15 December 2012

ZOFEST 2012 hmangin Tripura-ah

MZP huaihawt ZOFEST 2012 chu Tripura-a Darchawi khuaah neih zawh a ni ta a. Ni 11 leh ni 12-ah hman niin a nuamin a khamawm loh hle. ZOFEST hmang tur hian December ni 10 zing dar 7 velah Aizawl kan chhuahsan a, kalkawngah te kan tluan vak loh avangin zan dar 9 velah Darchawi chu kan thleng ta hram a.

ZOFEST CHU
A tukah ZOFEST neihna hmun tur hnungah sikul naupang exam an awm avang leh cuurent a awm loh avangin chawhnu atangin programme tan a ni a, a tir phat atangin a nuam em em a. Zaithiam hrang hrang te, thuziakmi mi langsar tak takte an awm bawk a. Zanah programme hlimawm tak hman a ni bawk a, zan dar 11-ah tìn mah ila a khamawm loh hle.

A tawp ni-ah pawh naupang exam an awm avang bawkin chawhnuah programme hi chawhnuah neih niin hemi ni ve thungah chuan seminar neih a ni a, Lalmuanpuia Punte, L. Keivom leh C. Chhuanvawra-te'n paper present-in thu pawimawh tak tak ngaihthlak a ni a. Zanah pawh hun hlimawm tak hman a ni leh a, Mizo chi peng hrang hrangte chu 'Insuihkhawm leh zai i rel ang u' ti-a inkaihkuaha lâmin ZOFEST kan hmang zo ta a ni.


ZOFEST-a ka kal hian hlawkna tam tak ka chhar phah a. A bikin programme ka awmna bika thusawi pahnih, L. Keivom leh Lalmuanpuia Punte te thusawi chu a hlawkthlak hle. (L. Keivom thusawi ka la rawn post ang - thla ka lakpui a, ka intithei hle!) Zohnahthlak chi peng hrang hrangte chuan anmahni tawng theuhvin ZOFEST lawmna thu an sawi a, anmahni lam theuh an entir bawk a, mit leh beng a tlai ngei mai. Chu'ng chipeng hrang hrangte tawng chu a zawng a zain hre vek kher lo mah ila, hriatthiam a mual mual chu a awm ve zel a, hei hian kan inunauzia leh chhulkhat kual kan nihzia a tilang chiang hle.

Chu'ng lam zingah chuan Ranglong lam hian ka ngaihtuahna a tithui khawp mai. An rimawi hman leh an lam dan leh incheina thlengin an awmna chheh vel hnam dangin a nghawng nasa hle tih a hriat a, ngaihtuahna a kal thui vawng vawng. Chutih laiin Paite lam pakhat, 'Buhtuh Lam' erawh a hmuhnawmin Mizo lo neih dan a tarlang chiang khawp mai. Buh an tuh lai te, an thlo lai te, an seng lai te, an vuak lai te, an deng lai te, la an kai lai te leh an puantah lai thlengin lam pakhatah an khung leng vek a; ka en ning thei thlawt lo! He lam hi Burma lam atanga lo chhuak niin an sawi.

Zaithiam hrang hrang an zai a — Lalpanliani, H. Vanlalhlana, Lawmi Khiangte, Vanlalruata leh Vuantea leh midang tam takin zaiin min awi reng a, Suna leh Tuarpuii te che vel chuan lawm a hlawh hle. He'ng zaithiamte hian hla hmangin inpumkhatna thu an hril a, chipeng pakhat aiawha thusawitu pakhat phei chuan Mizo tawngin, "Zai chauhvin i inpumkhat lovang u," tiin thiam leh thiam lovin a sawi hial a ni.

He ZOFEST kan hman atang hian Zofate'n inpumkhat kan duh tlànzia a lang chiang hle a, a tua te mai pawhin inpumkhat an duhzia an sawi theuh va. Inkaihkuaha unau, tawng hrang hmang si te han zaia han lamho dial dial chu a nuam a, a nawm rualin ngaihtuahna a kal thui duh kher asin! He ZOFEST hian Zofate inpumkhatnaah rahtha a chhuah a beiseiawm takzet.

DARCHAWI KHUA LEH DARLONG HI
Darchawi khua hi in 300 vel an ni a, mihring 2000 vel awmin Darlong an ni deuh vek a. Mizo tawng hmang thei lo an awm mang lo. Tin, hnam dang hmuh tur an tam lo khawp mai. Kohhran pali — Baptist, Presbyterian, UPC (NE) leh EFCI an awm a, Baptist hi an tam ber a, Presbyterian hi Mizoram Synod hnuaiah an awm. Zirna lamah Higher Secondary thleng a awm a; Shillong-ah te, Agartala-ah te college kal an tam hle a. An khua atangin Officer tam tak an chhuak tawh a ni.

Darchawi khua hi Unakoti district-a awm a ni a, Kanhmun atangin km 50 vela hla a ni a, Zampui atangin km 20 vel a ni awm e. A khaw bul lawk km 3 velah hian Kumarghat Railway Station a awm a, hei hi Silchar atanga intan a ni a, darkar 3 tlanin Agartala a thlen theih a. A awmna hmun hi a phai em em a, zanah phei chuan chhum a zìn nasat em avangin motor-a tlan a harsat phah thei hial a.

Lakhuihthei hi an chîng nasa a, thelret hi eizawn nan an hmang bawk. Chhungkaw tinin kuhva kung an nei fir fer a, an intodelh hle. Thil man a sang a, he'ng laia hmawmsawm cheng 1-a kan lei theih hi cheng 2-in kan lei. Thil uih lampang — Dangpuithu, nghathu etc. an ei nasa a; artui hi induhsak nana hmangin chaw ei apiang deuhthawin artui chhum kan min hmehtir deuh ziah a ni. Sa-ah chuan vawksa hi an ei nasa ber a, sangha pawh an ei nasa hle.

An thil chìna mak ve deuh mai chu, in chhunga an luh dawna chapal leh pheikhawk an phelh zel hi a ni. Chhuat hi fai em emin an dah a, an inlengte leh anmahni ngei ngei paw'n an pheikhawk leh chapal chu pawnah an dah mai thin.

Zuk leh hmuam, ruihtheihthilah an fakawm khawp mai. Naupang pakhat chu meizial a zûk ngai leh ngai loh kan zawt a, a zûk loh thuin min chhang a, a chhan kan han zawh leh chuan a kumin a la tlin loh thuin min chhang mai a ni. Tin, zu dawr pawh hnai të-ah a awm a. Mahse, an khawlaiah zu rui hmel hmuh tur a vâng khawp mai.

Power supply a tha hran lo khawp! Current awm that loh phei chuan an tui buaipuitu operator chuan tui a herh haw tha duh vak lo lehnghal a ni awm a. Tui a harsa khawp mai. Chuvang chu ni maw, chaw ei dawn hian no lian pakhatah kut silna tur dawhkanah an chhawp tawp mai a ni. Tin, chaw ei apiangin novah tui kan indaihin min chhawpsak ziah bawk.

An khawlai a tawp vak lo. Tuihawk luankawr tha tak an nei a, kawngpui sir tawn tawnah cement-in an siam thlap a, kawngpuiah tuihawkin hmun a chan a beiseiawm loh! An khawsak hi a changkang reuh khawp mai a, TV pawh in tin deuhthawah an hûng fir fer a, DTH an hmang mai a ni.

Nupui pasal neih lamah hian hnam dang an nei vak lo. An chhehvela Tuikuk awmte nen hian an inneih pawlh a, ngaihzawngah pawh Tuikuk nula ngaizawng an tam khawp mai. Amaherawhchu, he'ng nupui atana Tuikuk an neihte hi Kristian vek an ni thung. Hnam dang hual vel kara an awm chunga khutianga a hlanga an awm thei hi an fakawm khawp mai. Entawntlak tak an ni.

Darchawi khua hi Darlong khawpui tiin an inchhal a, Darlong tamna ber khua a ni. Mak tak maiin Darlong-ah khuan Pachuau te, Chhangte te, Hnamte leh chi dang dang an awm tlat! Chuvangin, Darlong hi Lusei ang chi deuh a nih hmel. Darlong hnam hrim hrim hi mi 9000 velah an inchhal a, Darlong khua hi Tripura-ah khaw 22 a awm a, Tripura hmar lamah an chêng ber. Tripura-ah khuan Pu BK Hrangkhawl MLA an nei ngat mai.

Darchawi khuaa an awm hma hian Langkaih lui piah lama Saidara khuaah an awm thin a, chutah chuan kristian an lo nih hnuah tihduhdah niin an lal chuan kristian-te chu an awm ve a phal lo va. Langkaih piah daiha awm tura hnawtchhuakin hmun hrang hrangah an awm darh a, kum 1919 khan tuna an awmna, Darchawi khuaah an awmkhawm tan a. Kum 1923-ah kristian hmasa ber Ngulkhuma chuan Pastor Zatuaha kutah baptisma a chang a, tun thlenga nung takin an la kal chho ta zel a ni.
Share:
Location: Aizawl, Mizoram, India Aizawl, Mizoram, India

7 comments:

  1. This comment has been removed by the author.

    ReplyDelete
  2. Darlong thianhlui,kum tam tak ka hmuh tawh kohte awmna hmun Darchawi hi chu vawikhat tal kal ve ka chak a nia.

    ReplyDelete
  3. Tripura tlangmi (Mizo hnahthlak ni kherlo pawh) te hi a tamzawk chu Kristian anni hial tawh ang. Mizo ten kan care thiam chuan zawi2 in mizo hnama awmluh duhna anla nei maithei a ni, amaherawhchu mizorama mizo ten kan thiam a pawimawh ve ang.

    ReplyDelete
  4. @Xingibera, a nuam khawp mai. An zinga awm a nuam, ka kham lo hle. I hman remchanah la zin mawlh rawh khai.

    @Pu duhawma, a dik khawp mai. Anmahni hrim hrim khu an inthlahpung chak lo lutuk a, vai an tam ropui sia, an hma lam hun hi keimahniah a innghat ve khawpin ka hria.

    ReplyDelete
  5. A nawm dawn khi le. Thlalak lampang te pawh lo tarlang la, hmuh ve a chakawm alawm le.

    Khitianga festival an nei dawn anih rau rau chuan sikul naupang exam loh laia huaihawt ve mai awm............te ka lo ti ve mai mai.

    ReplyDelete
  6. Pu Caribou, camera hi ka keng lo va, midang camera-ah vek thla kan la a, ka lak hunah ka lo la post dawn nia. A hun hi kumina tih hman ngei an duh si a, sikul exam zawh meuhvah chuan a tlai tawh dawn si a, hun remchang thei ang bera ngaihah an buatsaih ta a ni awm e....:)

    ReplyDelete
  7. Zinvah ngaina mi tan chuan chhiar a nuam leh hle mai. Kar leh lamah khian Arunachal Pradesh lamah zin ka tum ve tak asin. Tripura-ah hian ka la zin hauh lova, hun remchang neih ve ka duh ngawt mai. Darchawi-a Presbyterian Pastor chu tunge aw ni ang? Kan Pro. Pastor lo ni tawh thin Rev. Laltharzuala kha la ni tak maw??

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers