14 January 2012

Vanbawng Lalte inthlahchhàwn dân leh an thlahtute

Vanbawng Lal thlahtu kal zel dan hi lehkhabu hrang hrang râwna ka buatsaih ve a ni a. Ka hlut khawp mai. Amaherawhchu, mi inchengvawng lo tih takah ka lehkhabu râwn te hming lo ziah lan nachang ka hre hauh lo mai a, pawi ka ti takzet. A thu pawimawhna erawh kiam chuang lo ve.

Tin, kan hriat tur pakhat chu, hmanlai huna an inthlahchhawn zel dan leh thlahtu bul hla lampang hi chu rinthu a tel tawh ṭhin a, chuvangin a thlahtu bul lam hi a dik ber e tihna a ni chuang lo.

Mizo thlahtu bula sawi chu Nova a ni. Hei hi bible Nova a ni lo a nia!

Nova’n Dongula a hring a, Dongula’n Niguite a hring a, Niguite’n Bawklua leh Ngeknguka a hring a. Bawklua’n Ralnaa a hring a, Ralnaa chuan Chhuahlawma a hring a, Chhuahlawma’n Mizo lal hmasa ber, Zahmuaka a hring.


Zahmuaka hi Lusei thlahtu bul niin, Zadenga, Liantluanga, Liannghawra, Thangluaha, Paliana, Rivunga leh Thangura a hring a. Thangura’n Chawnglula a hring a, Chawnglula’n Thangmanga a hring a, Thangmanga’n Sailova a hring. Thangura thlahte hi Thangur ti-a hriat an ni a, Sailova lo chhuah hnuah Sailo ti-a hriat lar an ni ta zawk a ni.

Sailova chuan Chungnunga, Chenkuala leh Lianlula a hring a, Chungnunga’n Lalhluma, Rohnaha, Chera leh Thangphunga a hring a. Rohnaha’n Lallula a hring a, Lallula’n Lalpuiliana, Lallianvunga, Mangpawrha leh Vuttaia a hring. Lalpuiliana’n Lalsavunga a hring a, Lalsavunga’n Vanhnuailiana, Lalphunga leh Thawmvunga a hring.  Lalphunga’n Pawibawia leh Lalruma a hring.

Pawibawia’n Vanphunga (Vanbawng khaw dintu), Thangkama (Sihfa lal), Lalruaia (Lailak lal), Dorawta (Saitual lal), Lalzika (Buhban lal), Thawngliana (Lenchim lal) leh Khawzadala (Khawruhlian lal) te a hring a ni.

Vanphunga’n Liankiauva (Vanbawng lal), Awksarala (Phullen lal), Lalbuaia (Luangpawn lal) leh Pianfela (Zawngin lal) te a hring a. Liankiauva hian Lallula, Vanbawng lal a hring a. Lallula unaute hi an la dam a, mahse, Vanbawng khuaah an awm tawh lo va, a tute erawh Vanbawng khuaah an la chêng mek a ni.
Share:

19 comments:

  1. Vanbawng hi Hmar hnam an tam in ka hria. Engti tih a Vanbawng Lal thlahtu te chhui ta chiam nge i nih hi ka va hrethiam lo em..!!! an khawchhuak i ni ngei ang, i nih loh vek pawhin pa thil chhui peih tak zawng i ni e.

    An hming khi by-heart vek ka tum a ,a har ruffss, informative hle mai a.

    ReplyDelete
  2. Tun tum chu a hitory ruih ruih hle mai. Mizo chronicles a ni ve hawt alawm le. Nakinah a la tangkai viau dawn hi.
    I blog hi chhiar a va harsa ta ve. A thim mah mah a ni, kei ang, mit tha lo tan chuan bih hnaih a ngai lutuk. A var talin ha type teh.

    ReplyDelete
  3. @Beethugs: Vanbawng khua ka ni e. Nia, Hmar an tam khawp mai, a tlangdungah hrim hrim khian an tam a. Paite pawh an awm nual. Ka tui ve hrim hrim a, ka'n dahtha ve reng reng a ni e.

    @Pu Caribou: Nia, a buaithlak khawp mai. Hmanni khan gadget pakhat ka paih a, a template a lo khawih buai nge ni, a dum ta vek mai. A thuziak erawh a hawrawp rawng ka tivar chawp ta mai. A zia lo tak tak a ni.

    ReplyDelete
  4. In khaw history i ziak thei a i fakawm hle mai. Mahni khaw history ngaihsak reng reng lo hi an awm ve ania.

    ReplyDelete
  5. Thu ziak hlu tak, rotling a ni e. In khaw tan a i thiltih hi thangtharte tan a la tangkai khawp ang le. (Y)

    Chuan, Lal hoah khian ka hmelhriat an awm nual mai hahaha. :D

    tren tren.

    ReplyDelete
  6. @Pu Rp, ka lawm e. Ka tuina zawng a ni roh alawm le. :)

    @Chhuaklinga: Chutia law? Mi hlui i ni maw? hahaha.. Ka lawm lutuk e.

    ReplyDelete
  7. Ku TS, thuziak dahthat tlak a nih hi, i ti ropui hle mai.

    I blog erawh a thim deuh tlat, chhiar a hahthlak tep emaw ni chu aw ka ti.

    ...khrum

    ReplyDelete
  8. K'u Khrum, ka lawm e. Nia, a template fuh lo a awm a ni. A chhan ka hre hauh lo va. A buaithlak khawp mai.

    ReplyDelete
  9. A ṭha hle mai. I hringnunin mual a liam hnuah pawh he thu ziak hi chu i liampui ka remti hauh lovang. Thurochhiah ṭha tak a ni.

    ReplyDelete
  10. Thianpa Bawiha, i comment a ropui hle mai. Ka lawm lutuk e.

    ReplyDelete
  11. Ka chhiar ve hman chiah a ni. A ngaihnawm hle mai. Ka tan thil thar a tam mai, ka hlawkpui viau a ni.

    ReplyDelete
  12. TS a thim tawh miah lo ka screen atang chuan Yeyyy!!

    I thilziah hi a la hlu dawn chauh ang. Phullen lal hming khi ka nu leh pa sawi ka hre ve tawh zan..

    ReplyDelete
  13. Ka chhiar ve hman chiah a ni. Ka hriat loh a tam hle mai. Ka hlawkpui khawp e

    ReplyDelete
  14. @Pu Hv, i comment a lang thei ta e..! Ka lawm lutuk e.

    @Pi Ma, blog hi ka theme ka thlak daih a, chuvang chuan a var ta pup mai a nih hi. A tha ber ang emaw chu. Ka lawm lutuk e.

    ReplyDelete
  15. E khai, a va bengvarthlak ve le. Ka pute ho hming ka hmu nual mai!

    ReplyDelete
  16. @Pu Dina, tu tu kha nge i pute chu ni ang le..? Hriat a châkawm hle mai!

    ReplyDelete
  17. Ka comment tawh emaw ka tia. Ka lo la comment lo a nih hi..

    A bengvarthlak ka ti. I taima hle mai. Thuziak hlu tak a nih hi. Miin an lo la CITE ngei ang le...

    ReplyDelete
  18. @K'u Krista: Ka lawm mawlh mawlh e.

    ReplyDelete
  19. A bengvar thlak hle mai....ka lawm e..

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers