20 January 2012

Hmangaihna ril


Nikum krismas dâwn a ni a, Aizawl bazar-ah pawh mi an lûn tha map map viau va. Tih tur ka nih avangin bazar-ah ka chhuak ve a.
Nakin deuhvah chuan zaithiam pakhat ka hmu a, ka enliam mai a. Kawi khat ka pelh hnuin zaithiam piangthar da leh hi ka hmu leh a, ka nui a. Kawi khat dang ka liam leh a, lengzem hla hin, gospel hla chauh sa ta ka hmu leh a, ka ngaisang vuai a. Kawi khat dang ka thlen lehin lengzem hla sa kumhlun ka hmu a, ka nêk deuh salh a. Kawi khat dang ka thlen leh hnuin lengzem hla pawh sa ngai lo, gospel hla hlir sa hin ka hmu a, ka en vawng vawng a.
Chutia ka en lai tak chuan mi pakhat hian mi rawn su her lawp a, ka phone a tla bawp a; ka han en lêt chuan tleirawl të, hmelchhe fahran lo, kan venga mi hi a lo ni a. Inthlahrun hmel zetin ngaihdam min dil a, min hre lo tih ka hre nghal mai a. Ka phone tla chu a kut khinghnih meuhvin min chharsak a, lâk pahin ka’n melh deuh kherah!



Bazar-a ka kal, ka haw leh lam chuan thuziak mi pakhat ka tâwk a, kan inbe luam a. Kawi khat dang ka kal leh tihin fiamthu thiam pakhat nen kan inhmu a, fiamthu thawhin kan titi bawrh bawrh a. Kawi khat dang ka thlen leh chuan filmstar pakhat ka hmu a, ka en zui dauh dauh a. Kawi khat hnuah rapper ka hmu leh a, ka kal pel fua a.
In ka thleng a, ‘vawiin chu milar hmuh ni a ni ringawt mai’ ka ti a, mahse, chu’ng zinga milar ni ve lo ka hmuh chuan ka rilru a la ta ber a ni.
Kan venga mi a ni ka tih tawh kha. Engtin tin emaw kan inhmu zeuh zeuh a; inhmu zeuh zeuh ta chu kan inbe zeuh zeuh a, inbe zeuh zeuh ta chu kan lo inkawm ta a. Phone no. ka laksak a, ka bia a, kan innel ta phian a. Kan innel telh telh a, kan inngaina leh a. Kan inngaina telh telh a, kan inngaizawng ta a. Kan inngaizawng a, kan inhmangaih ta tak zet ta! Mahse, kan inhmuh tirh aang khan a kutkawr inhmeh tak mai kha a la bun reng a. A inhmeh ka tih vang leh thlasik khawvawt a nih vangin a pawi ka ti lem lo.
A zia chu a duhawm lam mah mah a ni. A hmel chu hmelha sawia mitthlaa lang nghal ang chi a ni mai. Mahse, a zia-ah duh loh deuh ka nei; a SMS type peih lo lutuk hi! Phone-a biak chuan kan thu a thlum viau zel a. Mahse, SMS-a umzui chuan a tawi thei ang ber hi ka dawn let hin a ni. A chhan ka zawt a, ‘SMS type hi ka peih vak lo va…’ a ti sam et a. Hmangaihna mit a keu tawh avangin hriatthiam loh phal chi pawh a ni lo.
Mahse, zankhat chu call balance ka neih loh avangin thu pawimawh deuh ka zawt a. ‘Aih’ tih ringawtin mi rawn reply a. Hmangaihna mit a keu a ni tih pawh ka hre chang tawh lo. SMS dengkhawng tak ka thawn a, a reh ta vang vang a.
A tukah top up ka thun a, ka phone a. A awng tha duh lo va. Inhmuh ka rawt a, inhmuhna hmun tur ka hrilh a, phone ka dah ta hmak a. Ka sawina hmun pain ka chhuak a. Ka beisei loh deuhvin min lo nghak reng tawh zawk a. A hmel chu a zing riai mai. A hlim lo tih ka hria a, keimah vang a nih pawh ka ring. Mahse, pawi ka ti lem lo.
Ka chhuahchhal nghal pang a. A ngawi reng a, a mittui a parawl pam a. Min chhan duh tak lohvah chuan ka thinrim chuan, “Inhen ang,” ka ti tawl a. Chu veleh min rawn en a. Zawimuangin a kutkawr chu a taksa dang nena angkawpin a phelh a. Mak ti deuh takin ka en reng a. A han phelh zawh chuan thil mak ka hmu ta!
Kut lem a vuah a lo ni reng mai. A tana ‘aih’ tih type ringawt pawh a harsat tur zia ka hrethiam nghal. A kut lem pawh chu lakthlak leh a tum a, ka lo dang a. Ngaihdam ka dil a.
Kawnga midang kal zut zut pawh chu hre chang lovin ka pawm ta vawng vawng a.
Share:

2 comments:

  1. Rock music hi ka ngaina viau a, hetiang lampang ziahna pawh hi ka chhiar fo a, ka la ngaithla zel tho mai. Tin, a let zawnga play tih khi ka thil awih zawng a ni chiah lo. Engpawhnise, bengvarthlak e.

    tren tren.

    ReplyDelete
  2. a van tha em k tap thei lom le,ziak zel rawh

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers