18 February 2011

Keimah!

Hausaknaah hian chatuan nunna awm chu ni sela, ka thi hma ngawt ang!

A chapo apiang hi ngaihsan tur ni sela, ngaihsan tur ber ka hre lo vang!

A taima fal bik hi hlawhchham zel ta se, ka va hlawhchham ngun bik awm em!

Lunglen avanga thu thiam tur chu ni se, Literature-ah Nobel Prize ka dawng tawh mai thei!

Mi hrisel apiang hi dam rei ta se, he thu hi ka ziak thei nang!

Miin inkhawm thatchhia hi ngaihzawng atan duh miah lo ta se, lentarpui tur ka ngah awm e!

Ruihtheihthil leh zuk leh hmuam ti lo hi hmeichhia hian pasal atan duh ta em em mai sela, hna nghet ka zawng nghal ang!

A bur lian apiangah a tak awm tam ta zel se, VIP-te’n dinchhuahpui nana an hman theih tur khawpa tamin ka thluak ka sem ang!

Mi bawrhsawm zawng zawngte hian doctor ngai ta sela, doctor hna hi ka hnathawh chak ber a ni ang!

Pawisa hi khawvela thiltithei ber ni sela chuan, phuarbehna hrui ka mamawh lo vang!

Lerh apiang hian ngaihzawng ngah vek sela, sms pack ka heh ngawt ang!

Tumruh avang ngawta hlawhtlinna hmuh tur ni sela, ka thatchhe viau ang.

Khawvel ropuina thlahlel miah lo chauh hi vanram kai tur tih ni se, Siamtu khua a har ve viau ang!
Note: Hei hi misual.com-a ka post hmasa ber a nia, ka'n dahtha ang e.
Share:

9 comments:

  1. Logic:

    Tumruhnaah avang chauh hian hlawhtlinna awm lo se, mi hlawhtlingte kha an thatchhe hlawm ngawt ang.

    Khawvel ropuina thlahlel reng chunga vanram luh theih ni se, vanram a ni lo vang.

    I post tha e, ka lo la chhiar miah hlei nem kei laisen lungmawla hian.

    I thiam leh viau zel mai anih hi.

    ReplyDelete
  2. Va ril thei ve aw..
    Kan miril thu leh hla thiam ho hian insum miah lovin han inphawrh zung zung teh u, in kamliam changin kan lo dak ve far ange.

    Keipawh misual.com ah hian 10 chuang zet ka o post ve reng tawh alawm mawle, hun remchangah blog-ah la sawn luh ve tur a nih chu.

    ReplyDelete
  3. Nangmaha ka hmuh theih te chu:
    TS-a thuziak reng reng chhiar tlak loh a awm lo a ni tih hi ka hre chiang ta khawp mai.

    Tin, TS-a hi a hausa lem lova, michapo a ngaisang lova, mitaima tak, mahni thawh theih ang ang chu thawh hreh nei lova thawk chiam zel thin a ni. Amah hi tawngkam thiam tak a ni a, mi lungleng thei tak a ni bawk, mahse a lunglen avanga tawngkam thiam a ni kher lova, tin, a rualpawl tawk leka hrisel a ni bawk.

    Tunhma, kan pipu te hunah kha chuan pawisa hian thil a ti thei vak lem lo, tunah erawh pawisa hian thil a va ti thei tawh tak em. Pawisa hmanga lei theih loh thil a tlem tawh a, tin, pawisa ngah apiangin tlawntu leh be thatu an ngah ta. Ruihtheih thila fihlim anih avangin a luck phah kher lo tih a chiang reng a, A lerh thawkhat a, ngaihzawng pawh a hung fing fer turah ka ngai, SMS pack erawh a thun ngai lo ani mai thei, a chhan chu a hmeichhe lamin an rawn phone zel a...Pathianah rinna nghat viau mahse keimah ang thova inkhawm thatchhia anih ka ring.

    ReplyDelete
  4. @Pu Rp, ka lawm e. Nikum lama ka post tawh a nia. A rei tep tawh.
    'Khawvel ropuina thlahlel reng chunga vanram luh theih ni se, vanram a ni lo vang.' A dik ka ti khawp mai.

    @Seki, ka lawm lutuk e! Ni lem lo mah se...

    @triple, khatiang tawngkam kha ka phu hauh lo a nia aw..! Nia, sawn lut rawh, a tha viau dawnin ka hria. Blog tihhausak nan..

    @Pu Cari, ka nui vur vur mai! Mi i fak uchuak lutuk! Tawngkam ka thiam lo va, mi lungleng mi tak ka ni tih chu i hria e. Ka tuina lamah lo chuan ka taima lo a nia...hehe

    'Ruihtheih thila fihlim anih avangin a luck phah kher lo tih a chiang reng a, A lerh thawkhat a, ngaihzawng pawh a hung fing fer turah ka ngai, SMS pack erawh a thun ngai lo ani mai thei, a chhan chu a hmeichhe lamin an rawn phone zel a...Pathianah rinna nghat viau mahse keimah ang thova inkhawm thatchhia anih ka ring.

    Khiti lai të khi chu han sawiselna tur ka hre lo! Ka hûng fir fer lo, mahse, ka lerh! Hahaha.. Ka lawm e.

    ReplyDelete
  5. Thenkhat ah chuan nangmah ka hmu a mahse a then ah hi chuan ka hmulo che....mahse ngaihtuah ti thui khawp mai.....!!!!!!!!!!!

    ReplyDelete
  6. @Marvinic, I tidik ang. Keimah khi keimah ka ni vek lo.. Hehe. I rawn leng a, ka lawm lutuk e.

    ReplyDelete
  7. Nangmah hi keimah pawh a ni ve tho a nih hi...lol Rilru thui tak min neih tir. Chhiar nuam ka van ti ve le..

    ReplyDelete
  8. @Noddy, Ka lawm lutuk e! A chang chuan Keimah hi keimah ka ni lo fo!

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers