07 September 2011

Chhêmdam Thlifîm kum khat!

Mi blog-te chu kum sawm dawnte an ni tawh hlawm a, chutih laia keia blog kum khatna lo hetih pui hluai chu ka inthlahrung deuh va, mi nuihzat kan chang ang tih pawh ka hlau khawp mai. Amaherawhchu, ṭul ve tlata ka hriat vang leh, comment-tu leh chhiartute chunga ka lawmthu sawina ni pah fawmin ka han ti ve a ni.

Chhemdam Thlifim September ni 8, 2010 khan ka siam a. A hmain Chhemdam tih hming puin ka lo siam tawh a, thiam leh thiam lova dai chawp takmeuhva ka siam a nih avangin a template vel ka tibuai ta nuai a, a hran ka siam a, chhiartute zarah kum khat a tling ve ta reng mai a nih hi!

Hei hi chhiartute vang liau liau a ni tih ka hrechiang em em a, a bikin comment-tute in chungah ka lawm e. Nangmahni avang liau liauvin he blog hi a kal zel a ni tih ka hria a, thu lama ka pachhiat deuh chang pawha ṭhahnemngai taka Chhemdam Thlifim lo nghaktu in ni a, nangmahni avangin phurna leh chona ka neih phah zel a, in chunga ka lawmna hi a theuneu lo ve!



He thuziakah hian a hming hmerhin mi pakhatah chiah lawmthu ka sawi dawn; Sandman hian blog update hi ṭhahnemngai takin misual.com lamah  mi phochhuahsak ṭhin a, hemi avang hian zau zawkin mite’n he blog hi an lo hriat phah a, lut duh tan pawh awlsam takin a luh theih phah bawk a, a chungah ka va lawm tehlul em!

He blog hi mi chi hrang hrang 80 (Anonymous tiam lovin)-in an comment tawh a, post 52 (he post tiam lovin) awm tawhin comment zawng zawng hi (keima comment tiamin) he thu buatsaih lai thleng hian 737 a awm tawh a ni.

Blog-a comment tam zual 10-te hming leh an comment zat chu hei le!

Top ten commenters
1. Caribou - 64
2. H. Vangchhia - 44
3. Triplestar - 38
4. Rp Pachuau - 30
5. Khumchikthei - 20
6. Dolerich/Lalzarzova - 19
7. Sekibuhchhuak - 16
8. Noddy - 14
9. Krista Roluahpuia - 13
10. CyberThug - 12
Post hmasa ber - Rawih maia! September ni 8, 2010.
Comment hmasa bertu - Caribou, October ni 24, 2010 (Thlûkna dah dân leh short key pawimawh dang te)
Comment tamna ber post - Mizo blog khawvel leh Min tilungngaitu

He kum khat tlinna pual hian top 5 commenters remchâng ang angte chu hemi chungchanga an duh duh sawi turin ka ṭahawh a, min tihhlawhtlinsak hlawm a, ka lawm khawp mai.

Caribou...
"Chhemdam Thlifim blog-a thuziak ṭha tak tak ka chhiar te'n a changin min tinui a, a changin min tilungleng a, a changin min tibengvar hle ṭhin. Blog siam hi kan tam ang huin tha taka update zat zat peih erawh kan tlem hle. Chutih karah, bahlah awm hlek lova thuziak chhiar tur tharlam leh tha tak tak min rawn chhawpchhuak reng theitu TSa hi fak loh pawh tum ila fak loh a har a nih hi. Blog siam hi thil harsa a ni lo, a chhunga thuziak ṭha tak tak hmanga update ṭhin erawh thil dang daih a ni; a harsatzia ka hrechiang khawp mai. Blog pakhat lek pawh enkawl harsa tia ka iak ka iak laiin blog pahnih lai mai ṭha taka a enkawl thei te hlei hlei hi a chhuanawm ka ti. A thuziak reng reng ngaihnawm ti takin ka chhiar chhuak dap hin. Thil hmuh inang heuh heuh, thil tawn inang heuh heuh, kan sawi chhuah dante, kan ziak chhuah thiam dan te hi a lo va inang lo tak em! Hetih kawngah tak hian alawm he nau hi ka tluk loh em em hin. Ka ziak chhuah thiam miah loh tur ha tak takin a rawn ziak chhuak fo hin si a. 
A kum a la naupang na a, thuziak lamah erawh a naupang lo hle, a nihna a ropui lo na a, thu leh hla khawvelah erawh ka chunga leng a ni si. Thu leh hla lama thangchhuah diar lo khim tawhte ho sulhnu aiin a sulhnu te hian mawi loh bikna reng reng an nei hauh lo a ni tih hi huai takin ka sawi ngam e. Hetiang blog ha tak, a thlawna chhiar theih tura a rawn duang chhuak hi a lawmawm ka ti a, chawlhsan mai lova ha taka a enkawl chhoh zel theih nan leh, he Chemdam Thlifim hi chawl mai lova a thawt heuh heuh reng theih nan ka duhsakna sang ber ka hlan e."

H. Vangchhia...
"He blog pawh kum a tling ta der mai. Chhiartu bakah chhiartute'n an chhiar aṭangin midang chhiar lo thlengin a chhunga thu awmte hi Mizo mipuite'n ṭha lama hlawk nan hmang thei turin ka duh hle mai. Kum dang tam tak ziah chhunzawm zel ni thei sela a lawmawm ngawt ang."

Triplestar...

“Hun rei lo te emaw tih chhungin Chhemdam Thlifim blog chuan kum khat a lo tling ta der mai. Ka lawmpui e.

He blog hi Zoram khawvel blog-ah chuan ka luh ngunna ber pawl zinga mi a ni a, comment pek theih loh changte awm mah se, ka chhiar hram hram ṭhin a, internet luh chang hian ‘A blog a update leh tawh ang em aw..’ tiin nghakhlel takin ka tlawh hram ṭhin.

He blog-ah hian fiamthu nuihzatthlak tak tak leh thuril tak tak chhiar tur a awm ṭhin a, keini’n kan kal pelh leh kan kan mai mai ṭhin kha ani chuan chik taka enin thu ril leh hlu tak tak a lo chhar chhuak ṭhin a ni.

A blog neitupa hi kum lamah keini ai chuan a nau a ni tih ka hria, mahse, thu leh hla lamah chuan ka pa rual a ni tih ka pha lo ve. Ani hnen aṭang hian thil tam tak ka zirin ka hriat belh a ni.

He blog hi kum khat mai ni lo, kum sawm tam tak tluang taka kal zel tur leh Zofate tan, thu leh hla lamah leh fiamthu thianghlim lama Zofate chawmtu ni zel turin duhsakna sang ber ka hlan e."

Rpa Pachuau...

"TS-a hi ka la hmu lo va, internet khawvelah erawh chuan ka ṭhian ṭha berte zinga mi a ni hial awm e. Blog ka siam ve achinah ka luh ṭhinna ber a ni a, luh man a awm ka ti ṭhin hle a ni. Thu hi a naupan aiin a thiam a, a kum aiin a ril hian ka hre ṭhin. Fiamthu duh tak a nih ka ring a, a post zauh zauh bawk ṭhin a, ka hlimpui hle ṭhin. Thu-a duhtawka a han thlep kual vel ka chhiar hian mi pahnih ka hrechhuak ziah bawk. A blog-in kum khat a tling hi ka lawmpui rualin ka tluk lo ka tihna chu post update chungchangah hian a ni – tluk rual a ni lo. Taimak a ngai em a, ka pachhiatna lam tak a ni bawk si. Ka blog aiin thla hnih khat chauhvin a upa a, thu pai lamah erawh a pa rual a ni hawt ang. Mi pakhat, ṭhalai, fel tak, tuina lama chiang tak mai ka hmelhriat a, a blog chhim theia ka awm hi ka lawm hle a ni – ‘Chhemdam Thlifim’ dam reng se la, min chawmtu ni zel rawh se."

Dolerich...
"Internet khawvel hi ka tan chuan chenna ngai loh ram fan ang a ni a! Chu ramah chuan lungawina te, hlimna te, lawmna te ka rin loh tak takin ka hmu a. Chu'ng zingah chuan he ka nau anga ka en, Tsa Khupchong blog hian ṭahna zara nuihna awmchhun chu duhsak takin min hlan ṭhin a. Thu leh hla mualah thang chhuah a, tlang tlir turin ka beisei a. Ka duhsakna zawng zawng ka hlan e."

Chhemdam Thlifim tleh heuh heuh rawh se! 
Share:

24 comments:

  1. Lawmpuina ka hlan a che! Mel lung pawimawh i phum ta a, mel sang tam tak kal zel turin duhsakna ka hlan a che, Tv. Hugo-TSA :-)

    ReplyDelete
  2. Ku TS, nimin mai emaw ka tia nikum a lo ni ta der mai maw. Kham lo tak in kan chhiar a hun zawng a lo liam puat mai a ni ber e.

    Mi blog, kum sawm a upa pawh khan, hetiang hun, kum khat nihna hi an lo kal pel ve phawt a ngai a sin.

    Han ti zel teh; next post kan lo nghak fan fan e.

    Chhemdam thlifim in chhem dam zel rawh se.

    ...khrum

    ReplyDelete
  3. Happy blog birth day kan ti ve mai dawn em ni?...lawmawm e.

    ReplyDelete
  4. Happy Birthday, Chhemdam Thlifim. He blog atang hian thu tha tak tak leh thu fing tak tak te, nuihna tur te, hmangaihna lampang te, a ziaktu nunhlui ngaihnawm tak tak te ka chhiar fo thin.

    ReplyDelete
  5. Comment hmasa ber nihna min pe ngawt a, kei aia comment hmasatu "Anonymous" a awm sia.......ka inthlahrung deuh dui mai.

    ReplyDelete
  6. TS, ka lawnpui takzet a che..tluang taka i kal zel theih nan duhsakna ka hlan a che...

    ReplyDelete
  7. Thian duhtakte u, in mi duhsakna leh in mi lawmpuinaah ka lawm takzet e.

    @Pu Caribou: Post hmasa bera anonymous comment kha keimah ka nia, comment test-na atana ka hman mai mai a ni e. I tan inthlahrunna tur a awm lo. :-)

    ReplyDelete
  8. Ka lawmpui khawp mai che.. I blog a i thuziak te hi a ngaihnawmin chhiar a manhla thei khawp mai. Hun lo kal zel turah ziak tur a hriselna tha i neih zel theih nan ka duhsakna ka hlan a che.

    ReplyDelete
  9. Ka internet muang lutuk avangin blog lamah ka lut thei lawk lo va. Ka lawmpui takzet che> Ka neih ve loh thil tam tak i neiin ka hria.

    ReplyDelete
  10. I blog kum khat birth day chu ruai nen lawm ila, sa ei a chakaw a lawm mawle, UAMA a la hla si :-)

    -triplestar

    ReplyDelete
  11. Ka lawmpui em em a che.Ka lawmpui em em a che.

    ReplyDelete
  12. Happy 1st B day! Chak loh lai ber leh tlohtu tlem ber lai po'n han ti hram hram zel ang che

    ReplyDelete
  13. Happy Anniversary..Blog hi enkawl a hautak ania, ziahtur hriat bawk si loh chuan :)

    ReplyDelete
  14. Lawmpuina chibai mawlh mawlh le!

    I blogte leh nangmah hian kan tan khawvel nuam a siam thin.

    ReplyDelete
  15. I va han sualin i va han lawmpuiawm tak em! Taksa lam chak loh avang in i blog kumkhat tlin ka rawn lawm thei lawk lova, min lo hrethiam mai aniang chu

    Kum lam en chuan "KA NAU" i ni a, thu leh hla lamah erawh "KA U" i ni

    ReplyDelete
  16. Hotupa, Aizawl ka rawn haw avangin blog update lam ka en hman miah lova, tuna ka update khan i post hi ka rawn hmu ve chiah. A va han lawmawm ve kum khat i blog a lo tling ta chu. Ka lawmpui a che. Chuan ka hming i sawi lang khi chu phu lo hle mah i la, i ti lawmawm hle e. Kum 2 a nih hun a nghah hlel awm khawp mai! :)

    ReplyDelete
  17. @Sekibuhchhuak: Ka va lawm thin em! Dam zel rawh :D

    @Pu HV: Ka blog tlawm te-ah hian taima takin i lo lut thin a, i duhsakna nen ka lawm e.

    @KChT: I mi fuihna chuan min tiphur kher mai. Ka lawm e.

    @Pu Rpa: I mi lawmpuinaah ka va lawm em!

    @Pu Caribou: He blog tan hian i va hlu em! Lo paldarh hmasatu i ni si a.

    @eL: Ka va lawm em!

    @Marvinic: I mi duhsaknaah ka va lawm tak em!

    @Noddy: I mi duhsakna chuan beiseina thar min pe e.

    @Dolerich: Ka inzirna i ni e. I mi lawmpuinaah ka lawm e.

    @Triplestar: Thu leh hla ruai kan theh mup mup a nih hi tiraw.. :D

    @Samuel: Ka lawm lutuk e!

    @A_es: Ka lawm e. Ni e, theihtawp ka lo chhuah zel ang.

    @chhangte_II: A dik khawp mai. Nangni lo siam hmasate phei chu, tun thlenga tha taka in la kal zel thei hi in fakawm ka ti thlawt!

    @Krista: I comment chhiar nuam tak kha a ni he blog enkawltu chu.

    @CyberThug: I chawimawina min pek hi ka phu loh tawp a ni a, ka lawm em em bawk. Lo dam zel ang che.

    @Sir Sandman: Sawi tam ngai lovin Sir i ni e.

    ReplyDelete
  18. Ka lawmpui a che. (G)

    ReplyDelete
  19. This comment has been removed by the author.

    ReplyDelete
  20. Keipawh chhemdan thlifim blog hi ka tlawh ziah a nia. Mizo blog-ah chuan a tha ber te zing ami a ni. Kum tam tak a kal zel theih nan duhsakna ka hlan e.

    Chutih rual erawh chuan, TS facebook-a ka friend request i accept duh lo tlat hi chu na ka ti. 😁😁😁

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers