03 December 2010

My diary in 1st December

Ka muhîl thei lo, ka let ka let a. Ka ngaihtuahna chu kum 3 dâwn kal ta chhûngah a chêng vêl a ni. A tâwpah chuan ka phone number chuamah he thu hi ka thawn ta tawp mai..
12:00am – “I la muthilh ka ring lo! Rawn biak che ka châk hle mai; mahse, ka ngam ta ngang lo a ni. Tûn atanga darkar 10 vêlah chuan Biakinah hlim takin i awm tawh ang. Ka mitthlâin ka hmu a, kum 3 dâwn kan inkawm chhûnga ka lawmpuina leh duhsakna thu hlan zawng zawng che aia thûk leh ril leh sâng, keimaha awm zawng zawng chu i tân leh in pa tân ka rawn hlân e. Ka khua a va har ve aw.. Khawvêlah ka mal leh ta ngawih ngawih mai. Lawmpuina leh khawharna inpawlh avânga tah vak vak ka va châk tehlul êm! I aiawha ka tâna ding thei an awm ngai tawh lo vang.”


Nakin lawka thil thleng tur chu mitthlâin ka hmu a; kan duhthu sâm ang chu mi dangin an lo luah leh thîn a, mahni kan bo leh mai thîn..
02:00am“Tûn atanga darkar 8 vêlah chuan Biakinah hlim takin i awm tawh ang. Kan tâna duhthu sàm emaw kan intih laiin mi dang tân a lo ni zâwk thîn si a.”

SMS han thawn tlut tlut tâk mai chu ka inthlahrung rilru hle a, thil tha lo zâwk a thlen palh pawh ka hlau hle a; mahse, hun ka neih tlêm tawh zia ka hre ve kar si..
02:20am“Tûn lo chu zalên taka SMS thawn theihna  hun che ka nei tawh dâwn si lo va, chu vângin rûnlum nuthai i chan hma hun tlêmtê tal hi chu min hriatthiam nan a man a to lua lo vang chu maw..”

Kei, mi khawhar leh lungngai thei hian a êng zâwnga thil thlîr ka thiam loh thin avângin nasa takin ka intina lui niin ka hria a, rethei ngawih ngawih niin ka inhriat phah ta hial a..
02:30am“A êng zâwng aia a thim zâwnga thil thlîr nuam ti mi ka ni tih i hriat  kha, mi dem lutuk bîk lo vang chu maw.. Engti fakauva nasain nge ka rilru hi a lo retheih  tâk mai le?”

Ka inthiam chawp leh rih thîn. Ka tâna a hlut zia chu ka mitthla leh rilru hian a theihnghilh thei si lo. Ka tawrhna hi keima hma chiah ka ngaihtuah vâng a ni tih ka hriatchian êm avângin ka insit em em a, minungte zînga hnahthel lêng vêl mai mai niin ka inhre ta ber a..
02:50am“Ka hlim ni-a min hlimpuia ka hlim avânga hlim thei, lungngaih ni-a min tawrhpuia ka lungngaih avânga lungngai thei hi nang lo chu ka tawng tawh dâwn si lo. Hei hian min tilungngai êm a ni. Mahni hmasial mi tak ka nih avângin in hlimna tur ai mahin ka hrehawmna tur chuan min luah hneh a, in hma lam hun ai mahin ka hma lam hun ka thlîr tlat si. Mihring pawh ka nih tâk hrep loh hi.”

Mi pakhat avânga nâ ka ni. Ka duhthusâm tam tak chu amahah a tâwp thîn. A hmaa ka duhthusâm te chuan rilru hlimna min pe thîn a, mahse, chu chuan natna atà nat lehzualna min thlen a lo ni reng mai.. 
03:20am“Nangmah avângin mumang ramah ka lo chêng ve tawh thîn a, nangmah avâng vêkin pangchang takin ka lo awm tawh thîn. Tûnah nangmah avângin lâwm tak chungin ka lungngai mêk a ni.”

A inbox hnawk tur zia ka ngaihtuah a! Ka thil tihin awmzia a nei lo va, a nei a nih pawhin a chhe lam bâk engmah thlen a nei dâwn lo tih hriain, an hma lam hun tur leh an chhûngkuaa hlim taka an la khawsaho tur chu ngaihtuah chung zêlin ka mangtha ta a ni.. Ni e, ka mangtha ta..!
03:40am“Ka SMS zawng zawng hi lo delete nghauh nghauh mai rawh aw..! I pasal neih hmaa ka SMS tâwpna ber atan.. – Ka rilru chhûngril ber atanga lo chhuak thian hmangaihna dik tak hmangin duhsakna sâng thei tâwp ka hlân a che. Hlim taka inneiin nupa inlungrual tak in nih ka duh a, fanau maltluan chawi dûnin inhmangaih tawn takin damchhûng ni in chhiar liam dâwn nia. Hmar arsi chu ding takin êng rawh se. Kei erawh chuan hriatreng ka hlawh tawh lo vang.
Mangtha..
Ni e, mangtha mawlh mawlh..”

Share:

9 comments:

  1. Puii zun chhunzawmna a nih duh hmel ka ti? Thu leh hla hi chu i thiam reuh a lawm le nangte hi. I naupanna tumahin ngainep suh se.

    ReplyDelete
  2. Ka va khawngaih, che u! In pahnih te khan. Thil ni thei awm tak tak hi i rawn phuahchhuak thiam riau mai Ku TSa hi.

    ...khrum

    ReplyDelete
  3. Comment ve lo thei ka ni lo. "I bialnu leh kan veng tlangval ruihtheih thil tih ching ***** kha an inru a, lo lungngai duh hran lem suh," tih thuziak lehkathawn dawn nen khan tun ami hi a mi den a inang thuak ang ka ring.

    Puii chu aw.... a va uiawm dawnin ava ngaihawm dawn tak em. Puii, i hlimna ni tur khawfing chat kha Ts-a tan chuan lungngaih chhumpui lo thlentu mai a ni. I hlimna dar rimawi kha, atan chhingmittui luantirtu ania sin. Hlim taka i duhlai tang i belh lai khan kumkhua atan a hmangaih ber a chan ta.

    ReplyDelete
  4. In zavaia chungah ka lawm e! Sawi tur dag ka hre lo. :-(
    Puii, i hlimna ni tur khawfing chat kha Ts-a tan chuan lungngaih chhumpui lo thlentu mai a ni. I hlimna dar rimawi kha, atan chhingmittui luantirtu ania sin. Hlim taka i duhlai tang i belh lai khan kumkhua atan a hmangaih ber a chan ta.

    ReplyDelete
  5. Ts, ka van khawmgaih reuh che em awww! mahse.... mahse.... Pathianin Puii anga tha thian rinawm leh fel a pe lovang che tih tunge sawi thei? ;-)

    ReplyDelete
  6. Va ziak thiam lawi si ve, a mood-ah min hruai lut, tak tak te pawh ni a mawi a nih hi.

    ReplyDelete
  7. Hehehe.. Triplestar: Ka lawm e. Mi dang tan chuan mood-a inluhtir chu a har duh ngawt ang!

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Powered by Blogger.

Ka luh ṭhinna

Followers