24 February 2011

Hun thim

Thiante'n an chêtchhiatna (chêtthatna?) hlimawm tak tak an ziak a, kei chuan ka nuna thil thleng hahthlâk (hlu bawk si) zualte ka'n ziak ve thung ang e. Remchângah chêtchhiatna lam chu ka'n la ziak ve ang chu.

Kum 2005 kum khân Aizawl, Durtlang-ah ka awm tan a. Hetih lai hian kum 16 mi ka ni. Ni khat chu Aizawl-a ka inhlawhna hmasa ber atan Thuampui-a Ch. Chhunga Bus Terminal saknaah saw'n ka thawk a. Ka ruh a la no deuh avângin ka chau hle. Chhûn-ah kan han châwl a, ei leh in mahni intum tur chu lo niin! Thawhpuite chuan tiffin-ah an pai mai a, pai nachâng lo hre ve lo ta chu mi dang hmuh hlau takin hmun biru-ah ka thu ta tlawk tlawk a, khatih laia ka khuahar zia kha! Thingpui dâwr vela inhnawhpuarna tur pawisa nei hek lo, chauh nen ril a tâm duh ngei mai. Tlai bânah Thuampui atanga Durtlang chu kein ka la thleng thak zui a. A retheihthlâk khawp mai.

Awmna atanga hnawhchhuah hi vawi hnih ka tawng tawh! 2005 chawhnu lam khân Durtlang-a ka in luahpuipa chuan zin turin min chhuahsan a, mahse, a lo haw leh tawh lo. A hnuah nupui a neih thu ka hre zui a, rilru a na duh khawp mai. Thenawmte'n min khawngaihin buhfaite min pe a, inhlawhna turte min zawnsak bawk a. Ka chungah an fel tak zet. Mahse, chutianga awm reng theih ni hek lo, kan thenawmnu chuan mi ina awmna tur min hmuhsak hlauh va, chutah chuan hmeichhe nunchan ka zir ta a ni! Hetah hian hnawhchhuah vawi khatna ka tâwk!

Ka awmna pa hi zungawlvei a ni. Zankhat chu awmna nu leh a fate chu hmun dangah an riak daih a, kan pahnih chauhvin kan awm a. Zan laiah chuan a lêng hi mipa pakhat leh hmeichhe pakhat nen an lo haw a. Zu an in ho va, an ri lè lú a. Keia intitlângnêl chuan ka awmna pa chu bengchheng lo deuh turin ka'n khap ve a nih chu! (hahaha) A thinrim a, a âng a, a kal tluang laklawh a. Chhuak turin min ti ta a. Mahse, chhuak nghâl lêm lovin pâwnah khua ka nghâk vâr a, zîngah chuan ngaihdam min dîl ve nasa. Ka intingêng lui a, sikul-ah transfer certificate ka la a, kan khuaah ka haw vang vang.

Kan khuaah kum khat ka awm a, Higher Secondary a awm loh avângin Aizawl bawk ka pan leh a ngai. Ka buai leh tan. Ka pa hian zirna lamah thahnem min ngaihpui lêm loh avângin ka buai a zual. Keia intitumruh ve laklawh tawh chuan ka thiante ka zuithla tawp a; thlenna tur dang nei hek lo, ka thiante inah chuan ka thleng tawp a. Ni thum ka awm hnuin kan khua atanga Aizawl-a pêm ta, chhûngte ena kan lo en te inah ka awm leh rawih a. Anni chuan awmna remchâng min ngaihtuahsakin, ni thum hnuah bawk tlangval senior mahnia khawsa, zungawlvei inah bawk ka tlulût leh ta a nih chu!

Morning-ah class ka kal a, chhûnah ka inhlawh thîn. Mutbu engmah ka nei lo va, zânah pawh sin tur dang nei lovin thutthlengsei, tawi zet si-ah chuan ka mu kawm ngul thîn. Kut hrûkna ni àwm tak hi sin tur min pe a, chu chuan ka kawng achin hnuai lam zawng a khuh pha tâwk a, kawrlum ka ha a, ka mu mai thîn. Hetih lai hian ka chhûngte'n ka chanchin engmah an hre lo va, ka nu phei chu a mangang hman hle a ni àwm e. Ka pa erawh a ngaihtuahawm loh khawp mai. Chuta tang chuan ka pa nena kan inkârah khî a awm ta reng. Tichuan, thlasik khawvâwt a rawn thlen hmain hnawhchhuah (vawihnihna!) chu ka tâwk leh ta a ni.

Ka awmna pa hi zungawlvei ka ti tawh kha. A ruih apiang hian thil rû-ah min puh ziah a! A hnuah a hmu leh zêl tho va. Tumkhat chu a ruih laiin a mobile rû-ah min puh leh a. A nâ hi ka va han ti ngawih ngawih tak em! Hetih lai hian mobile neih chu sawi loh, khawih takngial pawh ka la khawih chhin lo. Chutah chuan min hau tâwp hleithei ta lo. Chhuak turin min ti dawt lo na a, chhuak turin min duh a ni tih erawh ka hria a. Rilru na tak chungin ka thawmhnaw tlêm tè chu polythene-ah ka khungkhâwm a, thenawmah ka dah a. Ka thianpa te in luah bawk ka pan leh ta.

Heta ka thianpa hi a û-te nupa bula awm niin kan khuaa mi tho an ni a, ka tâna an hlutzia kha aw.. Tlaiah ka thawmhnaw kan la a, thiante inah chuan ka awm leh ta rên râwn a. Heta ka awm hnu hian ka chhûngte chuan ka chanchin an hre leh ta chauh a ni. Class pawh kal hleithei lovin kan khua nen ka kârtawn ta sek a. Kum chawhnu lamah phei chuan hmun tha zâwk an duh avângin ka thiante chu an insawnchhuak leh dâwn ta tlat mai! Tichuan, loh theih lohna avângin September ni 1, 2007 atangin ka parawl ve tan ta a ni.

Morning-ah ka la kal reng a. Tumkhat chu thenawmpa thahnem min ngaihpuina avâng liau liauvin Power Department-ah hna ka hmu ve ta hlauh mai - electric hrui pawh hna chu! Hetah hian thla khat chhûng ka thawk a, nitin cheng 105 kan hlawh. Zokhawsang leh Mualpui inkâra electric hrui inzam zawng zawngah khuan ka kuthnu a tel vek! Chite lui kam vêl khu thosi a tam si, a lum si, a va han hahthlâk thîn ngai em! Thla tâwp lamah phei chuan malaria ka vei zui a, ka taksaah ringworm tam tak a rawn awm bawk a. Ka hriselna a tihpan phah hle.

A sei ta hle mai. Duhtâwk dâwn tawh mai ila. Tûn hnua mi tuichawia ka inhlawh te, zankhuaa lei paiha ka inhlawh te, bankhur chawh, cubic lung thiar, etc. te ka ngaihtuah lêt lehin ngaihawm loh mah se, ka lung erawh a tilêng thîn. Kum 2007 hi ka tân hun thim a ni a, inhlawhna awm ang ang hi chu thawh loh ahleih pawh ka nei lo a ni ber e. Mahse, kha'ngte khân ka nun hi an tihlu tak meuh meuh a ni.

Share:

16 comments:

  1. I lo va tuar nasa ve le!!

    ReplyDelete
  2. @Anon, eng eng emaw chu a awm ve nual a nih khi! :-)

    ReplyDelete
  3. Thianpa leh...i life history chu a va han ngaihnawm kher em ve le. Hun harsa leh khirh tak tak te i lo paltlang tawh a, i hun tawn ang te hi tawng ve ta ila chuan, ka tuar chhuah zawh pawh ka ring lo ve.

    I hrehawm tawrh thinna te chuan chhelna a pe ang che. Kan hringnun kawng chhuk chho zawh lai theuh hi thenkhat tan chuan a lo bumboh bik thin a lo nih hi. Tunah chuan kawng bumboh zual lai chu i kal pel tawh alawm. Thenkhat tan hi chuan nun hi a suala kan sual chhuah a lo ngai anih hi tiraw... Hrehawm tuar ngai miah lo mi chuan tawrhchhelna a nei ngai lo. Hun thim ber pawh lo inher chhuak se, i tan chuan hmachhawn a hrehawm tawh loh khawp ang. Nang chu hrehawmna leh retheihna ina a hrual fip tawh, chumi atanga mahni kutke ngeia tal chhuak a ding chhuak thei i ni si a.

    I ziak tha khawp mai. A dang pawh lo ziak chhunzawm leh rawh. Ka ngaihnawm tih chi tak anih hi.

    ReplyDelete
  4. Ts, i experience i ziah hi, a hun laiin hreawm viau mahse, nangmah siam puitlingtu ani chiang kher mai tiraw? Thu i thiam a, helama kal chi i nih hi! I thu ziak pawh a ngaihnawm e!

    ReplyDelete
  5. Ts i tawrh hi ka tawrh ni ta se nang ang hian ka chhelin ka tuar chhuak zoin ka inring lo, hrehawma leh harsatna in i rilru leh taksa a tuaihriam tawh a, caribou sawi ang khian i hma ah eng harsatna pawh lo thleng sela i hmachhawn ngam zel tawhin ka ring.

    A hun laiin hrehawm hle mahse i han sawi chhuah takah chuan a tuartu ni ve lem lo chuan ngaihnawm ti takin kan lo chhiar ta anih hi, han chhunzwm zel teh, mahni inenfiah nan pawh kan tan a tangkai khawp dawn mai.

    ReplyDelete
  6. @Pu Cari, i sawi dik khawp mai. Nun hi sual chhuah a ngai tak meuh a ni. Kha'ng ka hun kal tate kha zirlai ropui tak an lo ni a, mi tam takte aia ka vanduaina hi ka vanneihnaa chhiar theih a ni ta reng mai. Tunah eng la ni lo mah ila, hman ka nun nen chuan a inthlau ve tawh lutuk asin! Ka lawm lutuk e.

    @Pi Maisek, min tipaukhauh tlattu, keimaha zu leh ruihtheihthil reng reng huatna tuhtu chu a ni chiang a, mahse, tun thleng hian ka puitling thei lo a ni e. Ka thuziak khi a chhumbung rem rum a. A tira ka ziah tum dan tak phei kha chuan hrehawm ka tih zualte ziah den den ka tum a ni a; mahse, ka luangliam ta lutuk a, ka hlawhchham ta a nih ber khi! Ka lawm lutuk e.

    @Triple, ka lawm e. Khatianga ka tawrh kha min siamtuin a lo phal reng alawm mawle..! Remchangah rawn chhunzawm ka tum dawn nia.

    A kim lo deuh a. Durtlanga ka in luahpui pa chu kan khuaa kan thenawm tlangval, mahnia in luaha lo awm sa a ni a. Kum 2005 kumtir khan a bula khawsa turin min hruaithla seuh seuh a, nupui neiin a rukin min chhuahsan leh daih a nih chu!

    ReplyDelete
  7. Kan inkawm hmasak bera ka ngaihdan che kha a lo dikin ka hria, mak em em chu mikhual hnenah tikhan ka thilphal ngai lo.hrethiams.

    Ka rilru a dek; i thu ziah hian...

    I zep lova, ka zep bik lovang i pa nena in inkar khi i sawi lang tlat, siamthat i mawh a ni e...a bak fb lamah ka sawi ang.

    Puih i ngaih hunah ka inhuam reng,ka theih phawt chuan, i dinhmun tha tawh deuh mahse...

    ReplyDelete
  8. Pu Rp, ka lawm e. I thilphalna kha ka la theihnghilh miah lo a nia aw.. Hehe. I site min kawhhmuh kha ka bookmark a, ka lut reng a nia.

    Ni e, ka pa nena kan inkar hi ziak dawn tak tak ila, post tham a nih ka ring! A chhan dangte pawh. Fb lamah online hun a inrual hunah min la councelling deuh la thain ka hria.

    Ka tana i inhuam avangin ka lawm tak meuh meuh a ni. Nangni paw'n hun khirh leh harsa, khimi ai maha nasa zawk in tawk vekin ka ring; in ziak duh lo mai mai a nih ka ring bawk. :-)

    ReplyDelete
  9. E khai, i hrehawm tawrhna ka tan min chotu! I lo tuar nasa hle mai, kan hriat miah loh lamah.

    Kawng bumboh zawh chungin, tlang nuam tak ila chhuang chhuak ngei ang.

    ReplyDelete
  10. @Seki, ka lawm e. Nang pawh tuna i dinhmun thleng turin harsatna tam tak i paltlangin ka ring a, chu'ngte chu i la rawn post ang chu..

    ReplyDelete
  11. Ka chhiar fo nangin ka van comment ngailo em em tih ka inhre chhuak. Rilru taka chhiar tlak hlir i ziak ni berin ka hmu.

    ReplyDelete
  12. E khai aw.. Pu Hva teh hlawl chu! I rawn leng a, ka lawm lutuk! I mi fakna erawh ka phu lo khawp mai. I rawn leng ziah dawn nia.. :-D

    ReplyDelete
  13. E khai, ilo va tuar nasa ve. Mite tana entawn tlak tak i nih hi. Hreawm hmasak hian lawmnain a zui thin a ni. Nawm hmasak erawh chuan hreawm tuar an zuau thin. PATHIAN zarah i hunthim te chu a reh ta a, ka lawmpui a che.

    ReplyDelete
  14. @Pu Duhawma, min lawmpui avangin ka lawm tak zet a ni. Kan hrehawm tawrh hi Siamtu hian a lo phal lutuk mah mah alawm le!!

    ReplyDelete
  15. Kumin February a i post kha ni daih tawh mahse tunah ka chhiar chauh avangin tunah ka comment ang. Ts, he link min hrilh hnu kar 1 liamah ka chhiar chauh a, ka inthiamlo khawp mai. Hunthawl ka neihloh vang ania.

    I thuziak khian min hneh ngei mai. Harsatna tamtak i paltlang a, mihrang laka mi chu thuhran, nangmah hringtu i pa lakah lehzel pawh. Mahse, ka ngaisang ta sawt che, a chhan chu maw, i harsatna tawh ang tawk ve tamtak chuan sual kawng a zawh ngei ka ring. Nang erawh chuan tumruhna nen hringnun i sual zui a, a ropui ka ti takmeuh meuh. I thuziak chuan ka rilru a tihnim ruih mai. Mahse, nang chu fiamthu min hluitu ah i la tang thei si. A ropui thlawt. I nunah vanneihna i tawnchhoh zel ka duhsak che.

    ReplyDelete
  16. @sheldon: Ka dam suai suaiin ka hria. I mi fak leh fuihna avangin ka lawm takzet.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers