12 June 2011

Zinkawng ninawm leh hlimawm


Mi’n flight cancelled an sawi laia hetiang thu mai mai heti lai meuha han ziah mai chu, kan intibawrhbáng ang tih pawh a hlauhawm hle naa, luhlul ka chhuah ta mai! Ka inthlahrung viau tho.
December, 2009 a ni a. Krismas a hnaih tawh avangin mahni khaw lama haw a chawh ta hle. Engkima a uanfum leh mite hnungzuia khawsa ni ta chu haw-na lampang ka’n ngaihven meuh chuan ticket a lo full vek tawh tih chiah ka ngaihven-chhuak thei a. Chutia ticket full vâng mai maia mahni khuaa masi hman han thulh theih a ni ngawt si lo va, ka che ta vat vat a.
A zawna zawng ta na ná nâ chuan dâwr bungraw phur haw tur a awm thu ka hre ta a. Midang hire a nih avângin ticket lâk a ngai lo va, ticket lâk ngai lo ta na ná nâ chu len loh tak tak a awm lo tiin a hmangtu turte chu ka’n bia a. Tâwt an inti viau tawh nâin sikul lama chhuanlam kan lo siam thin tawhna kha ka chhawr ta zék a; tichuan, haw thei turin ka inpuahchah ta phawt.
Ni 19 zîng a ni a. Dar 4:30- ah thovin motor chhuahna hmun tur Millennium Centre kawt chu taxi-in ka pan vang vang a. A hmun ka thlen meuh chuan mahni khuaa masi hmang tur haw tumte chu an lo zi nuk nuk a. Chumi kârah chuan ka haw tumna motor, pick up (207=pahnih engmah pasarih!) chu ka hmu thuai a. Chutah chuan bungrua tam tham tak leh mi 10 vel an lo dingkhawm laih a. Han en chuan bungrua chuti zozai nen chuan mi 20 vel chu len ngaihna a awm lo.
A bungraw ringawt pawhin a tâwt tawh ang tih theih a ni zâwk; passenger-te thawmhnaw nen phei chuan a lena len rual a ni lo. Lu a hai ta map mai. Tichuan, engtin tin emawa inload-in keia chuan loh hlau lutuk chu a bungraw remtu-ah te ka’n tang vêl a. Rilru tak chuan a thleng tlai ber nih nen a inthlahrunawm ve deuh. Chutia kan han inremfel leh meuh chuan mihring chuan ngaihna awm lo khawpin a khat ta tlat mai.
Engtin tin emaw hmeichheho chu bungraw chungah an chuang thei mai a, a mipaho chu a hnungah beh mai tur tiin kan inhnêm chawp ta ringawt a. Chuti pawh ni se Traffic Police duty te an la awm cheu avângin a then chu Zemabawk thlengin City Bus-in kan han phei ta phawt a! Zemabawk awngaina hmunah chuan kan lo nghâk ta thap a.
Mahni khuaa haw tumte chu an lo tlân zung zung a, thiante, hmêl lama lâktlâk bîk lohte nen kan han inhmu nawlh nawlh a, chuanna tur ngaihtuah chuan, ‘a hmêlchhe zâwk zâwk si,’ tia ben lawlh an châkawm. Motor thâwl deuhte chu dumka phur truck thlengin kan thlir zui dauh dauh va.
Tichuan, motor rawn thlen hnuah zing dar 6-a chhuah tum kha dar 9 velah kan chhuak hman ta tâwk a. Mite chu motor-ah an chuang a, keini chu kan bet ta a . Hmeichhia hmeichhia 9 leh dawr bungraw tam tham tak chu a chhûngah an inêkbeng a, mipa pahnih awmchhunte chu motor hnungah kan ding tai a, kan tlân ta vang vang a. A tîr lamah chuan a nuam ve duh khawp! Kan chuang rei telh telh a, hrehawm a rawn inan ta tak tak mai ale! Ke lam chu in-pâng-aw-zial ang hrimin a rawn kham chho va, kâwng a thleng a, hnungzâng a thleng chho va; nghâwng thlengin! Chumai ni lovin invawnna bân a la rawn kham a, din mar theih loh tur tingin vawnbân lah chu a la hniam laklawh ta dah.
Chutah kan hmeichhe phurhho an rawn che ve ta thung a. An han insûm tâng tâng a, a tâwpah an pikchhuak ta tho va. Keini a hnunga awmte tân hmuh loh theih a ni si lo; an chawei hnuhnun berah anam leh thil kan chi hrang hrang an hmeh tih chu a lang reng mai si. A khât tâwka thlî rawn thaw phei leh zauh thîn chuan, ‘Kâr khat chhûng chaw ei suh,’ min ti nite hian ka hre rum rum a.
Kan hmazâwn chiaha a hnung bang nghênga thu te chuan a châng leh min han pawt hlak a, thil min hrilhru dâwn emaw tiin kan han kûnhniam dêk dêk a, ‘ni lo’ tih paha duh lo chung chunga an han bun chu tihluih a ni lo tih hre mah ila, motor atanga thehchhuah lâwp mai an châkawm rum rum a. Chutia inring hman lêk lova bun tih takah kan vawnbân neihchhun chhunah an han tikai ta nuai a, tlâk duh lo ta nafam chu vawn loh theih ni hek suh; chaw ei hun laia awngai chuan chawngheia awngai kan ni mai.
Chumai ni lovin thlasik boruak tih takah a la vâwt êm êm zui a. Hnar hmâwr a vâwt thlur a, kut vâwt taka thei leh thei lova kan han hrûk hnu pawhin a chhûng lam atangin a la rawn in-tîra-mei-kai-ah duah duah a. Behpuipa nena inen chungin, “Ka hnap a dawk em?” kan inti kan inti tawh mai a. Kawng ha lo tih takah vaivut a la khu êm êm zui a, motor tlânna khute chu tlânsan hman rual lohin a rawn vir lut leh mep mep a, chutah bawk chuan mi khawngaihthlâk kan ni leh hîn!
Chutianga châwl lova tlân beuh beuh ta chu Khawruhlian kan thleng a. Chutah chuan têt tê nih laia Khawruhlian-a min lo pêmpui loh avâng ringawtin paber chu kan han mawh leh ta rih a. Khualzin dang nalh tak takte kârah kan han zuangthla khu luih a, kan kete chu kan han per tâwn tâwn a. Ruh inchuktuah laite chu a ri tuarh tuarh a. Pheikhawk bun rawngte chu rawng thlâknaa thlâk hlim ang maiin a paw thuk a. Samte lah chu vaivutin a bâwm chhah lûk a.
Chuti chung chuan pum lamin min thîn nasat avâng hrim hrimin chaw ei turin hotel-ah kan han lût thâm thâm a. Kalkawnga kan thil tawnte ngaihtuah chhuah loh theih ni suh, chaw ei chu khawi lamah, kan eisa pawh kan bun chhuak lo chauh zâwk a. Chuta kârah chhuak tur a awm lo tih hre lêk lovin mawng lamin min lo tur ve chhén a. Famkim lohna khawvêl hi a lo va famkim êm tiin inthiarna kan pan leh nghe nghe a nih kha.
Chutiang chuan khualzin dang nalh tak tak, rimtui tak takte en dauh dauh chungin Lal piancham lâwm turin kan lawina vângkhua chu kan pan leh ta vang vang a..
Share:

20 comments:

  1. Ngaihnawm hle mai...

    ReplyDelete
  2. ho deuh pawh hi a ngaihnawm leh tlat thin a...
    thu thiam tak chu i ni e..

    ReplyDelete
  3. I ziak ngaihnawm hle mai. Krismas hnaih tawh vanga motor vang lutuk tawhah i chuang a, i che a fuh lo a ni maw??? Hetiang hi keini thingtlang atanga khawpuia lehkha zira awm thin te hian kan lo tawng deuh thup thin anih dawn hi. Ka lehkha zir ve thin lai te kha min tihrechhuak rum rum mai.

    Khaw kar kawnga motora beh hi chu ka tih than ani a, a hrehawm pawh ka ti vak lo. Pum pai nuam lo leh "kaw lam chiang vak lo" chuanga zinkawng thui tak zawh hi a hrehawm berin ka hria. Mite min hriatpui miah lohvin kan tuar tlawk tlawk thin.

    ReplyDelete
  4. Ka tawn tawh hnu ni ve deuh chuan ka hria. A hrehawm duh a nia aw!!

    Tum khat chu Zirlai hruaitu kan nih ve lai a ni a, Kan haw dawn a-inthlan a hnaih tawh viau i sawi ang hi kan tawng a, politician pakhat motor ngaituah turin kan va nawr a lawm le; an nu khan min lo chhang tha lo viau mai a, thinrimin ka chhuak tau vel a. An pa ngaih tha lo chuan min rawn um zui leh a kan haw hram. Ka ngaihtuah a, kan lo che pui khawp khan ka hria; min ngaihtuahsak lo mahse an thiam khawp mai.

    I ziak ngaihnawm bik e.

    ReplyDelete
  5. @Anon, ka lawm e.

    @Hriatpuia: Ka lawm e! I rawn lenglut thin a, ka lawm takzet.

    @Pu Caribou: Ka thuziak a hovin a tak emaw, a seiin a tawi emaw, i chhiar tawh hnu pawh ni se ngaihnawm takin min comment-sak thin a, ka lawm takzet a ni. Kawthalo chunga zin chu a nuam lo duh khawp mai :-)

    @Pu Rpa: Ka lawm e. Experience i ngah dawn nasa mai si a, han ziak char char mai teh. Chhiar a nuam ka ti thei teh mai nia. Blog update thar a awm khât deuh hi chuan khua a har hman mai thin. Blog khawvel hi facebook, misual.com nen a inang lo khawp mai a, a nawmna a dang riauvin ka hria!

    ReplyDelete
  6. Tsa nge2,thu i thiam khawp mai,chhiar anuam thin e,han ziak zel teh

    ReplyDelete
  7. @anon: Mi rawn tlawh a, ka thuziak i lo chhiar a, ka lawm takzet e.

    ReplyDelete
  8. he thil hi hmun dangah i dah tawh amawni le, chhiar tawh thana ka inhriat chu le... a nih loh vek chuan anpui a nei a ni mai thei :D

    ReplyDelete
  9. ‘Kâr khat chhûng chaw ei suh,’ min ti nite hian ka hre rum rum a. A hun taka i hmang thiam khawp mai. tawngkam i thiam khawpin ka hria. Ti daih ila, 'tri' khi engtin nge i tih bik?

    ReplyDelete
  10. @Varte: Yesss.. I chhiar ngei e...hehe. Misual.com-ah ka post tawh alawm. Blog update pah ni fawmin ka'n dahtha mawle.. Ka lawm lutuk e aw.

    @dolerich: Ka post-a mi kha copy tawp rawh, chuan i hman duhnaah i paste leh tawp mai dawn nia. A rawng kha a dang mai thei a, mahse, i thlak leh mai dawn nia. Kei paw'n misual.com-a mi ka copy paste ve tho a nia...hehe. Ka lawm lutuk e.

    ReplyDelete
  11. Ts, i ziak ngaihnawm khawp mai! ka nui tlawrh tlawrh mai! vawi khat chu kei pawh lehkha zir a kan haw, bus ticket kan chang tawh si lova, Silchar atangin truck vawk phur chungah kan chuang a, vawk kha truck mawng lamah an awm a, keini, a hma lamah...kalkawngah ruahpui van awn a rawn sur a, kan huh vek! Ruah a han a, ni a sa leh a, Aizawl kan thlen meuh chuan kan ro leh vek! Nuam ve mai mai....

    ReplyDelete
  12. @Maisek: Ka lawm e. A va hit lo ve mawle..hahaha. Kei pawh khatiang deuh chi ka tawng tawh a, Reiek kal kan tumin. Mahse, remchangah ka la rawn post zawk ang...haha

    ReplyDelete
  13. Ngaihthlak nawm in chhiar a nuam khawp mai. Zinkawng harsa tak tak zawh chang hi chu ka nei ve thin a, mahse nang anga han ziak ve tur chuan ka tlin ka ring lo e. Vawikhat mai nilo Night Bus ah zan rei a nula bula han thut a, han englo deuh zeuh zeuh kha chu; i thil han post takah chuan ka hrechhuak uar uar mai, haha...

    ReplyDelete
  14. @Hmelthatea: I rawn lenga ka lawm khawp mai. I thil tawn chu rawn ziak ngei teh khai. Keia ziak tehlul ai chuan i chhuah ngaihnawm zawk fein ka ring a ni.

    ReplyDelete
  15. A nuih zat thlak a, chhiar a nawm rual in in khawngaihthlak awm bawk. A beh a han beh ngar gar chu aw..........

    ReplyDelete
  16. @Ramenga: I rawn tlawh a, ka lawm e. Nia, kan khawngaihthlak angreng. A retheihthlak mai mai asin aw..

    ReplyDelete
  17. Helaia blog hi lawm ka zawn fo thin chu. Min followna atang khan ka zawng hmu lo alawm. A ngaihnawm leh khawp mai. I lainatawm a mahse hetianga harsatna tawkte hi ka lainat thu a hunlaiin ka hrilh duh ngai lem lo. Harsatna counter dan thiam hi lawm kan zira kan misual.com thin le tiraw Ts. I tawngkau chheh pawh a mawi zel e.

    ReplyDelete
  18. @K'u Krista: Nia, i blog ka follow-na kha fiamthu zawk kha a lo nia..:-) Nia, kha'ng laite kha tunah chuan ngaihawm a lo ni leh tawh zawk mai.. Ka lawm lutuk e.

    ReplyDelete
  19. Ka lehkha zir lai min ti hrechhuak e a. Hetiang hun hi a hunlai hian hrehawm viau mahse hun lo kal zel ah min tihlim tu an ni thin.

    ReplyDelete
  20. @Pu Samuela: I lehkha zir lai chanchin chu lo la ziak mawlh teh khai. Ni e, tunah chuan a lunglenthlak ve leh tawh khawp mai. I lo len avangin ka lawm e.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers