05 April 2011

Mizoram Kutdawh

Aizawl-a awm chuan kan hre vek ang a, kutdawh an lo tam tâk zia hi. Anni ka hmuh hian ka ngaihtuahna hi a kalthui thîn khawp mai. Hmânlai kan pi leh pute khân Mizoram-ah kutdawh an awm tih rawn hmu ta sela, mak an ti ngawtin ka ring.

A tlângpuiin kutdawh kan tih hi mitdel an ni hlawm a. Kawng sirah bâwm dahin an zai mai thîn. Tumah pe turin an dîl lui lo. A thlâwna pawisa hmuh aiin an thiam ang tâwkin an zai mai a. A nihna taka sawi chuan zaia inhlawh an ni. Nilêngin an zai a, chu chu an ei bêl ber a ni. Thenkhat erawh chu dâwr hrang hranga lût kual thîn an ni a, he'ng ho hi pawisa pe lova chhuahtîr a zahthlâk thîn a, kawng sîra thu ai chuan an hmuhchhuah hnem ka ring thîn.


Thenkhat chu nupui fanau neia chhûngkua din tawhte an ni. An kutdawh atangin nupui fanau an châwm thîn. Chhûngkaw châwmna khawp an la hlawhchhuak thei hian kan la chhiat loh zia a tilang. An zînga thenkhat chuan inah TV an hûng a, mobile phone-te pawh an hûm ve. He'ngte hi an kutdawh atanga an hlawhchhuah a ni a, mawi lo pawh kan ti mai thei. Mahse, an mamawh ve miau a!

Tanpuitute hian zaithiam an tih avânga tanpui an nih ka ring lo va, anmahnia khawngaihna leh lainatna infawkkhâwm atanga lo chhuak a nih zâwk ka ring. Thenkhat erawh chuan pawisa thleng nawi nan an hmang mai thîn. Cheng 10 an thlâk a, cheng 5 an la mai. Hei hi mitthi râl tum, cheng 100 pêk paha, "Cheng 50 min lo kîr r'u.." tih nen thuhmunah ka ngai. Mahse, tuimal far te tein tuipui a siam thîn bawk si a le!

Kan khawpuiah ngei hian vai tam tak kutdawh an lo awm ta! Hei hian ngaihtuah a tithui ka ti. Mizo-ah pawh kan intodelh tâwk tawh tehrëng nen. A zak thei lo lo-ah an la tang zui a. Bazar lûn laiah an thu a, mi kawng kal lai an pawt buai a, pêk loh zahthlâk takin mi an siam thîn. He'ngte hi kutdawh hnawksak an ni; kan mamawh lo.

Mahni duhthu ngeia kut dawh an awm ka ring lo. An zak ve thîn tho. An hah a, an chau ve thei. An inthlahrung a, rilru nat an hre ve tho. Chu vângin kan tanpui loh pawhin i hmusit kher lo ang u. Tanpui ngaite tanpui hi kan tân awmhmun missionary a ni.

Pe rawh u, tichuan pêkin in awm ang.
Share:

8 comments:

  1. Kutdawh ngailova ka awm hi PATHIAN malsawmna ava ni em! Ka fel vang, ka that vang, PATHIAN thu ka awih em vang, PATHIAN tana ka inhman nasat avang te a malsawmna hi dawng tur ni ta ila nitin hian eikhawp ka hmu lovang. LALPA ka lawm e, tih mailo chu sawitur ka neilo.
    Tanpui ngaite tanpui hi ringtute tih tur a ni. Sum leh pai chauh pawh ni lovin, Peter-a leh Johan-a te angin sum leh pai engmah pek tur neilo pawh ni ila, Nazareth ISUA hminga damna thu kan hrilh a pawimawh a ni.
    A sei ta hle mai...

    ReplyDelete
  2. A tawp i kharna khi a tha khawp mai. Kutdawhte hian kan tanpuina an mamawh takzet a ni.

    Kutdawh ve miah lo, piansualna nei bawk si lo, kan zaithiam te pawh, an zaithiam vang liau liauvin a thlawnin pawisa tam takin kan vur thin a, kutdawh te phei chu tanpui awm hliah hliah kan ni e.

    I fa chu sangha pe la, ni khat atan atan a puar ang a, sangha man dan i zirtir erawh chuan kumkhuain a puar thung ang. Kutdawh te pawh hi, pawisa peka tanpui mai bakah hian an tih ve theih awm ang ang te zirtir a, anmahni intodelh tir ve tum hi a tha khawp ang.

    Ka hriat ve phak chinah chuan Chakma zingah hian kutdawh an tam thin. Mitdelte pawh hi kutdawh tur ringawtin khawpui lamah an zin tang tang thin. Mitdel pakhat lo thleng thin phei kha chuan ka nu hi a vau deuh khar khar tawh. Tin, kutdawh naupang pawisa pek hma loh chu min um tang tang thin te, min tihzah ngei tuma min pawt thin te hi pawisa ka pe ngai lo bawk. Kutdawh theuh theuh an lo inang lo khawp mai.

    ReplyDelete
  3. Mizorama vai awm tur te hian ILP an mamawh tih chu kan hre vek ang. Mizoram lo kal tur an nih pawhin, tu emawin an sponsor angai a, an hnathawh tur chiang takin ziah fel thlap hnuah an kal chhan tur chhuanlam a that viau chuan ILP pek anni thin.

    Kutdawh te hi ILP neia lut an nih ka ringlo.

    ReplyDelete
  4. e khai i lo dam maw? ka bo vang vanga Mizoram ka rawn haw zawk. Ka haw hnuah ka net a lo chhe sia ka lut thei lo pawi tak a ni. Kutdawh ai pawhin ka chan a chhe ta emaw ka ti.

    ReplyDelete
  5. Mizoram chhunga vai kutdawh ho hi ka ngaithei der lo, an lehkha ken xerox copy fiah lo em em mai te hi an in copy saka an keng zel mai niin a lang, ka duh dan tak phei chuan hetianga kut rawn dawh ho hi police te hian man sela thawn haw zel sela ka ti.

    Vai mipa kutdawh pakhat ka hmuh pawh kha, a kut dawh chhan a ho khawp mai, lei a neih loh vang ringawt mawle.

    Bazara ka kal laiin chakma kutdawh pakhat hian dawrah kut a dawh a, dawr neitupa khan pawisa nawi Rs 1 a lo pe a,a duh lova a paih vel mawle, kutdawh ho zingah pawh hian khawngaih leh tanpui phu hi chu an awm ve tho.

    Mite angin hausa in nuamsa lo mah ila, kutdawh em ngailova kan awm hi a va lawmawm em !

    ReplyDelete
  6. @Pu Duhawma, a dik chiah. Kan lo vannei thlawt e. Pathian min hmangaih zia hriat thar nan hmang thiam teh ila aw..!

    @Pu Cari, i comment a va tha tehlul em! Kutdawh zaktheilo hi ka ngaina lo ve khawp mai. Vai kutdawh phei chu ka la tanpui awm pawh ka hre lo. Bazar chhukthla vela kutdawh, pawisa peka lawmthu sawi zat zat thin a awm a, chutiang chu tanpui an nuam bik riau asin.

    @Pu Hv, kutdawh rau rauah vai kutdawh hi an lo hnawksak deuh a nih hi. Zah an hre tawh der lo lehnghal. Police-ho hian Mizoram-a ILP nei lova lo lut vai sela chuan vai kutdawh an rêm duakin ka ring.

    @Pu Rp, dam alawm. I ngawi reng a nih chu mawle.. I reh ka lo ti ka lo ti a. Facebook, blog leh misual.com-ah i reh vek. Tunah chuan rawn chechhuak ve tawh teh khai.

    @Triple, kei tak chuan ka la tawng lo a, bazar-a kutdawh zingah mi kawngkal pawisa dil lui tlat an awm thin an tia. Chu'ngte chuan pawisa an pek hma chu an zui a, a kawng kala te tan pawha zahthlak khawp a ni. Mizo kutdawh zingah hetiang an awm lo niin a lang. Ni e, kan vannei thlawt e.

    Ka lawm e.

    ReplyDelete
  7. Ku TS:
    Ni ngawt mai ti raw, Tha leh mawi leh tul kan tih dan ang zelin mahni hmazawn theuh a mawhphurhna hi i hlen ang u.
    A tul chuan sorkarin hma la teh se.

    ...khrum

    ReplyDelete
  8. K'u Khrum, ni khawp mai. Sorkar chet a ngaiin ka hria. Mipui ringawt chuan hetiangah hma kan la thiam si lo a. Ka lawm e.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers