27 June 2011

Ka pu mawlh mai kha!

Ni e, amah ka pu kha a tûnlai awng takin, 'ka idol' zawng a ni chiang alawm. Midangte angin khawvel finna leh thiamna nei lé lú lo mah se, ka tân chuan he átna kailâwna min nawr lût a, min zui tlattu a ni miau a..

A chanchin min hrilhte hlei hlei khân ka thinlung a hneh takzet a, a thil la tawn leh zêl turte nen lam nghâkhlel takin ka thlîrphah hîn a nih kha. A kuta hlîtpui kawngbo ang maia thil dum raih leh a mawngtama ser, a chaw bâr khat tiat dâwn laia lian awm te, a hnarkaw chhûnga hnapkhir ang taka pangtichawr lo awm ngoh chhan leh a beka perhpâwng tiat zeta arngêng bawk rûn mai te, a chala Pu Vâna saihlum tia zeta tísa fu larh mai leh a ha intlar hát zînga beram vâr rual zînga a dum lo inzep chhén ang maia a dum inzep tat te hian thawnthu an nei vek asin!


umkhat pawh a hianpa nena an ramkalnaah savawm an táwk a ni âwm e. A hmasa zâwka kal a hianpa chu a chhawm bauh bauh a. Chutih lai chuan an kawngzawh tur lam aangin savawm nuhur lian deuh mai hi hlauh nei niâwm fahran hian lo tlânthla thut a. A hmasaa kal a hianpa chu kawngsîrah a lo inthiarfihlîm hman hlauh mai a. Amah ka pu chuan lo hmu ve hman hek lo le, a savawma lah khân position siamha hman hek lo, ka pu chu a kapah tak a kokichhuan láwp a. Ka pu pawh chu savawm hnungah nau nuar puak mut ang maiin a bei hlè hle a. Chutianga rem angreng tak, rem hauh si lo va awm chung chuan an kal tawhna kawng lamah an inpaw nui thla uar uar mai a. A hnuah a hianpa hnênah a hlauhzia lam ai mahin savawm nuhur neih uihzia ringawt a hrilhfâk a ni âwm e.

A kuta thil dum awm raih hi a sawi dân chuan chu savawm hnunga lungawi fahrana a bei lai khân khawih loh tur a lo khawih palh a, ani tenchhe lutukin a hnuah a kuta thil kai, uih zet mai chu duh lovin leiah a tât ta vak a. Chuta ang chuan chu thil dum chu ama thuin, ama awm awmin a lo awmchho ta a ni. A sawi dânin chu thil dum chu a duh hun hunah a tirehin a tikai leh thei a ni âwm e.

umkhat chu ram kâng helhnaah a kal a ni âwm e. Chutah chuan hâl lai a nih avâng leh thlî a tam avângin helh a harin, a helhtute pawh an kâng lek lek zâwk a. Ka pu pawhin theihtâwp chhuah mah se, midang ang thovin a helh sâwt mawh khawp mai a. Chutia a'n helh sâwt tak tak theih tâk lovah chuan ka pu thinin a tuar ta lo va. A alh hrang te reuh té tèa awm ho chu a hut hlum ta hmak hmak mai a. A hiantena an khap pawhin zu hulh duh hauh lo va. A hnua a sawi leh dân chuan, khatia a hut khân a hik lutuk lo va, vawkthau er ang maiin a ri sar sar a, sam rim a nam hmui cham cham bawk a ni âwm e.

Tichuan, chutia meialh a huta hut hlum ta chu a mawngtam pawh kâng nasa angreng hle a. A tirah chuan lian deuhin a durh pup a, chu a durha chu naupang baloon keng ang maiin hutpuah phét a tum a. A hnuah chuan a mawngtam durha chu hutpuakin a ri deuh khurh a, a za hiai a, a rawn thîp nghâl vát vát bawk a. Zan danga thatchhiat deuh chânga hnuailêng lama awm mai hîn chu loh theih lohna avângin kum chanve dâwn chunglêng lamah a anphah a ni âwm e.

A mawngtama chaw bâr khat dâwna lian lo awmchhan chu zan khat chu chunglênga awm reng a ning thut a. Hnuailêng lamah a tlathla thurh a. Chuta ang chuan chu ser chu ama thuin, ama awm awmin a lo awmchho ta a ni. A sawi dânin chu ser chu a duh hun hunah a tirehin a tikai leh thei a ni âwm e.

umkhat leh pawh an hianzahovin an títì mai mai a. Suakchhîngi nu vaihlo zial ngei chu an zukhu hlat hlat bawk a. A hiante uang vêl chuan vawikhata zu tam thei ber zawn an rawt ta a. Midang chuan an hmuiin pahnih pathum an pet mai a. Ani ka pu lah chuan chutianga tih chu duhtâwk ta mai lo chuan a bengkuaah a thun a. A beng lehlam a'n bêng pawp a, a lehlama a vaihlo zial chu a khu luih a, a alh puat a, a tla tawp a ni âwm a. Benga dah pawh chu duhtâwk ta mai lo chuan a hnarkua pahnihah a vaihlo zial bul lam chu a thunlût ve ve. A'n thaw káwk a, a khu hlat hlat a. A kaa a thâwk chuan a hnârkua aangin a khuchhuak a, a hnâra a thâwk chuan a ka aangin a khuchhuak mai zêl a. Chumi um chuan pakhatna a la a, lawmmanah Suakchhîngi nu vaihlo zial têlkhat chu an leisak ve a ni âwm e.

A hnâra pangtichawr awm hi a sawi dân chuan chuta an intihsiak um chuan a hnâr lama awm vaihlo zial pakna lam a lo phui tâwk lo va, chutia a hnâra a'n thâwk leh chiah chuan vaihlo ziala vaihlo them pakhat chu a lo tla zauh a. Chu chu chung lamah hîpchhovin a tâng ta tlat a. Hnâr tiza mai mai tu-ah tiin lâkchhuah pawh a tum lêm lo a ni âwm e. Tichuan, chu vaihlo them chu nikhua a lo rei deuh hnuah pangtichawrah lo changin a hanglian chho ta a. Amah pawhin mahni rîla rah ngei chu tiin ha takin a enkawl chho ta zêl a ni. Chuta ang chuan chu pangtichawr chu ama thuin, ama awm awmin a lo awmchho ta a ni. A sawi dânin chu pangtichawr chu a duh hun hunah a tirehin a tikai leh thei a ni âwm e.

Ka pu hian a tleirâwl laiin tleirâwl hmaibawl an tih hi a nei ve a. A hmaia thil awm tawh phawt chu ngaithei lo ém êm mai, a tel lovin awm thei sela chu a hnâr pawh hleh a duh hial ang tih tur khawp hi a ni a.

umkhat chu a ngaihzâwng nen an inkâwm a. Tîtì mai mai pahin a hmaia arngêng chu a dehtîr mai mai a. A arngêng deha chu hrikhrah deh ang mai hian a puak pup pup mai a. A châng leh a chikin a chikchhuak leh zàwih zàwih hîn a. Ani lah chuan zahah la hek lo, nuam a ti ém êm mai a. A nui huah huah a. Chutia a nui vei huah huah chu a ngaihzâwng chuan hrethiam lovin a deh chhunzawm duh ta lo va, inhau chhovin an inhen phah ta ringawt mai a.

Ani lunglêng leh si chuan, 'Kan kârah ngêngpui râl lo hrâng e, kei ka tuara'n a na ém mai..' a ti a ti ta mai a. A tâwpah phei chuan a lunglêng lutuk tihngaihna hre lo chuan sakawrbakcheh a la lawk a, 'nang vâng mai maia kan inhen chu le..' tiin a hmaia arngêng pakhat lo bawl ve sek chu a hlep ta hlawk mai a. A tîrah chuan a arngênga chu a rawn chhuak ha duh khawp mai; mahse, a hnuah chuan thi tlém a rawn tel het het a, a rei tial tial a, a tel hnem tial tial a. Ani enkawl ngaihna hre leh si lo chuan helret hlûm a la sauh sauh a, a bel hnuin puanchhiain a tuam hnan hmiah a. Mahse, a damphah lo kher a niang chu, a tâwpah chuan a rawn pûn ta nge nge a. Chuta ang chuan chu arngêng chu ama thuin, ama awm awmin a lo awmchho ta a ni. A sawi dânin chu arngêng chu a duh hun hunah a tirehin a tikai leh thei a ni âwm e.

umkhat leh pawh a tlangvâl laiin an khaw zâwlbûkah intihhlimna angreng a awm a. Chutah chuan an khuaa zaithiam an neihte leh fiamthu thawh thiamte chuan an thiamthil an thawh a. Ani lah huau huau lâwm tak, sachân huau huau te, salu lâm huau huau te, khuangchawi huau huau tea lo tel ziah hîn a nih avângin chutah pawh chuan tel vein a hmasa berah a hu a. Chutah fiamthu thawh thiam Rongenga pain fiamthu a thawh lai chuan za leh za lovin uar tâwkin a lo nui ngheng ngheng a. A hmaa fiamthu thawhpa ding pawh hrechang tawh lovin a nui bu tlawrh tlawrh a. Chutia a nuih zâwng chuan a hmaa fiamthu thawha ding, Rongenga pa kezungpui chu a chalin a va tauh leh chawrh hîn a. An fiamthu thawhpa nen phei chuan an inhù lo chauh a ni.

A chala tísa bâwk lauh awmchhan hi a sawi dân chuan chu an intihhlimna hmuna a kalnaah a ni a. A nuih nasat ém avângin a hmaa fiamthu thawh, Rongenga pa kezungpui chu a chalin a va tauh leh charh hîn kha a nia. Ani Rongenga pa lah ramvachal tih takah a kezungpuite chu lungsakhat tak alh ang mai a lo ni kher nen. Chu chu ka pu, tlangvâl tuaitìr lam chuan a va tauh zâwng chuan a chal chu a páwng lâwng mai a. An bân hnuah tuboha chhut luh leh mai a'n tum a, a lo chhut luh mai theih awzáwng lo va. A tihngaihna hre lo chuan, 'Ihm.. Sam angin âwn hmak ila a ni mai 'lawm..' tiin puanthemin a âwn kawh lóh mai a. Chu chu a hiante leh nulate chuan chhaihin, 'A chalah a sazu a o ve..' an tihphah nghe nghe a. Chuta ang chuan chu tísa bâwk chu ama thuin, ama awm awmin a lo awmchho ta a ni. A sawi dânin chu tísa bâwk chu a duh hun hunah a tirehin a tikai leh thei a ni âwm e.

umkhat leh pawh an naupan têt laiin a hiante nen thei an lo va. (An thei lawh hming chu a tui ém avângin midang hriat a hlau tlat a, chuvângin thupsak mai mai ila.) An lo euh a, a hmunah an ei euh bawk a. Nihlawhthlâk hlein an hria a, an thei lawhna hmun pawh tûn thlengin, 'Nihlawh hmun' tih a ni ta nghe nghe a. Haw pahin an thei lawhte chu an ei chho va, tui an ti ta ém êm a. A hming kan hriat loh avângin a hmingah 'Tuifúni' ti ve leh mai ila. Chutah ka pu chuan chuan in a thlen hnuah pawh henawm khawvêng te chu a sem den den a. A pêk dâwn apiangin, 'Sem sem dam dam, ei bil thi thi' a ti ziah a. Tûn hnuah he a awngkam pawh kan hriat lâr tâk ém hi. Hetia an thei lawh a sem kual avângin nihlawh a inti ém êm a, a mumang pawh a hatphah hle niin a sawi a. A hmaa changêl leh nghavawk mai mai hmu hîn khân nula malno tak tak, Chawngmawii leh Sichangneii thlengin a mumangah a hmuhphah ta niin a sawi a ni. A pawmawm hle.

A ha kara kekawrtè niâwm tak, a dum inzep tat awmchhan nia a sawi dân chuan, khatia an thei lawh a'n ei tur khân iptepui chhûng kha en lovin a thil lâk hmasak ber chu a seh nghâl rap a. A ri nghâl rak a. A thil seh chu a han enchian nâk chuan khawkherh rah ro chang ha zet mai hi a lo ni a. Ani naupang tè, ha la o nghet tak tak lo chuan lo dâwl zo íkháw lovin a ha pakhat a ui ém êm, meihawl pawha a nawh phal ngai loh chuan a peihlohsan ta nghâl a. A nat chu thuhran ni se a tuar na ém êm a. Chuta ang chuan chu hadum inzep tat chu ama thuin, ama awm awmin a lo awmchho ta a ni. A sawi dânin chu hadum inzep tat chu a duh hun hunah a tirehin a tikai leh thei a ni âwm e.

Chutiang khawpa ropui leh tuarchhel, mak dangdai leh huaisen, savawmin a put pawha nui uar uar thei, ka pu chuan chanchin dang pawh a la ngah hle a. A theih hrâm chuan lo la thihtîr loh dân ka lo ngaihtuah ang a, a hnuk ka lo vuan âng âng ang a. Chuta a la dama, a phal chuan a chanchin dang chu remchângah ka la rawn thai ial leh dâwn nia.

Ka pu mawlh mai kha, ropui deuh mai asin a nih..!
Share:

19 comments:

  1. Upa leh tar ho hi an fing asin. Naupang ngaihnawm tih zawng leh bengverh zawng taka titi an thiam hle a. I pu pawh hian naupangchhe hrilhin a hrilh che a nih hmel. A enga pawh chu nise, i pu hi pa titi thiam tak, presence of mind nei tha tak, tupa tunu te pawh an kum phu tawka kawm thiam, pa tlawmngai thei tak leh tuarchhel tak a nih ka ring.

    Ka chhiar thla zel a, mahniin ka nui ker ker mai. I pu hian chanchin a ngah ka ring khawp mai. A dang pawh lo ziak zel teh.

    ReplyDelete
  2. Va ngaihnawm reuh e.

    Pu neih hi ka chak ve thin khawp mai, pu tak tak. Ka pute an boral hma a, titipui tur hi ka duh ve thin a nia aw.

    I ziak tha ka ti thlawt. Kumupate ngaihsak hi a tul a nia.

    ReplyDelete
  3. ka chhiar a, ka chhiar nawn leh a, a ngaihnawm ka ti khawp mai. I pu chuan chanchin a ngah bakah i ziak ngaihnawm thiam em a, thui deuh mahse, a tha lutuk tlat mai. Remchang hmasa berah a chanchin dangte pawh ka lo beisei leh ngei ang. I pu leh savawm an in bengberek lai chu ka hmu chak kher mai,... lols

    ReplyDelete
  4. Hahaha.. A sei lutuk a, chhiarchhuah a huphurhawm dawn tehlul nen! A hmasain lawmthu ka'n sawi hmasa a ni e.

    @Pu Caribou: A nia 'sin. Ka pu hi a nihna ang takin ka la ziakchhuak thiam lo zawk mah mah! Thiam deuh chu ni ila a vannei ni tur a nia! Blog-ah hian chhiar tham lawih ka post khât em a ka tia, post ve thuai mai. Min lo chhiarsak chu ka lawm kher mai.

    @Pu Rp: Pu hi ka nei vannei ang reng. Ka nu pa hi Pastor a nia, ani tluka mi tha leh dik hi ka la hre ngai lo. Thu leh hla lama ka tuina bulpui ber pawh amah a niin ka hria. Ka vannei khawp mai. I mi faknaah ka lawm takzet e.

    @Hmelthatea: Ka thuziak min lo chhiarsak thin a, ka lawm khawp mai. Nui sun sun chungin i comment ka chhiar. Part 2 hi ziah sa, khitiang bawka sei chu ka la nei a, lo la dahthat ngei chu ka tum ang e. Ka lawm e. Nia, savawm kha...hahaha.

    ReplyDelete
  5. A sei mhs chhiar anuam, i ziak thiam bawk, i pu hi a pa hmel ka ti, kawm anuam ngawt ang, adang rawn ti leh vat rawh ;) anuam ngawt ang, adang rawn ti leh vat rawh ;)

    ReplyDelete
  6. Ka naua chu Pu i lo nei bon bik hle mai! I ziak ngaihnawm khawp mai. Fiamthu thiam i ni tih i thuziakah pawh a langin ka hria.

    Thil pakhat, thlukna hi a chhiartuten an chhiar sual loh nan kan dah thin a. Vee eel cee-a te anga word tina thlukna dah tum niawm fahrana dah vak vak hi a tul ber lo ania. I dahsual ka tihna erawh a ni lo aw.

    Chuan, ka ziah tura ka lo ruahman ania, min ziah khalh daih! Ka pu Hranga chanchin ka la ziak ve ang! Kudos nau nau.

    ReplyDelete
  7. @Anon: Ka hria che a nia. :-) Ka lawm e. A dang pawh ka la nei a nia.

    @K'u Zara: Nia, thlukna hi ka dah uar khawp mai. Thluk seinaah tawh phawt chuan ngaih pawlh theih tur awm lohnaah pawh ni se a theih chin chinah ka dah thin; thlukna chhinchhiah nan ni lovin thluk seina chhinchhiah nan. Ka ti laklawh tawh a, han thlah mai chu ka la phal lo deuh. I pu chanchin chu lo ziak mawlh teh khai. I comment tha tak avangin ka lawm e.

    ReplyDelete
  8. Ngaihnawm ti deuhin ka chhiar a, tak tak nge ni anga i phuahchawp i rawn ziak ni ang aw tiin ka ngaihtuah. I suangtuahna te hi ngaihnawm deuhin i ziak thiam riau a, eng chen hi nge a tak tih pawh kan hre thei tawh dawn hleinem mawle :-)

    I pu hi tunlai tawng takin a MAN tiah tiah hmel hle mai. A tlangval lai chuan khawkhat tlangval tlawmngai leh huaisen a nih ngei ka ring.

    ReplyDelete
  9. Thlukna dah hi ka sawisel hran lo ania. I thuziak ka chhiar hian i dah tha khawpin ka hria. Mashse thenkhat hi chuan dah dik an tum lutukna lamah hian an tisual ka hmu fo mai. Chu chu ni ve suh ka tihna a ni ber. Tin, thenkhat hi chu consonant-ah kan thluk thin a, dah thiam pawh a harin ka hria. A pawimawh ber nia ka hriat ve chu a chhiartute'n a nihna tur dik taka an chhiar theih nan thlukna hi dah tur a ni tih hi a ni.

    Lehkhabu pakhatah chuan 'na' tihah hian thlukna an dah vek mai a, thenkhatah kha chuan a lo dik ta hauh lo. Rilru na tihah te kha chuan na han thluk khan a buai ta vek a ni. Ka sawi tak teuh chu a. Ka point i man ang chu maw...ka sawisel hran lo che nia...

    ReplyDelete
  10. @triple: Nia mawle..! Ka pu han man tiah tiah ziah hi aw..hahaha. Ka lawm thin khawp mai. Ka phuahchawp mai mai a nia, chanchinbu pahnihah ka chhuah tawh nghe nghe a. In mi fak leh fuihna te hian min tichakin min tiphur a, a dang ziah leh pawh min tichâk thin. Ka lawm tak meuh meuh a ni.

    @K'u Zara: Hrethiam tehreng mai! Thenkhat chuan ri sang leh hniam chhinchhiah nan an hmang thin a, hei hi ka thlawp lem lo khawp mai. Ni e, dah uar tum luatah chhiartute tana ninawm thei pawh a awm thin. Hemi chungchangah thianpa VLC-a pawh ka khak tawh nghe nghe! Ri chhinchhiah nan a hmang a, tun hnuah erawh a hmang ngai tawh lovin ka hria. Chuan, vowel awm kawpnaah hman a ni ngai lo bawk a. I mi fuihnaah ka lawm tak zet zet e.

    ReplyDelete
  11. Van ziakthiam ve a... a ngaihnawm hle mai... ka chhiar zel hi aw....

    ReplyDelete
  12. @Sangpuiipa: I rawn leng chu ka lawm kher mai, kan pu a lo thuhmun lehnghal!

    @Maisek: Ka va han lawm thin em! Ka blog post apiangah i comment hmuh ziah ka inbeisei dawn a nia!

    ReplyDelete
  13. ziak ngaihnawm hle mai. ka haw chang apiang hian ka pu hi ka kawm a, hmanlai ka sawi pui thin. an hlu a ni

    ReplyDelete
  14. dawt ka tih dawn chuan thu tak tlem chu a pai vein ka hre bawk sia.. engpawhnise, ngaihnawm tak chu a ni hrim hrim. Part dang beisei zel ang.

    ReplyDelete
  15. @reverie: Pi leh pute hi an hlu ngawt mai. Kei chu kan awmna a inang lo va, inhmuh a har ta khawp mai. I lo tlawh a, ka lawm khawp mai.

    @Varte: Ka lawm e..hihi. Part dang ziah sa ka nei tawh a, remchangah ka lo dah leh dawn nia. Mi chhiarsak a, ka lawm khawp mai.kan awmna a inang lo va, inhmuh a har ta khawp mai. I lo tlawh a, ka lawm khawp mai.

    @Varte: Ka lawm e..hihi. Part dang ziah sa ka nei tawh a, remchangah ka lo dah leh dawn nia. Mi chhiarsak a, ka lawm khawp mai.

    ReplyDelete
  16. CHanchin dangdai ve tak anih hi mawle. Mitin mai hian sawi duh thin ilang chuan chanchin maksak tak tak hi kan nei theuhin ka ring tlat nia mawle.

    I pa leh a sas inthen chhan khi a holam mange aw hairehai. Arngeng case :D

    ReplyDelete
  17. @Pu Hv, khua a lo har hman alawm! Ni ngawt mai, nang paw'n rawn ziak char char rawh. Thawnthu i ngah em mai. Case holam ve tak chu a ni..haha

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers