23 April 2011

Beidawnna tibeidawngtu mi ropuite

*Rocker ropui leh hlawhtling, Black Sabbath hotupa ni thin, Ozzy Osbourne hi mi hriat a hlawh hmain sa talhna hmunah a inhlawh thin.

*King of Rock n Roll an tih hial, Elvis Presley pawh a lar hma chuan truck driver mai a ni thin.

*Lemchangtu lar leh hlawhtling, khawvel hmeichhiate star rawn luai luai, Brat Pitt pawh hi a lar hmain nipui laia lungalhthei laihchhuahna khura warning sign petu-ah a tang thin.

*Th Beatles member leh an hlaphuahtu pakhat, Sir Paul McCartney pawh a lar hma chuan dawr hran hranah kal kualin bungrua a sem thin.

Sir Paul McCartney
*Rapper lar ber pawl ni mek, R. Kelly pawh hi mi hriat a hlawh hmain kawng sirah zaiin a inhlawh thin.


*Zaithiam lar, Sir Elton John pawh hian a lar hmain Mills Music tichhuaktute in tur thingpui a semsak thin.

*Zaithiam hmingthang, Ronan Keating pawh kha a naupan laiin a zaithiam loh em avangin an sikul choir atangin an ban daih.

*Khawvela basketballer ropui bera chhal ngam, Michael Jordan pawh hi High School a kal laiin an basketball team atangin an ban daih.

*British Prime Minister hmingthang, Sir Winston Churchill pawh kha khawvela University hmingthang ber ber pahnih, Oxford University leh Cambridge University-te chuan 'thu thiam lo' tiin an lo hnawtchhuak tawh.

*American lemziak thiam hmingthang, James Whistter pawh West Point-a lehkha a zir lai chuan chemistry-a a fail avangin an hnawtchhuak daih.

*Kum 1905 khan physics zirlai, Albert Einstein-a lehkha ziah chu University of Bern chuan, 'Awihawm loh leh suangtuahna mai mai' tiin an lo hnawlsak daih tawh.

*Sakhaw lama a ngaihdan a danglam em avangin John Bunyan-a chu Bedford taninah an khung a. Tanina a awm laiin Bible tih lohva khawvela kristian lehkhabu hralh hnem ber 'Kristian Vanram Kawngzawh' (The Pilgrim's Progress) chu a ziakchhuak ta a ni.

*Novel lar tak, 'Ironweed' pawh hi chhuah a nih hmain vawi 13 lai chhuah ngam lohva hnawl a ni tawh. A ziaktu, William Kennedy chuan a thuziah sa tam tak a khawl hman a, mahse, 'Ironweed' lar hma chuan tuma'n a thuziak an chhuahsak duh lo a ni.

*Dr. Seuss-a'n naupang thawnthu a buatsaih, 'And To Think That I Saw It On Mulbery Street' chu press 27 ngawtin an chhuahsak duh lo. A 28-na, Vomguard Press chuan an chhutsak hram a, a chhuah hnu rei lo te-ah copy maktaduai 6 lai an hralhchhuak nghal a ni.

*Lehkhabu ziaktu ropui, Dale Carnegie pawh khan kum 12 a nih hmain vawikhatmah car a hmu lo. Mahse, kum 46 mi a nih meuh chuan a hming hre lo an awm tawh lo.

*Editor hmingthang, Edward Bok-a chu Dutch naupang rethei tak, sikul kalna tur pawisa pawh nei zo lova inhlawhfa mai mai a ni thin a, office tirhkahah tangin kar khatah cheng 6 a hlawh thin.

*Kum 1802 khan 'Atlantic Monthly' chanchinbu-a an poetry editor chuan tlangval kum 28 mi, Robert Frost-a'n a poetry ziah chhuahsak tura a ngenna chu thawnkirin, "Kan chanchinbu phekah hian thu rorum lutuk tan hmun a awm lo ve," tiin a ziak a ni.

*Kum 1889 khan Rudyard Kipling chuan San Francisco Examine chanchinbu atangin, "Ka pu, saptawng i thiam hlawl lo niin kan hria a, a pawi kan ti khawp mai," tih thu a dawng.

*German tennis star, Boris Becker pawh hi tennis a khelh tirh chuan a thau avangin a thiante'n fiamthu thawh nan an hmang thin. Mahse, kum 17 mi a rawn nih chuan Wimbledon Tennis-a mipa champion thei naupangber a rawn ni ta.

*Khawvel mi hausa hmingthang, Andrew Carnegie pawh khan a tirah chuan darkar khata siki hlawhin hna a thawk thin.

*Mitdawivaih thiam hmingthang, Howard Thurston pawh hi a naupan lai chuan sikul a kal mumal ngai lo va, mi bawng chaw dahkhawmnaah a riak vel mai mai thin.

*General Motor-a Vice President ni thin leh motor amaha intihnun chawpna (self starter) siamchhuaktu, Charles Kettering pawh hi mi rethei tak, mi pawisa puk chawp reng renga khawsa thin a ni.

*NFL-a running back ni thin, Hershel Walker pawh hi Junior High School a kal lai chuan football khelh a duh thin a, mahse, an coach chuan, "I pate lutuk" tiin a lo hnawl thin. Mahse, beidawng lova a inzir tang tangin kum rei lo te hnuah 'Heisman Trophy' a dawng ta hial mai.

*Thu leh hla thiam hmingthang, John Milton pawh kha mitdel a ni.

*Concert violinist hmingthang, Itzhak Perlman kha a ngawng achin hnuai lam chu a zeng vek.

*Cartoonist leh humorist lar, James Thurber pawh kha mit tha lo a ni.

*Kum 1994-a Miss USA, Heather Whitestone pawh kha bengngawng a ni tlat.

*Cambridge University-a lecturer leh theoretical physicist ni bawk, lehkhabu lar tak 'A Brief History of Time' ziaktu, Stephen Hawkins kha Lou Gehrigs Disease (zeng chi khat) natna vei a ni.

*Lemchangthiam hmingthang, James Earl Jones kha kum 6-14 mi a nih lain beidawnthlak khawpin a dang a awk thin. Tunah chuan khawvela lemchangthiam hlawhtling berte zinga mi a ni der tawh.

*Olympic-a decathlon champion lo ni tawh, Rafer Johnson pawh kha kelek saa piang a ni.

Mi tumruh leh beidawng ngai lo, hlawhtlin hmaa bei tang tang thin mi tam tak an la awm. Thil theih loh hi a lo awm lo a ni.
Share:

14 comments:

  1. Ka save e aw. A tha lutuk tlat, hetiang hi nun kaihruaitu atan ka duh thin lutuk. A dang pawh lo ti leh la....

    ReplyDelete
  2. A treasures collected by Ts-kan ti ve mai dawn em ni?

    A tha khawp mai; Heng zawng zawng phena thu inthup kan zir chhuah tur chu, mi tumruh leh taima an hlawhtling nge nge tih hi a ni.

    Mi pawisa puk chawp reng hian khawsa ila, General Motor-ah Vice chairman kan ni ve kher lo vang. Mahse mi ta kan puk khan challenge min siam chuan dinhmun tha zawkah kan inhlangkai thei.(ka'n sawifiah ve reng reng teh ang)

    I post tha khawp mai.

    ReplyDelete
  3. @dolerich: Ka lawm kher mai. Hetiang mi entawntlak hi an tam khawp mai. Nia, remchangah a dang pawh lo ti leh ka tum dawn nia.

    @Pu Rpa, ka lawm khawp mai. Kan harsatna tawhte hi hmang tangkai thiam ila chuan harsatna lo thleng thin hi kan pawm thiam hle awm e.

    Min chhiarsak a, ka lawm lutuk e.

    ReplyDelete
  4. I lakhawm taima hle mai. Ka hriat loh a awm nawk, ka lawm lutuk.

    Ti daih ila truck driver te hian tunlai hian thlakhatah $5000 emaw + emaw an lalut thei asin. Chumi chu junior scientist te hlawh ang zat a ni. Elvis hunlai khan ni khatah $50 an hlawh.

    ReplyDelete
  5. Sakhaw lam avanga lungin tang i sawi khian thil pakhat min ti hrechhuak. India pawn hmun tam takah hian UPC hi Kristian ang ni lovin, CULT angah ngaih anni. A chhan pakhat chu trinity an rin loh vang....

    ReplyDelete
  6. A tha lutuk tlat. Ka save ve nghal e. Hetiang thutawi tha tak tak leh mi inspire thei thu tha tak tak hi ka zawngve nasa thin a, ka la hriatloh a awm nual mai...

    Pu hv, i kawmen hnuhnung zawk, UPC te Cult chikhat ang a ngaih an nih chungchang khi ka va hrechiang chak ve le

    ReplyDelete
  7. @Pu Hv, i comment ringawt pawh a bengvarthlak thin. Driver chuan an lo hlawh tam hle mai. UPC hi an khawngaihthlak letling!

    @Cyber, ka lawm lutuk e. A dang pawh han zawng khawm la, han post teh khai.

    ReplyDelete
  8. I sawi ho reng reng khi, an tunhma nunah chuan hun khirh tak tak, beidawn rum rumna te an tawk fo vinin ka ring thin. "Tum" an nei a, chu an thiltum tihlawhtling tura an beih nasat dan khi ka hre chak khawp mai. Vawi engzat nge an hlawhchham lailet der ang a, vawi engzat fakau nge an hlawhchham hnua a aia nasaa an beih nawn thin ang le???? Hlawhtlinna tlang chhip chuang chhuak thei tura hringnun kawng bumboh tak an zawh dan te, thawhrimna, beih hram hramna, teirei peihna te leh hlawhchham tum miah lova "tum saruh" an neih dan te hi, lo ziak nghe nghe teh. Ka chhiar chak zawng tak a ni.

    TS-a nge nge, i blog luh man a awm thin. Ka bengvar leh ta sawt mai.

    ReplyDelete
  9. A va tha leh thuai thuai ve le aw Ku TS, nang nge nge.

    Ka sawi ngai bawk kan sawi leh teh ang. "Mi inzir mi leh chhiarzau peih tak i nih hi", han ti zel teh.

    Ka lawm e.

    ...khrum

    ReplyDelete
  10. @Pu Cari, i comment chhiar a nuam thei khawp mai. Eng subject lam hawi pawh ziak ila, ngaihnawm takin i comment thiam tlat a, i awhawmin i fakawm ka ti thin khawp mai. Ka lawm lutuk e.

    @K'u Khrum, ka lawm em em e!

    ReplyDelete
  11. A va bengvar thlak in chhiar ava manhla ve le.... Mihring theuh theuh kan tum ruh dan hi a inthlau ngawt mai.

    ReplyDelete
  12. a va tha kher ve le aw,,, i blog ka lo luh phat ah thu tha tak mai ka hmu nghal e.. Ropui tak a ni

    ReplyDelete
  13. @Ramenga: I rawn leng lut thin chu ka lawm khawp mai. Mite chuan hlawhtling turin an lo thawkrimin an lo bei nasa khawp asin.

    @Marin_a: Teh nawlh che chuan! I rawn leng lut chu ka lawm khawp mai. I lo leng ziah dawn nia. I blog pawh a tha ka ti khawp mai.

    ReplyDelete
  14. @Ramenga: I rawn leng lut thin chu ka lawm khawp mai. Mite chuan hlawhtling turin an lo thawkrimin an lo bei nasa khawp asin.

    @Marin_a: Teh nawlh che chuan! I rawn leng lut chu ka lawm khawp mai. I lo leng ziah dawn nia. I blog pawh a tha ka ti khawp mai.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers