20 January 2012

Thawhchhuah rapthlâk!


Agriculture department-ah hna chhetê ka thawk ve a. Chawlh tih lohvah chuan nitin office turin ka chhuak hîn. Lîrthei ka neih loh avâng leh, kan vêng awmna a hlat loh avângin kein ka haw mai zêl a; chutah chuan a ni, tûna he thu hringtu hi ka tawn tâk ni.
Nithum kal ta aang khân tlangvâl, la naupan hmêl deuh, City Park-a amaha lo hu reng chu ka hmu tawh a, nitin ka la hmu ziah bawk. Tûnah pawh ka hmu leh a, ka ngaih a hat chiah loh avângin luh man ka pe sawk sawk a, a bulah ka va ding a. Min en lo.
Aw ka thian hrâk a, a rawn dâk chhuak a. A hmêlah lungngaihna sâr zâm ka hmu. “Ka lo hu ve thei ang em?” ka ti a, a bu nghat a. Thuthmun ka rem a. Bulan dân tur ka haihchham hle. “Ih..ih.. Nithum vêl kal tâ aang khân heta i hu hi ka hmu ziah che a, tumah dang ka hmu bawk si lo nen. Ka ngaih a ha chiah lo va.. Harsatna nasa tak i tâwk em ni? Puih theihna che ka nei em? I pawi ka sawi loh ka beisei,” ka ti nghâl bawrh bawrh a. Za lo zetin a nui hak a. Zawi muangin a rawn hawi chhuak a, ka mitah tak min en ràn a. A mit sen rámah chuan harsatna namén lo a tâwk tih a chiang.
“Ka pi, tih theih i nei lo.”
Ka phu deuh zawk a, a âw chuan ngaihno a bei lo takzet. Ka chhâng zui lo nâa, minute khat vêl hnuah a rawn awng leh a.

“Thingtlâng khua ka ni a, kum 5 kal tâ aang khân mi in luah chawpin Aizawl-ah hian ka khawsa a. Inhlawhfa chawpin lehkha ka zir a, college lai ka zir ve tawh. Result chhuah aangin thla hnih vêl a liam tawh bawk.” A tâwp chawt a. A thaw hul hak a. Amah ka en reng a.
“Ka fail a, ka complain a, ka fail leh a nih hi!”
A harsatna ka hre ta. A chan tur ka dâwn a; thingtlâng aangin harsa tak chunga inhlawhfa chawp chungin lehkha a zir a, a hlawhchham. A tawrh nat dân tur chu ka hrethiam. Kum 30 lai liam tawhah chhûngte ina awm chungin ka tuar tawh. A tawrh nena tehkhin chuan a nêp lutuk. Theihtâwpin ka hnêm a, haw rualpui-ah ka sâwm a. A remtih hnuin haw pahin kan titi a. A chanchin dangte pawh min hrilh zêl a, a lungawi loh dân chenin. Ka hriatthiampui vek.
Rei lo tê-ah chuan kan in pêng ka thlen avângin remchânga a ina lên intiam chungin ka pênsan a, ka rilru erawh chuan a pênsan thei lo tlat. A ngaihtuahawm ka ti a ni.
A tûkah pawh chuan a ngai têin ka hmu leh a. A tûk lehah pawh. Chutiang chuan ni li chhûng kan inhmu tawh a, kan haw rual ziah a; a harsatna leh chanchin min hrilh ziah a, ka hnêm ziah bawk. Phone number-te pawh kan inpe. Mahse, a tûkah a ngai tê bawkin. Ka hna lama ka buai theih êm avângin a in luah pawh ka la hmuhsak hman lo. Kâr tâwp chawlha kal ka tum ràn rân a.
Zirtâwpni a ni a. A ngai têin kein ka haw a. City Park zâwn ka thlen chuan ka hawithla a, a awm lo. ‘A pawm thiam thei ta a ni ang,’ ti rilru chungin rilru nuam zâwkin ka haw thei ta a. A tûk inrinni-ah chuan vêng danga kan pa chhûngte boralnaa an kalbo vek avângin in nghah a ngei a, ka tlawh thei lehpek lo.
A kâr leh kâr tluanin nidanga ka hmuhnaah khân ka hmu zui tawh lo. Chutiang chuan kâr hnih dâwn kan inhmu zawm ta lo. Phone hmanga biak ka tum a, ka hlawhchham. Hman remchân ni deuhvin a in luah a sawina chu ka zawng chhuak a, a lo inkalh khap a. A neitute chu a awmna an hriat leh hriat loh ka zâwt a. Min chhâng lawk hlawm lo. An mitmeng aangin thil dik lo a awm tih ka hre nghâl.
“A ni thei lo!!”
Chanchin an han sawi chuan kâr hnih kal tâ inrinni-a thil thleng chu ka hrechhuak uarh uarh a.
Share:

0 Comment:

Post a Comment

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers