03 February 2012

Ka pu mawlh mai kha! - II


Vânneihthlâk takin ka pu, ka chhuan em em mai chuan min la dampui hlauh mai a, a chanchin min hrilh ang angte chu chhuahchhàwn a remtih angin ka rawn ziak chhuak zêl a ni a, a chungah pawh ka lâwm khawp mai.

A pian kha henrual zînga sawi hè hû tlâk ni lo mah se, ka zahpui ngai lo. A kareh hi a zau hle a, a hen tak tak châng phei chuan a tukkhumah a insi chät thei a, a kâin a lu-ûm a vêtchhuak thei a ni. A beng pawh hi parh viau àwm tak a ni a, mahse, a të viau thung. A bekah a inzep tat a, hrilhru duh tân chuan a sam keu niap niap a ngai hial hîn a, a kareh hian a hék hle. Tin, a khabe hi tap khabe ang lo tak maiin a phîr hai mai a, henkhat phei chuan a khabe a keh emaw an ti hial hîn a, a chhan zâwttu a tawng nawk hîn; hei hi a tlangval laia a nula rìmna hmanrua ber a ni. A lu ûm hrim hrim hi a bial vak lo va, a chhiarkawp dân takin rectangle shape deuh hian a awm a ni àwm e.


Ka pu hian a kareh zau hi intihtheih nan leh inchhuan nan tak a hmang a, ani anga kareh zau dang an lo awm si lo va, a inla-champ hle a ni àwm e.

Vawi khat chu tlangval a hriat chhoh an vel lai hian a hiante nen theipui lo turin an ramkal a. Kalkawngah chuan thawnthu mai mai sawiin an titi a, Samdala chanchin an sawikai a; a theipui lawh dân nen. Chutah chiah chuan an thil pakhat an rawt ta a. Chu chu, a kung hnuai aangin theipui rah chu an kâin an lo dawh ang a, a dawh lût hnem ber chu a kungah a lâwn hmasa ber dâwn a ni.

Tichuan, a hmun an thleng a, theipui pawh chu a lo rah ha hle nghe nghe. A hmaa an lo tum tawh ang ngeiin a hnuaiah a an âng phuau hlawm a, thli a thâwt hat loh avângin a rah pawh a îl mai mai duh lo hle. Darkar chanve vêl hnuah chuan an duhtâwk a, ka pu kâah chuan a lût hnem ta ber a. An han enchian chuan ka pu chuan a hnar kua var hawk khawpin a lo hmuam hnem hi a lo ni a. A kamsîr phei chu a peh hen hial a! Ka pu luhlul chuan a chhâk mai duh lo va, a kunga a lâwn hnu pawhin a hmuam zêl a. A kamsîr chu a peh zau hret hret a, a kareh a zau ta telh telh a. A hnuah chuan vawi leh khatah a dawlh ta vek a; a hrawkah a pâwng thla zuai a, a hnungzâng lama a pâwngthla ṭãwlh ṭãwlh a. Hetah tak hian a irh uk nghe nghe.

A kamsir peh chu theipui hnaia chârbeh leh mai a tum a, mahse, a châr nghet thei awzâwng lo mai. A awng apiangin a peh a, a ngawih laiin a inbel zêl thung a. Chu chuan nikhua a lo rei hnuah a kareh a tizau ta em em a. Rongenga pa'n fiamthu a thawha za lutuk tak maia a nuih châng chuan a tukkhum lamah a kamsîr ve ve hi a insi chat chat zêl a ni. Chuta ang chuan a kareh zau tak chu ama thuin, ama awm awmin a lo awmchho ta a ni. A sawi dânin chu a kareh zau chu a duh hun hunah a tizîmin a tizau thei a ni àwm e.

Zan khat chu tlângau hian a tûk lama lal thuchhuak anga Isua film an chan dâwn thu leh naupang tiam lova mipa zawng zawng lal muala kim vek tur a nih thu a rawn puang a. Chu thu chu a hriat chuan ka pu chu a phûr em em a, hetih lai hian ka pu hi tlangval upa lampang deuh tawh hi a ni. A pa leh a unaute zawng zawng nena kal tura rilru siamin hma takah an mu chhûngkua hial a ni.

A tûkah chuan lal mualah an kal vat a, midang pawh an hahnem hle nghe nghe. An film chan tur an la an tak tak hmain Rongenga pa bawk chuan fiamthu a lo thawh leh a, mi dang chu an lo nui leh huau huau a. Ka pu pawh chuan a kareh zau show nan chu hun chu a hmang angkai hle. Nakinah chuan an chanpual chu lalpa chuan a rawn ruat thliah thliah a. Rongenga pa chu puithiam lalber-a chang turin a ti a, ka pu chu a bawih ni turin. Phûr lo sateh mah se, lal thu a ni miau si a, thatho lo takin a aw ve ta a.

A film zawh êp tawhah chuan ka pu chanpuala a pawimawh ber lai chu a lo thleng ta a. Isua chu an man êp tawh a, Juda Iskariot-a hovin Rongenga pa-te nen an inzui dam dam a. Hmunsàm ram dai reih ruihah Isua chu an va hmu ta a. Juda chuan Isua a va hrilhru sâ sâ a, a fâwp ngawih ngawih a. Chu veleh engkhaw sawi set set lovin mi pakhat hian ka pu bengah tak sâtin a sâtthla hlawk mai a! Ka pu chu a ê ring hle a ni àwm e.

Hetih lai hian an cameraman-te hian camera trick an la thiam loh avângin a nihna ang angin an chang tawp a. Ka pu beng pawh sahthlâk a ni tak tak bawk. A sâttu khân hmai a tuam tlat avângin ka pu chuan a hre lo va, hria chu ni se hnuah a sawisa nasa ngawt ang. A film-ah a beng tidam leh mah se, a takah tihdam leh tak tak theih a ni tawh si lo, lal-te paw'n a tih ngaihna vak an hre lo va, an sahthlâk them, te reuh të an hmu leh hlauh va. Chu chu lâ-in an huibet leh tawp a, chu chu ka pu chuan damchhûng beng atan a lo pawm a ngai ta a ni.

An film chan tuar bertu chu ka pu chauh a ni lo, Isua lema chang mawlh kha a ni! A hnuah phei chuan ramtuileilovah a chhuak hial rëng a. Zakhuma'n a vaw uar bawk êm a ni. Ka pu pawh chuan a hnuah ngaiah a neih chhoh ta vel mai mai a. Chuta ang chuan a beng chu ama thuin, ama awm awmin a lo awmchho ta a ni. A sawi dânin chu a beng chu a duh hun hunah a lathlain a vuah leh thei a ni àwm e.

um khat chu an khuaa fiamthu thawh thiam em em mai, Rongenga pain Zawlbuk-ah fiamthu a thawh leh pek a, a ngaithlatute chu an nui ham ham mai a. henkhat phei chuan a fiamthu thawh chu Comedian Search-a tel huna sawi atan tiin phone-ah an lo chhinchhiah a, lehkhapuana lo ziak malh malh tâwk lah bo lo.

Ka pu erawh chuan ngun takin a ngaithla kar mai a, fiamthu a sawi zo chiah tiha mi dang an nuih dar dar lai chuan ani chu a lo chhîng diar diar a, mi dang nuih tawh loh hnua Rongenga pa'n fiamthu dang a rawn thawh an leh chiah tihah uar mangkhêngin a'n nui ta mai hîn a! Nuih kal laklawh mi dang chuan a ngaihna hre lo zet hian an lo nuih vak vak a. Chutianga a tih zêl avângin a hnu deuhvah phei chuan Rongenga pa chuan fiamthu a thawh zawm duh ta lo va, an khuaah chuan ka pu chu fiamthu thiama sawi leh hriat hlawh, Rongenga pa khûm theitu leh tlàwm theitu awmchhuna sawi a nihphah ta hial a ni.

Hetia mi dang nuih hnua a nuih hian awmzia thûk tak a nei thung. Mi dang chuan a fiamthu chu an nuih liam mai a, ka pu erawh chu a zat vâng ringawta nuih a tum ve hauh lo. Rongenga pa fiamthu thawh chuan ram inrêlbâwlnaah kawngro a su em, kohhran leh mimal pawisawina a ni em, fiamthu thianghlim a ni em, wordplay nge oneliner satliah, tih zawng zawng chu ngun takin a ngaihtuah hmasa vek phawt a, chutah nuih chi a nih chuan a nui chauh hîn zâwk a lo ni.

Hetianga ngun taka ngaihtuah hnua a nih tâk chauh hin avângin Rongenga chhûngkhat laina zingah ka pu lo ngaithei lotu an lo awm ta hial a. An kutpalh pawh vawiduailo tâwkin a khabe a rim hle a. A khabe phei chu damdawiinah a huitîr a, thla nga chhûng chu doctor-hovin nuih an phal lo nghe nghe. Ka pu erawh chuan a nuih dân chu bànsan a tum hauh lo thung. A nui lui zêl.

Vawi khat chu Zawlbuk-ah Rongenga pa'n fiamthu a thawh leh a, ka pu pawh an zîngah a hu ve kar a. Nakinah chuan fiamthu uih lutuk mai, nuihzatthlâk bawk si a rawn thawh leh ta a. Ka pu nuihza lutuk insûm zo lo chu a nui chhuak ta hawk a! Chu veleh a khabe hui, la dam ha si lo chu a rawn peh leh ta hawk a. Ka pu ning lutuk chu a runluih nan tiin a nui ta vak vak mai a. A khabe aanga thi lo chhuak zawih zawih chu a ning lutuk a, a hruhul a, vutin a tuamhnan a. Thla khat hnuah a phelh a, a khabe chu a lo phîr ta hai mai a, nula lawm a hlawh phian a ni àwm e.

hiante chuan thîkin a tih dân anga tih ve an tum a, an khabe an tikak a, vut an tuamhnan a, thla khat hnuah an phelh a. Mahse, khabe phîr chu khawi lam, a lo ser bâwk luau zâwk a! Ka pu vânneihnaah an puh ta hial a ni. Chuta ang chuan ka pu khabe phîr chu mah thuin, ama awm awmin a lo awm chho ta a ni. A sawi dân chuan a khabe phîr chu a duh hun hunah tichîpin a tikau thei a ni àwm e.

A lu ûm sâwl hi a uanpui ha duh vak lo va, chumi hre lova fiam palhte chuan tûn thleng pawhin an la fiam nawn leh lo. A lu hian kil li a nei a, a phêk deuh bawk a, a tung viau a ni àwm e. henkhat phei chuan a lu chauh hi chung lam zâwngin a hang emaw an ti hial a ni.

Hmânlai chuan indo rëng rënga khawsa hi an ni bawk a, an dinhmun a râlmuang lo hle. Vawi khat pawh khawchhak lam aangin pawih râlhovin an rawn rûn thut mai a, ka pute inrin loh lai tak a nih avângin an chan a chau hle. Ka pute inah pawh pawih pasalha pahnih chu an lo lût a, ka pute uipa chu an talh a, an uipui an pâwngsual bawk a. Chumai pawh duhtâwk lovin ka mu chu an vaw hrep a, nikhaw hre lova a awm thlengin thingremah a lu an tauhtîr chawrh chawrh mai a. Hmeichhia chu khawih lovin a hnuah an chhuahsan ve leh mai a ni àwm e.

Ka pu a rawn harh leh chuan a thinrim chu a inhrosa nasa mai a. Tih ngaihna vak a awm tawh si lo, insehruh ún chungin a mittui a tla zawih zawih a. A thingrem mawnga a phone chu a lachhuak a, a thinrim chânga a hla ngaihthlâk hin, rock lampang ngan tâwk mai chu earphone-in a ngaithla a, a luin thingrem a tauh vak vak mai a. Lal leh upate'n an lo dan hnu thlengin a tauh a ni. Damdawiinah an hruai vat nain ka pu lu chu a nih tur ang ang a ni zo tawh. A phêk vek.

Mistiri leh doctor angkawp chuan ka pu lu phêk vek chu siamhat tumin bei ngial mah se, an hlawhtling lo chiang kher mai. A chângin triangle shape-in a awm a, a chângin rectangle shape-in a awm bawk a, a circle thei tawh ngang lo. Doctor leh mistiri-te beidawng chuan a nih nih an nihtîr ta a, in lama inenkawl turin an hâwtîr ta rih a.

Ka pu chuan a lu phêk lutuk chu a buaipui angreng hle a, phai lamah te kalpui mah se, a ben pawp pawp chânga a rawn bial leh deuh hîn tih mai loh chu permanent-in ngai a awh thei tawh lo. Chuta ang chuan a lu phêk chu ama thuin, ama awm awmin a lo awmchho ta a ni. A sawi dânin chu a lu phêk lutuk chu a duh hun hunah a tibialin a tiphêk leh thei a ni àwm e.

Ka pu hi tuarchhel tak leh luhlul tak mai a ni a, a intihpalh chânga a thinrim a chhuah chuan a intihpalh aia nâin a taksa a sawisa hîn; hei hi a chhan tûn thlengin a la sawi duh lo. Ka lo la zâwt zêl ang a, sawi duh hun a neih hunah a chanchin dang ziah pahin ka la rawn thai ial leh dâwn a nia.

Share:

16 comments:

  1. Ka va han nui nasa emmm! Lo ziak leh thuai rawh...

    ReplyDelete
  2. Thianpa, ka ziah sa ka'n dah thawr mai a nih hi. Remchangah le.. Ka lawm e.

    ReplyDelete
  3. I pu hian naupang ngaihnawm tihzawng leh mak tih zawnga thu sawi a thiam hmel. Naupangin in bawr lat lat thin lo maw???

    ReplyDelete
  4. @Pu Carbou, a ni maithei a ni..haha! :D

    ReplyDelete
  5. Pu i va nei Cial bik ve a... Min tihlim lutuk he i pu chanchin hian.. Rawn ziak zel rawh lawm takin ka lo chhiar thin ania..

    ReplyDelete
  6. Dawt pawh va ni suh, hahaha zanlai laiah kan nui huk huk chu le. A bul i tan dan leh a chhung thu han inper san dan te khi ! :D

    tren tren

    ReplyDelete
  7. @Pi Ma, a part-I pawh ka dah khi aw..a tawpah. I lo chhiar dawn nia, i la chhiar loh chuan. Ka lawm e. :D

    @Chhuaklinga, ka thuziakte min lo chhiarsak thin a, ka lawm khawp mai! Phuahchawp leh lutuk hi chu tiraw..hahaha

    ReplyDelete
  8. A khabe phir chungchang hi mak ang reng hle mai a!!

    ReplyDelete
  9. Pu ila nei a, i vannei hle mai, keipawh mahni pu te han titi pui vel chu ka chak ve thin khawp mai, i pu bik phei hi chu sawi tur a ngah hrep hmel leh nghal a...tak tak te anih ngai chuan ;)

    ReplyDelete
  10. @Puibawiha: Nia, a mak khawp mai. Hahaha! :-)

    @

    ReplyDelete
  11. Hmmmm..kan inkawmngaih viau ang le. Ka hmu chak mange aw...

    ReplyDelete
  12. @Beethugs: Pu chu ka la nei a, mahse, tunah tak chuan ka kawm phakah a awm tawh lo va.. Awmna hmun a inang tawh lo va..

    @K'u Krista: 'Inkawmngeih' Ka phuahchawp a nih khi aw...!

    ReplyDelete
  13. Comment dan tur pawh ka thiam love,mi tihlim khawp mai...

    ReplyDelete
  14. Thianpa, i comment-in min tihlim e. :D

    ReplyDelete
  15. Ipu khan thu a thiam nge i sawichhawng thiam?! a ngaihnawm hle mai. Kamsir peh a modi tum dan khi:)

    ReplyDelete
  16. Hahaha.. Pu Hv, ka phuahchawp kikawi kual vel a nih khi!! Ka lawm e.. :)

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers