19 February 2015

Chutih hunah chuan

'Lei' țawngkam ka hman țih hunah...
'Dawr' awmna ka hriat loh der fo hunah...
'Pawisa'-in mi tihmangan takzet hunah...

'Changkanna' a zuan dawr dawr hunah...

'Mamawh' ka haider theih loh hunah...
'Țha lo' ka hmuh țhat tlat hunah...

'Rualawhna'-in mi rûn nasat hunah...
'Rûm râwl' a bengchhen viau hunah...


'Retheihna'-in mi zuam em em hunah...

'Nunhlui'-in mi tihlungngaih hunah...
'Beiseina' ka hloh der hunah...
'Khawvel' hnawksak ka tih hunah...


Thih ngama nâ ka lo ni tawh ang.

16 February 2015

Hunah

Min hmangaihtute an kal bo hunah,
Hmangaihtu kan nih ve a țul tawh ang.

Khawvel hi bengchheng kan tih hunah,
Kan nun a reh tlawk tlawk tawh ang.


Hma lam beiseina a thamral hunah,
Hnung lam inchhîrna a lang tawh ang.


Khawvel thil vanga lung a lên fo hunah,
Mittui khawhar a luang fo tawh ang.


Min hual veltute an kal bo hunah,
Lei hi hmun khawhar mai a ni tawh ang.


Ruh chuktuahte a lo mawih hunah,
Engkimin min phatsan tawh ang.

04 February 2015

Mipa leh hmeichhia

Mipa leh hmeichhe zin dun tur chuan bag lian tawk an ak ve ve a, an bawr dun hle. Mipa chuan, "I bag ka lo ahsak ang che," a ti a, a ahsak a. Mipa chu a bawr bik ta hle mai a, hmeichhia erawh chuan engmah a ak ta lo. Hei hi a ni, mipa leh hmeichhia chu.

Mipa leh hmeichhia chu restaurant-ah an chawl dun a. Mipa chu second hand dress, hmeichhia erawh readymade. Ei man pek a hun a, mipa chuan, "Ka lo pek kep ang che," a ti a, a pek kep ta a. An puar ve ve a, mipa erawhin a chawi ta. Hei hi a ni, mipa leh hmeichhia chu.

Mipa leh hmeichhia hi kawng sirah kein an kal dun a, kawngpuiah motor a tlan zut zut a. An pahnih chuan nunna pakhat ve ve an nei. Mipa chuan, "He lamah kal rawh," tiin hmeichhia chu motor hlat lamah a kaltir a, ani motor hnaih lamah. Hei hi a ni, mipa leh hmeichhia chu.

Mipa leh hmeichhia hi an inkawm țhin a. Bazar an hlat dan pawh a inang reng. Mipain hmeichhia chu bazar turin a sawm a, hmeichhia a hman loh avangin an țhulh. Ni dangah hmeichhiain mipa chu bazarpui turin a sawm a, an kal mai a ni. Hei hi a ni, mipa leh hmeichhia chu.

Mipa leh hmeichhia hi ruaițhehnaah an kal a, an ei țeuh dawn nghe nghe. Tukțhuan bak an la ei lo, tin, chaw an chang ve ve dawn tih an hre chiang em em tho, mahse, mipa chuan, "Intlar hmasa rawh," a ti a, a din hmasaktir ta. Hei hi a ni, mipa leh hmeichhia chu.

Mipa leh hmeichhia hi an inngaizawng a, nitin an inbe ziah. Inngaizawng an ni a, an inhmangaih tawn hle. Phone an nei ve ve a, chawmhlawm an ni ve ve. Mipain a be ziah a; mahse, țum khat chu a biak loh avangin hmeichhia chu a titau ta tlat. Hei hi a ni, mipa leh hmeichhia chu.

Hei vang hian a ni ang, mipain hmeichhia hnenah, "Lo haw rawh, ka thinlungah in i nei e," a tih a tih țhin ni!