07 November 2011

Advantage of facebook deactivated!

Facebook ka chhuahsan lailâwk avangin ka nunah thil danglam lo thleng leh tun hmaa ka tih thin ka tih tâk lohte a awm ta nual a! Chu’ngte chu ka’n tarlang ang e.

* Zan mutna hun ka ngah ta hle.
* Lehkha zir thei turin ngaihtuahna leh hun thawveng zâwk ka nei thei ta.
* Kawnga kal chunga phone ka bih ngur ngur thin kha ka sim thei ta.
* Zing thawh hlim atanga facebook nghal char char avanga hnathawh leh class ka tlai ziahte kha ka pumpelh ve ta!
* Ka mit pawh a lo hahdam thei ta zâwk a. Lu nâ pawh ka nei tlêm ta zâwk bawk.
* Ka phone battery charge paw’n a lo daih rei ta zâwk a.
* Facebook-a na tak taka min sawiseltu leh thu hahthlâk tak takte ka pumpelh ta.
* Mi’n ‘facebook-ah i va tam ve’ min tih thin kha ka pumpelh ta! (Tuman facebook-a tam nih hi kan duh lo!)
* Ngaihtuahna pawh a facebook ta lo deuh e!
* Hunâwlah hahdam takin ka châwl vang vang thei tawh a, lehkhabu chhiarna hun ka ngah phah ta zâwk bawk.
* Facebook atangin zah-theih-loh (over!) ka zir chhuak tih ka hriatchhuah phah!
* A lerh te pawh kan lo lerh loh phah ta deuh alawm!
* Ka haihawt zualpui a reh.
* Thu tha bâwm (misual.com leh blogger) lam tân hun ka ngah ta zâwk.
* Ngaihtuahna nu but but a lo reh tâkah chuan thuziah lampangah min pui ta hle.
* Ka Pathian biakna (tawngtai, bible chhiar leh inkhawm) hun tur zawng zawng kha facebook khawih nan ka lo hmang thin tih ka hrechhuak ta!
* Tul lova hun ka lo khawhral hnem zia ka hrechhuak thar a, tangkai zâwka hun hman duhna thinlung ka put nachâng ka hre ta.
* Facebook-a mi puitling deuh leh ka thian tha zualte contact theihna tur (phone no & address) ka nei tawh tho va, ka hlimin ka lâwm em em e.

Ziah a râlah chuan ziah tur a la awm nual, duhtawk phawt ang.

He thu atang hian facebook ka lo hman nasat zia leh deactivate âwm hliah hliah ka nih zia midang tân pawh a hriat theih ta a, ka deactivate avanga min uia min ko lova min lawmpui theih zâwk ka ring hial!

Mahni inthunun thei leh a hman chintâwk hriate tân chuan facebook hi a tangkai lutuk. A chintâwk hre lo paw’n facebook hi ka tangkaipui nangiang alawm! Mahse, a chintâwk ka hre ta lo hi a pawi ta ber chu a ni.

Ka deactivate avang khan ka facebook thian zawng zawngte ka thlah hmak dawn tihna a ni rëng rëng lo. A hma angin kan inkâwm tam thei tawh dawn lo tihna mai a ni. Facebook tel lo nunchan ka’n zir phawt ang a, khawih leh tura ka fit tâwk (ka inthunun theih) hunah ka kir leh ang.

Taka, ka fiamthu lehkhabu hmasa ber tur 'Nun tihlimtu' tih chu a chhuak thuai dawn e. Remchângah a cover nen ka la rawn post leh dawn nia..
Share:

18 comments:

  1. a nih hi post pawh a awm nghal mai. I fb tak tak kha chuan nang ber pawh kha i reh khap mai-blog lamah.

    ReplyDelete
  2. E khai! Pu Rp, i va rang ve! Nia, blog lam hi chu han tihnun deuh chu ka tum khawp mai, ka tlin leh ngut ang emaw chu.

    ReplyDelete
  3. Hlawkna tur ka ngah ve dawn hle mai keipawh hian...engtik emaw hunah chuan ala ngai ve ang mawle...a lunglenthlak hle mai...mahse congrats le...i'n boruak pawh lo tha zel turin duhsakna ka hlan a che..

    ReplyDelete
  4. Thianpa, boruak tha lo kan nei hran lo! I mi duhsaknaah ka lawm e.

    ReplyDelete
  5. Phone atanga online thin i nih a i bansan lailawk anih chuan, i kianga midang awmve tan pawh a hahdam thlak dawn chu mawle hairehai. Hmunkhata awmho reng si phone inhman san (TXT/chat etc.) daih hi ka thil nin zawng tak a ni hrim2 hehehe.

    Nangpawh thim atanga khaweng a chhuak ang maiin i thawl huai ang chu mawle. :)

    ReplyDelete
  6. I fiamthu bu chu chhiar a va chakawm tawh ve le. Lehkhabu meuh ziaka chhuah hi thil harsa tak ani an tia sin. Ka lo chang reng e.

    Facebook i deactivate chu i hlawkpui hle mai maw. Ka lawmpui a che. Facebook hi hman thiam chuan a tangkai hle, mahse hmangthiam erawh an tlem hle thung. Blog lamah i lang tam dawn tawh tihna a nia, a phurthlak ta hle mai.

    ReplyDelete
  7. @Pu Hv, ni e. Phone ka addict a ni ringawt a! Mi bula awm pawh inthlahrunawm khawp hi a nia. Tunah chuan a zia ta khawp mai.

    @Pu Caribou: Nia, a chhuak tep ang. Misual.com-a ka post-te pawh a awm nual ang, article ni lo. A chhuah hunah a cover nen ka rawn post dawn nia. In mi lawmpuinaah ka lawm takmeuh a ni.

    ReplyDelete
  8. Bansan ngai lova hman thiam ka zir mek. Ka zir thiam lo a nih chuan FB hi chhuahsan hun ka la nei ve ang.

    I lehkhabu chu kan lo lei ve ngei ang chu.. :)

    ReplyDelete
  9. @Pu Zaia: Chintawk ka hre lo em lawm! Zirlai tan chuan a buaithlak a, zirlai lo tan chuan information tha tak ang a nia, bansan love a.. Ka lawm lutuk e.

    ReplyDelete
  10. Engkim hi chin tawk neih loh chuan thil tha lo an ni vek thei a ni tih i rawn pholang tha hle mai. Mahni tana hnawksak pawh hi hre reng chung pawha kalsan theih loh a tam duh khawp mai. Nang chu i tana hnawk i thing thla tawp thei a, i fakawm hle mai. I la hlawhtling dawn khawp e.

    ReplyDelete
  11. A point hnihna khi tangkai lo ka ti :) , hun tha neih ringawt chu ho e..!! 12na khi a ni thei viau mai. Ziah tur hi i hre thin mange. Ngawi tak rawh, i lehkhabu chu rawn chhuak rawh se, ka hmaih lo viau ang.

    ReplyDelete
  12. @K'u TPa: Ka lawm lutuk e. I mi fak leh fuihna ka phu lovin ka lawm khawp mai. Chintawk ka hre si lova! Rawn lenglut fo rawh.

    @beethugs: Hun tha neiha tih si loh chuan...i ti deuh a ni maw...hehe. 'Ka zir tam ta zawk a..' tih ka belh ni mai rawh se. :-) I point lakchhuah atangin nang pawh i hriat ruak...haha. I rawn lenglut a, ka lawm kher mai.

    ReplyDelete
  13. ka Facebook tlem chinah hian keipawh blog lamah hian ka tui thar leh deuh, mahse ziah tur erawh a rawn lang nghal uai uai kher lo. A hma te kha chuan engemaw hlek rilru ah lo awm se status ah kan han update ringawt a, mi in an lo comment a, kan reply a, hun kha a hek em em. Kan attention span kha a tawi tup mai a ni. Hunawl neih hlekah phone kan check zuk zuk reng a, mi zingah mawl hmel deuhin kan nui sung a. Han login loh vang vang chuan kan chiri bik lo ve.

    ReplyDelete
  14. @Miss aduh, i rawn ziak tawi kim khawp mai. Facebook nasat chuan ngaihtuahna hi a facebook tel tlat a, rilru fim kek kaka thuziah pawh a harsa duh khawp mai. Deactivate chuang lova i login lo hmak thei kha a thain i entawntlak ka ti khawp mai. I lo lenluh avangin ka lawm e.

    ReplyDelete
  15. Thil engemaw kan post a, chhuahsan pawh ni ila rilru ah engtinnge an kawmen ang aw.. tih kan ngaihtuah vung vung a, thiante post ah kawmen ila engtinnge an kawmen chhunzawm hriat chakin kan za leh mer mer a...
    Thil engkim mai 'luttuk' hi chu tha lo tak ani. Keipawh facebook i chhuahsan atang hian ka inngaihtuah ve tan a, luh tlem ka zir ve mek...

    ReplyDelete
  16. @Dolly: A ropui khawp mai. Facebook avanga ka hun kalral hnem zia kha ka ngaihtuah a, a lo uiawm ngei mai. I comment avangin ka lawm e.

    ReplyDelete
  17. TS chu self control i nei tha hle mai. Thil addictive lutuk hi chu a tir atanga insum hi pawimawh fo in ka hria. Ka facebook khat khawp mai, One week chhung hian One hour ka awm angem aw??

    Anyway, Congratulations TS ti daih teh ang!!

    ReplyDelete
  18. @Pi Ma-i: Self control ka neih loh luat vang a ni ber! Ka lawm e.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers