27 August 2011

Aw Jenny..!

Amah chu tleirâwl kum 19 mi vêl niin a taksa insiam mêk, insiam hlawhtling hlim a ni a, a hatna ai maha a taimâkna leh a mizia duhawmnaten min hneha min hnêm hi amah hrechiang apiang chuan mak min ti hauh lo vang.

A hâng lo va, a ngo hluak lo; a ngo sen chak mai a, damdawi hming hriat a nei mang lo chu a hrisêlzia nemnghettu a ni a, chu chu a taksain a nemnghet a ni. A thau lutuk lo va, mahse, cher lam ai chuan thau lam hret zâwk mah a ni a, amah chuan thau a inti hle thung.

Meng zim san mai a ni a, engtik lai pawha nui reng mai chî niin a nuih reng vânga awm ta nge tih chu hriat loh, a biang vei lamah hmangaihna chhûn luhna atana
ha fahranin biangsum a khuar kak a, chu chu a duh emaw, duh lo emaw, amah ka hmuh apianga ka hmuh hmaih theih loh leh hmuh loh theih loh a ni.
 

He'ng a pianhmanga ai maha min hneh zâwktu chu a mize duhawm tak kha a ni. A taima êm êm a, ina a awm ve pawhin mawng a hûng hman meuh lo. A awng duh a, chu chuan nêlawm takah a siam a ni. Tu pawh hian anga a kâwm thei leh hian kawm a thiam lutuk hi tûn thlenga pawi ka tih ber a ni. Amah chu Jenny a ni.

A û nen khawi lai emaw thiltihna hmun pakhata inhriain kan inkâwm chho va, an inahte kal zauh zauhvin chuta
anga inhria kan ni nghe nghe a. Chu'ng hunah chuan û angin nge min ena hian angin tih pawh hre hrang thei lo khawpin kei, tlangvâl hankin zet tawh hi min lo dawngsawng thiam zu nia! Chu tak chu a ni a hnua min tinaa he article rawn piantîrtu ni tâ chu.

College kal a châkzia te, kan college-a a rawn luh ngei tur thu te min hrilh
hîn a, chuta ka lo biakhat duh loh a hlauh thu pawh min hrilh bâng lo. Kei pawhin chu hun ka nghahhlelhzia te ka theih ang tâwkin ka hrilh ve a; a ni, ka nghâkhlel tak zet. A bula awm ka thlâkhlelh avâng ringawt pawhin chu chu thleng thuai thuai se ka ti a, pâwl sawmpahnih a pass um pawha a pain hmun danga luhtîr a tum thu min hrilh pawhin a pa hnênah kan college-a luhtîr hrâm tura tiin, kan college nawmzia leh lecturer leh zirlaite inpawhna hatzia te chu ka theih ang tâwkin ka hrilh ta rèng a ni. Kan college chu Gov't Aizawl College a ni.

Chutianga inhmua inkâwm ngeih tâ chu ka ngaina chho ta tial tial a, min ngaina ve em tih erawh ka hre chiah lo. A hnu deuhvah phei chuan ngainatna mai ni lovin hmangaihna a lo piang chhuak ta a, vâl hi ka buai ta! Tûnlai khawvêl thiamna lo sáng chho zêl hi a hmang
angkai thiam tân chuan a angkai nangiang a. Chu chu theihtâwpa hman angkai ka tum ve a.

Thingtlânga awm ka nih avângin Krismas chu kan khuaah ka hmang
hîn. Amah nena kan inhriat kum pawh hian kan khuaah Krismas hmang tura haw ka tum a ni. Ka haw dâwnah ka tlawh a, chutah chuan ama phiar ngat, muffler (ngawnga veh chî puan lum) min pe nghe nghe a. Kei pawhin a tân liau liauva ka lei, hmeichhe incheina dahna, a bawm love sign-a insiam kual raih ka pe ve bawk a, keima tâwkin ka hlim a ni.

Ka thinlung hmun kil khatmah âwl awm lova a luahkhah vek avângin bei nge sei rûn dung tiin Krismas hmanga kan khuaa ka awm laiin beiseina sáng tak nen ka hmangaih thu chu phone-in ka hrilh ta râwt mai a. Chuta min chhânna chu pângngai ka ti - “Ngaihzâwng neih ka la duh lo,” a ti. A duh emaw, duh lo emaw, keiman ka duh miau si a! Chuta
ang chuan ka hmangaih thu chu ka hrilh chàmchí a. A hlawhtling lêm hlei lo va! Chuti chung pawhin hian angin ha takin kan inkâwm reng tho va.

Hmangaih biahthu ka hlan vânga a hlim sawt leh a nunkhaw hman a nawm thut ka ring lo va, ka beisei pha hek lo. Kei erawh chu ka rilru a tilài a, a chânga hrehawma awma hlimna min petu a ni a, hei hi nuam ka tih lai ber a ni ta.

Zan khat chu a ngai têin ka phone leh a, chutah pawh chuan chhânna ngai bâk ka dawng lo. Ngaihzâwng a neih leh neih loh ka zawh lahin a neih loh thuin min chhâng bawk si a. A rilru tak hriat ka duh avâng a rilru dik tak min hrilh turin ka ngên a. Chutah chu min hmangaih loh thu min hrilh ta..

“Tlang takin ka hrilh mai ang che. Ka hmangaih thei lo che a ni..”

Chuta min chhânna chuan min va dêng na tehrèng êm! Ka mittui a parawl kuang a, ka
awng chhunzawm thei lawk lo va. Chutah chuan ka la tâwp mai lo va, kum thum kum li, kum nga thleng pawha ka nghah theih tur thu ka hrilh âwk âwk a. Ka va han hmangaih tehrèng êm aw..

Chuta
ang chuan an inah pawh ka kal khât ta raih a, kan inhmuh pawhin a hma ang thovin min biain min kâwm reng mah se, keimah zâwk hi ka rilru a nat zêl avângin ka be tam duh lo va. A hnuah phei chuan an ina kal ka serh ta hial emaw tih mai turin ka reh ta vang vang a.

Kum khat a liam ta..

Nikhat chu message a rawn thleng a, phone number a thlâk thu chu a number thara min hrilhna a ni reng mai a. Kan inkâwm zui hlek a. Pune-a thil zira a awm thu min hrilh ta a. A hmaa ka suangtuah ang kha a thleng lo chiang hle. Kan college-ah a lo lût lo tih ka hre dím diam tawh a, chuta chhapah Mizoramah a la awm lo zui. A lo haw hun tur ka zawh lahin a thil zir a zawh hmaa a lo haw a rin loh thu min hrilh a. Chu chen chen a hmêl hmuh loh chu ka zuam lo kher mai.

A mak a ni. Hmangaih takte hi hnartu an nih pawhin an hmêl tal hi chu kan ngaihlu a, kan thlahlel ngawih ngawih tho a ni. Hmangaih ve lotu chu huat hlur awm tak a nih laiin a ni teuh si lo, hmangaihte hmêl han hmuh hi chuan huatna tam tak kârah hlimna tê chu a lo awm ve
hîn zu nia!

Chuta
ang chuan message-in kan inkâwm chho ta zauh zauh a. Keimahah amah beiseina a tlêm ta hle a, mahse, amah hmangaihna chuan beiseina nei lo thei lovin min siam miau si a le.. Sawi tama hlawhtlin mai theih chu ni sela chuan ka va hlawhtling dâwn chiang tak êm!

Kum hnih a liam ta..

He kum hnih chhûngin mi pângngai ni ve ta nafam chu ngaihzâwng ka nei ve nual hman a. Lerh erawh ka inti lo! Hmangaih loh ngaihzâwng ka nei ngai hauh si lo va. Chu'ngte chu han hmangaih dâwn viau chuan min tlânsan leh
hîn a, hei hi a ni mak ka tih chu. Hmangaihte kan ûm mêk laia hmangaihtu kan tlânsan dâwr dâwr tho si hi. Min hmangaiha min lo duh ngawih ngawihtu chu ka tawng tho va, mahse, ka hmangaih hauh si lo. Hmangaih lo mah ila, ka dinhmuna ding an ni tih erawh ka hriatpui chiang teh e.

Hmangaih tam tak a neih theih tih ka pawm a, hmangaih ber erawh pakhat bâk a awm thei lo tih pawh ka pawm. Mahse, Jenny-i'n min hmangaih thei lo chu ka pawm thei ngang lo a ni.

Zankhat chu message-in kan inkâwm leh a (Hmun danga a awm hnuin kan inbe ngai ta lo). Chutah chuan hmangaihna lam thu sawi kai dâwn chuan a message hi a tawi tak mai
hîn a, a chhan ka hrechiang khawp mai. Min la hmangaih ta chuang lo tih chu.

Ngaihzâwng dang han nei lâwp lâwp
hîn mah ila, amah anga hmangaih theih tumah ka neih theih loh avângin amah chu ka hmangaih ber a ni tih ka chiang a. Min hmangaih lotu chunga rilru ka pêk angin min hmangaihtu chungah erawh rilru ka pe tlat thei lo hi eng nge a chhan erawh ka chiang lo. Hei hian hmangaihtu tâna hmangaihte an hlutzia a tilang chiang hle âwm e.

Kum thum a liam ta..

A hma angin message kan la inthawn zauh zauh a. Chutah chuan hmangaihna hi mak ka tihzia te, hmangaihtu kalsana hmangaihte kan ûm zui chawn chawn
hîn chu mak ka tih thu pawh ka theih leh thiam ang tâwkin ka hrilh bawk a. Chu'ng hunah chuan, “Ka hrethiam bîk lo,” tih chiah hi chhânna ka dawn hin a ni. Min la hmangaih ta chuang lo.

Chutih hunah chuan a hma ang bawkin beidawnna thinlung chuan lungngaihna leh hrehawmna a rawn thlen a, ka thinlung chu hmangaihna zûnzámin a rawn bawh nghâl
iam iam hîn. Chutah chuan beiseina tlêm nen khumah ka tlu leh hnawk hîn a ni.

Hmangaih nei thei tura mihringte duan kan ni hi buaithlâk leh hrehawm tih châng ka nei
hîn. Hmangaih tawn chuan hlim zâwk âwm tak kan nih laiin, hlimna aiin hrehawmna kan tawng tam zâwk zu nia! A châng chuan hmangaihna avânga nun hlimna tak tak neia temtu chu mi tlêmtê an nih ka ring hial hîn a ni.

Kum thum kal tâa a Krismas present min pêk chu ka kawl
ha khiau va, tumah khawih leh hman ka phal ngai lo. Khua a vawt emaw, nipui lai a ni emaw, amah min hriatchhuahtîrtu chu hlut takin ka vêt hîn. Chu a muffler senno (pink) min pêkah chuan a tharin a hmêl ka hmu hîn a, chu ngawt pawh chuan a hlutna a belhchhah a ni.

Kum li a liam ta..

Ka thinlungah mei angin a nung reng a, beiseina êng pawh engthilmahin a tihlum thei hek lo.

Mi pângngai tân chuan beidawnna hun a tling ve ta..!

A thil zir a la zawh loh vângin Pune-ah a la awm reng a. Zankhat chu message ka thawn leh a. Pasal a neih huna min hrilh hrâm tur leh chu chu phu ka intih ve thu chu. Chutah chuan pasal a la neih mai loh tur thu leh hmu zo ni sela, engmah a zir tawh loh thu min hrilh a. Zawnpui tura min tihna thu pawh ka dawng tak e. 

Chu mai ni lovin, a pasal neih ni-ah chuan nupui fanaute nena ka kal duah a rin thute min la hrilh tâk deuh deuh va. A beidawnthlâk vawng vawng teh e maw! Amah nena chutianga awm chu ka duhthusàm ber a nih tehlul nen. A hmangaihna thu ka dawng chatuan tawh dâwn lo a ni ta ber mai.

Pasal a neih hma chu nupui neih ka tum loh thu ka hrilh tâk kha.

Hmangaihna avânga hlim taka awmte ka awt a, hmangaih tel lêm lova hlim taka nula leh tlangvâl kut insuih riala lêng dûn ka hmuhin hmangaihna nena a hlut turzia ka hrechhuak nawn awn awn
hîn. Hmangaihna tel lo hlimna ka la hre ngai lo va, hlimna tel lo hmangaihna erawh ka hrechiang ta hle mai.

Ka tâna Khuanu ruat chu ni sela, hetiang ang harsatna ka tâwk hauh lo vang. Mahse, Khuanu ruat ni lo tura han puhthlûk mai chu kaw
halo chunga inkhâwm tluk zetin harsa ka ti a; lungawi taka hmangaihtu âng belh mai loh chu tih tur dang ka nei tawh lo tih hre mah ila, keimaha keimah hian pawm harsa a ti ém a ni.

Kum nga a liam ta...

Nikhat chu a phone number hmasa zâwk a
angin message ni lo phone call ka dawng teh tlat a. Phûr zeta ka han lâk chuan...

“...Thla thar ni 26-ah pasal ka nei dâwn a, i lo tel loh chuan...”

Ka ‘aw’ tain ka hria.

Mak ka ti lo va, ka dem lo bawk. Mak ka inti a, ka indem thung. Mi pasal neih dâwn avânga lo phili chiam mai chu a mak rêng a. Mahse, amah ka hmangaihzia hretu leh a taka lo tawngtu an awm a nih chuan anni mak tih erawh ka hlawh hauh lo vang le.

Jenny-i vânga ka hlimna chu Jenny-i vânga lungngaihnain a rawn thlen ta reng mai. Jenny-i vânga Jenny-i ka beiseina chu Jenny-i vânga Jenny-i laka beidawnna chuan a rawn thlâk ta a ni.

Ka theih leh neih ang tâwka nalhin ka inthuam a, bâwm chhûngah present dang leh a Krismas dâwn muffler min present tawha chu ka thun tel a. Biak In lam ka pan ta chhat chhat a.

Monu inthuamna mawi tak hmuh hmaihin moneitu vânneihzia ka chhût neuh neuh a. Kum nga lai beiseina nena ka nghah tithlâwntu chu ka hmu bawk a. Keimah avângin amahah hlim lohna a neih ka ring lo va, a hmêlah a lang chhuak hek lo.

An inneih thutiam chu zawi hle mah se, ka bengah
êk tla ri tluk zetin a ring a, zungbun an inbuntîr rual rualin Jenny-i ka beiseina zawng zawng chu a tâwp a, ka duhthusàm zawng zawngte nen romei angin a zâmral ta a ni.

Hmangaihtu leh hmangaihte inneihna ni chu a ropui a, a mawi a, lawmpuina leh duhsakna hlan nawn awn awn tlaka ni duhawm hmang thei an nih laiin hmangaihtu dang tân erawh ni râpthlâk a ni si a.

Ka present bâwm ken chu ka dah a, “Kei aia hmangaihtu i tawng a ni mai thei; mahse, nang aia hmangaih ka tawng tawh dâwn si lo..” tiin ka phun sap a.
Share:

17 comments:

  1. Ka lung ava kuai tak em...tak tak a ni nge chu ka hrelo. Mahse keimah ah ka han inchan a ka tuar nat dan tur pawh ka hre vek..a ngaihnawm lutuk.

    A ni khawp mai, kan hmangaih ber te hian min hmangaih berlo tih hi chu. Mahse hmangaihna hian hringnun hi ava ti ngaihnawm tak em...

    Ka sawi leh duh pakhat chu...nulat tlangval in hmangaihna te, chhungkua hmangaihna te, unau hmangaihna te, mu leh pa hmangaihna te, thian in hmangaihna te hi a in anglo vek in ka hria..romance hi hmangaihna emaw ti tam tak kan awm ngei in ka hre bawk.

    Ka ngaihtuahna a ti thui hle mai...a ngaihnawm takzet a ni.

    ReplyDelete
  2. Keipawh hmangaihna hi la na ve ṭhin tak ka ni, tunah pawh ka la lana reng, a substitute na tur an la awm hrih lo mai2 zawk a ni...hahaha

    Mahse Hmangaih ah chuan Isua hmangaih hi a thlawn lova, a inchhir awmloh, min ti na lova a fuh ber....khing zawng zawng neih theihna pawh khi Isua alo ni reng alawm le. :)

    ReplyDelete
  3. Mi lungleng mi tak e tilo chuan love story hi chhiar leh a movie en hi ka peihlo tawp.

    Nangma ziak anih vangin ka chhiar thung e.

    ReplyDelete
  4. Ngaihnawm khawp mai.

    Tak tak chu a ni lem lo'ng chu tiraw?

    Ngaihnawm hle mai, han ti zel phawt mai teh kan lo chhiar zel ang.

    ReplyDelete
  5. A va ngaihnawmin a va lungrunthlak tak em. Hmangaihna hi zawng a lo mak a ni. Kan duh ber leh kan beisei ber nei thei lova awm hi a hrehawm a, hmangaih berin hmangaihtu hmangaihna a hrethiam miah lo te hi a mak hlei hlei. Hmangaihtu neih hi a ngaihthatthlak viau laiin hmangaih tur neih hian nun a tinuam a, chu chu kan thlakhlelh ber pawh a ni fo thin. Thenkhat tana hmangaihna lamtluang a tluan purh laiin thenkhat tan erawh a kawng a bumboh em em lawi si. Chan loh tur leh phu loh zuna uai fuh laklawh chuan chan a chau ngawih ngawih thin a, thenkhatte hlim taka an nuih laiin tu hriatpui lohvin kan indawm kun ngawih ngawih thin.. Hmangaihna diktak pawh hi a lo dawngsawngtuin a dawnsawn duh si loh chuan engtik khawtik ah mah par a chhuah thei ngai dawn lo a lo nih hi.

    Hetiang ang thu ziak thei tur chuan a tak ngeia tawn a ngai a; chutih rualin a taka tawng satliah tan hetiang thu hi ziak chhuah theih a ni chuang si lo. Thuziak hi i va'n lo thiam tak em.

    ReplyDelete
  6. Ka comment teh duah chu. Ka ti ve mai mai anih khi.

    ReplyDelete
  7. @marvinic: Dik chiah alawm. Hmangaihna hi amah ringawt pawh thawnthu a tling nghal hrim hrim. :-)

    @Albert: Nia, hmangaihna hi kan han sawi kan han sawi chuan Isua hmangaihnaah bawk kan tlulut leh thin a nih hi!

    @Pu Hva: I va tilawmawm dangdai thin em!

    @Pu Rpa: Tak tak ni chiah lo, ni lo chiah lo. Nikuma ka ziah a nih khi. Ka lawm e.

    @Pu Caribou: Hmangaihna chungchang hrim hrimah hian i comment hi ngaihnawm ka ti thin. Ka rilru zawng takin i rawn sawi thin a! I comment a sei poh leh a chhiar a nuam ting, i inthlahrung mai mai a ni. Ka lawm lutuk.

    ReplyDelete
  8. a van tha reuh e... thil eng eng emaw te pawh min ngaihtuah tir ka ti!!.. a ngaihnawm thin khawp mai. Tang zel rawh Ts..

    ReplyDelete
  9. A ngaihnawm hle mai. Lung a kuai tlat. Ngaihzawngte thil present hi ka thiam loh mai bakah a leina lam tur hi ka tlachhma ve thei khawp mai. Amaherawhchu Audio cassettee lei na tur erawh englai pawn ka nei reng thung leh lawi si..hahaha.. Comedy in tawp se tha tur a nia..

    ReplyDelete
  10. Kan nupain kan chhiar a,ngaihnawm kan ti tak zet e. I tawngkam leh i thu thleh let thiamna hi ropui kan ti,kan ngaihlu.

    ReplyDelete
  11. @marin_a: I thil të të hriat chu lo post la, chhiar a châkawm alawm le! I lo leng a, ka lawm lutuk e.

    @Noddy: Kei pawh present chu ka uar lo khawp. Mahse, eng emaw changa han tih zeuh erawh a awm ve thin. Comedy hlir zawng a hnêawm lutuk ang e! Ka lawm thin e.

    @Bawiha: 'Kan nupain kan chhiar a..'
    Deuh kher che chuan! Ka nuih a za lutuk..hahaha. Tak taka, ulukly-a in lo chhiar vangin in nupa chunga ka lawm takzet e.

    ReplyDelete
  12. A va ngaihnawm lungrun ve le.

    Eng hawi zawng pawh hian thu hi ziak la, a nihna hi i phawk chhuak tha thin mang e.

    ReplyDelete
  13. i ziak tha bawk e...len luh man a awm ngei e.....ka buai deuh em avangin ka rawn lut hman thin lova,...zia lo ngei mai...hui ha.

    ReplyDelete
  14. @Chhuaklinga: A ni em em bik lo nia! I mi faknaah ka lawm e. I rawn lenluh thin avangin ka lawm bawk e.

    @eL: Ok. Hman lo chung chung paw'n i rawn tlawh hram hram a, ka lawm hle mai.

    ReplyDelete
  15. Ku TSa nge nge. Ziak tha dangdai thiam bik thin hle mai. Chhiar man a awm thin mang e.

    ...khrum

    ReplyDelete
  16. K'u Khruma chu i va han reh vang vang tak em! I rawn lang leh hlawl thin a, a lawmawm thin e.

    ReplyDelete
  17. A ngaihnawm leh pek hle mai a! Hma taka han chhiar phei chuan keima tawn emaw ka ti mai dawn alawm le...

    Nula tlangval inhmangaihna hi keimahah hian a bo ti tih tlat mai a; buaithlak zek mai.

    I thuziak hi a tak a nih loh pawhin nangma rilru atanga chhuak a ni hrim hrima a hlu ka ti!

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers