01 September 2011

Ka Nu

Mangang leh lungngai tâwpa ka awma min thlamuantu, chanchhe ber leh khawvêl êng kîl ngam lo tur khawpa zahna nasa ka tawh chânga ka bula awma, hmangaih tlâk loh khawpa inngaihna rilru pu hial khawpa suala ka tlûk chânga min theihnghilh lotu, ka nu hi chu a hlu a ni.

Mite anga khawilo kal dâwna chêng tam min hûm chhuahtîr thei ni mah suh se, a hmangaihna
awngkam kha a hlu a, suma lei theih a ni lo. Nu sàr veh vawh leh duh duh thawka ti thei ni lo mah se, amaha beiseina leh rinna awm chuan a tichak a, chu chu a a faten paw'n kan lo chhim hîn.

Thiamna lamah chhuan tur engmah nei lo mah se, a thilthlâwnpêk zozai kha tu nu dang mahin min pe thei lo va, min hmangaih anga tu dang mah a hmangaih thei lo hi vânnei ka intihna ber a ni.


Eng emaw chângin thinrimin han titau ve
hîn mah ila, nêm leh zaidam takin min thawidam a tum hîn a; a bulah chuan vânduaina lo thlengte pawh hi a nuam bîk hliah hliah a, mal taka ka awm a phal ngai lo.

Khawvêl sualna tam tak leh hmêl hrang hranga inlana mi bum tum
hîntu laka ka fihlîm theih nan a theih chin chinah a âng chhûng nuamah min chêntîr a, ka tawrh ai pawhin a tuar mai hîn. Chu a hnathawh ropui tak chu a hlawhchham hauh lo va. A hlawhtlinna chu keiman ka têl mêk a ni.

Ka thiltihah hlawhchhama ka awm chângin kei ai mahin hrehawm a lo ti
hîn a, ka rilru ai mahin a rilru a lo na hîn. Chu'ngte avângin a bulah chuan naupang thar ta sawtin ka inhre hîn a, chuta ang chuan a hlutzia chu ka hre chhuak uai uai a. Ka chhût a, ka chhût nawn leh hîn a, ka hlawhchham a ni; tunge nu hmangaihna hlutzia chhût chhuak zo ang le?

Taimâkna leh tumruhnain min kaihruai a, chhelna leh dawhtheihnain min enkawl seilian bawk a. Ka awm dân tura
ha tam tak min hrilh mah se, a chêtdân leh awmdânin thil tam tak min zirtîr zâwk a, amaha pârmawi chu keimahni-ah a lanchhuahtîr hîn. Chu chuan puitlinga ka kalna kawng a kawhhmuh a, ka inchhuihbah palhna lak atà min vêng tlat a ni.

Ka damlo va, a tlaivâr a; lungngai leh khawhar ngawih ngawiha ka awmin min thlamuan
hîn. Thinlung ngui leh chauva ka awmin min kuangkuah hîn a, ka ahna mittui chu duat takin a hruhul hîn. Sual kawng ka zawh a phal ngai lo va, a tih theih tâwk awngaina hmangin min hnèm hîn. Hmangaih tâwp lovin min kuangkuah a, chutah chuan thlamuang takin ka ap hîn. Nu leh fa inkâra hmangaihna tluanghrui awm hi tu'n chhuchat zo tak maw aw..!

Harsat mangan ka tawh chângin ka nu ângchhûng nuam ka ngai a; hmána thlahlel taka a
âng ka belh hin lai kha ka mitthlâah a rawn lang uai uai hîn a, ka dam phah sawt sawt hîn. Khawvêl sualna tam takin min hnaih chângin hmána a fuihna leh zilhna thu ha tak takte kha ka bengah a rawn ri nawn awn awn a, chu chuan sual lak atà min thiarfihlìm a ni.

Thiamna aia theihna; theihna aia chhelna, chu chuan chhamna lak atà min hlattîr a ni mai lo va, min thiarfihlìm a ni. Hlawhtlinna dai theu turin hlawhchhamna hlîng inchhuntîr hmasak phawt a
ûl zia min hmuhtîr a, puitlinna lamtluang zawhna kawngah pachhiatna pawimawhzia min tawntîr a ni. Sum hmanga theihna aiin thluak hmanga thiamna min pe a, hlawhtlinna avâng chapona aiin hlawhchhamna avânga inngaihtlâwmna rilru min tuh bawk.

Ka nu min pêk ang khawngaihna chî hi Mother Teresa-in min pe thei lo va, ka nu min pêk theih ang tumruhna leh beih hrâm hrâm duhna thinlung hi Helen Keller-in min pe thei lo bawk a. Ka nu min pêk ang chhêlna hi Dolly Parton-in min pe thei lo va, ka nu min pêk ang thawhrimna hi Oprah Winfrey pêk theih ka ni lo. Ka nu min pêk theih thiamna leh hmasâwnna hi Marie Curie-in min pe thei lo va, ka nu min pêk ang
hanlenna atana rilru leh thlarau châwmna thu hi khawii thuhriltu ropui ber ber kâ aanga hriat ka beisei ngai lo va, ka beisei phâk lo bawk. Ka nu min pêk rohlu hi tu dang tehlulin nge min pe thei ang le? A dawngtu ka nih avânga ka lâwmna hian tâwp ni rëng a nei lo vang.

Ka
hatna duhin ka pa'n min hau va, ka rilru nat hlauvin ka nu'n min hnèm hîn. Chhel nihna man pha turin ka pa'n min vua a, ka nat hlauvin ka nu'n min chûl a; thawhrimna awmzia leh hlutzia min kawhhmuh tumin ka pa'n min chher a, hman tlâk ni turin ka nu'n min tuaihriam bawk a; ka pa ka zah a, ka nu ka ngaisáng thung.

Hetiang khawpa min hmangaihtu, ka nu hi tihnat ka phal ngai lo va, kha zozai lungngaihna a lo paltlang tawhte atâ hahdam tawh se ka ti takzet a. Ka tâna kum tam hrehawm leh harsaa a lo hmanliam zawng zawng hlutna kha, eng tangka maha lei theih a ni lo. A tâna ka tih theih tâwk tih ka duh a, hmangaihna famkim nena duat taka enkawl ka duh a ni.

Ka hma lam thui tak a thlîr
hin avânga harsatna a tawh zozaite avâng khân thiamna leh theihna ka neihte chu a tân ka hmang tawh ang a, keimaha chi nung a tuha chu a vuai mai loh nan ka enkawl ang a, a chawrno hlep hlep hîn ang.

Ka dik lohnaa min fuiha ka lungngaiha min hnèmtu, ka
hatnaa min faka chak lehzual tura min fuihtu, thu min hrilh zawng zawngte duhtâwk mai lova a taka lantîrtu, hmangaihnaa min enkawla ka thinlunga khawngaihna tuhtu, kawng dik lova ka pêng tur min vênga awngaina nena min kaihruaitu, ka nu hi ka theihnghilh ngai lo vang. Amah avânga ka mittui tla hi, kut min thlâk leh min hauh vâng ni lovin, a hmangaihna hlu tak vâng a ni zâwk si a.

Hmánah chuan a mi hmangaihna hrethiam lovin palzûta palzama paldaia lo paltlang mai maiin keimaha a tum chu ka haider fo
hîn. Kha'ng lo hlutzia kha a hun lai khân lo hrethiam ni ila chu, a harsatna tawh tam tak kha ka pumpelhtîr thei tur.. Min hauva min zilh hin pawh hi suala ka pênbo a phal lohzia tilangtu a ni tih tûnah ka hrethiam tawh a, min fuiha min phûrna zawng zawng hi chak lehzual tura thahrui min siamna a ni tih ka theihnghilh tawh ngai lo vang.

Engtikah emaw chuan tu pa emaw, tu nu emaw ka la ni ngei ang. Chu'ng hunah chuan fa enkawl dân hriaa ka thiam theih nan ka nu min enkawl
hin dân ka ngaihtuah chhuak hîn ang a, chhûngkaw hlawhtling ka din theih nan ka pa thawhrimna ka theihnghilh ngai lo vang. Chu'ng hunah chuan an hnu chhuia an zia ka phawk chhuak zo lo a nih pawhin ka theih leh thiam chin chinah ka hlatsan mai lo vang a, ka rilrua an lo tuhngheh tawh thawhrimna leh dawhtheihna nen ka bei zual deuh deuh vang. Chutih hunah chuan ka bulah awm tawh lo pawh ni se, a thil min zirtîrte avângin chatuanin ka thinlungah a nung reng tawh ang.
Share:

22 comments:

  1. Nu te lo hlutzia min ngaihtuah let tir. Thu ziak tha tak a va ni em!

    ReplyDelete
  2. Hei zet chu tha ka va han ti em !

    I tawngkam han chheh chhoh dan, inlak lawn mawi ziate khi tha ka ti lutuk ringawt. Thu i thiam thlawt e.

    Heti khawpa nute hmangaihna i hrethiam hi i fakawm khawp mai. Nia, khawvel hi eng chen pawh awm mahsela nu hi pakhat chauh kan nei dawn. Duat theia kan awm lai hian a theih ang anga duat hi an va han phu tak em.

    I blog-a i post zawng zawngah ka rilru a hneh ber mai.

    -triplestar

    ReplyDelete
  3. Ngaihnawm thlawt e-an hlu reng a ni.

    ReplyDelete
  4. Ngaihnawm thlawt e-an hlu reng a ni.

    ReplyDelete
  5. I ziak ngaihnawmin a dik ka ti hle mai. Nu te hi an hlu teh asin.

    Naupan zual lai min mitthla tir reuh reuh mai alawm le.

    ReplyDelete
  6. nute hi an lo hlu ber mai a nih hi...nute hi an lo hlu ber mai a nih hi...

    ReplyDelete
  7. @Noddy: A va lawmawm tehlul em ve aw..

    @triplestar: Ka lawm hle mai. Tunlai chu ka nu hmangaihnaah ka luangliam tak zet zet, ka ziahna a rei deuh tawh naa, ka rawn dah leh a ni. Ka lawm lutuk.

    @Pu Rp, ka lawm keuh keuh e.

    @Pu Hv, i naupan lai chanchin chhiar a châkawm mang e.

    @eL: Hlu takzet!

    ReplyDelete
  8. I ziak tha khawp mai a!! a chhiar a hahdam e, Ka chhiar uluk kher mai.
    Chuan, Para tawp ber a "Engtikah emaw chuan tu pa emaw, tu nu emaw ka la ni ngei ang. " tih a "nu" tih lai tak khi tihsual palh nge ka man lo ve hrim hrim?

    I ziak tha khawp mai, ka nu hlutna ka man belh leh ta!!!

    ReplyDelete
  9. A va han ropui tak em, I thu ziak hi eng lam hawi pawh ziak la chhiar anuam thei khawp mai.

    ReplyDelete
  10. Lal ropuia ni tawh mai la tha ang a!!,, Ziak tha thei emai, (ka ti lutuk em aw!!!!) he2 :)

    ReplyDelete
  11. Mihringte hmangaihna ah chuan nuin a fa a hmangaihna hi a thukin a tlo berin ka hre thin. Fa tan a nu chu a inhumhimna, a mangan nia a tlanchhiatna hmun a ni a. A lungngaihni a thlen apianga a tlukluhna hmun a ni.

    TS-a nge nge, i va'n ziak ngaihnawmin i va'n han ziak thiam bik thin tak em.

    ReplyDelete
  12. nu te hi chu an hlu ania... Ts, i nu chu ka ngaisang khawp mai...

    ReplyDelete
  13. Ka nu hi lehkhathiamlo, pawl 4 pawh pass lo a ni chungin ka ngaisang a nia, PATHIANIN hetiang nutha min pe hi ka lawm a ni. Nu hlutzia i rawn ziak a a lawmawm hle mai.

    ReplyDelete
  14. Ts, ava tha leh thuai thuai em! Thuziak thiam tak ini satlaih mai lo va i thupui thlan leh message-te hi a tha em em thin a nia.

    Ka like lutuk e!

    ReplyDelete
  15. Hei zet chuan i quality a pho chhuak chiang kher mai!! A tha lutuk tlat. Han tang sauh sauh la, Pa Hmangaihna te pawh han sawi ve zel la.. KZP ka chhawng vah e.I sawi hi a dik bawk si..
    ChhanaPa

    ReplyDelete
  16. Nu hlutna leh nu hmangaihna i va han puangchhuak thiam em ! I thiam tak zet a ni. Ka mittui a tla sawk mai ka ti,ka nu min hlut zualtir e,ka lawm e.

    ReplyDelete
  17. @Lersia: Uluk takin mi chhiarsak a, ka lawm khawp mai. Khati lai bik kha chhiartute tan bika ziak ka nia, chhiartu mipa leh hmeichhia hmer tel thei ve ve turin ka'n ti mai a ni e. Ka lawm lutuk.

    @Ramenga: Ka lawm thin e.

    @marin_a: I ti mah mah! Mahse, ka lawm hrim hrim.

    @Pu Caribou: Ka ziak thiam bik hauh lo. Nu hmangaihnaah ka luangliam em a ni. Ziak ve ta la chuan a aia ngaihnawm zawka i ziah theih ka ring a ni. Ka lawm lutuk, i comment a ngaihnawm e.

    @maisek: I rawn leng teh khauh a! Ka lawm lutuk e.

    @Pu Duhawma: Ka nu pawh chuti tho a ni. Mahse, nu dang thiamna sang ber neite ai pawhin ka duhin a hlu zawk a ni. I rawn tlawh a, ka lawm lutuk e.

    @K'u Krista: Kei pawh i comment ka like khawp mai. I rawn tlawh leh i mi fakna hlu tak avangin ka lawm e..

    @ChhanaPa: KZP avangin ka lawm tawp! Nu lamah ka luangliam rih em a, chang dang ka la kân thei rih lo chu a ni ber mai :-) Ka lawm e, i rawn tlawh ziah dawn nia.

    @Hanc: Ka va han lawm tehlul em aw.. Nu hmangaihna hi chu a ropui ngawt mai tiraw.. Ka nu ka ngai veng veng thin. Uluk takin mi chhiarsak a, ka lawm e.ik kha chhiartute tan bika ziak ka nia, chhiartu mipa l

    ReplyDelete
  18. Hnuk a ulh lek lek mai ka ti..Tha e.

    ReplyDelete
  19. E khai, ziak tha hle mai. Chhiar a inchhirawm loh kher mai.

    ...khrum

    ReplyDelete
  20. E.. Thianpa Mapuia chu, a lawmawm hle mai. Ka lawm lutuk e.

    K'u Khrum, ka lawm e. A rang lamin i contact no ka hre duh khawp mai. Ka email tskhupchong@rocketmail-ah min lo thawn dawn em ni ang?

    ReplyDelete
  21. A ngaihnawm hle mai!I nu chu nu fel tak anih hi. A fapa pawh i fel e mai!

    ReplyDelete
  22. @Sekibuhchhuak: Ka lawm hle mai!

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Powered by Blogger.

Ka luh ṭhinna

Followers