20 May 2012

Ka Nau Mary

Mi hlim thei tak a ni
Ka nau hming chu Mary a ni. Kei aiin kum 3-in a naupang a, mahse, kan pumrua erawh a intiat reng a. Naupan lai aṭangin ṭhian dang kâwm lovin kan inkâwm chawt a, kan inngaina hle. Chutih rualin ka bêng a, ka vêl ṭhin. Mahse, tunah chuan ka nau neihchhun a nih tawh avangin kut ka thlâk phal tawh lo va, duh hun huna kan inhmuh theih tawh loh avangin kan inhmuh chhun chhunah chuan kan hlim thei hle.


Kan khaw High School aṭangin pawl sawm a pass chhuak a. Zir zawm chu a duh lutuk. Mahse, keiman zir ve ka duh avangin a chhunzawm ve thei ta lo a ni. Lo lamah rim takin hna a thawk a, ka nu leh pate nen hna an thawk tlâng a, ka nu a damloh chuan a enkawl ṭhin. Inhlawhna awm ang apiangah a inhlawh a, mite hmuha hna zahawm lo leh ngaihsanawm lo pawh ni se a ṭul chuan a thawk mai a ni.

Chutiang ngawt ai chuan tiin Aizawl lamah mi inah a awm leh ta a. Mi ina awm nawm lohzia leh hrehawmzia lo hrechiangtu hian ka khawngaih kher asin. Chuta a hlawh aṭangin puih ka ngaih apiangah min pui ṭhin. Mahse, chhel takin a tuar chung pawhin tawrh zawh loh chin a nei a, a rawn chhuak ta a. Hmun dangah a awm leh dawn a, chuta a kal dawnah pawh hreh tak chungin a kal a, a mittui a tla zawih zawih a nih kha.

Kum khat zên zâwn mi ina inhlawhfaa a awm hnuah kan khaw lamah ka nu hrisel loh avangin a haw leh ta a. Ṭha takin a châwl hahdam ve thei tawh dawn emaw kan ti a, mahse, a hrawkah bâwk a rawn awm tlat mai. Aizawl-ah kan entir a, awrpuar an lo ti a, inentirna lehkhaa leng lo khawp damdawi an lo chawh tlar dul a. Chuta a la ṭhang zel a nih chuan kan zai dawn nia, tiin an thlah a.

Beiseina nen damdawi a ei chungin a ṭhang zel bawk si a. Neihthinglungkhawngin zai turin damdawiinah kan kalpui leh a. Test hrang hrang a neih hnuah krismas dawna lo kalpui leh turin min ti a. Krismas dawnah thingtlang aṭangin zai turin kan hruai leh a, mahse, kumthar lamah kal turin min lo ti leh a, Aizawl Civil Hospital doctor chuan. A zinna senso zawng zawngah kan neih zawng zawng a zo va, beidawng takin a haw leh ta a. A tuar ta tlawk tlawk mai a ni. (Han inpuang ta phawng mai ila. Hemi chungchang hi misual.com-ah ka post tawh)

Chutianga kum khat vel a awm hnuah vanneihthlak takin kan ti dawn em ni ang, mi pakhat hian awmpui turin a rawn sawm a. A awmna turte chu damdawiin pakhata doctor thu ber a nih avangin a thlâwna an zai theih nghal tur thu sawiin a thlêm a. Keini tan chuan thu lawmawm tak a ni. Mi ina awm hreh sateh mah se, nula awrpuar nih chu a duh bik si lo. Hreh tak chungin a kal leh ta a nih kha. Mahse, rin ang a lo ni em em si lo.

A sawmtu sawm ang a lo ni lo va, a awmnate chuan a hrawk zai a ngai tih pawh an lo hre hauh lo mai a. Kan sawi a, a sawmtu thlêmna te pawh a hrilh vek a. Tichuan, krismas dawnah engtin tin emaw an zai thei ta hram a. Hnara hlît phawi ang huai a ni. Mahse, rin angin thil a kal lo leh zel a. Kan damdawiin awmna bill chu a lo sang hle a, a zatve tal chu kan pek a lo ngai a. Kan lawm rualin kan rilru hahna a lo inṭan lek hi a lo ni a.

Krismas pawh kan khuaah a vawi khatna atan a hmang thei ta lo va. An ina awm hlawhin amah an zaina chu a rûl ta char char a. An zaina chu a ser a, ani lah chu duh angin a la ṭawng ring ngam bawk si lo. A hmaa zai ngaina em em, zai reng mai ṭhin kha a zai ṭha thei tawh lo va; a hmaa hlim taka ring taka nui uar uar ṭhin kha nuih a insûm a lo ngai ta a. A hmaa duh duha a lu chêttir ṭhin kha an zaina hmanga phuarin a awm tawh a; khawlai chhuahvah nikhuaah a nghawng ser thupa kawr nghawng nei a hâk a lo ṭul ta a ni.

Mi ina awm a nih a hai lo nachungin phone number hriat loh aṭanga 'Mi ina awm i nih kha, induh suh' tih message a dawng âwl lo va. Amah mai ni lovin a chhûngte pawh kan rilru a na ṭhin. Mi ina awm hi hna nuam leh zahawm a ni hauh lo va, mi hnuaihnung leh rethei berte tih âwm tawk leka ngaih a ni; duh lo mah ila chutiang kan nih a ngai miau si a.

Nula ve lem si mi ina awm reng renga hun hman chu a tan pawh a zahthlak a, a pik a ni. Ngaihzawng te an lo nei ve duh a, tuman mi ina awm eng atan mah an ti lo; hmuhsit zui bak a hlawh ngai lo a ni. Hmangaihtu a tawn vete pawh a hnua natna mai a ni ṭhin. A duh ang anga a awm a rem ve lo va, mahse, mite khawsak dan a va hmu pha ve tho si.

A phone neih vete hi a bawn asin. A thawhchhuah ngeiin mi phone hlui chu cheng 800-in a lei a, chu chu a phone neih hmasak ber a ni. A neih tirhah chuan a lawm em em a, mahse, a peih-reipui lo mai pawh a. Chu a phone-ah chuan, SMS leh contact list engmah a hmuh theih loh va, call erawh a dawng thei a, mi a call thei bawk. Mi'n an rawn biak pawhin an âw aṭangin tunge an nih a hre thei mai zel a, a phone screen (display chhia), engmah dang hmuh theih loh a en aṭang ringawt pawhin SMS leh miss call a dawn leh dawn loh a hre hrang thei. Chutiang khawp chuan a phone a hlut a, a roh a, a bel a ni.

Ka phone hman hlui ka pe leh a, mahse, chu pawh a hlui leh chhâwng a nih avangin rei a daih ta chuang lo. SMS a inthawn theih a, a inbiak theih loh thung! Mi'n an rawn call te hian han pick up ve bawk mah se ṭawng a hriat theih miau loh avangin induh nih a hlawh a, phone pakhat zawk hmanga an inbiak pawhin a hrawk an zaina avanga a ṭawng rin theih loh avangin induh nih a hlawh leh zel a, message thinkhei tak tak a dawn phah ta hial rëng a ni.

Puanṭhui zir a châk em em a, mahse, chu a châkna chu a tipuitling thei lo. A rualpui te, hmana a classmate-te'n BA an zirsan fer fur tawh a, ani erawh chu pawl sawm pass a la ni reng a. Rual a awt ṭhin. A inzaina senso a thawk a, a phone man leh topup man a thawk bawk a, mi ina awm mai mai mah ni se building chhâwng ropui tak tak chhûnga chêng tam tak chuan an tluk lo. Chuvangin ka nau Mary hi ka chhuang a ni.

Engtikah emaw chuan a tân kâwl a êng ve ang a, engtikah emaw chuan a la hahdam mawlh ang. Chutih rualin thil tih châk em em a tih theih hunah chuan a tlai tawh ang a, rual a awt hlen ang tih mawlh ka hlau a ni. Chhel takin a tuar ang a, a la tuar chhuak em em ang. Tunah ring takin nui lo mah se, nakinah chuan a nui ri kan la hre leh ang a, min la tihlim leh dawn a ni. Tunah a zai ri mawi tak mai kha hriat tur awm rih lo mah se, hun a kal ang a, a dam chian hunah zaiin min la awi leh ang. Zalên taka pâwna a chhuah ve theih hun a lo thlen hunah chuan kan duh hun hunah kan inhmu thei tawh ang a, chutih hunah chuan a hrehawm tawrh hma aia nasain kan hlim za tawh ang tih ka ring tlat a ni.

Ka Nau Mary kha Pathian zarah a dam zel ang a, hlim tlâng takin chhûngkuain kan la nuiho leh ang.
Share:

11 comments:

  1. lung te poh achhe thei rum2 dawn lawm le...

    ReplyDelete
  2. Thiana,chhiar a har ka ti,a ngaihnawm bawk si. Hnuk a tiulh tlat

    ReplyDelete
  3. Ka thu chhiar nuam tih loh tak, chhiar loh ka phal si loh a ni; a mi khawih a dang zar mai ka ti.

    Mihringte hi harsatna leh manganna kan tawh lai hian, kan tawk mawlh mawlh thin. Huaisenna leh chhelna a nei ka nau Mary hian, a nun ngai mihlim tak a nihna nei leh ngei turin duhsakna ka hlan a. Pathianin mal a sawm zel ang.

    ReplyDelete
  4. I nau chu a va khawngaihthlak ve le aw. Hrisellohna hian mihring hi kan nih tur ang min nih tir lo fo thin a lo nih dawn hi.

    ReplyDelete
  5. I nau tak tak maw? A khawngaihthlak hle mai, mawhphurhna thui tak i nei a nih chu. A inzaina sensote chu han sawi vek la ti nia...puanthui chu zir rawh se, thiam takin.

    Ka nau hian puanthui zir a nei ve thin a sin, chutah chuan zir rawh se a duh phawt chuan man lovin...kutthemthiam hi a tha khawp mai.

    Taka i thil tur kha ka la ba tak...next time..sure

    ReplyDelete
  6. I nau phone chu in hnaih deuh chu ni ila siam sak ka chak hle mai. Aizawl lama ka thiante ka lo be kual anga, tihdan kan la ngaihtuah dawn nia. I sawi har anih hi mawle, nikum misual charity sem lai te khan lo sawi tawh ni la a free vek in ka lo siam sak mai tur anih nen!

    ReplyDelete
  7. @Rema, a lungchhiatthlak khawp mai tiraw....hehe.

    @Bawiha, min lo chhiarsak a, ka lawm khawp mai.

    @Ajo, ka lawm e.

    @Pu Caribou, a ni khawp mai. Thalai hrisel lo ngat phei chu an khawngaihthlak ka ti thin.

    @Sangpuiipa, i inhuamnaah ka lawm lutuk ringawt. A nachang ka lo hre lo bawk atin ni. Ka lawm lutuk e.

    ReplyDelete
  8. Ka kawmen reng si a, a bo daih zel mai a.
    Hetiang thu hi chhiar nuam ka tih loh, ka chhiar loh phal si loh a ni. Ka nau hi a va han tuarchhel em, malsawmna leh damna a la chang ngei ang.

    ReplyDelete
  9. @lr, a lang ta e! I duhsaknaah ka lawm khawp mai.

    @Pu Hv, hmanni-ah a thil tawn pakhat min hrilh a, ka lainat lutukin ka ziak ta alawm le... Rilru a na duh thin khawp mai.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Powered by Blogger.

Ka luh ṭhinna

Followers