11 May 2012

Ka ke a nâ!

Vawiin chu thil pawimawh tiin ka chhuak a. Tlai lampangah chuan in pakhat aṭanga ka chhuak hi kawngpui ka chhuak dawn chiah tihah step ka rap pial a, rem tak mai hian ka ṭhu hnáwp mai a. Ka ke ka ṭhut fuh chiah lo ni tur a ni, a na ṭhawt a. Ka hawi kual të të a, min hmu an awm lo tih ka hriat hnuah zawimuangin ka tho va, ka bai phei aih aih a. Chhel tum tak maia bai loh hrám ka tum paw'n ka bai tlat mai a nih chu!

In ka thleng a. Ka han châwl hahdam chu, a na ta telh telh mai. A rei telh telh a, a ti tet tet a, kalna tur nei ni âwm fahran hian a turin min tur ta ut ut mai a. Ṭah te lam a chhuak ta lek lek a. Neuva chanchin ka chhiar nasat lai a ni a, Neuva ka ngaihtuah chhuak vawng vawng a. A hmaa ka ngaihsan lêtin ka ngaihsan phah ta hial a. Engtin nge nâ an lo tawrh bik le, ka ti rilru deuh reng a.

Ka bul leh chhehvela awmte zingah nâ ka sawi a, ka na lai ber min zawh chuan a sawina lai tur tak pawh ka hre lo. A bâwr velah a na kual vel vek a ni ber a. A natna lai vel ka han en a, engtin mah a awm bawk si lo! Chuti khawpa nâ ta chu tlêm tal chuan vùn ve âwm tak, ka ti a, ka lungawi lo ru em em a. Ka zût ka zût a; a khawih vel a remchàn zawk nan tiin kekawrbul ka hâ ta ringawt a.


Ka zung tur pâwna chhuak chu ka bai aih aih a. Ka lût leh lam chu ka Mara ṭhianpa chuan, "Ṭhianpa, i tlûkna chu a nâ mi?" tiin pai lampang hian mi zâwt a. Nâ han tih dawt kha ka hreh ve tumhrang si, harsa ti tak chungin, "Na lo ve," tiin ka lo chhâng mai a. Ka chhàn zâwng chuan nâ ti tih hriat tak mai hian ka ṭhen chák châk a. Nâ tawrhah chuan dâwt sawi a har a ni ber mai e. Mi ngaihsak zui lem hlei lo va. Ka van haw reuh tak!

Tichuan le, vanneihthlak takin kan ti dawn nge ni, zan a rei telh telh a, a nat telh telh rualin a rawn vûng ve ta thár mai a. Lung hi a chhe em em a, ka tuai ka tuai ringawt mai a. Ka han en leh rih ṭhin. A sa vel chu a ṭha ṭang mai a, a na lai bawr vel ringawt pawh kg tham a tling hial awm e. A rawn vûng ta mai chu ka lâwm ta hle a. A chhan chu, vûng hian midang hmuhah nâ a nihzia a rawn tichiang tlat. Lehlam takah chuan ka lungawi ta em em a.

A nâ a lan chhuah dan chu a vûng hi a ni mai a, han tuam deuh hlûn lah chu ka ti chiah si lo. A na lai vel chu ka en a, chuti khawpa nâ  chu a chhûng lam ruh leh tî engtin tâk insîksawi kual ang maw, ka ti rilru a. A chhûngah luh theih niin kawngka pakhat awm ta se, luhna kan hai ang a, tih tur khawpin a insîksawi kikawi kual vel ka ring ta hial a. Ka han hmet kual vel nawk nawk a, a na lai tak te kha tilui tih hriat takin ka'n hmet deuh vang vang a. Eng a nih phah lem hlei lo va.

Ka ṭhu vang vang a. Ngalruh tliakte hi engtin nge an awm ṭhin le? Nikhawhrelova an awm tawp ṭhin a nih loh chuan a lo van na duh âwm em em, te ka ti rilru a. Ka ṭhianpa ngalruh tliak kha chu a tliah tirhah nikhawhrelovin a awm ngei mai a, kei hi ngalruh tliak em ni lo mah ila a nat êm tho si avangin ngati nge nikhawhrelova ka awm loh bik, te tiin ka vui lek lek a. Nikhawhrelovin lo awm ta ila, mit ngaihah pawh hliam na tak tuar ka nihzia a lang dawn a, mi'n min khawngaih em em dawn a ni. Tunah hi chuan ka harh kur mai si a, thil dang engkim ka ti thei thei bawk si, midang ngaihah chuan na der ka ang em em mai a. A vûng han hmuhtir tura kekawr hlìm sek lah chu ka tlâwmlâkna kawng tak a ni roh lehnghal a. A hrehawm ka ti kher mai.

Zan a rei telh telh a. A nâ chu hnuai lamah a luangthla dem dem ni mai hian ka hria a. Ramkâng ang maiin a chhehvelah a ṭaidarh thei em ni aw, ka ti hial a. Nâ min hrilhtu ka thluak pawh chu ka ngei ta lek lek a. Na hriat theih loh natna CIPA (Congenital insensitivity to pain with anhidrosis) hi lo vei ta ila, ka ruh lo tliak pawh ni se nâ ka hre dawn miah lo va. Midangin CIPA natna ka vei a ni tih an hre dawn bawk si lo va, ka ruh tliak rum pawh ni se nâ ti lo ang takin ka awm thei dawn a, midang tan chuan ka va han thangṭha mai mai dawn em, ka ti ta vel mai mai a.

Ka ngaihtuah ka ngaihtuah a. A nâ a reh thei chuang si lo va. A nih nih ni tur leh, zingkara a lo dam var beisei tawp chung chuan ka mu ta daih a. A la dam lo ta a nih leh kan la chhunzawm leh dawn nia!
Share:

10 comments:

  1. I ngaihtuahna a kal thui thin mange hairehai. Ngaihnawm lutuk :)

    ReplyDelete
  2. A va zia lo ve le aw. Chu, nula rim pawh a va rem dawn rih lo ve....nge nula inah bai lut ta la, a lo khawngaih viau zawk thei che a.... anih loh vek leh "inkan tir" zawk ta mai la, a tihchi phian maithei bawk. Chutiang te anih chuan 'kena' kha malsamna ah a chang hlauh thei a nia aw......

    ReplyDelete
  3. A va pawi ve aw. Lo dam thuai teh se.

    ReplyDelete
  4. awhaw, ava zialo tak em. mahse a ngaihnawm viau zel mai. lo dam vat ang che aw.

    ReplyDelete
  5. I khawlai leng te hi i hawi he he zel a....:) Lo dam thuai thuai rawh se.

    ReplyDelete
  6. Tsa hian a ke a tihulh avangin min chawi tir zu tum ringawta mawleee... ka ulh tir pawh ni hlei lau...:) Tak takin, i ziak zawm lo em mai... a dam tawh turah ngai phawt ang...:)

    ReplyDelete
  7. @Pu Hv, ka lawm e. Blog update ka duh ve sia, ka update-na tur hre lo lutuk thiltih a nih hi...:)

    @Pu Caribou, i comment chu ka nui nasa lutuk! Hahahaha...Hei ka tha tawh e. Ka lawm e.

    @Lra, a dam tawh e...:)

    @Marvin, ka lawm e. A dam tawh e...:D

    @Sangpuiipa, ni ang chu mawle...haha. Ka dam tawh e....:)

    @Pi Maisek, a ni ngawt mai tiraw?!!! La na zui sela chuan i chawi ngei ngei ang mawle...haha

    ReplyDelete
  8. Thuziah thiam tak hi chu i ni.

    Lo dam tawh rawh se, zinna tur i ngah kha.

    ReplyDelete
  9. Dam tawh chuan a tha a nih chu. Stepa tluk hi a nuihzatthlak lo teh ania, hmanni ah ka thiante in step tawp ber ka rah thelha ka tlu nuaih tawh alawm.

    I tlu i tho leh, mi hmuh hlaua i hawi kual hrek hrek, na ti si chu i van khawngaihthlak reuh :P

    ReplyDelete
  10. @Pu Rp, ka lawm e..:) Hei, ka zin ta teuh mai.

    @Miss Aduh, step-a tluk kher kher hi chu zawngchhangthlak loh khawp mai. Tuman min lo hmu lo hlauh va! :)

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers