21 March 2011

SMS Duhsakna

“Ka mu hma emaw, tlai emaw zîng dâr 4 vêlah ka harh thîn a, ka phone hi ka en ngei ngei thîn. Ka beisei anga i message dangdai tak hmuh hi nuam ka ti lutuk, ni hman a nuam thei ngei mai; ka lâwm e. Mi pakhat i tihlim tih hria la, nuam takin hun i hmang dâwn nia..”

He SMS hi 21.3.11 (Thawhtanni) zîng dâr 9:45:32-a Lawngtlai-a ka thiannu hnên atanga ka dawn a ni a, nilêngin ka rilru a luah ta reng mai.

Harsatna leh rokhawlhna eng emaw tak ka tâwk a nih loh chuan zantin ka mut dâwnah ka thiante mi 70 vêl chu SMS-in duhsakna nen ka ‘mangtha’ thîn a, ka mut hun a tlai thin avângin reply ka dawng tam lo. Mahse, keimah hi ka hlim thung a, chu chu a lâwmman niin ka hre bawk.


He'ng ka SMS thawn chhuahte hi mi dang hnên atanga ka dawn ni lo, ka thian duhtakte tâna keimah atang ngeia lo chhuakte a ni a, a dawngtute'n hmun danga an la hmuh ngai loh avângin ka tâna a hlut piah lamah an tân pawh a lâwmawmin a hlu sawt ngeiin ka ring. Khi SMS atang ringawt pawhin eng tham ni lo mah se, mi hnêna duhsakna thu kan hlan hian nasa takin hna a thawk thei tih a chiang hlein ka hria.

Chuvângin ni khat hun kan thlah liam dâwn te, ni thar kan hmuah laite hian mi dangte hnênah duhsakna thu hlan uar ila hringnun a va mawi lehzual dâwn em! Mihring kan inang lo va, hna hrang hrang thawk kan ni. A then chu buai tak takte pawh an ni bawk a. Mahse, ni khata SMS vawi khat thawn keuh mai khân an hna a tikhaihlakin ka ring lo; chu pawh duhsakna! Keimahni kan lo buai deuh a nih pawhin mut dâwna thawn keuh mai kha thil harsa lua a ni lo bawk.

Hetia thiante hnêna mut dâwna duhsakna thu thawn ka chìn tan atangin keimah ngei pawh ka hlim a ni tih ka inhria a, tûn hmaa ka nun ngui leh chau tak thîn pawh khân min kiansan hret hret a ni tih ka hre bawk.

Duhsakna hlan i uar ang u; suma lei theih loh tam tak a man si a.
Share:

17 comments:

  1. I thuziak a tawi-fel in chhiar a nuam. Ka expirence ka han ziak lawk ang e aw...
    Kum 4 kal ta khan BSNL SMS Pack ka subscribe a. Zing thawh hlima an chhiar tur te, zan mut dawna an chhiar tur tein ka thian te, ka chhungkhat laina te, hla tak taka awm te, ka thawn thin a. Mahse an lawmlo. Fiamthu han thawh chang chu ka nei ve tho na a, SMS dawn hrim hrim kha an lawm miah lo. "Thu pawimawh tak kan dawng dawn emaw tih laiin," tih te, "Nula SMS kan dawng dawn emaw tia beisei taka hawn laiin," tih ang reng sawiselna ka tawng hnem lutuk a. A hnuah phei chuan ka unsubscribe ta daih nghe nghe. SMS pawh hi, a thuziak ai chuan a thawntu hi an lo pawimawh zawk ani tih hi ka zir chhuak chiang hle.

    Hemi hnu hian information leh news ang rengin ka hnathawhna lamah Gupshup SMS ka siam leh a. Sawisel tawk an awm tho. Tunah chuan SMS ka thawn chhuak tlem ta khawp mai.

    I sawi ang deuh khian mi tan thu tha tak tak thawn chhuak mah ila, thenkhat tan chuan an phone inbox tihnawktu mai mai kan ni thei ve tlat. Pawisa senga thawn chhuah chu ka sim ta.

    ReplyDelete
  2. Pu Cari, ka lawm thin. A ni thei khawp ang, hetiang chi hi an lo awm leh thin. Mahse, GupShup ang chi hi chu a ninawm duh riau asin! Tuna ka thawn dan chuan, mi pakhat ka thawn khan mi dang nena thawn kawp mai mai lova amah chauh ka thawn angah an inngaiin a hriat a, dik tak sawi chuan sawiseltu ka thawng lo va, an lawmthu ka dawng zawk thin. Ka thawn hun hi zing dar 102 leh dar 1, dar 2 te a ni tlangpui a, an mutreh a ni thin a. Zinga an thawh hian an hmu chauh va, chuvang chuan a tibuai lo niin ka hria. Puitling tak tak chin erawh ka thawn ngai lem lo. I thian leh chhungkhatte chu an rilru a la zau tawk lo te pawh a ni mai thei. :) Ni khata SMS pakhat, chu pawh duhsakna thu lo hawtu chu duhsak tlak a ni lo zu nia!

    ReplyDelete
  3. Ka tum vak lo nain misual.com-ah ka'n va post nghe nghe dawn teh ang!

    ReplyDelete
  4. Keichu Forwarded message hi ka huat zawng a nia.. ve leh tlat a.. thlum tak mai a in "Mantha" na an mahni irawm chhuak nilo tih hriat reng reng min rawn ziak duah te hi chhiar pawh ka chhiar tha peihlo.. chu ai chuan "Mangtha" rawn tih satliah ringawt pawh hi ka duh zawk.. Forwarded message in thawn ai chuan min thawnlo law law le ka lawm zawk... Especially jokes.. an jokes hriat a hmanlai thei si.. sawi pawh kan sawi peih tawh loh te hi an rawn tuipui thar ve leh a....

    ReplyDelete
  5. Hehe.. A dik chiah alawm. An rawn forward mai mai tih hriat reng reng ai chuan anmahni'n an irawm ngeia an phuah hi a hlu zawk. Duhsakna a nih hrim hrimah khan lawmawm tho mah se, anmahni atang ngeia min duhsak khan a lawmawm leh zual. Alej, i no. min pe la, fiamthu ruahthamloh, tharlam deuh deuh ka rawn thawn dawn che mi? Hahaha.. Ka lawm e.

    ReplyDelete
  6. Hiahiahia.. Kei chu a za lutukkkkk!!!

    ReplyDelete
  7. Tawngkam tha in Sial aman an tih hi sial tak2 a ni chuang lo, mi hlimna, rilru hlima awmrtirna hian mihringah satisfaction min pe a chumi chu damdawi tha leh hlimna kan dam chhan chu a tling der a ni.

    Good post

    ReplyDelete
  8. Pu Hv, ka lawm e. Mite tana duhsakna thu han thawn mai chu a harsa lo khawp mai. Mahse, Pu Caribou comment ang khian a dawngsawngtu hi mi chi hrang hrang an lo ni a.. Thawn tur chin bithliah thiam te pawh a tha ngawt ang.

    ReplyDelete
  9. E, Ku TSa chu i message dawng tur listah tel ve ila a tha awm mang e.

    SMS hi kei ka thawn peih tha der lo mai. 2002-04 chho vel khan unlimited pack kha Rs 99/= in kan subscribe thin a, kan hrat hle, thawn tur erawh kan van thung. Tunah erawh thla khatah 20-30 bak ka thawn awm lo e.

    Khi tia a tangkaina i han sawi takah chuan a that phian khi a.

    ...khrum

    ReplyDelete
  10. Message an rawn forward chuan a ngai chiah kha thawn let leh hmiah tur!

    ...khrum

    ReplyDelete
  11. K'u Khrum, ka phone neih tirhin ka hrât khawp mai a. A lo rei telh telh a, ka thatchhe telh telh a. SMS pawh ka reply tha peih ta lo zawk a, mahni'n hun awl lo ngah vak loh nen. Mahse, vodafone ka'n hmang a, SMS pack cheng 30 manah 10000 a lut a, thla khat chhung atan. Rilru thar ka nei ta a, ka khiti ta a nih khi! Min rawn comment sak a, ka lawm khawp mai.

    ReplyDelete
  12. SMS pack Rs 50 man ka subscribe hnu khan SMS hi ka thawn chhuak tam ngang mai a. Thenkhat chuan a hlimawm an ti a, thenkhat chuan min hau mawlh mawlh mai. Mihring hi a lo inan loh theih khawp mai.

    I tih ang deuh hlek hian thu tha tak tak leh thlum tak tak ka thawn chhuak a, zinglama wishna leh duhsakna te, zan lama inmangthana te nen, a thawntu in pawisa ka lost a, a dawngtu in a thlawnin a dawng thung. Thu tha leh thlum tak tak ka ziaka ka thawn chhuah te kha, mak tak maiin, midang daih hnen atang tein ka dawng ve leh nawlh thin. A vir kual ve nual ni ngei tur a ni.

    ReplyDelete
  13. Ka thiannu pakhat nen chuan zan tin kan inmangtha thin a, a msg ka hmuh loh hi chuan ka awm a nuam zan thin lo. Chutiang bawkin ani pawhin ka msg a hmuh loh chuan hrehawm a tih thu min hrilh thin. A ta tur liau liau hian thu thar ka type ziah thin a nih ber chu. Nun hi a tinuam tih chang ka nei thin. I ziak tha e k'u TS...chhunzawm zel rawh.

    ReplyDelete
  14. Pu Cari, ni e, mihring kan inang lo khawp mai. 'A thawntuin pawisa ka lost a, a dawngtuin a thlawnin a dawng thung...' i tih hi nizan atang tawh khan ka rilru-ah a riak reng mai.

    dolerich, hetiang thian hi an ngainatawm duh teh asin. Ngaihzawng ni lem lovin thianah pawh an lo awm thei khawp mai a, inthianthatna a thûk! Kei pawh hetiang thian ka nei..hairehaiii!

    ReplyDelete
  15. Atlangpui thuin mobile phone nei tirh lam hian sms thawn kan hrat a, kan ni rei tulh tulha kan peih lo tulh tulh niin ka hria, ka neih tirh chuan kei pawhin thla khat chhungin 1000 dawnteka than ve thin, mahse tunah chuan pu caribou sawi ang deuhin ka thawn chhuak khat ta khawp mai.

    Ka phone hi silent-ah vibrate in ka lukham hnuaiah ka dah thin a, zan reiah emergency pawh awm thei a ni a, mi phone te ka lo hre lo palh ange tih thuhla-ah, chuvang chuan sms leh call a rawn kal hian ka harh deuh ziah thin, sms ho mai mai a rawn kal hi chuan a lawmawm vak loh, thianbik deuhte an nih chuan thu hran.

    Ts nupui fanau i han nei anga, in nu-in a phal tawh awm si lova i thil chin hi a ziaawm ve mai ang he he

    ReplyDelete
  16. Hehe..
    @triple: Kei pawh nang ang chiah. A tirah chuan sms thawn ka hrât khawp mai. Nizanah tleirawl pakhat paw'n phone a nei thar a, sim card thar a nei chiah a, "Ka'n lerh tak tak teh ang.." a ti! He a tawngkamah hian phone neih tirh rilru a langchiang hlein ka hria. Nupui fanau neih chuan a dân a dang tawh ngawtin ka ring.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers