30 April 2011

Mi ropuite Love Affairs

Mi tupawh hmangaihna tawng lo leh hmangaih nei lo kan awm àwm lo ve. Keini mi naràn mai pawh ni lovin khawvel huapa mi lâr leh ropuite hlei hlei hian asin lo kùrpui ni. Lungngaihna Ni awm lova Hmangaihna Ni (Valentines Day) a awm atang ringawt pawhin hmangaihna hian engtiang chiahin nge mihringte-ah bu a khuar kan hre thei ang.

Khawvela mihring piang tawh zînga mi pamham bera sawi, Russian dictator Joseph Stalin-a pawh kha he hmangaihna hian a chiah zawr hneh teh asin! Heti taka a nunràwnga a pamham mai hi a nupui hmangaih em em, Catherine Svanidje-i'n a thihsan hma vâng a ni e an ti.



Kum 1907-a a nupuiin a thihsan khan Stalin-a chuan, "Ka rilru ngaihtuahna lungtum ang maia khauh tinêm theitu awmchhun, ka hmangaih em em ka nupui ka chân a ni. Ka tâna he leilungina thil min pêk hlu ber a boral rualin ka mihringpuite ka hmangaihna leh khawngaihna zawng zawng a bo ta vek mai," a ti hial a ni.

Italy dictator, Benito Mussolini pawh kha nupui nei reng chunga hmangaih dang a neih avângin a buai viau asin. Amah avâng liau liauvin a nupui, Rachele leh a bialnu hmangaih em em, Petacci chu an inbauh chiam nia!

Benito Mussolini & Petacci
A bialnu Petacci hnênah, "He khawvel ram zauvah hian nang lo chu innghahna tur ka nei lo," tiin lehkha a thawn hial a. A nupui nen pawh an inthen phah nghe nghe a ni. Khatih lai khan helna leh indona avângin Italy ram chu a chiri hle a, Mussolini dinhmun pawh a hlauhthàwnawm hle. Chuti chung pawh chuan Petacci chuan, "A bula ka awm lai chiah hi ka nun lai a ni," tiin a dam chhûng hun tâwp chu a hmangaih bulah a hmang a. Mussolini an kahhlum dâwna a kalsan duh tlat loh avângin kahhlum a ni ve ta a ni.

Adolf Hitler, khawvelin, 'Hepa thinlungah hian hmangaihna chi fang khat pawh a awm lo ve,' a tih hial pawh kha chutiang a lo ni bîk hauh lo ni ngei tur a ni, a kalna apiangah a awmpuinu, Geli thlalak a keng thîn nia!

Ngaihzâwng tam tak a nei a, mahse, hetih lai hian a bialnu pakhat, Eva Braun nena an tâwpna chu Mussolini-te pahnih tâwp dân nen a inang hle. Eva Braun nena an inngaihzàwn lai khan Hitler-a khan Unity Mitfold te, Winifred Wagner te, Leni Liefenstall-te a kawp reng tho va. Hemi a hriat avângin Eva rilru nâ chu intihhlum tumin pistol-in a inkâp a, vànneihthlâk takin a dam chhuak leh hlauh zâwk a ni.


Chuti chung pawha mi dang a la kawp reng avângin intihhlum tumin damdawi a ei leh a, mahse, a thih hmain an chhanchhuak hman hlauh a ni. Hei hi a hriat rual rualin Hitler chu Eva an enkawlna clicnic chu panin a bulah, "Eva, ka va hloh teuh tehlul che em! Pathian hmingin hetiang hi ti tawh lul suh. I ai awh zo tumah an awm lo va, chân ngam tur chein ka huaisen tâwk lo a ni.." a ti hial a ni.

A hnu, April ni 30, 1945 khan Hitler leh Eva Braun chu thi-a chhar an ni.

Billy Graham-a pawhin chu'ng chu a pumpelh bîk hauh lo. Lehkha a zir laiin a hmangaih em em chu a hmangaihzia lantîr nan mi dangte inpêk thin aia mawi zâwk 'Pangpar Special' a lei a. Chu chu pêk a han tum nâk chuan a hmangaih chuan a lo la duh lo va, ani thinrim chuan a pangpar special chu kawngsir tuihâwk luankawrah a paih a, a thianpa Wendell chu hetiang hian lehkha a thawn nghâl a.

'Ka tâna arsi mawina zawng zawng a bo ta! Nun hlimna tur ka nei ta lo!' tiin.

A thianpa chuan Rom 8:28 - Tin, Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria' tih hmangin a theih ang tâwkin hnêm mah se, awmzia a nei lo kher mai. Hun rei tak chhûng chu Billy-a'n a hringnun chu hrehawm takin a hmanphah a, a pianthar hnuin, "Nula emaw, khawvel thil eng thil mahin Pathian a hliah tur a ni lo; thil dang zawng aiin Amah ka thlang thawh zâwk ang," tiin a chunga thil thleng chu a pawm thiam thei ta chauh a ni.

Ni khat chu Boston khawpuiah crusade nei turin a kal a. Crusade buaipuitute a chibai kual den den laiin hmeichhe pakhat a hmu tlat mai! Hmána pangpar special pêk a tum ngeia kha.

Chu veleh sawi tur hre lovin Billy-a chu chechâng lék lovin a ding ngawi reng a, a lungphute chu inthumrawn tlut tlutin a thlanfîm a tla, a a lu a hai muai muai thei hial a. Kum 12 kal taa amah hnâwltu a ni tih hriain a nupui, Ruth-i chuan chu nu chu a va hnaih a, a pasal kut vuan chungin, "Ka hmuh duhna a rei tawh asin. Pathian hnênah pasal duhthusàm ka neih theih nan ka tawngtai thîn a, nangman i lo hnâwl avângin ka dîl chu ka hmu ta a ni," a ti a. Chuta chin a nupui nen a hma aia hlim zâwkin hun an hmang thei ta a ni.

Radium hmuchhuaktu, Nobel Prize pawh tum hnih ngawt dawng tawh, Marie Curie pawh kha a bàng bîk lo. Tum khat phei chu, "He khawvelah hian ka tân khawvar a awm tawh lo," a ti hial a ni.

Kum 18 a nihin mi hausa chhûngkua, Szezuki inah a awm a, a awmna tlangval Casimir nen an inhmangaih ta a. Casimir chuan a nu leh pate hnênah neihah a dîl a, a nu leh pate chuan nungchang leh hmêla pawha mi iaiawm loh tak mah ni se, anni ang mi hausa chhûngkaw mo atan chuan Marie chu an lo sit deuh a ni ang, an remti ta lo va. A rilru a nat em avângin Marie chu chu in atangin a chhuak nghâl a, Soborne University-ah science zirin radioactivity a hmuhchhuah phah nghe nghe.

Nobel Prize lo chhuah chhan pawh hmeichhe pakhat vâng niin an sawi. Alfred Nobel-a'n dynamite a siamchhuah atangin sumdawng hausa leh industrialist ropui tak takte chuan bethain sum tam tak an pe a, thahnem fé chu a khâwl hman a ni. Nimahsela, tuman a private secretary nena an inngaihzàwn thu an hre lo va, an ring pha hek lo. Chu nu, Bertha-i chu nula fel tak niin tawng chi li lai a thiam a, Alfred-a nen an inhmangaih hle.

Ni khat chu Alfred leh Bertha chu Sweden khawpui Stockholm-ah King Oscar-II hmu turin an zin a. Chuta lal fapa Arthur-a'n Bertha hmêlthatna leh felna a'n hmuh chuan khaw dang a hawi thei ta lo! A duh em avângin kum 1876 June thla khan Arthur-a nupui ni turin Bertha chu an hruai ta a, Alfred-a tawrhna chu sawifiah thiam rual a ni lo.

Chuti chung pawh chuan Arthur leh Bertha inneih hnu kum 11 chhûng chu hmangaih lehkhathawn an inthawn reng tho va. A hnua a pasal nena Vienna an thlen tumin Alfred chuan pâ takin a lo mikhual a. An inhmuh veleh Bertha chuan, "He i dynamite hmuhchhuah hi râlthuam atana hmang lovin khawvel hmasàwn zêl theih nan a hman theih ang em?" tiin a zâwt a. Chu zawhna chu Alfred chuan a chhâng a ni ngei ang, kum 1893 January ni khat khan Bertha hnênah lehkha thawnin, a sum neih eng emaw zât chu khawvle hmasàwnna leh râlmuanna atana thawkte hnêna pêk a tum thu a ziak a, kum hnih hnuah a intiamna ang ngeiin khawvela chawimawina sáng ber, Nobel Prize chu pêkchhuah tan a ni ta a ni.

Bertha-i'n pasal a neihsan hnuin Alfred leh Vienna-a bank nghâktu, Sofie Hess nen an inngaizâwng leh a, he nu hi hmangaih lehkhathawn 216 ngawt a thawn hman!

Hmangaihna tak hi chu aw..!!!
Share:

21 comments:

  1. aw hmangaihna tak hi chu aw......a va nunrawngin a va hlimpuiawm tak em.....post tha tak a ni....ka naupan lai chuan...0<3! tiin ka ziak ve ngat zel...

    ReplyDelete
  2. A ngaihnawm ka ti hle mai a...

    ReplyDelete
  3. @eL: Naupan lai i tingaihawm em mai a! Hahah..
    @Sisen & Anon, ka lawm e.

    ReplyDelete
  4. Miropui tak tak chanchin chhiar hi a ngaihnawm thin. Hmangaihna pawh an lo la na ve thin hle a ni tih i rawn tarlang chiang khawp mai. A bengvarthlak takzet e.

    Hmangaihna hi zawng a lo mak a ni. Milian zingah pawh hmangaihna hi a lo thuk theiin thil a ti thei hle a, tin, mirethei ber ber te kara hmangaihna lah a nep chuang bik hauh si lo.

    ReplyDelete
  5. A tha hle mai, ka hriat loh min hrilhtu hi hlu ka ti thin reng a, i hlu e; ka tan.

    ReplyDelete
  6. va tha em..hemi chhuah tur hian i chhiar zau hla mai maw...ropui e..nangpawh i bang lo anga ....tha khawp mai

    ReplyDelete
  7. A ngaihnawm, a bengvar thlak bawk ngei mai. Hetiang lamah chuan kapi leh kapu te inkar kha ka hre chhuak ve lo theilo a ni.

    Kapi leh kapu kha kum 80+ inneiin, inti tlan miah lova awmdun an ni. Kapu kha May 14th, 1890 apiang (recorded) niin, a kum 102 pumhlumna lawm kan inpuahchah mek laiin, chak tha tak niin tihsual palh vangin a pianchamphaphak thleng hman talo chuan kum 1992 May ni 2 ah a thi a. Khata tang khan kapi lungleng kha a chawei a tui tawh ngailo, Pathian hnenah lawmthu sawina hla aphuah vak2 a, type writer hmangin a chhuchhuak vek a. Chu'ng ho chu a thluk siamin tape recorder a leiah chuan a zai te chu a thun thin. Chutianga lungleng leh khawhar taka a awm hnu chuan a taksa a chaklo zel a, kum 2001 khan kapu, angaih em em chu min pan san ta a ni.

    Ka lung avan leng tak em.... ka trype lai hian min hmu lova ka lawm hle mai.

    ReplyDelete
  8. Hei chu ngaihnawm bengvarthlak bawk category ah ka dah e

    Kei chauh hi emaw hmangaihna lana ka lo inti a midang pawh an lo ni ve tho a nih hi he he

    Tlangval tih takah hmangaihna lam i post thei riau mai tih huklam te hi i lo tum rilru a ni lo maw :-)

    ReplyDelete
  9. i love affairs ve? SMS chhas atanga intanin han ziak la.

    ReplyDelete
  10. @Pu Cari, ka lawm e. Hmangaihnaah hian ka luangliam reuh lutuk a, ka rawn ti ve mai mai a ni e!

    @Pu Rp, ka lawm e. Min fuih phurtu i nih avangin ka lawm leh zual.

    @mama, bang bik nang aw..! Haha. Ka lawm lutuk e.

    @Pu Hv, i pi leh pute chu an fakawm hle mai. Kum 80 chuang intitlan miah lova innei chu an inngainatna pawh a thuk ngawt ang le.. Mi zawng zawng hi i pi leh pu ang hi ni ve thei sela ka va ti tehlul em!

    @triple, tih huk lampang chu a la hnai vak lo ve! Haha.. Han hmu te te phawt ila.. Hmangaihnaah hian ka luangliam thei em lawm le.. Ka lawm e.

    @Miss Aduh, nang meuh i rawn lut thin chu ka lawm ngawt mai. Ka love affairs chu tu'n an chhiar peih hlei lo'ng e!

    ReplyDelete
  11. Keini ai a mi ropui leh mi 'strong' tak tak te pawh hmangaihna ah an buai ve hle a, duh lo tu te pawh an nei ve a ni tih hriat hian rilru a ti nuam deuh :) Sual thlak hle mahse

    ReplyDelete
  12. @Jerusha, i comment chuan min tihlim kher mai:-) I rawn lenglut teh nawlh a, ka lawm takzet a ni. I rawn lenglut thin dawn nia.

    ReplyDelete
  13. ka rin dan chuan \ts-a hi,,,a comment dan ai chuan a comment tu hiuan a tih hlim zawk ka ring..

    ReplyDelete
  14. @eL, i ho reuh lutuk! A ni lovang tih pawh a hriat miah loh!

    ReplyDelete
  15. A ngaihnawm cher cher hle mai Ts. China Missionary ropui Hudson Taylor pawh kha a hmangaih chuan Chinaa missionary a kal a duh ve miau loh avangin rilru na takin a thren ta a nih kha.

    ReplyDelete
  16. @Pa Sam, nang meuh i rawn lenglut chu ka lawm kher mai. I sawi Hudson Taylor ang hi ka mi ngaihsan chi an ni. Hmangaihna avangin hmangaihte an chân ngam a.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers