06 June 2011

GAC

Hlimtea mi lêng lawina rûn,             A
A sakhming Hmangaihna Rûn chu.    B
A ko mêk, lêng thar dàwntuai khu;   B
Kawptea nautin lawina hmun.          A

An thlang ber fo fam chan hmain,   A
Tu'n lo sèl lo u, chawimawi phû.     B
A chhûlchhuak lêngtin zir hruaitu,   B
A bei zêl dâwn, 'ram tân' tiin.         A

Thiamna sáng duhin ka rawn bêl,   C
Duhte'n a angah min lo pawm,      D
Chuti'n thinlai tui ang luang dêl.     C

Lenrual zawngte chhima'n ka sâwm, D
Chuti'n duhte'n an rawn 'D' hêl;        C
Thiam petu lu an tihai hlawm!         D



He sonnet hi a rhyme scheme chu abba abba cdc dcd a ni a, (hriatthiam a awlsam nan a tâwpah ka ziak zêl e) sonnet-ah pawh Petrarchan sonnet niin kum 2009 August thlaa kan college Govt Aizawl College ka phuahna a ni a, a bo tawh emaw ka tih kha hmân zânah ka haichhuak leh nawlh a, ka lâwm khawp mai.

A remchâng êm a, tlêm han ziak zau law law ila. Petrarchan sonnet hi a chunga kan hmuh ang khian tlar 14 a ni a. A hla hi hlâwm hnihah hen a ni a,  hlâwm hmasa zâwk chu tlar khatna aanga tlar riatna thleng niin chu chu Octave an ti a. A hlawm hnuhnung zâwk hi a tâwp lam tlar ruk niin chu chu Sestet an vuah bawk a.

Hlâwm hmasa Octave kha tlar li ve ve-ah henin châng hnihah chhuah a ni a, chutiang hlâwm khat chu Quatrain an ti a;  hlâwm hnihna (hnuhnung zâwk) Sestet pawh kha hlâwm hnihah hen tët leh niin châng khatah tlar thum ve ve a awm bawk a, chu chu Tercet an ti bawk.

Tin, tlar tinah thu lamrîk pariat heuh a awm a. Hei hi a phuahtu azirin lamrîk kua aanga sâwm thlengin a hman theih vek tho va. A phuahtuin zalênna zau tak a nei a ni.

A rhyme scheme chungchâng hi han sawi zau leh lawk ila. abba abba cdc dcd-ah hian a hawrawp inang zawng rhyme (a tâwp thumal lamrîk) a inang vek a ni. Entirnan, châng khatna khi a rhyme scheme chu abba niin a tlar khatna leh tlar lina ('a' ve ve) khi a thumal lamrîk a inang zêl a . A dang pawh chutiang zêl chuan.
Share:

17 comments:

  1. Tha thei mange, ka thiam loh hi nalh tak tak hian i chhawp chhuak thin a, ngaihnawm ti takin, chhuang tak che in ka chhiar thin e.

    ReplyDelete
  2. I harh hma a, a hmasa pawlah i thut theih zel beisei phawt teh ang. Sonnet hi kei ka taimak lohna lam ania, mapuia pawh khan Shakespearan sonnet a uar viau thin kha maw...han ti zel rawh khai...keini blank verse bak hmang peih lo tan a hlu e...

    ReplyDelete
  3. Tsa te, dolerich te ho hi thu leh hla lama ka pur chawkna tak tak in ni e. Thu tha tak tak in ziahte hi hmaih nei miah lovin ka lo chhiar zel e...

    ReplyDelete
  4. E khai ! Hei chu a dan a va dang ve. Ka thiam ve lo re re,Ts i va thiam chikim ve le !

    ReplyDelete
  5. @Pu Hv, em em a che!
    Ka lâwm lutuk e!
    Hehe..

    @dolerich: Nia, Mapuia khan Shakespearan Sonnet chu a uar tak khawp mai. GAC-a a kal chhung zawngin poetry inphuahsiakah pakhatna a nihpui vek nghe nghe asin. Blank verse hi a hahdam ber e. Tun hnaiah chuan sonnet ka phuah hleithei ta lo. Ka lawm lutuk e.

    @CyberThug: Inhnemhnanna tham awm lo chung pawha i lo chhiar zel avangin ka lawm takzet e.

    @hanc: Teh hlawl chuan. Fanu tlanbo?! I rawn lenglut a, ka lawm e.

    ReplyDelete
  6. Sonnet hming hi chu ka hre tawh thin a, a awmzia reng reng ka lo la hre ngai hleinem. I hrilhfiah chiang bawk a, ka hrethiam pha lek lek. A thluk i ziak khi, a ri ka hriat loh chuan ka man pha chuang lovang.

    Hmar lam chhul chhuak Tsa leh Chhim lam chhul chhuak Dolerich kan nei a, thu leh hla lamah chuan ka lungphang lo khawp mai. Nasa lehzualin tan han la teh u.

    ReplyDelete
  7. A tha hle my, a nalh ltk tlat...

    ReplyDelete
  8. i hi!! Mizo Hla kungpui mualah i la chuang ve ngei ang le heti hrim hrim chuan!!

    Italian sonnet an ti bawk em kha? Sonnet hi a hlu danglam bik riau a sin.

    Nang zawng i ti tha thin e, i chhangchhiat hma khan han ti vak teh, ka nau.

    ReplyDelete
  9. @Pu Caribou: Kei pawh a tîrah chuan abba tih vel kha a awmzia reng reng ka hre lo. Mahse, vanneihthlak takin poetry-ah phak tawk tëin ka tui chho va, ka hrethiam chawp a. Ngaihven leh tuina zawng a nih loh chuan poetry ngat phei hi chu man a har khawp mai! I mi fakna anga dolerich hming nena tlar em chu ka phu lo khawp mai! Ka lawm lutuk e.

    @hriatpuia: I avatar chu leh! Hahaha. Ka lawm lutuk e.

    @Pu Rpa: I va han reh tehlul em! Hlakungpui mual zawng, keini tan a awlai lo viau ang le.. Aw, ni e. Italian Sonnet an ti bawk. Petrarchan khan he sonnet hi a uar em avangin Petrarchan sonnet an ti a. Englekhawle.. Kan la ti thei zel ang emaw chu.. Ka lawm lutuk e.

    ReplyDelete
  10. Hetiang lam hi ka hre ril lutuk lem lo a. Mahse a ho ka ti lo. Miin an ngaihhlutzia leh keimah ngei pawhin loh theih loha college-a ka zir a ngaih kha a ni a, a awmzia viau a ni.

    I ril thin khawp mai.

    ReplyDelete
  11. Khaih khaih khaih! K'u Krista, a tui lo tan chuan thil ninawm tak a ni zawk. Chu chu kei pawh tui lo atanga tui chho chawp ka nih avangin ka hrechiang khawp mai. Lunglen khawhar changa inbunchhuah hawk hawk nan te pawh, sonnet chauh lo poetry hrim hrim hi tangkai tak a ni. Min chhiarsak a, ka lawm lutuk e.

    ReplyDelete
  12. i phuah thiam hle mai, TSa nge nge ...A
    Hetiang hi ziak zel rawh ...B
    Nizanah ka ngum ka sawh ...B
    Ka rilru ah chuan beram an be, be be ...A

    :D haha ka thiam ve chhun. lolzzzz...

    ReplyDelete
  13. Haha.. Hotupa chu chawplehchilh paw'n i rawn tih theih nghal kha..:) Ka lawm lutuk e.

    ReplyDelete
  14. Khaih aw hei chu ka hriatthiam phak bak a nih hi, tingtang hrui kim nena hring dup hring dup ti a rem theih lam hi ka hriat ve theih lam a nih awm hi maw.

    Englekhawle, GAC hi nihgt shift ngata ka lo kal chhuah ve tawhna a nih avang hian ka ngaihlu ve hrim hrim mai.

    Ka classmate zawng te kha...A
    Khawiah tuan ve takang maw..B
    An zirlaibu zozai te kha....A
    Engtin thehthang ve tak ang maw..B

    kei pawh ka han ti ve chhin a nih hi :-)

    ReplyDelete
  15. E he! Triple, GAC chhuak i lo ni reng elo! A tha hle mai :-) Kha, i rawn ti nghal zat thei lehnghal. Englekhawle, ka lawm e.

    ReplyDelete
  16. TS-a chu i ril fu mai ka ti, Sonnet tih lam hi chu kei, ka til thenna lam a nih loh vang nge han sawifiah ngial mahla, ka hrethiam der lo mai, thil dang i ziah pawh hi a ngaihthlak nawm in a ril thei thin khawp mai,.

    ReplyDelete
  17. @Hmelthatea: Ka blog i rawn tlawh thin a, ka lawm khawp mai. Nia, mahni tui zawng a nih loh chuan a harsa ve bawk em a ni!!

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers