28 November 2011

Krismas lunglên


Krismas hi kan kum leh hun azirin kan hman dan a danglam chho zel a, chutichung pawh chuan kan naupan laia kan hman dan chu kan ngaih ber a la ni tho mai. Krismas kan nghahhlelh theih zia kha aw.. Eng vanga nghakhlel nge kan nih le? Eng nge nuam kan tihna chhan em em le?

Kum nga vel kan nih lai chuan thingtlang kilkhawr taka kan awm lai a ni a, kan hman dan pawh a mâwl thei ang ber a ni tawp mai. Lênkhawmna in tur bik liau liau chu biakin kawtah an sa a, a bang vel pawh hnahin an khuh vek a ni. Chutah chuan chhuahna tur kawngka pakhat an tikua a, chumi kuaa kan luh chuan krismas lenkhawmna in kan lut nghal a, kan kal tlang chuan biakin kan lut a ni nghal mai. Chu lenkhawmna tur bûk an sakah chuan kan nu leh pa, kan ni leh pi, kan u leh pute chu tui takin an zaikhawm tlak tlak mai ṭhin.


Krismas lemchan te kha kan uar thei raps. Zanah an zaikhawm a, keini chu a maksak thei ang berin kan inthuam a. Kan hiante in remchang laiah hnathawh thawmhnaw te kan inbel a, buara te kan sin a, pheikhawk chhe tak tak kan bun a, kan inhnawih râng a, hmai te kan tuam vel a! Chutianga hianzahova inthuam chungin an zaikhawm lai takin kan lut thut hin! A nuam ve mai mai hin asin aw.. Engtia chutia tih nachang lo hria nge kan nih chu ka hre lo. Zaikhawmte kan hrilhlawk hran lo va, kohhran hruaitute lam pawh kan hrilh chuang lo va, hianzaho phurin kan barakhaih ve tawp! Tun laia kan hman dante nen chuan tehkhin chi pawh a ni nang a!

Hâlpuah leh hâlmawi engmah a awm lo. Baloon nei pha an awm chuan kan thlir dauh dauh ringawt. Ruaiheh hi a nuam ber mai. Sa hi duh duhin kan ei ve thei si lo va, kum khata kan sa ei zât pawh kutang thliaka chhiar tham lek a ni ang. Chu pawh, ranvulh talh châng leh pate'n sa an kah leh zauh châng a ni mai a, a bak han beiseina tur a awm lo. Chawhmeh hi chu kan insuah fo, sa insuah kher kher hi chu a har alh! Chuvang chuan a nia, krismas hi ruaiheh hian a tihhlut em em ni.

Inkhâwm leh ruaiheh chu chu'ng hun laia kan krismas hman dan chu a ni ber âwm e. A.. Kan la naupang em a, kan hman dan kimchang ka hre tawh lo pawh a ni maithei asin! Biakin kawt hi field a ni nghal a. Kan ruaiheh chu changel hnah ngeiin field-ah kan kîl a, a chhungkaw të tëin kan kîl tlangpui a, hianhote paw'n kan kîl tho bawk. Chutiang chuan field-ah sa kan hmeh huai huai mai a, a nuam duh hle. Sa kan mamawh chuan fatute'n an rawn bun hnawk a — Aw.. Kan van tlai thei tak! Zanah chuan inkhawm banah kan lengkhawm a, lenkhawmnaa lem va chan leh a ni mai. Nuam thei rura mawle.

Khata ka hiante ho zawng zawng kha khawiah nge an awm tâk ang le? An la dam ang em aw..? Eng hna hna tak thawk tawh ang maw? A hente phei chu nupui fanaute nen an ri laih laih tawh âwm si a. An ngaihtuah ve hin chuan kei hi engtianga ka awm nge an rin ang le? Krismas lem kan chan laia kan hotupa leh a rawtchhuaktu kha la dam ta se, tunah tak hian eng nge a tih ang awww..? Lunglen loh a har asin!

Kum nga a liam a, kum sawm vel kan nih chuan kum nga hma lama kan krismas hman dan nena khaikhin theih pawh a ni lo, changêl hnahah ruai kan heh tawh lo va, biakin kawtah thing hnahin bûk an sa tawh lo va, krismas lemchanin lengkhawmte kan barakhaih ngai tawh lo. Mahse, a hnua ngaihtuah lêt leha lungtileng tur thil tam tak erawh kan hnutchhiah tho si.

Kum nga chhunga thil tam tak a thlen avangin biakin kawtah field a awm tawh lo va, biakin kawta field awmna khua chu an rauhsan tawh. Nunhlui leh hmunhlui a chang tawh. Khawvel changkannain min hnuchhawntir a ni ber mai. Mahse, kan awmna apiangah krismas chu a hun ngaiah bawk a lo thleng leh si! Biakin kawtah lenkhawmna tur in chu an sa tho va, mahse, a bangah rangva an hmang tawh.

Phur takin masi thing chu hmeichhe lamin an phur a, mipa naupangin thing muh tur kan pu a, a upa lamin phun tur chi an lo pu bawk a. Mahni buai buaiin kan buai sup sup a. Zanah kan thing put chu lenkhawmna in tualah an mût a, chumi bial chuan kan hukhawm a, tui takin krismas hla kan sa hin. 'Kan' han tih lêmah 'an' a ni zawk ang chu. Keini chu a phawvuaka la hlim tawk lek chauh kan nia.

Krismas ruaiheh chu a nawm ngaiin a la nuam reng. Ṭhian tel lo chuan nuam erawh a awm chuang lo, naupan lai chuan! Ṭhiante nen ruaiheh turin kan intlar a, fatu lamin naupangte chu min han dawh hmasaktir ngei a. Vawi thum tal kan dawh nawn loh chuan a kim thei lo, krismas ruaiheh lei vawithum dawh nawn chu thil inhmeh takah kan ngai tlat. Kan ei peih lo emaw, tui kan ti em em lo a nih pawhin kan dawh hmasaka kan ei bâng kha chaw nawi dahna tura an siamah kan paih ang a, a thar kan dawh leh ang. Chutiang chuan vawithum dawh nawn kan tlâk hram hram hin. A dawh nawn tam nih te kha kan intihtheihpui a! Kan rilru a thianghlim, kan hman dan pawh a tâwk tiu teu viau; sual a tel lo.

Zanah mi serawk kan rûk hinte kha sualah pawh ka chhiar phal lo! A nuam lutuk! Inkhawm banah khawlaiah kan lêng dul dul hin a, keini hianzaho chu mi sawm vel lai kan inzui hin a. Kawng chhak lama serawk awm chu kan vawmthla dawt a, a remchan dan azirin kan hawlhthla bawk a, kan chhar a, kan tlanchhe hul hul hin. A neitute kawngka hawng thâwm ringawt paw'n veng lehlam min thlentir hin nia. Kha'ng tlanchhiatte kha alawm nuam chu! Serawk pumkhat lek avangin kan inhuam thui hin khawp.

Tlanchhiat laia a vanduai bik nih erawh a nuam em em lo. Kawngpui char ha takah tlanchhiat vung laiin kan han inchhuih tlu khut a, khup a van pilh duh tak. A belkâng mai lo, kekawr chhanah a thi hawt zel a. hiante'n min ngaihsak zui lo mah se kan vui chuang reng reng lo. Kan dem hek lo, kan rilru a thianghlim a nia. A hrehawm ber zawk erawh chuan serawk neitu tlan peih deuh an awm hin hi a ni. Tawlhtluk khup nat tawh mah nak alaiin min han umpha a, min hau, min bêng; ah a van chhuak duh thei tak e aw..

A châng leh aia upa deuhte kan zui a, khaw tawp lehlam lehlam kan kartawn zak zak hin a, nuam kan ti em em tho. Biakina lenkhawm ai mahin khawlaia vah dâwl dâwl kha nuam kan ti zawk a, serawk rûk tih loh chu thil sual han tih em em dang kan nei lo; mi thil tisual lai kan hmu leh zeuh hin tih mai loh chu. Thokêpte kan chhu puak vel mai mai a ni ber e.

Kum nga a liam a, kum sawmpanga kan lo ni ve ta hial a. Krismas-a thawmhnaw thar neih loh chu a nuam duh lo khawp. Hetiangah hian chhungkaw harsa leh rethei nih a hrehawm duh hin ngei mai. Thawmhnaw thar kan nei thei lo va, YMA ang zâwnga thilpek, thawmhnaw kan dawn chuan thil thar nei kan ni mai. Chu'ng an thil min pek te lah chu han hâ ila, min sin emaw tih mai turte an ni hlawm a. Kan ha hluai mai hin a, krismas thilpek a nih avang erawh chuan a hlu kher mai.

Ngaihzawng neih nachang kan hre an tawh a, neih tur erawh kan hre lo. hiante zinga lo nei an awm chuan an chhas kan rim huai huaia a ni mai. In khatah kan inhnawh chêp vak zel. Lenkhawm pawh nuam kan ti an a, a phur phurah kan ang tawh zawk a. Biakin kawt lenkhawmna hmunah chuan thing hi hmun engemawzahah an mût a, chumi kil chuan kan hu bial laih a. Kutkawr kan bun a, lukhum dum lum khumin polar kawrlum nen, kekawr lum leh mawza lum, pheikhawk lum nen, a chungah shawl-in kan intuam lum bawk a. Lum takin kan zai hin a, a nuam thei e..

A chang leh Mizo chhangban ngei kan kang khawm a. Chhang kan laia muthlu bik nih chu a zahthlak duh khawp, hmai an lo hnawih mang nuau a, lenkhawmna hmunah min han kalpui a. A zai uar uar leh kutbeng ring ringah kan la ang a — a van zahthlak duh hin tak. Mahse, kan inhaw lo, krismas a ni tlat. Krismas thil a ni tlat a, a pawi reng reng lo. Mahnia engvaka kan lo ngaih loh kha hiante nen chuan a lo fel thluam mai; kan chhang kante rëng kan ei hnem hin em mai.

Ruaiheh hi 'sa vai' kan ti a, 'sa ka vai dawn' kan ti a, chu chu 'sa ka ei nghek dawn' tihna a ni. Sa vai tih hian a va han chiang tak em! Ei hnem a tum zia a va hril chiang em! Ruaiheh zawh tlaiah bûk kan sakah te kan tawm a, bailem kan chhuang leh a. A rûka kan vawksa thau lo khawl chu kan er a, kan kang a, kan ei ho hin. Midang bûk saka êk te kha kan va chîng tak! Bûka awm laia bûk vawm chîngte erawh an ngeiawm thei rura.

Tlai ni tlâk dawnah khaw dai velah kan lêng a, zan lam programme te kan sawi ho va. Tlang thengthaw nuam taka phaitual hnim chungah hahdam takin kan mu er awr a, krismas tlai ni tla tur êng sen ruih chu kan thlir a. Hun a van liam chak duh tak em aw.. Zanah hâlpuah kan hâl a, kan tlaivar ngei ngei bawk a. Tlaivar tam nih te kha kan duh a, intihtheih nan tak kan la hmang zui a. Zan laiah tute emaw 'tawm' hi enthlâk tur kan zawng a, kan hmuh hlauh chuan nuam hi kan va ti thei tak! Krismas kha a lo va uiawm hin tak em!

Kum nga a liam leh chuan ngaihzawng neih nachang kan hria mai ni lovin tlangval kan inti ve tâwk tawh a, kan krismas hman dan pawh a dang hret hret a. Hmeichhia kan melh ṭan a, an tel lo chuan krismas lenkhawm pawh a nuam tawh lo. Krismas zan ar kan a nuam em em tawh a, tlaivarpui tur lam kan ngaihtuah tawh bawk a. A hun lai mil zel chuan a nuam kan ti a, tun hnua han ngaihtuah lêt chuan a hma ang khan lung a tileng tawh lo riau! Chhungkua kan lo kim ta lo bawk nen.

Krismas rim a nam dêk dêk tawh hi chuan krismas hmanpui tur kan ngaihtuah an nghal a, rilru hian a dap ruai mai. Kan duhzawng deuhte chu kan hiante hnenah emaw, an hiante hnenah emaw 'min lo biak rawh' kan han ti ngawt a. Chu chu kan hmeichhe bêm dan ha ber a ni. Chuta 'ani paw'n a ti' tih thu han hriat tawh chuan krismas chu nuamsingkhaw a ni tawh mai! Zu leh mipat hmeichhiatna nen kan hmang lo, mahse, krismas laia arkanpui tur kan neih tawh chuan kan hlim em em a ni ringawt.

Ka lung a lêng mang e. Krismas thla ni tla tur chu thlang lamah a sen phût tawh a, kei chu ka hnathawhna hmunah, computer hmaah ka hu tung ût a. Ka ngaihtuahna chu kum eng emaw zat liam ta-ah a awm daih si. Ka hma lawkah computer mai ni lovin krismas pawh a awm tawh a, engtin nge ka hman ang le? Hmána kan hman anga krismas lemchan ang khan a hman theih tawh loh va, bûk saa krismas vawksa thau kanho kha tih leh rual a ni tawh lo. Ka ar kanpui hiante nen kan inkawm tawh lo va, krismas hmanpui tur lampang an awm tawh hek lo. 'Min lo biak rawh' tih hun kha a liam tawh a, mahni kutah engkim a tla tawh. Mahni khuaah kan awm tawh lo va, mahni khuaa krismas hman hram erawh kan tum ngam ta âwk a nih hi.

Ka lung a lêng — Ka lung a lêng — Ka lung a lêng mang e!
Share:

13 comments:

  1. A va mawi e, vur a tla seng seng mai.

    Krismas hi a hlimawm a, a nuam ka ti thin; naupan lai ngat phei kha chuan krismas hi a lo va hlu bik thin tak em. I thuziak chuan kan naupan lai min tihrechhuak rum rum mai. Zana mi thei lawh rukte kha a nuamin a hlimawm ve tlat.....

    Krismas leh zochhangban hi chu a inhmeh a ni. Urlawk zana chow kan ai chuan zochhang ngei kang ila; anih loh vek pawhin zochhang chhum, kurtai nen hmeh ila, a Krismas boruak bik riau thin.

    Kan ti nek nek a, Pathianin damna min pe a, rinloh karin krismas kan hnaih leh ta hle mai. Keini ang chhangchhepa tan chuan Krismas lo thleng tur hian lunglenna a chawk tho zo ta meuh lova, theihtawpa tan la chunga krismas lo thleng tur hmuah tawp hi ka tih theih chhun a ni ta.

    ReplyDelete
  2. @Pu Caribou: I comment chu chhiar a nuam, ka lung a tileng hmanhmawh a. Ka ngaihtuahna a tikalthui angreng hle. Chhangchhepa ka nih hun tur ka ngaihtuah lo thei lo. I comment hlu tak avangin ka lawm takzet.

    ReplyDelete
  3. TS he i thil ziah chuan tul lo lo min ngaihtuah chhuah tir a, mittui a tla a lawm mawle!

    Thingtlangah kan naupan laia Krismas kan hman thin anga nuam kha a awm thei tawh lo, thlengdawh te kha kan nghakhlel em em a, zingah kan tho a, kan thleng kan han en vat a, eng engemaw a lo awm a, kan va hlim thin tak em.

    Tunah zawng ka nu leh pa an awm ta lo, kan tet lai zawng zawnga an kianga thlamuang taka Krismas kan hman hun lai te kha ka va ngai tak em, ka pa khan cake a siam ziah thin a, tui kan ti thei em em bawk.

    Nang chu thingtlangah hman i tum bik a, ka lo kal ve chak e...

    Lalsangzuali hla:

    Chhungkim dar ang lenlai ka ngai mang e...Mahse kan tum Van nuam ah tal khian, hlim te a intawh leh kan beisei.....

    ReplyDelete
  4. @Pi Ma, i comment chu ngaihtuahna a tikal thuiin hnuk a tiulh. Tin, i comment laia i comment kha ka tawmpui pha che! A chhan chu he thu hi ka thinlung luangliam takzet a nih vangin. I lunglenna leh i rilru thar leh tur pawh ka hrethiam pha. Hlim takin Krismas hmang mawlh rawh u. Ni e, nangni nena intehkhin chuan kan la vanneih zawkna kawng pawh a ni maithei e. Hlim taka in hman ka duhsak takzet a che. Vanah chuan hlim takin kan la lâm ho mup mup dawn alawm.

    ReplyDelete
  5. i thu ziak chuan kan naupan lai hun ah min hruai kir chiang kher mai! Urlawk zana khawlai a saphaw leh sangha tin bur ruak kan hnuh rik vak2 lai te leh saphing kan pet vak2 hun te kha ...hmanlai an chang ta si a..

    ReplyDelete
  6. @Anon: I hming/nick dah hram la tha tur! Ka thuziak tehlul min chhiarsak a, ka lawm khawp mai.

    ReplyDelete
  7. I blog chu avan vawt ta ve ! Vur te a sur ta seng seng mai. Blogger hian WP hi min copy leh lutuk a :-))

    ...HNuk i ti ulh thei mai dawn alawm le i thuziak chuan. Bawng thlah, ruai thehna tur hnah lak, masi thing phurh...awi...

    Masi nuam deuhvin hmang ang che !

    ReplyDelete
  8. I blog chu avan vawt ta ve ! Vur te a sur ta seng seng mai. Blogger hian WP hi min copy leh lutuk a :-))

    ...HNuk i ti ulh thei mai dawn alawm le i thuziak chuan. Bawng thlah, ruai thehna tur hnah lak, masi thing phurh...awi...

    Masi nuam deuhvin hmang ang che !

    ReplyDelete
  9. @Sekibuhchhuak: Copy em ni le..! Blogger chu gadget pawh tam deuh mai asin a nih!

    Nang pawh krismas leh kumthar hlim takin i hmang dawn nia.

    ReplyDelete
  10. Hun awl neih hun atan ka khek a, kan chhiar tak tak mai anih kha hairehai. A ngaihnawm miah miah ngei mai. Ka lung a tileng lutuk tawp...

    ReplyDelete
  11. Ekhai, Pu Hv, a va lawmawm em ve aw.. A sei lutuk a, ka luangliam ve laklawh bawk si a, blog-a dahthat ka duh bawk si a, inthlahrung takin ka dah kha a ni a. Chuti chung pawha buai chung chunga min la chhiarsak chu ka lawm kher mai.

    ReplyDelete
  12. NGaihnawm ti takin ka chhiar chhuak dap mai, ka day dream nghal vawng vawng.... hnuk te pawh i ti ulh mai dawn lawm le.

    ReplyDelete
  13. @Beethug: A lawmawm hle mai. A sei tehlul nena! Ka lawm takzet e.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers