15 March 2012

Hringnun a mawi!

Vawiin (March ni 15) hi ka piancham vawi eng emaw zahna a ni a, inah nilengin ka inkhung a, ka ngaihtuahna erawh a kal thui em em a.

Facebook lamah ṭhian tam takin duhsakna min hlân a, chu'ng zingah chuan ṭhian hnai tak tak leh a tak ram pawha ka kawm ngeih em em te, site dang leh hmun dang danga ka ṭhian kawm a taka ka la hmuh lem loh te, online-a ka kawm ringawt engtik lai maha hmuh ngai loh tur tih hriat ngawih ngawihte'n duhsak takin ka piancham hi min lawmpui hlawm a. Ka lawm kher mai.

Ka piancham hi vawi khat mah kan la lâwm ngai lo va, ngaih pawimawh zawng leh chhungkaw dinhmun inan loh vang te pawh a ni ang. Mi'n ropui taka piancham an lâwm ka hmuh leh hriat chang hian an awhawm ka ti em em a, a rûk takin ka lo lawmpui em em ṭhin. Mahse, han lawm ve châkna em em ka nei ngai lo.


Rual kan han pawl a, internet khawihna chang kan han hria a. Facebook-a ka luh hnuin ṭum hnih chu ka piancham a lo thleng ta reng mai a. Facebook-a ka ṭhian hlu tak takte hian March ni 15, ka tana ni pawimawh tak mai chu a pawimawhzia an rawn nemnghet sauh sauh va. Lawmpuina leh duhsakna thu tam tak ka dawnte chhiar chungin hlim takin ka piancham ni hi ka hmang liam ṭhin. A lang a pauvin hmangin lawm bung bung thei lo mah ila, ka lawmna a kiam chuang lo va, a hranpaa lawmna hun hmangte pawh ka awt ta lo.

Vawiinah ka rilru-ah thil tam tak a lo thleng a, mahse, ka ziak sei duah lo teh ang. Ka piancham puala thuziak dah ve reng reng ka duh avanga tlem han thai hlek ka ni si a. Ka ṭhian min lawmpuitu zawng zawngte chungah ka va lawm rua em!

Hringnun hi a lo mawi ngang a ni e; a chang changin.
Share:

9 comments:

  1. hringnun hi a mawi ngang a ni e...i thlir thiam chuan,engtiklai pawh in..

    ReplyDelete
  2. Ka lawm e Chhanpui. Ka hringnun timawitu zingah i tel chiang khawp mai.

    ReplyDelete
  3. Pianchamphaphâk dam taka i han thleng thei hi ka lawmpui takzet che a. Thian tam tak, lawmpuitu i nei bawk hi i vannei hle mai. Natna khuma mahni piancham hmang mek engzat tak awm ang maw, tiraw??

    ReplyDelete
  4. Lawm nachang hria thian ka nei hi ani aia ka lawm lohna tur bik a awm ka hre lo!

    ReplyDelete
  5. Pu Zaia, a dik chiah mai. Engkim mai hi lawmna tur zel a lo ni. Mi lawmpui avangin ka lawm takzet e.

    ReplyDelete
  6. I pianchampha lo thleng hian hlimna, lungawina, thatna, hriselna, vanneihna leh malsawmna lo thlen che rawh se. Lawmpui nan che chibai tal han buk che ka va han chak tak em. I pianchamah hian tu nen maw nilenga in inkhung hran a???? Eeeehhhhhh.....

    ReplyDelete
  7. Pu Caribou, hahahaha.. Ka pianchamah chuan computer nen nilengin ka inkhung hrang mawle..hahaha. Computer hmaah ka bur ngar ngar a, ka peih loh tawpah ka mu tawp! I mi duhsaknaah ka lawm lutuk e.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers