08 January 2011

ICU Hmangaihna

Ka thianpa Sangtea hi mi nun zuai tak leh ti thawt thawt lo hi a ni a, rual a pawl tam lo bawk. Amaherawhchu, facebook tih vel a rawn lar chho va, chutah chuan a hun tam tak hmangin thian eng emaw zat a chhar thar phah nghe nghe a.

Chu'ng a thian chhar thar zinga pakhat chu Kimkimi niin Aizawl Civil Hospital-ah ICU room bika duty thin a ni nghe nghe a. An la inhmu lem lo va, mahse, facebook vela an inkawmna atangin an inkawm ngeihin an inngaina hle thung.

Zankhat chu a thiannu Kimkim chuan ICU-a a night dawn zanin leng turin a sawm a. Hmun leh hmuna la inhmu ngai lo a nih avangin Sangtea pawh chuan a 'aw' ve ta a. Zanah chuan an han inhmu ta ngei a. Kimkimi chu nula ngainatawm tak a lo ni a. A lo ngainat sa em avangin Sangtea rilru pawh a luah nghal hle nghe nghe a ni.

Rei vak lo a len hnu chuan Sangtea pawh a tin ta a. Kawngka a chhuah rualin Kimkimi dawn turin message, "A mak khawp mai, ka ngai nghal veng veng che maw le.." tih chu a thawn nghal zat a. Beiseina sang tak nei chunga a haw lai chuan Kimkimi message a rawn thleng a.
"Sangte, a pawi ka ti khawp mai, ka lo hrilh hmasa lo che a ni; ngaihzawng nghet ka nei tawh a..'

Bel chhunga sa emaw a tih kha mi dang ta a lo ni reng mai! Sangtea chu a rilru a na em em a, kawng pawh en mang hlei lovin a kal chhat chhat a, a mobile phone chu a pawm vawng vawng a. Chutih lai chuan motor a rawn ri tuarh a, phone a tla per chhak a, Sangtea chu a let hlawl mai. Motor-in a su a nih chu!

Damdawiin-ah bawk tlanpui leh a ni a. Casualty-ah theihtawpa enkawl nghal a ni. A hliam a nat em avangin chhuah pawh a chhuak thei lo va, that lam lah a pan thei hek lo. Accident a tawhnaa a phone thlauh chu a uksak theih tak loh avangin a phone a chân a, Kimkimi nen pawha an inbiak theih tak loh avangin damdawiin-a a awm thu hi Kimkimi pawh hian a hre lo reng reng a ni.

Chutianga kar khat lai casualty-a a awm hnu chuan that lam a pan theih takloh avangin damlo na zual dahna, ICU-a enkawlna tha zawk dawng turin sawn a ni ta!

ICU-a a riah tan zan chu Kimkimi duty zan ni lo mah se, a duty-te'n a chanchin an hrilh avangin Kimkimi pawh chuan Sangtea ICU awm thu a hre ta nghal a. A tuk khua a var veleh ICU-ah chuan a han tlanchho va. Chutah chuan Sangtea, nikhaw hre lova lo let reng chu a han hmu ta a ni.

A rilru chu chhun ang zawkin a na a, an inhmuh hmasak ber zan a haw kha in a la thleng lo tih hre phei sela chu a na leh zual ngei ang.

ICU-ah chuan Sangtea chu theihtawpin enkawl mah se, a zual zel a. A tawpah chuan chhan theih a ni ta lo.

ICU atangin an inhmu tan a, ICU-ah vek an inhmuh tawpna hun a lo thleng ta a ni.
Share:

10 comments:

  1. TSA chuh, thawnthu tawi ziak i va lo thiam em em ve le. A ngaihnawm khawp mai. Duh ai chuan a tawi mah mah ka ti, mahse, a ziaktu thu thu a ni si. I duh phawt chuan Sangtea thi tawh hnu pawh hi i ziak dam leh thei tho bawk.

    Facebook te, misual.com atang tein thian tha tak tak kan inchhar in, thian tha kan insiam thin, a lawmawm khawp mai. Kan nihna diktak kan thup ru thin tih hi thudik anih zia he thawnthu hian min zirtir a, a tha khawp mai.

    ReplyDelete
  2. @Pu Cari: Ka thuziak fahrah te te min lo chhiarsak zat zat a, ka lawm lutuk e. Ni e, kei pawhin duh aiin a tawi ka ti a, mahse, ka ziah sei chuan a hlutna tipung lovin ka tikiam zawk ang tih ka hlau bawk si a!

    ReplyDelete
  3. @Pu Seki: Rapthlak tak a ni! Hahaha.

    ReplyDelete
  4. Short story ziah hi chu i englo thenna lam tak a nih dawn hi. I story behchhan tur pic i han telh te hian a tihlu zualin ka hria. Heta tan hian a hranpa ngata i laktir a ni hial lo maw :-)

    ReplyDelete
  5. Haha! Triple, ka lâwm e. Aizawl Civil Hospital ICU thlalak tak tak a nia, a hranpaa lak phei chu a ni chuang lo! ;-)

    ReplyDelete
  6. Thil ni ve thei tak tak chu a nih hi a hehehe. I ziak tha khawp mai. Ka chhiar peih zawng tak a ni ve tlat mai ;)

    ReplyDelete
  7. @Dawldanga: Ni thei tak tak ang chu mawle..! :D Min chhiarsak avangin ka lawm e.

    ReplyDelete
  8. Ka nupui nen kan chhiar a, ngaihnawm khawp mai. Han ziak zel teh khai

    ReplyDelete
  9. @Pu Duhawma: In nu nena keia thuziak tehlul min lo chhiarsak avângin ka lâwm hle mai. I mi fuihna pawhin min tiphûr e!

    I rawn lènluh avângin ka lâwm em em bawk e.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers