11 January 2012

Kan khuaah Krismas

Nikum krismas leh kumthar kha kan khua, Vanbawng-ah ka hmang a, kan kohhran-ah Pathian thlarau thianghlimin hna a thawk a, kohhran kan hlim a, zai a tui bawk a; ka inchhir lo hle. Kan kohhran upate pawhin, ‘Heti taka hlima kan kohhran-in krismas kan la hman âwm reng reng ka hre lo,’ an ti an ti hial rëng a ni.

Harsatna aṭangin..!

Nikum hmasa lam aṭang daih tawhin ka nau hrawk thyroid (awrpuar) zai turin kan buaipui tawh a, mahse, a zaitu turte remchan lohna avangin sawn zel a ni a. Tichuan, nikum krismas dawnah tharthawh lehin Durtlang damdawiinah ṭha taka zai a ni ta a.



Kan damdawiin awm chin tur a hriat loh avangin hawna tur ticket pawh ka hauh lawk ngam lo hrim hrim a. Rin ang ngei ngeiin an zaina vel chu a chetpui theih lawk loh avangin kan khuaa krismas hman ka inbeisei pha tawh lo va. Haw thei lo tura inngaiin (krismas dawnah chuan ticket a harsa ṭalh tawh ṭhin) hmun danga krismas hmang turin ka intintuah a. Tichuan, kan damdawiin awm lai chuan hmun danga ka hman tumnaa kalna tur ticket chu ka ṭhianpa’n min buaipui char char a. Mahse, a ngaihna thlawt a awm lo! Kawng awm thei ang ang kan dap pawhin a theih ngang loh a ni! (Hman châk riauna hmun ka nei a!)

December ni 22 bawr chho velah chuan, krismas hmaa damdawiin aṭanga kan chhuah theih dawn avangin kan khuaa haw-na tur buaipuiin ka hmanhlel hle a, mahse, ticket pakhatmah a awm tawh lo! Ni 23-ah damdawiin aṭangin kan chhuak a, ‘bei nge sei rûn dung’ tiin haw-na tur ngaihtuahin damdawiin kan chhuah tlaiah chuan ka vei vat vat a. Thiante ka han phone kual a, a tawp a tawpah chuan vanneihthlak takin ticket la tawh, mahse, haw tum ṭhulh leh tur a lo awm hlauh mai a! Aw.. Pathian hian kan khuaa krismas ka hman loh hi a duh lo a ni!

A rang a rangin ticket chu ka buaipui a. Ka nau erawh chu motor-a han chuanpui chi a la nih loh avangin mi inah a la awm hahdam rih a. Tichuan, ni 24 zingah chuan kan khaw lama nu leh pate nena krismas hmangho turin ka haw ta vang vang a.

Krismas chu!

Hmangaihtu nu leh pate nen kum khat zet kan inhmuh loh hnuah kan inhmu leh ta chu a ni a, a hlimawm kher mai. Kum dangah chuan krismas hmang tura ka haw hian ṭhiante nena riah ho kan chîng ṭhin a. Chhungte nena riah ho kan nei khât em em a ni. Mahse, kumin zet chu ka zal ve raih a ni ang, vawi khat mah ka riak bo lo va, ka inkhawm loh pawhin inah ka awm ngawt ngawt mai.

Krismas kan han hmang ṭan a, kum dang ang bawkin khaw ro takin kan hmang leh dawn emaw kan ti fur a. Mahse, ni 26 aṭangin thlarau thianghlimin hna a rawn thawk a. Biakina leng lo khawp kan inkhawm a, lamtuala leng lo khawpin kan lâm a, zai a tawp hleithei lo. Zan lenkhawmnaah lah ni se nu leh pa leh naupang chenin kan tui em em a. Lêngkhâwm hi zan hnih ngawt kan tlaivar a.

Krismas programme duan lawknaa nawn loh tur anga inngai tawh kha, mi inphalte an lo lang ṭak ṭak a. A ṭhenin ar an thawh a, a ṭhenin vawk an thawh a, a ṭhenin an sum tam tham tak tak an rawn thawh bawk a. Chu’ngte hmang chuan kan nawn a, nawn tawh lo tura kan inngaih hnuah pawh mi inphalte avangin kan nawn leh a. Kan hlim tlâng tak meuh meuh a ni. A kum hmasa lamah khan krismas thlaah mitthi pali kan nei a, krismas zawh hnu paw’n mitthi kan nei reng a. Khawtlang boruak a pik em em a a. Hetianga hlim taka krismas kan hmang thei hi Pathian hnathawh a ni ka ti lo thei lo a ni.

Tichuan, thingpui leh chhang ruai bâkah ni thum ngawt chu hlim takin sa ruai kan ṭheh a ni.

Biakin boruak

Lêngkhawm hla kan sa tam khawp mai. Hla hruaitu leh châng sawitute’n an thiam bawk a, hla sak a nuam thei hle a, sak nawn loh pawh kan nei mang lovang e! Tin, biakin lâmtualah lâm ngai lova ka hriatte paw’n an phar ve dawr dawr mai. Thalai an lâm a, nu leh pa an lâm a, naupangte thlengin an lâm a ni.

Thil ropui tak mai chu, nupaa lâm hmuh tur an awm nawk hi! An awhawm thlawt. Chumai ni lovin, nufa lâm te, nu leh a monu lâm te, nu leh tunu lâm te hmuh tur an awm. Pasal sûn tawhte’n pasalah Isua an neih a, an hlim em em a. An chantâwkah an lungawi a ni. Taksa chêtna chang an tam a, lâmtualah an lâm dual dual mai a ni. Krismas hmain camping a awm loh mah mah a!

Lenkhâwmnaah pawh ṭhutna leng lo Pathian fak turin kan kal khawm leh a. Chhungkuaa lenkhawmnaa kal te an awm a. Theihtawpin kan zai a, an lâm suau suau a. Sawi tawh angin, nupaa lâm rial rial te hmuh tur an awm nawk a ni.

A boruak chu kumtharah pawh kan chhunzawm zel a. Mahse, ruaiṭheh ni-ah malsawm ruah a rawn sur hlauh va. Tisa lamah chuan ninawm tak a ni! Tichuan, krismas leh kumthar programme chu a lo zo ta a.

Kan ṭhianho hi!

Kan ṭhianho hian krismas lai vel hian chaw eikhawm kan nei ziah a, kuminah chuan a zing mah mah em ni chu aw ka ti hial. Vawi li vawi nga chu kan eikhawm a ni. Hmun dang danga awm, lehkha zir leh hna hrang hrang thawk kan ni tawh a. Kan khuaa awm chu an awm  mang lo va. A kalbo hmasa-sa chu kan thlah a, ar kan kangin kan sawhchiar laih laih zel a. Ar pawh kg 1 cheng 140 a ni a. Kan phawrh liam liam a, kan phawrh dai ve mai zel a.

Kumin kumtir Aizawl-a ka rawn chhuk thla leh tur pawh ar sawhchiarin zanlaiah kan pir ho va, a khamawm lohvin a nuam hle! A chhuk hmasa pawl ka nia, pir ho erawh ka chhim tam hman ta lo a ni!

Krismas leh Kumthar inkarte khan kan khaw tleirawl dangte leh keini ṭhianho chu kan inkhel a. Tualchhung LPS Sub-Operator lamin video-in thla min laksak a, an chhuah bawk a. Tlaiah inkhel ho zawng zawngin chaw kan eikhawm leh vek a! Nuam ve duh khawp mai.

He’ng zawng zawngte hian nunhlui an din a, nakina kan la sawi kan la sawi turin hnu an hnutchhiah a ni. Tunah zawng, lungleng taka krismas lo thleng leh tur nghah chauh tih theih kan nei ta a ni. Pathian-in min venghim se, dam takin kan inhmukhawm leh ngei ang — ka ṭhiante u.
Share:

16 comments:

  1. Masi tluang takin, chhungte nen in khaw lamah i hamng thei chu a lawmawm hle mai! I nau avangin buai deuh hlek mah ula.

    I blog 'hnungzang' rawng leh a hawrawp rawng hi an in ang lutuk em ni aw, chhiar a har ta deuh hlek a ka hriat chu. Keini putar tan chuan bih fet angai mai :-)

    Kumthar chibai le!

    ReplyDelete
  2. Masi tluang takin, chhungte nen in khaw lamah i hamng thei chu a lawmawm hle mai! I nau avangin buai deuh hlek mah ula.

    I blog 'hnungzang' rawng leh a hawrawp rawng hi an in ang lutuk em ni aw, chhiar a har ta deuh hlek a ka hriat chu. Keini putar tan chuan bih fet angai mai :-)

    Kumthar chibai le!

    ReplyDelete
  3. Pu Seki, kan hmang nuam e. Ka nau pawh a tha viau tawh e. Nia, ka blog hawrawp hi ka duhdan a ni miah lo. Hmanniah gadget pakhat ka paih a, chuta tangin a dum ta vek mai a, tihngaihna ka hre ta lo khawp mai. Ka lo en tha leh chhin ang e.

    Kumthar chibai le..

    ReplyDelete
  4. Misuala i post nen khan inang turah ka ngai ngawt a, i blogg a i dah chu a ngaihnawm daih zawk mai :D . In khua ngei a Lalthar piang leh kumthar i lawm thei chu ka lawmpui a che. I nau pawh lo dam zel rawh se.

    Tak a, inkhua hi ka lo kal ve tawh a sin, kan awm rei lo mai pawh a. Inkhua tih ka hria a kal leh ka chak khawp mai.

    tren tren.

    ReplyDelete
  5. @A Pa Chhuaklinga, ka lawm e. Misual.com-a mi kha chu a tlangpui zawr zawr a ni a, khi khi a chipchiar deuh zawk ang. A inang miah lo a nia. Ka nau pawh a tha tawh khawp e. Engtikah nge kan khuaah i lo kal a? I lo la kal leh ang chu tiraw..

    ReplyDelete
  6. KEI CHU KA CHHUNGTE NEN MAS HI KUM 15 AIA TAM KAN HMANG HO TAWH LO. I AWHAWM BIK HLE MAI. IN KOHHRAN HLIMNA CHI CHHIM VE A VA CHAKAWM EM. HETIANG HLIMNA HI KA TAWN LOHNA A REI TA. hMUN KHAWHAR AH RINGTHARTE NEN KHAWHAR TAKIN KAN ZAI TLENG TLENG THIN. I NAU CHU LO DAM ZEL RAWH SE.

    ReplyDelete
  7. Harsatna tam tak kara in khuaa krismas hmang theia i awm chu ka lawmpui khawp mai che. Kum khat chhunga kan hunpui ber leh kan nghahhlelh ber krismas hi chu mahni khuaah ngei hian hmang ila, a lo hlu ber mai. I hmandan hi ziak loh tam tak a awm ngei dawn a, i chet nat viau ka bei sei ru tlat.

    ReplyDelete
  8. @Te-a: A van hrehawm awm ve aw.. A huhova Pathian faka zaiho dual dual hi a nuam asin. Pathian-in rem a ti ang a, i chhungte nena hlim taka in la hmanho leh ngei ka beisei tlat a ni. Ka lawm lutuk e.

    @Pu Caribou: Hehe.. Chet nat theih loh! Kumin chu hmang tha ka inti ve ngang mai. :-) Ka lawm lutuk e. In hmang nuam turah ka ngai ngawt a nia.

    ReplyDelete
  9. Vanbawng khawchhuak lo nireng che a. I tla hla hle mai hehehe:fiamthu:

    Ka kal ve zan tawh, nuam lah chu ka ti phian a. Kan mitthla dawn a, ka hriat pawlh deuh nuai ta mai, avan zialo vele. A lunglen thlak e.

    ReplyDelete
  10. @Pu Hv, i lo kal tawh maw? Nang hi i fang zau ngawt mai! :-)

    ReplyDelete
  11. Kei pawh, awllen lai thil thleng hi ziak ve mai mai ila a tha ang. :) I ziak tha e. Thian hluite nena inhmuh hi nuam deuh a ni. Khaw pahnih ka nei a, kei pawh, Kolasib-ah pawh hian veng pahnih ka nei bawk a, thian hrang ve ve ka nei bawk a... i awmdan tur ka hriatthiampui che.

    ReplyDelete
  12. Kal ve tawh e mawle. Fang hnem i tih takah chuan, tumkhat a Mizoram ka fan hnem ber chu 1999 khan ania, zan khat lek lek chamin khaw 90+ kan kal. Kan kal chhan erawh DRDA scheme awareness campaign ..ka zai vel hahahaha

    ReplyDelete
  13. TS tinge ka chhiar ve thei lau!! background a dum, ziak pawh a dum!! Comment ho i chhanna chiah ka chhiar thei!! midang blog chu a fiah vek si ka hrethiamm lau!

    I va hmang nuam bik ve ti ve ringawt mai ang!!

    ReplyDelete
  14. @Pu Zaia, la ziak ngei rawh. Ka chhiar châk viau a nia. I comment avangin ka lawm lutuk.

    @Pu Hv, i lo fang hnem hle tak! I sawi zatve pawh ka la hre lo tawp ang. Zai leh zel maw?! I va han allround tak em!! Haha.

    @Pi Ma, a ngaihna ka hre lo khawp mai. Heti hian a awm ringawt mai a. A thiam, siamtha thei tur ka lo zawng thuai ang e.

    ReplyDelete
  15. In Khuaah chuan ka rawn hmang ve hial dawn em maw'n chu le! Min lo kawm ve duh awm si lova he2

    ReplyDelete
  16. @Bawiha: Lo la hmang mawlh teh! I inchhir tâkah! Kan inkawm char char dawn nia! :D

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers