27 September 2012

Women's Polytechnic-ah darkar 5

September ni 26, 2012 khan Women's Polytechnic chuan Week Closing function chu Durtlang-a an hmunpuiah an hmang a, hetah hian an SU hruaitute duhsaknain kan college SU General Secretary, thianpa Chhuantea nen kan han kal ve a. Mit a va han tlai tehlul em!

Hmeichhia hlirrrr mai hi a tlim hian an lo hlim hmur mai a, hawina lam apiangah a tlèt hian an tle sét hlawm a, anmahni an hlim si a, boruak an siam thiam bawk nen, a hlimawmin mahni piancham emaw tih mai awl khawp a ni a. A tir lamah intithupui fûn leh inla-hmuamup takin kan han awm ve tak naa, a tawp lama lâm tur an tih hunah zet kha chuan a lâm nasa-sa-ah kan han tang leh ta zawk a. Chutiang khawp chuan boruak an siam thiam a, a tul hunah an hlim a, an au va, kut an bêng a, chhimtute kan hlim loh an hlau em em mai kha an fakawm thlawt a. Zai tur te, hlado chham leh thil dang dangah te request a lut a, chu'ngah te pawh chuan tumah hreh hmel pu hauh lovin, phur takin an ti nghal zel thei mai kha tluk loh rim an va nam tehlul em!


Tin, thil pawimawh tak pakhat chu, an sports item-a tel pakhat — advertisement hi a ni. Sponsorship an zawng a, chuta sponsor-tu chu item angin advertisement an inneihsiak a, tihdan tha tak niin ka hria. College danga an ti ngai pawha ka hriat loh — Computer Games te, Kabaddi te, Bamboo Race te leh thil dang tam tak chu ni 10 vel lek chhungin an zo thei a. Chu mai bakah an function neihah programme khaihlak emaw, awm tinuam lo rawih thei khawpa sound system buai emaw a awm lo reng reng a. Item nei turte chu back stage-ah an lo inpeih at a, announcer-in a koh veleh stage-ah an lo chhuak nghal mai a. Hun an hmang zai thiam em em a ni.

Hemi kawngah hian an entawntlak khawpin ka hria. Sawrkar function emaw, mimal leh pawl emaw paw'n function kan la buatsaih zel dawn a, arrangement kan thiam loh avangin rei lo te chhunga zawh mai tur chu hun rei tak kan hmang leh mai thin. Programme chuangtlai ang chi hi chu hnawl ngam a tha khawpin ka hria a. Polytechnic-a ka awm chhung hian thil tam tak ka hmu chhuak a ni.

Tichuan,function zawh tlai lamah zanriah an buatsaih chu kan kilho va. An function neihnaa thutthleng leh dawhkan rem fel te, hmun phiah fai te chu tirh ngai hauh lovin an junior-te'n an han ti sang sang a, an SU hruaitute'n an tihpui bawk a; hmuh an nuam thlawt a ni. Chaw ei khamah, dance party an ti a, hla an play a, hall-ah an lâm mup mup mai a. An zirtirtute leh an SU hruaitute hovin an lâm a, an va hlimin an va hmuhnawm tak em! Rui lo hai lova hlim taka an lâm han hmuh meuh chuan a din hle hle theih tlat loh. Lâm lo awm an phal lo va, lâm loh tum pawh an lâmtir vek a ni. An zirtirtute leh an SU hruaitute chu a lâm nasa hlei hleiah an tang! An entawntlak ka ti thlawt.

An mi sâwm te min duatin min ngaihsak em em a, kan mamawh te min zawt a, min tihsak a, kan mamawh loh thlenga sawi mai a châkawm em em mai a ni. An hawihhawm a, an nungchang a mawi hle bawk. Aizawl pâwna an lo awm avangin zirna in lama an nungchang mawi leh khawlaia an nungchang kan hmu pha ve ngai lo va, mahse, lang lo liamah an lo 'zo' mup mup mai zawk a lo ni a. A tawp ni-ah pawh hian Mizo incheinain an inthuam a, hmuh an nuam kher mai.

Hetianga kan Mizo nula hmeltha rualte an han awm thei hi an fakawm ka ti thlawt a, ka au chhuahpui lo thei lo. Anmahni-ah zo zia a lang a, Mizo Mizo-na tam tak an chhawm nung zel a ni tih chu an nun dan mai bakah function-a Mizo lâm chi hrang hrang an entir atang pawh hian a chiang em em a ni.

Women's Polytechnic — Zindabad!
Share:

14 comments:

  1. Bawnra ve a, che spy mai mai ang chu aw hehehh

    ReplyDelete
  2. Women's Polytechnic ah hian Lecturer in awm ta la, a nuam i ti mai mai ang chu aw..... ni khat lek mah mah heti ti....

    ReplyDelete
  3. Pu Hv, ka che bon asin aw...:-D
    Pu Caribou, a dik chiah! Awmngaihna ka hriat pawh ka ring love a!

    ReplyDelete
  4. Dinner leh lam mawlh khi :) Nula tlep tuar kara mipa lo awm nih chu a hrehawm dawn loh tawp chu !
    TI daih ila hetiang program te felfai tur hi chuan inbuatsaih a ngai nasa thin khawp nia, an fakawm hle mai.

    ReplyDelete
  5. @Beethugs, a dik khawp mai. Chuvang chuan alawm Polytechnic ho ka fak em em ni!
    @Fakmawia, ka lerh tawh bawk leu!

    ReplyDelete
  6. i lo han tal hiar lo chu a tha e..haha.

    a nuam ngawt tak ang chu...an entawntlak hle mai, i sawi ang hian.

    ReplyDelete
  7. Pu Rp, tal hiar ngam chi a ni awzawng lo! Kan hlim tlang em ema a ni mai. ;-)

    ReplyDelete
  8. A nuam awm vei.....

    ReplyDelete
  9. I LERH :pp

    Ngaihnawm phian (Y)

    ReplyDelete
  10. nuam awm viau ang :)

    ReplyDelete
  11. @Ahooma & Anon, nuam tehreng mai...hehehe

    ReplyDelete
  12. " Zo Mup mup " khi a mawi em em a, mahse a tawp a Zindabad khian a ti zo lo tep

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers