20 January 2012

Facebook hrâng


Kum 6 kal ta aang khan thingtlang atangin Aizawl-ah ka nau, Sang Sangi nen lehkha zirin kan rawn awm a. Kan in luahna chu hmun fianrial tak niin a tawi zâwngin, henawm kan nei lo a ni ber. Thian dang kâwm lem lovin kan unauvin kan inkâwm chawt a, kan khua a har bîk lo. Facebook, orkut, twitter a rawn lar chho va, mi neih ang neih châk leh mi theih ang theih châk reng renga khawsa ta chuan phone kan tuak a, kan neih hnuin facebook-ah account ka siam nghal vat a, a hnu lawkah ka nau chu ka siamsak bawk a.
Aizawl-ah kum 4 kan awm hnuin ka nau chuan hrisel lohna neuh neuh a rawn nei chho va. Zan khat chu a nâ a rawn zual deuh avangin biak theih lohvin a awm hial a, damdawiina kalpui tumin taxi ka han zawng a, zan rei tawh lam a nih vang leh kan awmna a fianrial deuh avangin a vâng hle. Minute 20 vel hnuah chuan ka hmu hram a, inah kan tlanthla leh nghal vat a.
In chhung ka han lut chu – karei leh!! Ka nau chu saruak ngalngatin khumah thisen nen a lo inchiahpiah niai a, a pumah chemte pakhat a lo bûr vá bawk a. Ka au tuarh a, ka pan hnai a, ka nau nikhaw hre lova awm mek chu rawng taka pawngsual mai ni lovin, lainatna tel hlek lova vih a nih chu! Ka au ri hriain taxi driver chu a rawn tlanlut nghal a. Theih ang anga bawihsawmin taxi-ah kan hlâng a, damdawiin panin kan tlan ta vang vang a.
Damdawiin kan thlena doctor hovin an han en meuh chuan ka nau chu a lo chatthla fel der tawh. Min hâwng kher mai. An postmortem nghal a, a serha mipa chî an hmuh aangin pawngsual a ni tih an finfiah ta a. Chhungte hnena chanchin hrilhin Police Station-ah FIR ka thehlut nghal a. Tichuan, vengchhung YMA-in a kuang siamin puandumin an tuam a, kan khaw lamah phurh haw a ni ta a ni.
Kan khuaa kar khat vel ka châm hnuin exam hun a hnaih avangin Aizawl-ah ka lêt leh thuai a, lehkhazir erawh a har hle. Ka unaunu nena kan awmnaah keimahin ka awm ta ruk ruk a. A hmaa thil thleng avangin ka tih deuh hle nghe nghe. Rilru tihthawven nan ka facebook mai mai a; ka nau account password ka thlak a, account pakhat atana hman mai ka tum a. Mahse, ka inngaihtuah ngial hnuin ni thei ngangin ka hre ta lo va, ka deactivate ta zawk a. A thlalak leh status hluite chuan ka lung a tileng hle a, mittui a parawl kuang thei nia.
Chutiang chuan ka facebook leh ta tlut tlut a. Zan khat chu zing lam dar 1 velah ka muhil chu ka harh hlawl a. Facebook ka kheuh hawng a, thiante status update-te ka en thuak thuak a. Chuta ka thil hmuh pakhat chuan min barakhaih kher mai!
Sang Sangi
Ka rlru hah topzz..:-(
tih chu hnuai lamah a lo awm chu niin! Midang Sang Sangi a nih ringin a profile ka’n en a, ka nau ngei kha a ni! Ka phu chiang lutuk!
Eng nge thil awmzia ni ta ang le? Mi’n an hack ti dawn ila, a account ka deactivate tawh a, a password lah chu a boral hnu khan ka thlak a, keimah lo chu hria dang an awm si lo. Ka’n refresh leh ngat a, Sang Sangi like this tih a lo awm leh kalh mai le! Thian ka nei a nih hmel riau mai!
A râpawm zawngin ka ngaihtuah a, hlauvin ka khûr titih mai a. Ka tirilah mi tham er er a, ka khua a tisik ser serin ka hre hial a. Blanket phên aangin kawngka ka en dêk dêk a, a inkalh ha tih ka hriat hnuin puan themin beng ka hnawh a, phone ka switch off hmak a. Ka inlukhûp a, mut a chhuak si lo va, khawvar hun ka nghak ta ngawt ngawt mai. Zan a va rei duh tehlul em!
A tuka class ka kal hnuin mu chungin ka online leh mai mai a. Notification 572 awm zinga Princess Vetops, Kimi Pachuau and 593 other people commented on your photo tihah chuan ka lut nghal a. Chutah chuan thil mak ka hmu leh ta!
Sang Sangi
Unaupa hi cu ses teh my nia..;-)
Tuesday at 2:36am
tih chu! Karei leh!
A profile ka en a, Sang Sangi is now friends with Lalthlanmawia Sailo and 8 other people tih a lo awm leh a nih chu! Chu pawh mak tih tawh nâk alaiin, thlalak eng emaw zât a lo in-post thar a, kan in luah lai thla leh ama ruang ngei ngei thla pawh chu! Mipa pakhat, sual hmel deuh pakhat lo tel ve erawh chu a ngaihna ka hre lo kher mai. Ka’n enchiang a, a hnuaiah chuan Zoram Genesis tih a lo awm kalh a. A va mak tehlul em! Ka hlau lutuk chu ka logout nghal a, ka inbual a, hiante inah ka lêng daih a.
Hetiang thil a thlen tâk fo avangin tun hnuah ka facebook ngai ta meuh lo.
Share:

0 Comment:

Post a Comment

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers