25 March 2012

Hmangaih Lehkhathawn


To,

Duh leh hmangaih ber leh ka zah ber, ka phuhkhum hnu
Ateii

A hmasain he khaw duai tak hian he lehkha hi ziak lo thei lo turin min tur chhuak ta a ni ber. Sap thufingin, ‘Hunâwl leh thluak-âwl chu setana workshop’ a lo tih angin setana workshop ka nih mai loh nan he lehkha hi ka ziak a, khawngaih takin min lo chhiar chhuahsak hram turin ka inngaihtlâwmna leh ngenna tuifâwnte chu i lamah ka rawn theh phei e.

En teh Ateii, he khawvel leh hringnun hi ka ngaihtuah kawp châng hian eng vânga min lo duh mai nge maw i nih ka ti ṭhin. Sum leh pai leh chhûngkaw khawsakah te, hmel leh ruangâmah leh, nungchang leh chezia thlenga min en lova min thing chhuak nalh hi fing ka ti ru riau che. Hemi kawngah kher chuan tluk lo che ka inti kher mai! Min lo duha, min lo hmangaih thei mai hi ka lawm lutuk a, ka lawm telh telh a, ka lawm nawn awn awn a, lawmna luipui luang nghe nghe teh se a......seh maia!


‘Chunglêng savate’n bu an nei a, leia sihalte paw’n kua an nei; sarèp chenin tûl an nei a, mihring fapa erawh chuan kawppui ka nei lo’ ka lo tih tawh kha i hria ang a, kha kha dâwt mai changin tlángkam mai a nih ka va ring ta em! Aw...ka va han hmangaih ngawih ngawih che ve le aw... Hmangaihna tehna hi hmarcha ni sela chuan ka hmangaihna che chu hmarchapui a ni mai!

Ateii, mite’n i hnênah eng nge a ni min tih? Hmangaihna chhîpchhuan vû vû a tlu leh khut ṭhin chu min ti ém lo’ng chu maw? Rul pawh hi a tleng a tleng chuan a tâwpah a kuaah a lut ṭhin. Rul ni ila, nang a kua ni bawk la! Hrâm tlahawlh min ti âwm, mahse, thinlung leh tihtakzetin i thinlung kawngkhar ka rawn kik nawn leh e ka tihna mai chauh a ni si.

Ateii, kan inhmuh leh hmasak berah chuan min han en vang vang la, min iai a nih chuan min hrilh la, ‘dawtsawi hmang’ ka ti ang che, ka iaiawm si lo va! Kei pawhin ka en vang vang ang che a, ‘hmelṭhatë’ ka ti ang che — a theih hram chuan. Tichuan, tu pawi mah sawi lovin kan thidang dûn leh dawn nia. I hmangaihna kha min hlàn nawn leh la, khawvel hi eng vanga siam nge tih chhànna chu nang leh kei hi pêkin kan awm dawn zu nia!

Ateii, min ṭhen miah suh aw... Ka duh miah lo a nia. Bâkah hetiang inṭhenna tih vel hi chu mahnia thu lo tihtlûk ngawtna chî a ni lo, kan inrâwn ang a, kan ngaihtuah dun tur chî a nia. Ṭhenkhat chuan mahnia thu an lo tihtlûk ṭhin avangin a hnu leh zelah pawh an buai phah fo ṭhin a nia. Inṭhen hi chu a inngeih lohthlâk bâkah a induh lohthlâk a, a inhmuhsitthlâk ém mai.

En teh Ateii, ka hringnun lehkhaa thu i rawn ziah ni aṭang khan e...ka chhia leh ṭha hriatna te’n, ‘â rawh’ min ti asin. Tichuan, ka â a, tûnah ka fing leh ta! Tifingtu leh tihfina awm chu fakin awm rawh se! He khawvelah hian Chhandamtu kha misualte lam tura lo kal a ni a, kei erawh chu nangmah lam tura lo kal ka ni.

Eng pawh ni se, i hmangaihah chiang la, hmangaihna chu ka pe thei reng ang che. I rinawmna kha leiṭhaah te, lei pan hmun leh pialtlépah te tibaw suh. Hnimhlîngnei hmunah thehthang bawk hek suh, a neitu bulah ngei dah ang che. Tichuan, nun hlimna chu midang tàah i ngai bîk lovang. Inchhuihpalh avanga tlûk kher tur tihna a ni chuang lo a nia.

Ka pentui rawng, zanthim ang maia dum hi i ning tawh ang a, mit khap fuk fuk chungin i chhiar ri bul bul ang tih hlauhthàwn thil thu-ah ka titâwp hmuk e.

I tâna ziaktu rinawm

Mamma

Hei hi thla thar April thla (a theih chuan)-a ka lehkhabu tihchhuah tur, Hmangaihna Tuboh-a lehkhathawn pakhat ka rawn la chhuak a nih hi! Ka han thâwttir lâwk a ni e.
Share:

13 comments:

  1. I lehkhabu chu chhiar a chakawm tawh khawp mai. Lalpa'n mal a sawm che ang a, lehkhabu tha tak a ni ngei ang.

    ReplyDelete
  2. @Lra, nia tiraw.. Han beisei phawt mai ila...:)

    ReplyDelete
  3. ava tha em, Hmangaihna TUBOH mawlh chu ka nghak hlel

    ReplyDelete
  4. LOL! A chhuah hunah chuan kan tiho ṭham ṭham ang chu tiraw.. Intlanchhiatsan awih lohvah! :D

    ReplyDelete
  5. "Ka phuhkhum hnu" i tih lai tak khi, eng i tihna nge maw ni le??? Restaurant-a in chawlh laiin i hahchhiau thut a, i chow hmuamlai i phuh khum tihna nge, tawngkam thlum tinrengin i lo phuh khum zantin zawk?????? I love letter dawng thintu nula tan chuan tuar i va har thin dawn tak em......

    I tlawhkhalh hneh bawk a, Atei tan chuan tlanchhiatna a van hmel kher mai.

    I lehkhabu i released hun chuan bukhat tal chu lei ve ngei ka tum.

    ReplyDelete
  6. @Pu Caribou, nia, khi khi ka edit duh ta lem lo va! A thawnthu dang hriat a ngai a, chu chu sawi lo mai ang..:) Chaw ei a phuhkhum chu a ni ngei mai a. Ka lawm lutuk e.

    ReplyDelete
  7. Lehkhabu chhiar a tichakawm sawt mai a....

    ReplyDelete
  8. Ka inthlahrung, ka sawisel dawn.

    "Ateii, mite’n i hnênah eng nge a ni min tih?" tih leh hmundanga Ateii i address naah khian a kohdan angin ziak ta la.

    "A-te, mite’n i hnênah eng nge a ni min tih?" han ti la a ri pawh a dik zawk lo maw.

    ReplyDelete
  9. @Angaiha, ka lawm e..:)

    @Miss Aduh, inthlahrung lo ve. Sel bawrh bawrh rawh. I ngaihdan chu a dik khawp mai. Mahse, kan ṭhianpa pakhatin a û a kohdan ka bengah a châm deuh tlat a, ka'n ti ta mai a nia.. Ngun takin mi chhiarsak a, ka lawm lutuk. A dang pawh i duh duh i sel dawn nia. Ka lawm khawp ang.

    ReplyDelete
  10. " Bâkah
    hetiang inṭhenna tih vel hi chu
    mahnia thu lo tihtlûk ngawtna chî
    a ni lo, kan inrâwn ang a, kan
    ngaihtuah dun tur chî a nia.
    Ṭhenkhat chuan mahnia thu an lo
    tihtlûk ṭhin avangin a hnu leh
    zelah pawh an buai phah fo ṭhin
    a nia. Inṭhen hi chu a inngeih
    lohthlâk bâkah a induh lohthlâk
    a, a inhmuhsitthlâk ém mai."

    a tha kava tive le, nghahhlelhawm tawh vele. thianpa

    ReplyDelete
  11. Va bei duah thiam ve, heti zat hi i pai tawh a, tu tak han chhaithlu ang che maw, an kuh tul lo maw?

    ReplyDelete
  12. Tunah ka lo sawi leh ang:

    "Mahse, kan ṭhianpa pakhatin a û a kohdan ka bengah a châm deuh tlat a, ka'n ti ta mai a nia.."

    I bengah a cham a, i chhiar/ziah pahin a aw i hria a, a inhmeh i ti. Mahse kan hre ve lo,engtin a thluk dan kan hre lo, a kotu leh a koha kha eng ang mi nge kan hriat ve loh avangin "Ateii" ti a i address na hi a inhmehna kan man pha lo.

    ReplyDelete
  13. @Thianpa Marvin, ka lawm e...:) Thla tharah a chhuak hman ngei turah ka ngai a, ka rawn hrilh dawn che nia.

    @Pu Rpa, tumah ka chhai thlu hlei thei lo a nih hi, buaithlak...huisss...

    @Miss Aduh, a âwm tho mai! A dangah pawh Ateii ti vekin ka address a..:) Han sawi vak ngaihna pawh ka hre lo, sitail-ah ngai mai rawh...:D I chhiar huna i zulh dan hriat a châkawm khawp mai..D

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers