20 January 2012

Nun khawhar


Fapa mal ka ni. Ka nu leh pate paw’n an theih ang tâwk chuan min duat ve. Mahse, chhûngkaw harsa-ah chuan fapa mal nih chu hahthlâk mai a ni. Hmánah chuan ka nu leh pate nen kan khawsaho hîn. Ka pa’n min zilhhau a, min fuih a; ka nu’n min hnêm a, min thlamuan hîn. Mahse, tûnah chuan an awm tawh lo, an hun a liam tawh.
Thian dang ka kâwm tam lo. Ka unaute nen kan inkâwm hîn. Kan kawtah kan inkhualtelem a, kan infiamho hîn. Unau kan tam tham a, tu vak mah kan ngai bîk lêm lo – hmánah chuan. Mahse, tûnah chuan ka unaute kha an bo vek tawh.
Unau tam mah ila, hian chu ka nei ve tho. Ka kâwm tam lo tih mai a ni. Chu’ng ka hian kawmte nen chuan high school tlângah kan lêng hîn a, ramhnuaiah pipu suihin kan uai hîn. Tawlhpahrit-ah kan tawlh a, kekawr mawng pawp huauvin kan awm hîn. Pawi kan ti lêm lo; kan hlim tlat. A pawi ber zâwka chu kum tam liam tawh thil ka sawi tlat.
Kha’ng ka hiante khân nupui pasal an nei tawh. Tu leh fa pawh. Chhûngkaw enkawlin an buai a, an chhûngkaw hma lam thilah chiah an rilru an sêng. A hen erawh pialrâl ram nuamah an bei thlep tawh. Damlai thawnthu sawi tur an nei tawh lo. Ka tâna inpe hman tumah an awm lo; a awmte paw’n engmah mi rawn tihsak thei chuang lo – mahni hna hnaa buai kan nih tawh avângin. Eng emaw châng chuan hmánlai hun kha an ngaihtuah lêt ve hîn mai thei – keimah ang an nih chuan.
Chhûngkhat lainâ an tih ang chî pawh ka nei ve hîn – hmánah chuan. Awmna hmun a dang a, ngaihtuah a dang zêl a. Khawvêl inher zêl hian hmasâwnna a hring a, chumi rualin mihring rilru pawh a inher zêl. Chumi vângte pawh a ni mahnâ, ka chhûngkhat lainâ anga ka lo ruat ho kha hmuh tur an awm tawh lo – tûnah chuan.
Hmánah chuan khawvêl mite chêt leh khawsak ruala khawsain, tumah dang ngai bîk lovin ka awm hîn – chhûngkhat lainâ, nu leh pa, unau leh hiante avâng liau liauvin. Mahse, tûnah erawh chuan hmána tu dang mah ngai lova ka chênna lei-ah tho hian khawvêl mi tam tak zîngah khawhar takin ka khawsa mêk zêl a ni.
Share:

2 comments:

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers