20 January 2012

Tu mawh nge?


Aizawl tlangval Sangtea chu a bialnu nena inhmuh tumin kein a chhuak a. Kawngpuia a kal mêk lai chuan a message tone a lo ri ral ral a. A en vat a. A bialnu Mami message a lo ni a. A hmanhmawh deuh tawh avângin kal pahin a bialnu message chu reply tumin a type malh malh a. Chutih lai tak chuan motor horn a ri tuarh a.
A khawvêl chu thimin a rawn hliah ta a. Tichuan, a mobile phone avângin a nunna a chân a, a bialnu pawhin a hmangaih ber a chân phah ta bawk. Sangtea vui ni chuan a chhûngkhat hnaivai leh a hian hate bâkah Mami leh a hiannu an tel a, a bâk chu a vuitu a ni deuh mai.
Thlân kotlângah chuan Pastor chuan a vuina thu a han chham a. Chutih lai chuan Mami ringtone a lo ri leh ta ral ral mai le! Chu veleh mi dang zawng chuan an rawn en thup a, Mami tân chuan pick up chu sawi loh, men ngaihna rêng a awm lo. Zah avânga mittui tla chungin a haw ta hnâ hnâ a.
A tûkah chuan Mami chuan phone call a dawng leh a. A han pick up chuan a hnathawhna company-a an hotupa ber a lo ni a. A thu rawn thlen chu, “Nimin khân staff emergency meeting kan ko thut a, nang chiah i lo lang lo. Chumi avâng chuan hnathawk ha lova puhin bân i ni. Naktûk thleng i hlawh lâk tur awm zawng zawng lâk theihna hun i nei,” tih a ni.
Mami tân chuan a pawi mai ni lovin a zahthlâk a ni. Engtin nge hnathawh nei lovin a thil tum a puitlin theih tâk ang? A nu damlo enkawlna tur engtin nge a thawhchhuah theih ang? Thinrim zetin a neih chhun chhuna a lei, a phone a paih tau hak a, a darh chuaih a, siamhat theih a nih a rinawm loh. Thinrim avangin a mittui a sur zung zung a. Hna a neih tâk loh avângin mi chhuatnâwt te, nauawm leh inchhûng tifaiin a inhlawh hîn a. A phone a tihchhiat avângin thingtlang lama a chhûngte nena an inbiak lohna pawh thla hnih lai a ni tawh.
Chutiang chuan harsa takin a khawsa ve nãw nãw a. Pawisa khâwl chu sawi loh, a hlawhchhuah chhun chhun chu inluah man leh ei leh in atan a hmang zo zêl a. Khawvêl pumpui economic-in namén lova tlâkchhiat lam a pan avângin hna dang hmuh chu sawi loh, a thawk sa te paw’n an thiam lohna ni miah lovin an hna an chân zêl si a. A beidawng lutuk chuan a inhlawhna ang angte chu khâwlin an khaw lama a thlâkhlelh êm êm, a nu leh pate bula haw turin a inbuatsaih ta a. A in luah man pawh pe ta lo chuan ticket a lei sawk sawk a. A rûkin a haw ta daih a.
Tluang takin an in a thleng a. A nu ngaih êm êm hmuh tumin a hawi vêl ruai a, hmuh tur a awm si lo. A pa hnênah a nu awmna a zâwt a, a pa chuan heti hian a lo chhâng a: “Bawihi, i nu chu thla hmasa khân a boral daih tawh alawm! Kan phone tlang thei lo che a, lehkha kan rawn thawn i hmu nange?” Beidawng zet chhuatah a thu hnawk a. Ni eng emaw zât chu engmah a eiin a in thei lo va, a mu thei hek lo.
Nikhat chu pâwna radio ngaithlaa a hut mai mai lai chuan an in lam pana Police pathum lo inzui phei hlawk hlawk chu a hmu a. A bul an rawn thlen chuan engmah a sawi hmain Police pakhat chuan a handcuff phawrhin, “Aizawl-a i in luah man pe lova i tlânbo avângin dân anga man i ni e,” a ti a. Kutkawl chu a buntîr nghâl a. Mami chuan a chunga thil thleng chu mak a ti duh ta lo, a chhûngte zâwk chuan a ni mak ti ni.
Tichuan, kum chanve dâwn lai liam tawha a bialpa hmangaih êm êm, Sangtea hnêna, “Hmanhmawh rawh,” tih thutawi a thawn avângin Jail rûn thim bêl turin phûr lo zetin Police pathumte chu a zui ta hnak hnak a..
Share:

8 comments:

  1. Ku TS, Ka mawh a ni lo tih mai ta tum a, a philosophy a lo turu em anih khi.

    ...khrum

    ReplyDelete
  2. K'u Khrum, ka lawm e. Tu mawh mah a ni lo ve. :-)

    ReplyDelete
  3. Mami khian a thlawna pawisa dawn tur a nei tlat. An puin khiti mai khian a ban thiang lo, India ram Labour Law-in a phal lo, Court-ah kal se a hlawk awk mai ang.

    Ngaihnawm phian chu le.

    ReplyDelete
  4. Pu Rp, ni chiah ang! Thlang sappui mitthlaa ziak ka nia, a tirah tak phei chuan an hmingah khian sap hming ka hmang a, ka thlak ta vek zawk a nih hi. Ka lawm lutuk e.

    ReplyDelete
  5. A va ril reuh e. Thil awmthei leh tute chungah emaw chuan a tleng reng tawh maithei a ni tlat mai.

    tren tren.

    ReplyDelete
  6. @A pa Chhuakling: Ka lawm le aw.. ;)

    ReplyDelete
  7. I va phuah ngaihnawm kual ve!!. It's a sad ending tho'...

    ReplyDelete
  8. Hehe.. Pi Ma, ka phuah ve mai mai a nih khi. :-) Ngaihnawm ti deuhvin i lo chhiar thei a, ka lawm khawp mai.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers