30 April 2011

Mi ropuite Love Affairs

Mi tupawh hmangaihna tawng lo leh hmangaih nei lo kan awm àwm lo ve. Keini mi naràn mai pawh ni lovin khawvel huapa mi lâr leh ropuite hlei hlei hian asin lo kùrpui ni. Lungngaihna Ni awm lova Hmangaihna Ni (Valentines Day) a awm atang ringawt pawhin hmangaihna hian engtiang chiahin nge mihringte-ah bu a khuar kan hre thei ang.

Khawvela mihring piang tawh zînga mi pamham bera sawi, Russian dictator Joseph Stalin-a pawh kha he hmangaihna hian a chiah zawr hneh teh asin! Heti taka a nunràwnga a pamham mai hi a nupui hmangaih em em, Catherine Svanidje-i'n a thihsan hma vâng a ni e an ti.



Kum 1907-a a nupuiin a thihsan khan Stalin-a chuan, "Ka rilru ngaihtuahna lungtum ang maia khauh tinêm theitu awmchhun, ka hmangaih em em ka nupui ka chân a ni. Ka tâna he leilungina thil min pêk hlu ber a boral rualin ka mihringpuite ka hmangaihna leh khawngaihna zawng zawng a bo ta vek mai," a ti hial a ni.

Italy dictator, Benito Mussolini pawh kha nupui nei reng chunga hmangaih dang a neih avângin a buai viau asin. Amah avâng liau liauvin a nupui, Rachele leh a bialnu hmangaih em em, Petacci chu an inbauh chiam nia!

Benito Mussolini & Petacci
A bialnu Petacci hnênah, "He khawvel ram zauvah hian nang lo chu innghahna tur ka nei lo," tiin lehkha a thawn hial a. A nupui nen pawh an inthen phah nghe nghe a ni. Khatih lai khan helna leh indona avângin Italy ram chu a chiri hle a, Mussolini dinhmun pawh a hlauhthàwnawm hle. Chuti chung pawh chuan Petacci chuan, "A bula ka awm lai chiah hi ka nun lai a ni," tiin a dam chhûng hun tâwp chu a hmangaih bulah a hmang a. Mussolini an kahhlum dâwna a kalsan duh tlat loh avângin kahhlum a ni ve ta a ni.

Adolf Hitler, khawvelin, 'Hepa thinlungah hian hmangaihna chi fang khat pawh a awm lo ve,' a tih hial pawh kha chutiang a lo ni bîk hauh lo ni ngei tur a ni, a kalna apiangah a awmpuinu, Geli thlalak a keng thîn nia!

Ngaihzâwng tam tak a nei a, mahse, hetih lai hian a bialnu pakhat, Eva Braun nena an tâwpna chu Mussolini-te pahnih tâwp dân nen a inang hle. Eva Braun nena an inngaihzàwn lai khan Hitler-a khan Unity Mitfold te, Winifred Wagner te, Leni Liefenstall-te a kawp reng tho va. Hemi a hriat avângin Eva rilru nâ chu intihhlum tumin pistol-in a inkâp a, vànneihthlâk takin a dam chhuak leh hlauh zâwk a ni.


Chuti chung pawha mi dang a la kawp reng avângin intihhlum tumin damdawi a ei leh a, mahse, a thih hmain an chhanchhuak hman hlauh a ni. Hei hi a hriat rual rualin Hitler chu Eva an enkawlna clicnic chu panin a bulah, "Eva, ka va hloh teuh tehlul che em! Pathian hmingin hetiang hi ti tawh lul suh. I ai awh zo tumah an awm lo va, chân ngam tur chein ka huaisen tâwk lo a ni.." a ti hial a ni.

A hnu, April ni 30, 1945 khan Hitler leh Eva Braun chu thi-a chhar an ni.

Billy Graham-a pawhin chu'ng chu a pumpelh bîk hauh lo. Lehkha a zir laiin a hmangaih em em chu a hmangaihzia lantîr nan mi dangte inpêk thin aia mawi zâwk 'Pangpar Special' a lei a. Chu chu pêk a han tum nâk chuan a hmangaih chuan a lo la duh lo va, ani thinrim chuan a pangpar special chu kawngsir tuihâwk luankawrah a paih a, a thianpa Wendell chu hetiang hian lehkha a thawn nghâl a.

'Ka tâna arsi mawina zawng zawng a bo ta! Nun hlimna tur ka nei ta lo!' tiin.

A thianpa chuan Rom 8:28 - Tin, Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria' tih hmangin a theih ang tâwkin hnêm mah se, awmzia a nei lo kher mai. Hun rei tak chhûng chu Billy-a'n a hringnun chu hrehawm takin a hmanphah a, a pianthar hnuin, "Nula emaw, khawvel thil eng thil mahin Pathian a hliah tur a ni lo; thil dang zawng aiin Amah ka thlang thawh zâwk ang," tiin a chunga thil thleng chu a pawm thiam thei ta chauh a ni.

Ni khat chu Boston khawpuiah crusade nei turin a kal a. Crusade buaipuitute a chibai kual den den laiin hmeichhe pakhat a hmu tlat mai! Hmána pangpar special pêk a tum ngeia kha.

Chu veleh sawi tur hre lovin Billy-a chu chechâng lék lovin a ding ngawi reng a, a lungphute chu inthumrawn tlut tlutin a thlanfîm a tla, a a lu a hai muai muai thei hial a. Kum 12 kal taa amah hnâwltu a ni tih hriain a nupui, Ruth-i chuan chu nu chu a va hnaih a, a pasal kut vuan chungin, "Ka hmuh duhna a rei tawh asin. Pathian hnênah pasal duhthusàm ka neih theih nan ka tawngtai thîn a, nangman i lo hnâwl avângin ka dîl chu ka hmu ta a ni," a ti a. Chuta chin a nupui nen a hma aia hlim zâwkin hun an hmang thei ta a ni.

Radium hmuchhuaktu, Nobel Prize pawh tum hnih ngawt dawng tawh, Marie Curie pawh kha a bàng bîk lo. Tum khat phei chu, "He khawvelah hian ka tân khawvar a awm tawh lo," a ti hial a ni.

Kum 18 a nihin mi hausa chhûngkua, Szezuki inah a awm a, a awmna tlangval Casimir nen an inhmangaih ta a. Casimir chuan a nu leh pate hnênah neihah a dîl a, a nu leh pate chuan nungchang leh hmêla pawha mi iaiawm loh tak mah ni se, anni ang mi hausa chhûngkaw mo atan chuan Marie chu an lo sit deuh a ni ang, an remti ta lo va. A rilru a nat em avângin Marie chu chu in atangin a chhuak nghâl a, Soborne University-ah science zirin radioactivity a hmuhchhuah phah nghe nghe.

Nobel Prize lo chhuah chhan pawh hmeichhe pakhat vâng niin an sawi. Alfred Nobel-a'n dynamite a siamchhuah atangin sumdawng hausa leh industrialist ropui tak takte chuan bethain sum tam tak an pe a, thahnem fé chu a khâwl hman a ni. Nimahsela, tuman a private secretary nena an inngaihzàwn thu an hre lo va, an ring pha hek lo. Chu nu, Bertha-i chu nula fel tak niin tawng chi li lai a thiam a, Alfred-a nen an inhmangaih hle.

Ni khat chu Alfred leh Bertha chu Sweden khawpui Stockholm-ah King Oscar-II hmu turin an zin a. Chuta lal fapa Arthur-a'n Bertha hmêlthatna leh felna a'n hmuh chuan khaw dang a hawi thei ta lo! A duh em avângin kum 1876 June thla khan Arthur-a nupui ni turin Bertha chu an hruai ta a, Alfred-a tawrhna chu sawifiah thiam rual a ni lo.

Chuti chung pawh chuan Arthur leh Bertha inneih hnu kum 11 chhûng chu hmangaih lehkhathawn an inthawn reng tho va. A hnua a pasal nena Vienna an thlen tumin Alfred chuan pâ takin a lo mikhual a. An inhmuh veleh Bertha chuan, "He i dynamite hmuhchhuah hi râlthuam atana hmang lovin khawvel hmasàwn zêl theih nan a hman theih ang em?" tiin a zâwt a. Chu zawhna chu Alfred chuan a chhâng a ni ngei ang, kum 1893 January ni khat khan Bertha hnênah lehkha thawnin, a sum neih eng emaw zât chu khawvle hmasàwnna leh râlmuanna atana thawkte hnêna pêk a tum thu a ziak a, kum hnih hnuah a intiamna ang ngeiin khawvela chawimawina sáng ber, Nobel Prize chu pêkchhuah tan a ni ta a ni.

Bertha-i'n pasal a neihsan hnuin Alfred leh Vienna-a bank nghâktu, Sofie Hess nen an inngaizâwng leh a, he nu hi hmangaih lehkhathawn 216 ngawt a thawn hman!

Hmangaihna tak hi chu aw..!!!

29 April 2011

Lung A Lêng Êm Mai!

Mihringte hi khawvêla kan chàm chhûng hian mahni maiin kan awm thei lo va, chutah chuan thian hlutna a lo lang nghâl mai a. Mi tam tak chu kan hringnun zinkawngah hian thianah kan innghat a, kan engkima engkim an ni.

Kan hlaphuah thiam leh zaithiamte pawhin hla-ah an lo chawi vul chúk a, chu'ng hlate han nghaihthlâk veng veng hi chuan mitthlâ-ah thiante nena kan chêttlat lai te leh nunhluite kan dawnkîr vang vang thei nia! Chutiang hla tam tak zîngah, Pu F. Thanliana hla, 'Lung a lêng êm mai' tih, F. Laldinmawii'n thiam taka a sak hian min hneh ngawih ngawih a, ka beng hian a ri a hlat phal lo va, ka thinlungin a thlah phal hek lo.


Lenkàwl êng no riai, ka thlîr ning thei lo,
A lang tláng dum dûr saw, raltiang khûmin;
Lenrual hlimthlâ leh vânglaini liam hnu,
Thinlai tina an chang zo ta si maw..

Zîng nichhuak èng mawi tak maiin khawvêl a rawn chhhun èng a, romei paw chúk maite'n phaikuam leh hmun hniam lai an bawhte chu kalsanin khawvêl a lo thar sút a. Chumi ruala hràmthiam va tinréngina râwl an han chhuah tawh meuh hi chuan lunglênna chuan min rawn fan nghâl veng veng a, kan nunhlui mual liam  tate kan ngaihtuah chhuak leh uai uai thîn.

Kohkìr rual lohva kan nunhlui liam tawhte chuan ngaihtuahna a tithar a, thianzahova kan lo chêttlatna thin han hmuh ngat phei chuan sawi hleih theih lohvin suangtuahna lipuiah kan liluh nghâl veng veng thîn. Hmána hma lam hun pawh dâwn lék lova thiante nena làm kan thai laite kha mitthlâ-ah a tharin a lo lang leh uar uar a. Chu'ng kan nunhluite avângin a ngaiin kan kûr kan kûr ta mai a nih a hi.

Hawihkawm lenrual duh lêng zawngte kha,
A then an liam piallei thuah-riat kârah;
Nauang tah ka bâng lo,
Lung a lêng êm mai.

Naupan laia kan thiantha leh kawmngeih ber berte chuan nupui pasal nei tawhin thenkhat phei chuan an hringnun zinkawng zawh tâwpin mual min liamsan ta hial a. Hetiang hun hi a la thleng dâwn a ni tih pawh ngaihtuah pha lék lova kan hlimlai nite chuan hmánlai changin, duhthusàm mai lo chu inhnemna tur a awm tawh lo. Kan thenrual hlui ka tate avângin kan hmána sûlhnu hmuh hmaih rual lohte chu mittui titlatu mai an chang zo ta a nih hi!

Iang zo awm ang maw, tleitîr vânglaini,
An ngai ve ngei ang haiang tar hun chuan;
Nauang nui zâa kan hlimlai nite,
An ngai ve ngei ang rûn thim ruai hnuaiah.

Kan naupan lai hun kalsana nulät tlangvàl kan han hriat meuh chuan kan taksa, rilru ngaihtuahna chuan thil dangah min hruai a, engmah lungkham lék lova thiante nena kan nuihho dar dar lai te, kan ngaihzâwng leh duhtakte nena hlim taka kan inchhaih vel laite kha nghilh rual a ni lo. Kan damchhûng nunah kan tleirâwl chhuah lai nun tluka nuam leh thawveng hi awm tak ang maw? Tunge mahni vânglai nghilh phal tehlul ang ni?!

Tûna pitar putarte pawh hian an vânglai hun an chhuikìr neuh neuh thîn ngei ang. Chhûngkuaa kan inkhurbin hnuah pawh vânglai ngaihna rau chuan min la kiansan tak tak thei lo va, mahni tapchhak zâwl atangin kan hlimtualte chu mitthlâin kan hmukìr rauh rauh tawh mai thîn a ni.

Fam ta lo chu e, tawn leh ni herin,
Ânnêm biahthu hlànin, 'i dam thîn maw?
Nang ngaia kumsùl hmangral chhûng khan e,
A lêng vawng vawng,' tiin chàwnbân vuan e.

Hringnun rahbi chhiara pialrâl rûn sáng la kai ta lo chu lenrual hluite nena intawn leh ni a lo herchhuak leh nawlh thîn. Chutih hunah chuan hlim taka inkuah leh inpawm chungin, hun kal tate avângin thinlung hmunkhat puin suangtuahna ruam khatah kan lêng zâ thîn a nih hi. Hun rei tak inhmuh tawh loh hnua thian hluite nena intawn leh hian kan nunhluite chu kan hrechhuak uar uar lo thei lo va, thil sual kan lo tihho tawhte takngial pawhin lunghlui a tilêng vawng vawng thîn.

Chu'ng hunah chuan hnukulh teuhvin vânglai sawiin kan titi siam siam a, inhmuh loh kâra kan lo khawsak dânte sawiin, kan hma hun kal zêl turah duhsakna kan inhlàn tawn mawlh mawlh mai thîn a ni.

23 April 2011

Beidawnna tibeidawngtu mi ropuite

*Rocker ropui leh hlawhtling, Black Sabbath hotupa ni thin, Ozzy Osbourne hi mi hriat a hlawh hmain sa talhna hmunah a inhlawh thin.

*King of Rock n Roll an tih hial, Elvis Presley pawh a lar hma chuan truck driver mai a ni thin.

*Lemchangtu lar leh hlawhtling, khawvel hmeichhiate star rawn luai luai, Brat Pitt pawh hi a lar hmain nipui laia lungalhthei laihchhuahna khura warning sign petu-ah a tang thin.

*Th Beatles member leh an hlaphuahtu pakhat, Sir Paul McCartney pawh a lar hma chuan dawr hran hranah kal kualin bungrua a sem thin.

Sir Paul McCartney
*Rapper lar ber pawl ni mek, R. Kelly pawh hi mi hriat a hlawh hmain kawng sirah zaiin a inhlawh thin.


*Zaithiam lar, Sir Elton John pawh hian a lar hmain Mills Music tichhuaktute in tur thingpui a semsak thin.

*Zaithiam hmingthang, Ronan Keating pawh kha a naupan laiin a zaithiam loh em avangin an sikul choir atangin an ban daih.

*Khawvela basketballer ropui bera chhal ngam, Michael Jordan pawh hi High School a kal laiin an basketball team atangin an ban daih.

*British Prime Minister hmingthang, Sir Winston Churchill pawh kha khawvela University hmingthang ber ber pahnih, Oxford University leh Cambridge University-te chuan 'thu thiam lo' tiin an lo hnawtchhuak tawh.

*American lemziak thiam hmingthang, James Whistter pawh West Point-a lehkha a zir lai chuan chemistry-a a fail avangin an hnawtchhuak daih.

*Kum 1905 khan physics zirlai, Albert Einstein-a lehkha ziah chu University of Bern chuan, 'Awihawm loh leh suangtuahna mai mai' tiin an lo hnawlsak daih tawh.

*Sakhaw lama a ngaihdan a danglam em avangin John Bunyan-a chu Bedford taninah an khung a. Tanina a awm laiin Bible tih lohva khawvela kristian lehkhabu hralh hnem ber 'Kristian Vanram Kawngzawh' (The Pilgrim's Progress) chu a ziakchhuak ta a ni.

*Novel lar tak, 'Ironweed' pawh hi chhuah a nih hmain vawi 13 lai chhuah ngam lohva hnawl a ni tawh. A ziaktu, William Kennedy chuan a thuziah sa tam tak a khawl hman a, mahse, 'Ironweed' lar hma chuan tuma'n a thuziak an chhuahsak duh lo a ni.

*Dr. Seuss-a'n naupang thawnthu a buatsaih, 'And To Think That I Saw It On Mulbery Street' chu press 27 ngawtin an chhuahsak duh lo. A 28-na, Vomguard Press chuan an chhutsak hram a, a chhuah hnu rei lo te-ah copy maktaduai 6 lai an hralhchhuak nghal a ni.

*Lehkhabu ziaktu ropui, Dale Carnegie pawh khan kum 12 a nih hmain vawikhatmah car a hmu lo. Mahse, kum 46 mi a nih meuh chuan a hming hre lo an awm tawh lo.

*Editor hmingthang, Edward Bok-a chu Dutch naupang rethei tak, sikul kalna tur pawisa pawh nei zo lova inhlawhfa mai mai a ni thin a, office tirhkahah tangin kar khatah cheng 6 a hlawh thin.

*Kum 1802 khan 'Atlantic Monthly' chanchinbu-a an poetry editor chuan tlangval kum 28 mi, Robert Frost-a'n a poetry ziah chhuahsak tura a ngenna chu thawnkirin, "Kan chanchinbu phekah hian thu rorum lutuk tan hmun a awm lo ve," tiin a ziak a ni.

*Kum 1889 khan Rudyard Kipling chuan San Francisco Examine chanchinbu atangin, "Ka pu, saptawng i thiam hlawl lo niin kan hria a, a pawi kan ti khawp mai," tih thu a dawng.

*German tennis star, Boris Becker pawh hi tennis a khelh tirh chuan a thau avangin a thiante'n fiamthu thawh nan an hmang thin. Mahse, kum 17 mi a rawn nih chuan Wimbledon Tennis-a mipa champion thei naupangber a rawn ni ta.

*Khawvel mi hausa hmingthang, Andrew Carnegie pawh khan a tirah chuan darkar khata siki hlawhin hna a thawk thin.

*Mitdawivaih thiam hmingthang, Howard Thurston pawh hi a naupan lai chuan sikul a kal mumal ngai lo va, mi bawng chaw dahkhawmnaah a riak vel mai mai thin.

*General Motor-a Vice President ni thin leh motor amaha intihnun chawpna (self starter) siamchhuaktu, Charles Kettering pawh hi mi rethei tak, mi pawisa puk chawp reng renga khawsa thin a ni.

*NFL-a running back ni thin, Hershel Walker pawh hi Junior High School a kal lai chuan football khelh a duh thin a, mahse, an coach chuan, "I pate lutuk" tiin a lo hnawl thin. Mahse, beidawng lova a inzir tang tangin kum rei lo te hnuah 'Heisman Trophy' a dawng ta hial mai.

*Thu leh hla thiam hmingthang, John Milton pawh kha mitdel a ni.

*Concert violinist hmingthang, Itzhak Perlman kha a ngawng achin hnuai lam chu a zeng vek.

*Cartoonist leh humorist lar, James Thurber pawh kha mit tha lo a ni.

*Kum 1994-a Miss USA, Heather Whitestone pawh kha bengngawng a ni tlat.

*Cambridge University-a lecturer leh theoretical physicist ni bawk, lehkhabu lar tak 'A Brief History of Time' ziaktu, Stephen Hawkins kha Lou Gehrigs Disease (zeng chi khat) natna vei a ni.

*Lemchangthiam hmingthang, James Earl Jones kha kum 6-14 mi a nih lain beidawnthlak khawpin a dang a awk thin. Tunah chuan khawvela lemchangthiam hlawhtling berte zinga mi a ni der tawh.

*Olympic-a decathlon champion lo ni tawh, Rafer Johnson pawh kha kelek saa piang a ni.

Mi tumruh leh beidawng ngai lo, hlawhtlin hmaa bei tang tang thin mi tam tak an la awm. Thil theih loh hi a lo awm lo a ni.

22 April 2011

April Fiamthu

1. Bawnghnute a zuar ve a, fak dân tur a hre si lo. "Bawnghnute tui pawlh loh no. 1 khat cheng 10, pawlh loh tak tak 20," te a ti vel.

2. Doctor sum duh pawh khan a'n duh mai mai. Putar pakhat a inentir ve a. "Ka pu ka thawh thutin ka lu a hai thin a," a tia, doctor chuan, "Tho thut lo la ni mai alawm, khawi cheng 100!" a lo ti tih zawm zat..

3. Doctor: Ka postmortem pa pakhat pawh kha lo dam leh ta ang se, a mâwl tawh ngawt ang.
Tlangval: Ngatinge?
Doctor: A  kal-ah a thluak ka dah daih alawm.

4. Exam-naah khan a'n thiam àwm lo mai mai asin, a hmaa thu hnenah, "Min hrilh ve la, cheng 20 ka pe ang che," te a ti vel.


5. Khawvela mi zawng zawng hi kristian ni vek ila, piangthar vek ila, setana a hrilhhai âwm..!

6. Naupang pakhat pawh kha, "Pawl engzat nge i nih? an tia, "Pawl 7 tur ka nia, pawl 6 ka fail a, ka nawn," a ti zaih zel.

7. Naupang pakhat pawh kha an inkhâwmnaah, "Lazara nge mi hausa nih i duh?" an tia, naupang chuan, "Dam laia mi hausa, thih hnua Lazara," a lo ti zaih!

8. Rinzuala khan sakei kha a hmu hnai asin, "A hmuihmul pawh kha zo purun ang sung a ni," te a ti vel.

9. School naupang pakhat pawh kha class lak laiin kuhva a ei a, an sir-in, "Open your mouth," a tia, a tihngaihna hre lo chuan, "Ha ha ha!" a ti tawp!

10. Zu in mi pakhat pawh kha motor accident-naah khan a na lo pawlah a tang hlauh mai a, a rawn bai chhuak saih saih a, "Pathian-in zu in turin min la duh a nih hi!" a rawn ti heu mai!

11. Thleninpa -  Ka pu, eng nge i hming?
Mikhualpa - R. Beiseia. Nang eng nge i hming?
Thleninpa - Artalhtumlo-a.

Note: Hei hi misual.com-a mi nen a inang lo a nia.

15 April 2011

Nuih leh nuihza siamtu

Mihringte nui hi taksa mai ni lovin kan ngaihtuahna atanga lo chhuak a ni a. Eng emaw thil nuihzatthlâk kan tih tak kan hmuha kan ngaihthlâk hian kan nui a, kan nuih a tihzat chhan pawh a awm teuh ang. Kan kum azirin kan nuih tizatu pawh a lo dang zêl thîn.

A tlángpui thuin mihringte hian nuihzat chhan pahnih kan nei. Pakhat chu thil nung emaw, nung lo emaw awm dân leh chezia vâng a ni a, pakhat leha chu kan ri hriat te vâng a ni. Kan thluak hian chuti anga nuihzatthlâk kan hriat emaw, kan hmuh emaw te hi lo manin thluaka hriatna thazâmah a thawnchhâwng leh a, tichuan, kan lo nuichhuak ta thîn a ni.


Mak tak maiin mihringte nuihzatna hian hun hi a nei ve deuh roh va, chu chu ‘punctuation effect’ an ti a. Kan nuih tiza em emtu an han sawi zawh chiah hian za em em maiin kan nui thîn. Khawvela thil nung awm zawng zawng zînga nui thei awmchhun chu mihringte kan ni a; a tlángpui thuin puitling hi ni khatah vawi 17 zêl nui ang an ni.

Nuih hian mihring taksa a tihrisêl thei hle. Nuih hian thil nin ngawih ngawihna (stress hormons) a tihziaawm theih bâkah damlohna nasa tak lo awm mai thei tur pawh a vêng thei bawk. Nuih hian blood pressure a tihniam a, thisen zâma oxygen awm a tipung thei bawk.

Mi tam takina kan hriat lohva chu, nuih hi insawizawina (physical fitness) chi khat a ni tih hi. Mithiamte chuan vawi 100 nuih leh hah taka minute 15 chhûng insawizawi hi a that dân a inang chiah a ni an ti. Kan nuih hian kan àwma thahrui awm te, kan nâka thahrui awm te, hmaia thahrui awm te,  ke leh hnungzânga tha zawng zawngte chu an tang vek a, chu chu exercise tha lutuk a lo tling ve tlat mai!

A pawimawh bera chu, nuih hian rilru hahdamna a thlen hi a ni. Rilru tâwt up up, thinurna, hlauhthàwnna, lungngaihnate hian mihringte hrisêlna  a tichhe thei a, chu'ng zawng zawngte chu kan nuih hian kan ngaihtuahna atangin a labo vek thei a ni.

Chu vângin nuih hi a hrisèl a, nuihza siamtute hi zah hliah hliah tur kan ni. Mizote hian fiamthu thiamte en dân kan la thiam lo hle a, zir tur pawh kan la ngah khawp mai. Khawlaia mi lo chhaih nawmnah chîng leh lo nuihsawh vêl te kan la chìn chhûng chuan hnam hrisçl kan ni hauh lo vang le..

09 April 2011

Riang

Lungngaia rûm
Lungchhiaa insûm
Lungawi lova tûm chu

Thlarau rethei leh riangvai
Thlantui fîmin a bual leh a hual
Thinlung baihvai leh beidawng chu

Sianga riang tura piang
Nun hlimna zawnga ûmtu
Nung tura thih hreh tlat chu

An zalh ta e
Piallei daiah

Awm lo atâ lo awmin
Awm atâ a awm ta lo

05 April 2011

Mizoram Kutdawh

Aizawl-a awm chuan kan hre vek ang a, kutdawh an lo tam tâk zia hi. Anni ka hmuh hian ka ngaihtuahna hi a kalthui thîn khawp mai. Hmânlai kan pi leh pute khân Mizoram-ah kutdawh an awm tih rawn hmu ta sela, mak an ti ngawtin ka ring.

A tlângpuiin kutdawh kan tih hi mitdel an ni hlawm a. Kawng sirah bâwm dahin an zai mai thîn. Tumah pe turin an dîl lui lo. A thlâwna pawisa hmuh aiin an thiam ang tâwkin an zai mai a. A nihna taka sawi chuan zaia inhlawh an ni. Nilêngin an zai a, chu chu an ei bêl ber a ni. Thenkhat erawh chu dâwr hrang hranga lût kual thîn an ni a, he'ng ho hi pawisa pe lova chhuahtîr a zahthlâk thîn a, kawng sîra thu ai chuan an hmuhchhuah hnem ka ring thîn.


Thenkhat chu nupui fanau neia chhûngkua din tawhte an ni. An kutdawh atangin nupui fanau an châwm thîn. Chhûngkaw châwmna khawp an la hlawhchhuak thei hian kan la chhiat loh zia a tilang. An zînga thenkhat chuan inah TV an hûng a, mobile phone-te pawh an hûm ve. He'ngte hi an kutdawh atanga an hlawhchhuah a ni a, mawi lo pawh kan ti mai thei. Mahse, an mamawh ve miau a!

Tanpuitute hian zaithiam an tih avânga tanpui an nih ka ring lo va, anmahnia khawngaihna leh lainatna infawkkhâwm atanga lo chhuak a nih zâwk ka ring. Thenkhat erawh chuan pawisa thleng nawi nan an hmang mai thîn. Cheng 10 an thlâk a, cheng 5 an la mai. Hei hi mitthi râl tum, cheng 100 pêk paha, "Cheng 50 min lo kîr r'u.." tih nen thuhmunah ka ngai. Mahse, tuimal far te tein tuipui a siam thîn bawk si a le!

Kan khawpuiah ngei hian vai tam tak kutdawh an lo awm ta! Hei hian ngaihtuah a tithui ka ti. Mizo-ah pawh kan intodelh tâwk tawh tehrëng nen. A zak thei lo lo-ah an la tang zui a. Bazar lûn laiah an thu a, mi kawng kal lai an pawt buai a, pêk loh zahthlâk takin mi an siam thîn. He'ngte hi kutdawh hnawksak an ni; kan mamawh lo.

Mahni duhthu ngeia kut dawh an awm ka ring lo. An zak ve thîn tho. An hah a, an chau ve thei. An inthlahrung a, rilru nat an hre ve tho. Chu vângin kan tanpui loh pawhin i hmusit kher lo ang u. Tanpui ngaite tanpui hi kan tân awmhmun missionary a ni.

Pe rawh u, tichuan pêkin in awm ang.