29 April 2012

Ṭhiante zarah ka lehkhabu kan tlangzarh ta!

Hun eng emaw chhûng kan lo ruahmanna angin, April ni 28, 2012 (Inrinni) chhun dar 12 khan ka lehkhabu chu Aizawl Press Club-ah H. Rotluanga'n a tlangzarh ta a. Ka ṭhianpa, VLC Vanlalhriatrenga chuan hneh takin a hruai a, Pu Lalrammawia Ngente-in hunserh a hmang a, ṭhianpa Chawnglianmawia Chawngthu-in lawmna thu a sawi a, Rosy K. Remsangpuii'n thiam takin 'Zoram Par' a sa a, Pu Mafaa Hauhnar-in lehkhabu thlirna neih hnuin tlangzarh a lo ni ta a ni.

He hunah hian Comedian Search lama ka ṭhiante pahnih, Lalhmangaihzuala leh PC Lalṭanpuia'n thiam tak maiin fiamthu an thawh a, Pu Lalhruaitluanga Chawngte, Pu C. Lalhruaitluanga leh Pu Lalhmingmawia Ralte-te'n thu ṭha tak tak sawiin ṭhianpa Hruaia phei chuan ka pual liau liauvin chhamhla a rawn phuah chhuak nghal a, a tawpah ṭhianpa R. Lalrinmawia'n lawmthu sawina hmangin hun kan titawp ta a ni.


He ni hi ka tan a ropuiin theihnghilh a har tawh ngawt ang. Kan ṭan hmain ruah a rawn sur a, kan tlangzarhtu tur berte ruahin a dan tlat avangin a hun takah kan ṭan lawk thei lo va, darkar chanve velin kan tlai phah a, ṭhiante lakah a inthlahrunawm duh kher mai. Ruah a sur chung chuan mi 70 chuang hret an lo kal thei a, Aizawl Press Club kan khat mawi tawk aia tam hret kan ni a. Kan tlangzarhtu leh kan fiamthu thiamte avangin kan nuiho dar dar reng a, boruak a nuam khawp mai.

Chanchinbumi leh LPS Vision lam aṭang te, kan ṭhianzaho Mi Ang Lo aṭang te, facebook-a Circle of Friends (COF) aṭang te, ka misual.com ṭhian aṭang te, ka facebook ṭhian hrim hrim te, ka comedian ṭhian te, ka thuziak ṭhian te, ka ṭhian ṭha tak tak lo kal te kha an hlu ka va ti tehlul em! Ṭhian lo kal thei ta lo tam takte pawhin min theihnghilh lo va, thupha rawn chawiin duhsakna thu min hlân a, hmun danga awmte pawhin duhsakna thu min rawn thawn ṭawk ṭawk bawk a. A ropuiin a hlu a ni.

He hun hi ka ṭhiante avanga hlawhtling thei ta chauh a ni. Banner siam kawngah leh thil dang dangah ṭhianpa VLa'n min pui reng a, ṭhianpa Mapuia paw'n a hmunhma hman tur velah min buaipui a, Pi Jenis-i te nupain a hmun min hawhsak a, Pi Malsawmi'n phal takin a laptop a rawn thawh chhuak a, Pu David-a chu sound lamah a tir aṭanga a tawp thlengin a duty tluan zak a, ka ṭhiannu Nuny Fanai-in zei tak maiin thleng a chawi a, ka ṭhiannu ngainat em em Chhanpuii' leh ka nau Mary-te'n refreshment buaipuiin a, a ṭûl ang ang an khawih a.

Chanchinbu hrang hrangte'n a thlâwnin min chhuahsak a, LPS Vision pawhin zing lama 'Chibai Mizoram'-a min puansak bakah, zan lampang chanchintharah min puansak bawk a, a ropui thlawt.

Ka ṭhiante pahnih Mastea leh ṬPa te'n a thlâwnin fiamthu min thawhsak a, ka ṭhiannu min duat em emtu Rosy-i paw'n a thlâwn liau liauvin min zaisak a. Ka ṭhianpa ka theihnghilh tawh ngai loh tur Rintea chu hman lo chung chungin Champhai aṭangin he hun hmang tur liau liauvin a rawn chhukthla vang vang a, hei zet chu theihnghilh a va har dawn em! Ka ṭhianpa Hruaia pawh hi chawhnua Lunglei-a haw phei leh tur a ni a, a programme tam tak karah a rawn lang thei hram a, keimah avang liau liauvin an haw tlai phah bawk a, ka theihnghilh tawp lovang. Tin, min tlangzarhsaktu, Mapuia te hian video-in min cover-sak a, an programme, LPS Fiamthu Huang-ah an chhuah leh dawn bawk a. He'ngte hi a man a va tam em! Mahse, engkim a thlâwn vek!

Ka ṭhian ṭhate min tuipuina leh puihna hi suma chantir tur ni sela chuan engtikah mah lehkhabu hi ka tichhuak thei ngai lovang. Ka lehkhabu pakhat Hmangaihna Tuboh hi ṭhianpa Zra min publish-sak a ni a, ka fiamthu bu zawk Nun Tihlimtu hi Pu Isaac Hnamte-in min publish-sak a ni bawk a. A ropui thlawt a ni.

Ka lehkhabu pakhat Hmangaihna Tuboh hi novel a ni a, cheng 100 man a ni. Pakhat zawk Nun Tihlimtu fiamthu bu niin cheng 60 man a ni.

Belh: Kan hun hman dan hi tlém han belh hlek ka duh a. Pu Lalrammawia Ngente-in tawi fel taka hunserh a hman hnuah Chawnglianmawia Chawngthu, Mi Anglo Ṭhianho zinga mi chuan lo kalte lawmna thu a sawi a. Hetah hian a chhûnga awm zawng zawngte chu a dintir vek a, a thu angin bula awm remchangte nena inchibaiin,"I lo kal avangin ka lawm e," kan ti ṭheuh va, boruak a hlimawmin kan nui nasa nghal hle! MJA President hlui, Pu Robert Lalchhuana te lai laiin a bula a tupa rual lekte chutianga a han ti lai hmuh chuan, a nuih loh theih loh!

Tichuan, kan Zoram zaithiam chhuanvawr Rosy-i chu a rawn ding chhuak a, min duhsakna thu tlêm a sawi hnuah thiam lutuk maiin 'Zoram Par' tih hla a sa a, a hnuah ṭhianpa Rintea phei chuan, "A tir lamah phei chuan ka hnuk a ulh lek lek," a ti hial!

A lehkhabu thlirtu tur Pu Mafaa a rawn ding chhuak a. A han sawi tak tak mai chu, a ṭhenah kan nui a, a ṭhenah kan ngawi ṭhiap a, a ṭhenah kut kan bêng a, a sawi ngaihnawm thiam khawp a. Book of the Year an thlan dan chu tlêm rawn belhin, zirtir nei rùn ringawt lehkhabu ṭhaa kan ngai hi a ṭhat loh thute a sawi a, lehkhabu ziaktuin mahnia style neih a ṭhat thu te pawh a sawi a, a lehkhabu chhûng a thlir tel thiam bawk nen, ngaithlatu tan chuan lei loh ngam zuk ni lo va!

A tlangzarhtu tur, Mapuia a rawn ding chhuak ta a. A tlai avanga pawi a tih thu a sawi hnuah ka chanchin a han sawi ta tak tak mai chu! A ngaithlatu an 'hahaha' hluah hluah mai a, ka pualin hla ruahṭhamloh a'n chham nghal zat a! (Hei hi a video ka la rawn upload ang!) Chutah, Rosy chu fiamin, "Mizoram-a inngaizawnga stage-a ṭhuho awmchhun kan ni âwm e," a han ti a, a han fiam ta tak tak mai chuh, kan nui nasain kan hlim kher mai. Rosy-i a rawn kal lovang tih pawh a hlauhawm zawk! Chumi hnuah, kan programme neih chhan ber, lehkhabu chu a duh apiang chhiar theih turin a tlangzarh ta a.

Tlangzarh hnuah Mizoram-a fiamthu thiam lar ber ber pahnih, Lalhmangaihzuala (Mastea), 2011 LPS Comedian Search-a pakhatna leh PC Lalṭanpuia, 2011 LPS Comedian Search-a top 5-a mi chuan hun an hmang leh a, hetah hian Rosy-i bawk hian fiam a hlawh leh pek a! Ani'n fiam a dawl bawk a, anni'n fiam nuam an ti bawk nen, kan nui ham ham reng mai a. Min tihlimtute hi an hlu ngawih ngawih a ni.

Anni pahnihin hun an hman hnuah a duh apiang thusawina hun hawn a ni a. Hetah hian Lalhruaitluanga Chawngte, Lalhmingmawia Ralte, C. Lalhruaitluanga te'n thu an sawi a, ṭhianpa Rintea'n lawmthu sawiin hun kan titawp ta a ni.

An hming lam ngei ngei ka duh chu, ka comedian ṭhian lo kalte an ni. An hming kan tarlan tak pahnihte bakah, kum 2009 LPS Comedian Search-a pahnihna, C. Laldinpuia (Serchhip) te, kum 2010 & 2011 :PS Comedian Search top 5, Lalngaihsaka (ITI Mualpui) te, LPS Comedian Search hmasa ber 2008-a pathumna, Lalchhanhima (Aizawl Dinthar) te, kum 2008 & 2009 & 2011 (ni tain ka hria)-a LPS Comedian Search-a tel, PC Remsanga (Bethlehem Veng) te, kum 2011 LPS Comedian Search-a mi, Lalfakmawia te an rawn lang thei a, mi an tiphuisui kher mai.

He hunah hian kan hlimin kan lawm a, kan nui dar dar reng mai a, kham lo takin hun kan hmangho a ni.

Thlalak hi ka upload thei rih lo va, remchangah post hranin ka la rawn siam dawn nia.
Share:

26 comments:

  1. A nuam tops! ka lawmpui bawk che. Hmangaihna tulthir...Oh! tuboh ka chhiar mek :)

    ReplyDelete
  2. A lawmawm ngawt mai.. Pathian zarah thil harsa tak i puitlin theih avangin Lalpa chu fakin awm rawh se.

    ReplyDelete
  3. @Pu David, nangmahni vang liau liauva programme kha hlawhtling thei a nia, ka lawm reng mai dawn a nih hi!

    @Ṭhianpa, ka lawm e. Champhai aṭangin he hun hmang turin i rawn chhukthla vang vang a, a ropui thlawt.

    ReplyDelete
  4. Lalrinawma chhakchhuakApr 29, 2012, 5:46:00 PM

    Ka rawn tel ve thei lova pawi ka ti takzet zet a ni. Hun chep tak leh harsa tak kara hetiang i han puitlin mai hi a ropui tak zet zet mai. Mi tam takte tan malsawmna leh hlimna petu a nih theihnan duhsakna ka hlan mawlh mawlh a che.

    ReplyDelete
  5. A va ropui ve le. KAN LAWMPUI CHE. A remchan veleh lo chhiar a chakawm hle mai.

    ReplyDelete
  6. A va ropui ve le. KAN LAWMPUI CHE. A remchan veleh lo chhiar a chakawm hle mai.

    ReplyDelete
  7. Min hlep na chungin ka lawmpui tak meuh che. Tawiawmtu pawh a huhang na thah, dam reng rawh se..jish

    ReplyDelete
  8. @Ṭhianpa Awma, rilru chuan kan hre reng che a, i hman lo hlauh va, i chân nasa teh mai a nia..hahaha. I mi duhsaknaah ka lawm e.

    @Pu Hlua, i la chhiar mawlh ang. Ka lo la zin maithei a nia...hehe. I duhsaknaah ka lawm e.

    @Ṭhianpa Lta, ka lawm e. I lo tel thei lo mai pawh a! I awm lai ni sela chuan nuam i ti ve thovin ka ring...:)

    ReplyDelete
  9. A nuam ka ti khawp mai kha ni zet kha chu...thuziah kawngah hlawhtlinna i neih zel ka duhsak a che...

    ReplyDelete
  10. Pi Maisek, he function hlawhtlinna hnar in ni tih ka hria a, lawmthu ka sawi nawn leh e. Tin, i mi duhsaknaah ka lawm bawk e.

    ReplyDelete
  11. Apa Ts, ka lawmpui chein ka chhuang khawp mai che. (Y)

    Kan khaw lam a rawn thleng chho te a nih ngai chuan ka lo lei ngei ngei ang.

    tren tren

    ReplyDelete
  12. A pa Chhuakling, a rawn thleng chho ngei turah ka ngai...ka lawm takzet e.

    ReplyDelete
  13. A va'n ropui rem rem ve. Ka Lawmpui lutuk che, Mizo Thalai Lehkhathiam ten hetianga Zofate tana sulhnu in hnutchhiah thin hi ropui ka ti ngawt mai. Nangma tan tak pawh LUNGPHUN a ni tih i hre tho vang chu... I kum ngaihtuah-in i thiltih hi a ropui ka ti a, ka chhuang che a ni. I tih-chhunzawm zel ka duhsak a che. Kar a hla a, ka lo tel ve thei lo erawh pawi ka ti hle a, ka chan ropui a ni ber e. Congrats!

    ReplyDelete
  14. Ka chan ropui khawp mai, mahse 'in spirit' ka awmve reng ania. David khan pic hmasa lam kha a rawn tarchhuak zuai a, khami khan min awmtir chak zual.

    Tluang takin i tum in hlen thei a, a ropui e. I tum a ruh a, i thianten kan phurpui lutuk che kha a ni reng a. Thiante hlutzia hi keipawhin Mizoram kalo haw khan ka hre nawn nasa hle asin.

    Tlangzarh ani tawh a, hralh lam pawh a tluan ka beiseiin ka duhsak takmeuh che. Ka chhungte ho ka hrilh kual hlawm tawh a, an dawr ngei chein ka ring. Keipaw'n rei lovah ka kawl ve ngei ka beisei ania.

    Good luck and God bless my friend.

    ReplyDelete
  15. thlalak te i vawm bei dawn maw ka lo tia :) lawmawm hle mai

    ReplyDelete
  16. @Dr. John, ka va han lawm ve aw... I comment chhiar a ninawm loh kher mai. Ni e, in mi fuihna leh in mi duhsaknate hian min tichakin min tiphur sauh sauh mai a ni. A tlangzarh ni khan han awm thei la chuan nuam i ti ve ngawtin ka ring. Kan hlim asin aw...:) Ka lawm lutuk e.

    @Pu Hv, in hmanhmawh cheng chung roh em a nih kha le..:D Han tel ve la chuan kan inhlêp viau lo tur a nia..haha. Ni e, khami ni khan thiante hlutzia ka hre thar a, a programme hlawhtlinna pawh ka thiante vang chauh a ni. Ni lo sela chuan keimah mai chuan eng function mah ka tlin thei lovang. A ropui khawp mai. Ka lawm lutuk e.

    @Muantea, ka rawn upload vat dawn nia. Ngati tehreng nge mawni, ka upload thei rih lo atin lawm le.. A tang tlat zel a. Ka rawn upload vat ang. Kei pawh ka lawm e.

    ReplyDelete
  17. I hmel pengpung hian i thuziak minti chhiar chak zual..lolz

    ReplyDelete
  18. Pêng pûng reuh che chuan a...haha

    ReplyDelete
  19. pawi khawp mai lo tel ka duh viau va, programme a lo awm sa ve kher bawk nen ka nang hman lovang tih ka hlau deuh a . a lawmawm e ka lei tho va min la hniam zui bawk si.

    ReplyDelete
  20. Pu Rp, ka hrethiam khawp mai che. I programme a khat em bawk a ni. Min lo leisak a, ka lawm khawp a nia.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers