13 November 2010

Puii Zûn

Ka thianpa nena kan lènna in atanga kan chhuak chiah chuan no hriat ngai loh atangin phone call ka dawng a. Ka han pick up chuan hmâna ka chawlh hahdamna thin, Puii a lo ni reng mai. Kan inbiak khât deuh tawh avângin a aw atangin ka hre chhuak mai thei lo va, insawi chunga a han nuih tâk har harah chuan hai rual a ni leh si lo!

Puii hi a mak angreng. SMS pawh reply lêm lovin a reh vang vang a, a hnuah mi rawn call leh khut hi a chîng a. Tûn tumah pawh chuti ang ni turah ka lo ngai a; a rawn nui leh awr awr a, mahse, a ni lo.

"December ni khatah pasal ka nei dâwn a, chu chu ka rawn hrilh che a.. I theih chuan lo kal rawh aw..”

A dàn a dang ta! Ka lo beisei loh lam daih a ni.


“E khai! A va làwmawm ve.. Lo kal ngei ka tum dâwn nia..” ka ti chuai raih a.

“Mahse, ka buaipui hman lutuk dâwn lo che a.. Kan inah i thleng ang a, hrehawm i ti lo vang..”

A pasal tur chu keimah ang rual vel tho a nih thu te, amah nena kan inkawm chhoh tan dân thlengin kan sawi chho va, kal ngei tur chuan kan inhmin thei ta a... Mahse, ka lung a va lêng si êm!

Kum hnih ngawt chu kan inkâwm tawh. Engtin tin emaw ni kan inbe tan a, hmêl inhmu lovin hun rei tak kan inkâwm chho va. Aman min hre mah se, keiman ka hre lêm lo. A hnuah an khuaa ka thianpa awm chu a chanchin ka zâwt a, nuthlawi hmêltha leh fel tak, lerh deuh har a nih thu min hrilh ta a!

Mahse, ngaihzâwng angin kan inen lo, kan inkâwm ngeih em em ringawt. Kum hnih chhûng chu kan inkâwm tawh a, chumi chhûng chuan a hmêl chu ‘vuai’ chauhvin ka hmu; ka thianpain a chhe lo a tih kha thudik a ni tih chu ka finfiah hman tho va.

Ka vei ngai lo; ka ngai thîn. A hmêl vâng a ni lo; a ngainatawm vâng a ni. Min bia a, a nui har har a, a tawng siam siam a, a bula awm ang chiahin min siam thiam thîn. Chu chu a ni, ka ngainat em emna chhan chu.

Hmânah pawh phone-a kan inbiak laiin ka tap vak tawh! Ka bialnu nena kan harsatna ka hrilh a, min hnêm a, ka lung a chhe thut a, ka tap ta teuh va! Chuta ‘Nuam ka ti bîk lo a nia..’ a tih ri kha, chu, a rawn ri nawn leh ta!

Kan inngaizâwng a ni lo; mahse, pasal a han neih dâwn meuh chuan ka rilru hian a lo pawm awzâwng lo mai a lo ni.

A pasal neih tur thu ka hriat zân chuan lawmpuina ai mahin rilru natna chuan min tuam hneh a, hrehawm ka ti kher mai. A châng leh, ‘inngaizâwng pawh ni hawt si lo’ tiin ka inhnèm leh rih a; mahse, chuti mai a ni lo. Chu ka rilru natna chuan kawng engkimah tlâkhniam lam min pantîr a, mahse, chumi ngawl ka vei tlat si. A va na êm!

“Tûnah chuan hmána ka koh dân chea ka koh che a rem tawh lo va, tu dang mah mitmei vêng lova kan inkawm thinna hun kha a lo tâwp dâwn ta a ni. Theih ni se, hmána hlimna min pêk avânga thi si lo dam si lova awm leh ka duh a, ka lungngaihna min tâwmpui avânga pangchang taka mittui ka hrûkna kut ngeia lâwmna mittui nûl ka duh a ni. Mahse, a va harsa si êm! Lo lâwm ta pawh ni teh rèng ila, hmána ka lâwmna nena tehkhin rual a ni tawh si lo..” tia SMS thawnin ka thlah ta a ni.

A hmaa ka phone book-a a chung ber luahtu chuan min chhuahsan ta.

Ka intiamna anga a pasal neih nia lan erawh ka tum tlang ngam ta lo a ni.
Share:

13 comments:

  1. A ngaihnawm hle mai. Tunlai chu mobile leh technology thar mila thawnthu tawi ziah a awm ta nuala a ngaihnawm viau zel bawk.
    I thlukna leh punctuation mark ho i hmang fimkhur leh dik khi he thutawi hlutna pakhat a ni.

    ReplyDelete
  2. Nula tlangval inthianna hi nupui-pasal inneihna hian a titawp hmak duh khawp mai. Puii hi ngaihzawng angin i en lo na a, i chhungril erawh chuan a ngaizawng chiang khawp mai. Thian angin in inkawm a, in innel khawp mai, chu in inthianna chu a pasal neihna chuan kumkhua atan a sat chat hmak tawh dawn.

    I thawnthu tawi ziak ang deuh hian kan chhungrila kan hmangaih ber hi kan hmangaih ani tih kan hai fo thin. A saseh a lo thlen meuh chuan a tlai tawh lutuk si thin.

    ReplyDelete
  3. Nizana chawplehchilh deuhva ka ziah a nia, nakinah ka la chulmam leh ang. Ka ziah duh tam tak ka la ziak lo!

    @Xingibera & caribou: Ka lawm lutuk e.

    Ni e, ka lo hmangaih hman a ni ngei ang. Ka phone book-ah pawh a chung ber luahtu ngat kha a nia!

    ReplyDelete
  4. hetiang hunah hi chuan kal ngei tur, runluih (?) nan chaw pawh ei treuh tur :D

    ReplyDelete
  5. Dawldanga chuh, i han ti ngawt tak na a, kal a harsa duh ve fu law'ng maw? Mr TSA thu ziak hi tak tak anih vei chuan leh.... chan ropui dawn khawp mai.

    ReplyDelete
  6. @caribou, tak tak a ni hrim hrim. TSA comment khi chhiar chiang teh.. A phone book chung ber luah tu a nih khi. A hming bul pawh 'A' atang intan a nih loh pawn 'AA' tal a ni ta ve ang...

    Damlai lusun chu kan awm chiang a ni tunlai chu.. A parawl lehnghal a ka ngaituah riau a nia.

    ReplyDelete
  7. TSA hi enge maw ti tala ral a ngai dawn anih hmel khawp mai. A kawmngeih ber leh a hmangaih berin pasal a neihsan dawn ani si a le......hrilh a hai duh awm mang e.

    A huntawng zawng zawng te kha nunhlui an chang zo tawh ang a, "Kei zawng i tan ka tling zo ve mawlh si lo, aw Di, ka tawnah hian lam ang let in min pawm leh rawh. Khuandimin khiangawi mah la e, Puii, thinlai rukah i cham reng dawn si. Aw kohkir theih ka nuam ngei e, kan nunhlui zawngte kha," tih vawng vawng a ngai dawn ta ani maw. Tawnmang lamah bak a tangnem ah a kuahin a bahsam nel thiap te kha a chul sak thei tawh awm si lo va. SMS sweet tak tak pawh a dawng khat raih tawh dawn anih hi le.Ka tuarpui khawp mai.

    ReplyDelete
  8. Blog i lo nei changtlun hle mai. Zun a uai hrim hrim hi a nuam-hrehawm dangdai ka ti. Thu hi inthiam ngawt bik thin mai.

    ReplyDelete
  9. Hehehe.. Ka lawm e.

    Ka phone book-a ka save dan chu '7.9' ti ngatin a nia. A pianni leh thla. A chung ber luah lo thei a ni lo!

    ReplyDelete
  10. A that nasat hi. Misual-ah khan ka chhiar tawh, Han bei fat fat teh le?

    ReplyDelete
  11. @ruaruatapa: Phu loh fakna nen i rawn lenglut a, ka lawm lutuk e.

    ReplyDelete
  12. E khai!!!! Kei pawh Puii bawk ka chan dawn tlat. Puii, i sawi anga fel leh ka duh ngawih ngawih.... Tsa hi, mi tih nuih leh mi velh i thiam dan a in ang chiah.

    ReplyDelete
  13. Hehehe.. @Mpa: Ka lawm lutuk e. Mi i fak khawlo zo ang e aw..!

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers