10 January 2011

Kumthar hmachhawp

Mite chuan huaisen takin kumthar thutiam an nei ngam a, kei ve zawngin ka ngam thlâwt lo; hmachhawp ka nei ve ngam táwk zâwk a nih hi! Hetia ziaka dah hian tumruhna tak tak min neihtîr ve a, ka'n dahtha ve mai mai ang e.
1. Lehkhabu ziah: Hei hi kumin atana ka hmachhawp lian ber a ni. Nikum hmasa-ah khan 'Hmangaihna Tuboh' tih lehkhabu chu ka lo ziak tawh a, mite'n min ngaihhlutsak ve thova ka hriat avangin hei hian min tiphur hle. Nikumah ka buai phelèn em avangin ka ziak thei ta lo va, kuminah chuan engle khawle, puitlin ngei ka tum. A chhuah lam erawh Pathian thu thu a ni a, chhuah theihin han awm phawt sela, kawng a awm ve zel mai turah ka ngai. Tunah ka ziak tan bek bek e.

2. Computer neih: Hei hian ka nuih a tiza zawk! Kum thum lai neih ka lo tum ve tawh a, mahse, a leina tur ka neih miau loh avangin awmzia a awm lem hlei law! Kan han hmang thang a, hnathawh nan leh thil dang atan a tangkai zia ka hre pawh ting a, rual min awhtirtu a ni ta tlat mai. Kuminah pawh a ngai tein han tum leh rin ran ila, neih theih ngei ka tum tawh! A theih ngang loh chuan kumthar dangah ka sawn leh mai ang!

3. A tam thei ang ber inkhawm: Mi dang tan chuan thil nuihzatthlak a nih ka ring. Zep lohvah chuan nikum khan ka inkhawm mang miah lo va, nun a tinguai riau mai a. Veng chhungah leh thenawm khawveng hrim hrimah ka ti dak mai bawk a, a hrehawm tlat. Kuminah chuan inkhawm hram hram ka tum tawh a, a vawikhat nan hming ka ziak ve ta! Kumin chu veng chhungah pawh inthlahrung lutuka ka awm loh phah ngei pawh ka beisei ve ta e!

4. Thu leh hla lama theihtawp chhuah: Ka lo tui ve ting tang tawh a, bansan theih a ni lo. Kum 2005 atangin thu ziak tanin, daily velah ka ziak thin a, 'Vanglaini' velah ka thuziah a nawi a nawiin a awm tam ve thin khawp mai! Ka ziak zel a, daily lama ziah chu bansanin magazine lamah ka tuan ta a, a zat chiah ka hre tawh lo nain ka ziak ve ta fe mai. Chu'ngte bakah keima thehluh ni lem lova misual.com-a ka ziah leh heta ka ziah lachhawnga an chhuah a awm nual. Min dila min dil lem lo an ni nawk mai. Ka blog-a mi chhuahchhawn ka hriat theih te chu 'My Diary in 1st December' tih te, 'Lungngaihna phêna lâwmna' tih te, 'Mipa leh Hmeichhia' tih te, 'Pari Zûn' tih te an ni hlawm a; keima thehluha chhuah te pawh a awm ve nual. Tin, daily lamah 'The Zozam Times' chuan blog-a mi eng emaw zat a lo chhuah tawh bawk. (ka'n insawithei lawk a nih hi!!!)

Thiam lem lo, insitna chang hre chuang si lovin thu hi ka ziak thin a, ka tui nek mai. Kuta ziah erawh ka thei tawh thak lo! Kuminah pawh a tam thei ang ber ziah leh ka tum a, chu'ngte chu misual.com lamah leh magazine chi hrang hrang bakah, blog-ah hian dah zel ka tum a ni.

5. Hmasawn: Kei hi mi chapo tak mai ka ni; zia anga a awm tawh chuan chapo hi sim hleih theih pawh a ni lo. Vawi tam tak chu paih ka lo tum tawh a, a harsa khawp mai. Kuminah pawh theihtawpin ka'n tum leh ang e. Khawngaihna ngah tak niin ka inhre ve a, mahse, chu chu mi dangte'n a hlawkna an tel mang lo. Mi dangte tana malsawmna nih te pawh ka châk em em thin; ka ni hleithei lo tih pawh ka hria a. Kuminah erawh chuan theihtawp ka'n chhuah ang a, mite'n ka nunah zir tur an hmuh theih nan theihtawp ka'n chhuah ang e.
He thu chhiartu zawng zawng ka thian duhtak te, ka kumthar hmachhawp hi ka tihhlawhtlin ngei theih nan min lo tawngtaipui theuh dawn nia.
Share:

11 comments:

  1. TSa nge nge, i ziak a ngaihnawm bik thin mang e. Kumthar resolution ang reng deuh chu ka han ziak ve a, mahse mahni mawng hlim mai nih ka hlauhna avangin ka dah vel rih ta mai mai. Nang zet zawng i huaisen a, ziaka i dah thlap avang hian zawm ngei pawh i tum ka ring. I huaisenna hian i thiltum ah hlawhtlinna a pe ngei ngei dawn che anih hi.

    Thu chu i va lo ziak nasa tawh em em ve le. nang zawng thuziak chi i ni. Ziak zel rawh. Mi te paw'n thuziak hmanga ei an zawng thei anih chuan, nang hian engah nge i theih loh bik tehlul ang le? I thawhrimna hi i la hlawhtlinpui ngei ka ring khawp mai.

    ReplyDelete
  2. @Pu Cari, ka lawm e. Ka tui a, ka ziak ve mai mai thin a nih hi! Eizawn nan meuha hmang thei tur chuan mi bîk nih a ngai tak zet.

    Khaia aw..! A thupui ka dah dik lo a nih khi.. 'Kumthar hmachhawp' ti mawlh mawlh a, 'kumthar thutiam' ka'n la tih hram chu. Remchangah ka lo thlak leh ang e.

    ReplyDelete
  3. Hmachhawp i insaiam tha hle mai i tihhlawhtlin ngei pawh ka beisei e.

    kan mamawh nia kan hriat hi chu neih chhun chhun pawh hian han lei pawp mai ila, a hnu-ah kan inchhir leh lo nge nge a nia, pawisa chuangbang deuh neih huna lei-ah tih te hi chu thil neih lohna, keini ang duangin pawisa chuangbang kan nei ve thei tak tak lo.

    ReplyDelete
  4. I hlawhtling ngei theihnan duhsakna ka hlan ve tawp che...
    Tam thei ang ber ziah chu a tha.. Quality kha Kual zel theih bawk chuan tha lehzual.. :-) Kumthar Chibai!!

    ReplyDelete
  5. Thuziak hi ka han sawi leh hram teh ang. Keini ang tan hi chuan thu pakhat ziak tur ngawt pawh hian beih fe a ngai thin. Thuziak lo harsat thin zia hi ka hre chiang khawp mai. Hei vang tak hian thuziak thiam mi te hi an ngaihsanawm ka ti. Thu ziak tur hian hun a heh a, mit a hah a, hunawl tha tak neih a ngai a, mahnia a fala awm tam pawh a ngai thin. Thuziak thenkhat phei hi chu reference tha tak tak neih a lo tul a, chuvang chuan lehkhabu hrang hrang rawn kual chiam te a ngai thin. Facts data ziak lang tel tur phei chuan uluk leh fimkhur a ngai hle thin. Hengte avang kan writer tha tak tak te thuziak hi, chanchinbu lamah kan chhuah duh anih chuan hlawh an nei ngei turah ka ngai. Science Vision (Official Journal of Mizo Post Graduate Science Society) te angah pawh hian article puitling pakhat ziak ah Rs 500 zel pek thin an ni. Hetiang deuh hlek hian kan writer te pawh hian hlawh an neih ve thin chuan tun aia tha zawk leh hlu zawk, thuziak tur tam tak an neih theih ngei ka ring.

    Ka duh aia thuia ka han comment chu le.

    ReplyDelete
  6. @triple: A dik chiah. Pawisa neih veleha lei nghal loh chuan a zo vat zel!

    @Blind Dayze: Ka lawm e. Kumthar chibaiiii leeee!!

    @Pu Cari: A dik chiah. Thuziah hi a namai lo va, chanchinbu lama mite'n a nawm a maka an lo chhuah hi a huatthlala a, an chhuah duh chuan mi dilna chang hria se, kan ui phei chu a ni hauh lo. A.. Hma kan la sawn zel ang chu!

    ReplyDelete
  7. Phalna pawh la hmasa lovin an lo chhuah chhawng ve ringawt a, a chhiartute lahin ziah a harsatzia pawh ngaihtuah lovin an chhiar zawhah nau ek hruk nan te an lo hmang vel mai mai lehnghal haha

    ReplyDelete
  8. Anonymous comment khian min tinui huk mai. Miin harsa taka an ziak kha, a thlawnin miin sumdawn nan an hmansak a, chutah pawh nauek hruk nan an la hmang zui a... Krismas ruai atan bawng kan chek thlu a, a sa kan chan darh vek a, tui ti takin kan ei luai luai a, chumi ah mai pawh la lungawi zo lovin, a vun kan la vaw ngheng ngheng zui a.....hetiang deuh hi a niin ka hria.

    ReplyDelete
  9. Hahaha! Anonymous, i comment chuan min va tinui ve! I rawn lêng a, ka lawm lutuk!

    @Pu Cari: A ni ngawt mai. Tha a na duh thin khawp mai. Ka lawm lutuk e!

    ReplyDelete
  10. Ts, a va tha thin em!!! Pakhatah i hlawhchham. Hmangaihna tuboh kha midangte tihlim tura i ziah kha a ni a, kei chu min vel....

    ReplyDelete
  11. Aw haw... Ka va han lawm tehlul em! Min tiphur hle mai. I lo lenglut a, ka lawm lutuk e. I lo leng ziah dawn nia.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers