22 June 2011

Mite tana malsawmna - mi hrisel lote

Mi hrisel lo leh bawrhsawm tak mai ka ni a, ka hrisel loh avângin ka ngaihtuahna pawh kawng tam taka a hnualin ka thil tihna turah ka tha a tho lo hle ṭhin. A chang chuan ka vanduai bik em ni chu aw ka ti ṭhin a, mahse, vanduai bik tura siam kan awm erawh ka ring pumpuhlum tak tak bik chuang lo.

 Ṭum khat chu ka damlo hi keimahin ka awm a. Class pawh kal peih lovin khumah ka mu a, ka inngaihtuah mai mai a. Hla pakhat hi ka ngaithla a, chu chu Bawngkawn Pastor Bial Zaipawl (Presbyterian) conductor, El Bethela'n a nun chak lo leh hrisel lo tak aṭanga a phuah, 'Ka tawrh hi Lalpa'n a phal' tih hi a ni a. Hei hla hi ka rilru mangan leh lungngaih em em changa ka ngaihthlak ṭhin a ni.



A hla tlar pakhat 'Midang tana malsawmna a lo ni reng si, ka tawrh hi Lalpa'n a phal, vui thei ka ni lo..' tih lai tak ka ngaihthlak chuan keimahah hian thil lo thleng a awm ta a. Hetianga hrisel lo leh bawrhsawm taka ka awm hi midang tan malsawmna a lo ni reng alawm mawle!

Khawvel mi zawng zawng hi mi hrisel leh damlo ngai lo ni ila, doctor hian hnathawh tur an nei lovang. An awm bawk hek lovang. Tihdamtu nih hian hlutna a nei lovang a, Isua pawh kha tidamtu ti-a sawi leh hriat a lo ni hauh dawn lo mai tih ka hrechhuak ta a. Isua tihlutu pawh mi hrisel lote tho kan lo ni tih ka hre ta zel a. Ka ngaihtuah chhunzawm ta zel a.

Tuna hnathawk tam tak hi mi hrisel lote avang chauhva hna nei an lo ni reng mai. Damdawi dawr neitu leh a zuartute tan malsawmna, damdawi siamtu leh a enchhinna lama thawk zawng zawngte tan malsawmna bawk. Damdawi lampang zirna sikul neitute leh chuta thawkte tan malsawmna a lo ni a, chutiang institution leh damdawiin hrim hrima electric, canteen, tui, duty, thawmhnaw sute chenin mi hrisel lote zar an lo zo va. Ambulance neitu leh khalhtu driver te, chuta an hman petrol buaipuitu zawng zawng te tan pawh mi hrisel lote hi malsawmna kan lo ni a.

Zau zawkin ka ngaihtuah zel a. Mi hrisel lote vanga malsawmna dawngtu hi mi zawng zawng deuhthaw an lo ni tih ka hrechhuak ta a. Kei ngei pawh hi chu hrisel loh malsawmna chuan min lo kalkân bik hauh lo mai hi a lo ni a. Mi hrisel lo dangte pawh lungngaia indawmkun mai lova midangte tana malsawmna hlu tak thlentu an ni tih hriaa lawm zawk turin ka duh ta em em a.

KA TAWRH HI LALPA'N A PHAL

Khawvel lungngaihnate leh buaina karah hian,
Mangan leh harsatnate'n nitinin min bawm;
Beidawng leh chauvin ka rûm, ṭanpuitu ka au,
I hmaah ka lo kûn e, aw ka Lal Isu.

Hrehawmna ka tawrh zawngte hrethiam duh lovin, 
Ka nawmsakna tur zawngin ka tlan fo ṭhin a;
Midang tana malsawmna a lo ni reng si,
Ka tawrh hi Lalpa'n a phal, vui thei ka ni lo.

Ka vahbosan tawh lovang, he khawvelah hian,
Chhandamtu Isua ka nei, ka tana thi kha.
Khawvelin min hmusitin min dem mah sela,
Ka chhuang zel fo dawn a ni, aw ka Chhandamtu.


Ka nawmsakna tur zawnga rawng ka bawl laiin,
Ka tana a tawrhna zawng ka lo hrechhuak a;
'Ka tan eng hrehawmte nge i lo tawrh ve le?'
Sawi tur reng ka nei lo ve, misual mai ka ni!



Share:

19 comments:

  1. HE hla hi chuan ka hnuk hi a tiulh leh dawn tlat thin. I ngawi vang vang a, rin loh lamah i lo chhuak ta phut a ni berin ka hria.

    Nia, kan hrisel lohna hi midangte hriselna a lo ni e. Ngaihtuahna thar min pe e.

    ReplyDelete
  2. A lo nih tak hi mawle. Tiang zawng hian ka lo ngaihtuah ngai miah lova. I post tha e.

    ReplyDelete
  3. @Dolerich: Nia, khi hla khi chakna atan ka hmang thin. A tha takzet.

    @Jewel: I lo tlawh thin chu ka lawm ngei mai!

    @Pu Samuela: Ka lawm lutuk e!

    In lo tlawh avangin ka lawm e.

    ReplyDelete
  4. Ts, i rilru hi i van vawrh vir nasa tak em awww.... mi danglam tak ni turin Lalpan a siam che tih hi i in hria em awww?

    ReplyDelete
  5. Heti zawnga i ngaihtuah thei hi, i fakawm khawp mai, engkimah lawmthu sawi rawh u! an han ti thla zen hi, a awlsam a, mahse mahni ina han tuar ve chiah hian, a har zia kan hre chhuak thin.
    A dik khawp mai, i thu sawi hi!

    (Mi te tan malsawmna i nih duh chuan Damlo reng mai rawh, hhahhahaha :fiamthu)

    ReplyDelete
  6. Dam loh leh hrisel loh hi chuan taksa in a tuar a, rilru a hnual ruih a, sum tam tak sen a ngai thin bawk. Hetia dam tak leh hrisel taka kan awm thei te hi Pathian malsawmna a va han ni chaing tak em. Khawvela hausa ber pawh ni ila, ka hrisel lohva ka bawrhsawm miau chuan ka tan khawvel a nuam chuang lovang.

    Thianpa, i thil thlir dan hi a tha hle mai. Kan thil tawn apianga lungawi dan thiam zel tura fuihna tha tak anih hi. I ziak ngaihnawm khawp mai.

    ReplyDelete
  7. @Maisek: Ka lawm e! I ti mah mah thei lutuk!

    @Hmelthatea: Hrisel loh avanga lawmthu sawi hi har tak a ni! Mahse, thil theih loh a ni hauh lo. 'Lalpa'n a pe a, Lalpa'n a la leh ta. Lalpa chu fakin awm rawh se!' tih a awm kha.

    @Pu Caribou: Mi hrisel lo zingah mi hlim thei tak an tam lo ngawt ang. Mi harhvang tak an awm thei lo bawk ang. Mahse, deu ni si lovin a hrisela te tal hian mi hrisel lote vangin lawmna chang kan hre tur a ni. Min chhiarsak avang leh i comment tha tak avangin ka lawm lutuk e.oh avanga lawmthu sawi hi har tak a ni! Mahse, thil theih loh a ni hauh lo. 'Lalpa'n a pe a, Lalpa'n a la leh ta. Lalpa chu fakin awm rawh se!' tih a awm kha.

    @Pu Caribou: Mi hrisel lo zingah mi hlim thei tak an tam lo ngawt ang. Mi harhvang tak an awm thei lo bawk ang. Mahse, deu ni si lovin a hrisela te tal hian mi hrisel lote vangin lawmna chang kan hre tur a ni. Min chhiarsak avang leh i comment tha tak avangin ka lawm lutuk e.

    ReplyDelete
  8. Ka nunah hian ka tawng ve tho na a, mahse hetiang hian ka la ngaihtuah ngailo...ka tan chuan ava tangkai dawn tak em...a ngaihnawmin ka hlawkpui khawp mai..

    ReplyDelete
  9. @marvinic: I lo tangkaipui chu ka lawm takzet a ni. Mi hrisel lo leh bawrhsawmte hi i hnual mai lovang u.

    ReplyDelete
  10. Post heading atang khian, "Eng lam tak ni ang maw" tiin ka lo ngaihtuah a, ka rin loh lam daihin i rawn chhuah.

    I zaipawl rawn sawi te khi an zai thiam ka ti. 'Mahse an music video a an video clip rawn bilh tel thenkhat erawh kha chu hmuh a nuam lem lo, tel lo sela kei chuan ka duh zawk.

    Khawvel thil takin sum leh pai leh eizawnna lam pawh ni lo mahsela, hrisel lohna leh bawrhsawmna hi chuan Pathian lam hi min hnaihtir ve hrim hrim chuan ka hria.

    Hrisel leh dam taka kan awm lai hi chuan Pathian hi kan hre lem lo, kan han damloh chian hian kan ngai leh thin. Kan dam loh lai chauh ni lovin, dam leh hrisel taka kan awm theih avang hian Pathian hnenah hian lawmthu sawi mawlh mawlh reng fo tur kan lo ni zawk e.

    ReplyDelete
  11. Va dam lo ropui bik ve aw!! ka tluk loh i ni.

    Dam lo thiamte hi chuan natna khumah Pathian hmel an hmu hlauh thung a; chutiang mi chu i ni.

    i fuihna pawh a tha e.

    ReplyDelete
  12. Chhiar a manhla hle mai... ka chhiar lovang tih ka hlau mai dawn alawm.

    ReplyDelete
  13. @triple, i comment a dik lutuk! Hrisel tak ni ila he thu ziahna chang ka hre hauh lovang. Ni e, kan hlim lai hi chuan Siamtu theihnghilh a awl a ni. Dam loh malsawmna pawimawh ber, ka sawi miah loh i rawn sawi. Ka lawm lutuk. I comment ka like khawp mai.

    @Pu Rp, i comment tawi të kha a rilin a tha khawp mai. Ka lawm e.

    ReplyDelete
  14. Ekhai, Pu Hv, kan lut rual hle mai! I comment chuan min tihlim mang e. :-) Ka lawm e.

    ReplyDelete
  15. A tha khawp mai. I chhui dan a awmzia leh thin khawp mai.

    Lungawina famkim nei chunga damloh a tha leh zual ngei ang. Isua nen engkim a nuam zel ang hian midang tan malsawmna ni lo mah se kan lawm thiam a tulin ka hre thin.

    I thlir dan a dam hle mai. Ka like e.

    ReplyDelete
  16. @K'u Krista: Hman lo tak chung pawha i rawn tlawh hram hram zel avangin ka lawm takzet a ni.

    ReplyDelete
  17. i post tha khop mai.Pathian thil reldan hi hriattiam ahar ka ti thin,i post atang poh hian tam tak ka zir leh phah,keipoh ka Like e.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers