20 January 2012

Krismas chhinchhiahtlâk


Zosanga hi mi hlim thei tak a ni hîn. A naupan lai pawh pa tel lova nu awmtleiah chuan naupang harhvâng tak a ni bawk a. Mahse, vànduaithlâk takin khawsikpuiin a na ta vak a, inenkawl tura hmunpui lam an pannaah motor chesualah a nunna a chân thelh nghe nghe. He an chêtsualnaah hian a awbâwm chu sawhchhiain a awng thei zui ta lo va, a awng tam berah pawh a ‘ak’ nawk nawk hîn. Chu chu naupang lawm a tling tâwk em em bawk.
A khawsikpui hnu chuan dam chhuak leh mah se, a mit chu pângngai thei tawh lovin a kalh ta a. Chuta ang chuan hian pawh kâwm ngam tawh lovin inah a tawm ngawt ngawt mai a ni. A nun chu thimin a tuam vêl a ni ber. Chutih lai akârah a nu neihchhun chuan boralsanin harsa takin a nutei te bulah a khawsa a. Tawngtheilo leh mitkalh satliah chu a nutei te chhûng paw’n an làwm bîk hauh lo. Chutah chuan rethei takin a khawsa a, tlangvâl azawngah chuan a dinhmun chu a awhawm loh ber hial àwm e.
A nun chu hrehawmnaa khat emaw tih tur a ni. Kum 25 mi a nih laiin vànduaithlâk takin natna enkawl dam har tak mai, TB a vei leh hlauh mai a. A chhûngte chuan damdawiinah dah pawh tum lèm lovin inah an dah tawp a, an hna an thawhsan mai hîn. A tâwpah phei chuan a taksa a chhiat ém avângin an henawm hnaivaite chuan a chhûngte phalnain Aizawl-a TB Hospital-ah an hruai ta rãwih a. Chutah chuan theihtáwpin doctor-te’n tihdam tumin lo bei mah se, natna hrik chu a taksaa a ai darh nasat tawh ém avângin a ha chak lo hle.
Damdawiina dahtute lah chuan an awmpui reng thei bîk si lo. Nakinah phei chuan a bula damlo leh a kantu te, a awmpuitu te leh amah enkawltu doctor leh nurse te chu khawvêla a mihring hmuh theihte an lo ni ta mai a. Chu’ngho chuan a damdawi man turte chu thawhkhâwmin an pe hîn. TB damdawite hi a man a to ém avângin chu’ng an thil pêkte chu làwmawm viau mah se, a beitham hle a ni.
Heti ang em ema retheia a awmchhan chu amah siamtu nia ngaiin a dem hial a, nun hlimna chu a tân a hlat hian a hla vawng vawng a ni. Siamtu a mawhchhiat a, theih phei sela chu aw ring taka auva mawhchhiat a nâp hîn; mahse, chu tal pawh a thei si lo.
Chutiang chuan krismas pawh tumhnih a hmang ve ta. Krismas a lo thlen hian a lungngaih a zual hîn. A bula damlo awmte chu an inthlâk zut zut a, a tân erawh a in a ni thung si.
Krismas a lo hnai leh ta a. A rilru hrehawmna chuan hnai a rawn la leh an ta. Rilru hah leh beidawng zeta a awm lai chuan urlâwk ni, tlai thimhlimah hian damdawiin tualah motor nalh zet chhûng aanga hmeichhia pakhat leh mipa panga lo chhuak a hmu a. A bula damlo dang rawn kan turah a lo ngai leh mai a, amahah thil danglam engmah a awm lo.
Mahse, chu’ngho chu a rin loh deuhvin nurse duty room-a an luh hnuin a awmna pindanah an rawn lût a, damlote hnênah chêng 1000 den den a rawn sem a. Ani chuan tihngaihna hre lo zetin a lo la mai a.
An chhuah hnuah chuan a inngaihtuah harh ta! Krismas thil pêk maw! Ngaihsaktu nei lo nia inhriaa beidawnga lungngai hîn chuan thil pêk a dawng a nih chu! A lâwmna chuan vàn a tawng hial ang. Kum eng emaw zât hnua a nuih leh hmasak ber a ni.
Hmanhmawh zetin thei leh thei lovin pâwnah a tlànchhuak a. Tûn hmaa naupangte hlimna a siamna hîn anga awma, ‘ak’ nawk nawk chungin thilpêk petute hnênah làwmna chibai a va bûk a. A mit atà chhuak hîn lungngaihna mittui chu làwmna mittui chuan a rawn thlâk ta!
Pathian-ah làwmna thar a hmu ta a. Chumi tlai aang chuan Thlarau Thianghlimin rawn chênchilhin hlim takin krismas a hmang ta a ni.
Share:

0 Comment:

Post a Comment

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers