05 March 2012

Zei loh rapthlak dan a-z


Zei lote tana zei dan chu hetah hian a awm a, hemi hrûl deuh rohvin tunah zei tawhte tana zei loh dan kan ziak ve leh a ni.
Eng nge a ṭhatna?
A ṭha ve hrim hrim. Midang kenna remchang a ni a, chu chu thuhnuairawlhna a ni. Tin, zei deuh chuan lerh an hlawh a, lerh nih chu tuman kan duh lo a ni; chuvang chuan a ni, zei loh dan kan zir dawn ni.

Mamawh te
1. Pawisa eng emaw zat.
2. Reliance SIM card pahnih.
3. SMS Pack tlém.
4. Facebook fake account.
5. Inkhelh thawmhnaw.
6. Sana.

Zei sa i nih avangin zei loh i zir dawn a ni tih theihnghilh lo phawt mai la. Facebook-ah fake account nei ang che; mahse, i fake chu i chhas-in a hre tur a ni lo. I zei sa tawh avangin facebook-ah chhas i nei tawh a, i account original nen pawh relationship in dah nghe nghe kha. I Reliance SIM card pakhat zawk pawh i hmantir mek a nih kha.
a. Le, i fake account a chêt a hun e! I fake account hmangin i chhas chu va bâwl ṭiah ṭiah la, va chhai thlu teh le. Zei loh inzir ṭan i nih avangin i la zei em em a, i chhai thlu mai a ni. Zahzelah, “Mahse, midang nen relationship in dah kha..” i ti khawmawi ve ang a, ani chuan, “Ka ṭhianpa a nia, a bialnu nen an inṭhen a, kan runluihna mai mai alawm,” tiin a chhang ang che.
b. Nitin i fake account aṭangin va inbox hmasa ziah la, “Ka rawn message loh che chuan min message hmasak i tum ngai lo,” tiin i vui ziah ang. Eng tiang paw’n rawn chhang che sela, a chhuanlam a ni tih i hriat a ṭha ang.
c. I fake account nena kar hnih i inngaihzawntir hnuah a lakah thinrimna tur ngawt i zawng ang a, a wall velah a hming pum pumin i post ang. A status update-te kha hawrawppuiin i comment-sak ve ṭhin ang. Chutih rual chuan i account pakhat zawk hmangin, “Min lo hmangaih tak tak lo a nih hi, midang CK-pui i nei,” i ti leh zauh ṭhin ang.
d. Thla thum a ral hnuah i fake account aṭangin a phone number i dil ang a, i phone number i pe nghal dawn nia.
e. I number a lo neih tawh si avangin SMS-in “Hmela, ngati nge min bâwl a?” tih chu a rawn thawn ang a, i reply lovang. A thinrim lutuk chuan a rawn call che ang a, “Ngati nge ka SMS i reply loh a?” a rawn ti hmasa ang a, nang chuan, “Ka reply che kha.. Tun lai chu Reliance a chiang lo hrim hrim a..” tiin i chhang ang. Ani chuan chu lam a sawi zui tawh lovang a, “Eng nge facebook-ah khatiang khan mi rawn tih a?” a rawn ti leh ang a, nang chuan, “Ka fiah che alawm, i lo rinawm lo hle mai,” i ti ang. A sawi tur hre lo chu a ngawi vang vang ang a, phone a dah hmak ang.
f. I call ang a, i call hmain a lo pick up ngei ngeina turin SMS i thawn ang, nangma idea ngeiin. I call chu a lo pick up ngei ang a, “Hello.. Ngati nge i dah hmak a? Min be peih tawh lo ami? Naktuk chhun dar 12-ah City Park-a pipu-ah khan lo uai ang che. Kan inhmuh ngei a ngai. Tunah hian ka sana-ah dar 5:42 a ni a, lo mil rawh. Naktuk dar 11:56-ah chiah City Park gate ka rawn lut ang,” i ti ang a, phone i dah tau ve hmak ang.
g. A tuk a thlen hma ngeiin, signal ṭhat loh lai takin ‘Min hmangaih tak tak lo’ tih i thawn ang a, mahse, Reliance signal ṭhat loh lai tak a nih avangin i SMS chu a dawng kim lovang a, ‘Min hmangaih tak tak *sometext missing* tiin a dawng ang.
h. A tukah i inhmuhpui dawn. Chawhmaah i ṭhiante football khelhnaah tel la, chhun dar 12 hma ngeiin i inkhelhna hmun aṭangin haw la, in haw tlang nghal mai lovin City Park lam pan rawh; inbual leh insil fai pawh a ngai lo.
i. City Park chu dar 11:50-ah thleng ngei ngei tawh la, chutih hunah chuan ani chu a chhunga pipu-ah a lo uai tawh ang. Eng vanga i thu awih em em nge, kan tih chuan a hmaa i lo zei em avang khan i thu thuin i dah thei a ni.
j. Dar 11:56 a ri chiah tihah chuan hah hmel deuhvin gate chhungah lut la, ring tawkin, “Kan inkhel a, min lo nghak rei tawh em?” tiin au lung lung rawh. Ani chuan ngawi rengin a en ang che.
k. A pipu uaina bulah ngei thlan rim nam huam chungin ṭhu la, lum i tih em avangin i jersey hâk lai pawh kha phelh nghe nghe ang che. Tichuan, i kutin i thlan hru fai puak la, a kut vawnsak ang che.
l. “Facebook-a ka bâwl che avangin min ngaidam rawh,” ti la, a hmaah ṭhingṭhi nghal rap rawh le. A ngawih reng chuan i kutzungchal liak zauh la, a kezungpuiah zu tãt zauh rawh; tichuan, a rawn ṭawng tawh ang.
m. “Tun ṭum chu ka ngaidam hram ang che, mahse, khatiang khan vawikhatmah mi ti tawh suh ang che,” a ti ang a, zawi të a hriat phak si lohvin, “Ka ti lo che,” i ti ang a, chumi chhunzawm zat chuan, “Yesss!! Min ngaidam,” i ti ang a, kut i beng thak thak ang; i chibai chuk chuk bawk ang.
n. Tichuan, in inchhai vel ang a, zawlah inum kual vel ula, a umtu-ah ṭang ang che. I inchhuih tlu deuh reng tur a ni. A chang leh i bawh tlu rawp ang a, vai film-a an tihdan angin a chungah i mu ang a, a hmai zawnah tak hah hmel zetin i thaw hluam hluam dawn nia.
o. In haw dawn hnaihah lawmthu i hrilh ngei a ngai. Gate bulah i ding ang a, “Min ngaihdam avangin ka lawm e. Min lo hmangaih tak tak a nih hi,” i ti ang a, chutah tak chuan a message tone a lo ri ral ral dawn a ni.
p. A message a han en ang a, a hma zana i message thawn thleng kim lo ‘Min hmangaih tak tak *sometext missing* tih kha a thleng kim chiah ang a, ‘Min hmangaih tak tak lo’ tih a lo ni tawh ang.
q. Chuveleh a thinrim chu a kal tau hmawk hmawk ang a, nang chuan vai film-a an tihdan angin zai chungin kawngah i chhai phei ang. A bul i thlen veleh a kutah i vuan ang a, tal chhuah a tum ve bawk ang a.
r. Nang chuan i vuan tlat ang a, dawrah i hnuk phei ang. Zak chung chungin a zui che ang a, dawr i thlen veleh i pawisa ah lai khan papawr i lei ṭeuh ang a, dawr nghaktu hnenah, “Zana kan kan tur a nia…a duh lutuk a..” i ti ang. Chutah chuan i bialnu chu a zak hle tawh ang.
s. Tichuan, papawr tam tak chu i kentir ang a, bawr tawkin in haw tawh ang. In in awmna a hnaih zawk avangin in inah papawr chu in dah ang a, chaw ei dawnah i bialnu chu i hawtir ang a, i thlah lovang.
t. In chaw ei hmain ‘Zanah ka lo leng dawn nia’ tih message i thawn ang a, mahse, signal a neih ṭhat loh avangin a pending ang. Pawi ti suh, i leng dawn tho alawm.
u. I hman veleh i chhuak nghal nal nal ang a, kawngka kik lovin i lut ang. Ani chu a lo ṭhu tûm bur ang a, a bulah i va ṭhu ang. I ngawi vang vang ang a, a tawpah, “I dam maw?” i ti ang a, a chhang lovang che.
v. I hawi vual vual ang a, “E he! I tihtauhna chhan ka hria, papawr ka rawn ken loh vang. Ka rawn ken theihnghilh chiang lutuk! Sooooooryy..!” i ti ang a, i tlan chhuak nghal ang.
w. I papawr ken nen chuan i kal leh ang a, chutah chuan a thinrim a lo zia deuh tawh ang a. Papawr chu in kang dun ang a, a tam em avangin darkar 4 ngawt in kang ang.
x. In kan rei deuh avangin a ṭhen a lo ût ang a, a ût lo lai lai i thlang ang a, thleng pakhatah i dah hrang ang. Tichuan, inpui lamah thleng keng chungin in phei ang a, i ṭhu dawn chiah tihah i thleng i thlauh lui ang a, i papawr ken a baw vek ang. A buak rualin tlu lui la, in papawr kan sa zawng zawng chu delh chhe vek ang che.
y. A thinrim lutuk chuan, “Haw rawh, zei lo lutuk mai!” a ti che ang a, chuveleh i kal dawna i message thawn, ‘Zanah ka lo leng dawn nia’ tih kha a thleng ve chiah ang a. Nang chu hlawhtling inti takin i haw tawh mai dawn a ni.
z. Hetiang hian ngaihzawng i neih apiangin i ti ziah dawn nia.
Share:

7 comments:

  1. a link tawp a z.html khian awmzia a nei ang em le...:D

    ReplyDelete
  2. I comment awmzia ka man thlawt lo!

    ReplyDelete
  3. Ka chhiar ve chi anih leh nih loh pawh ka hrethiam phak lo..... chhangchhepa ka ni bawk sia....

    ReplyDelete
  4. Hehehe.. Mi thuziak phenah ka han ziak ve mai mai a nih hi. :-)

    ReplyDelete
  5. Hahaha... Zei loh dan hi i hmuchhuak hi i zei ka ti ngawih ngawih. Hei hi em ni, i facebook profile a i hming "Mi Lungngai Fa" tia i thlak daih na chhan kha!

    ReplyDelete
  6. Hahaha!!! Kha kha chu a thawk thut a, ka thlak ve mai mai a nih kha..haha. I thuziak hrûlah ka ziak ve mai mai. Ziak lo la chuan ka ziak lo tawp ang...:)

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers