16 June 2012

Ka Pa thilpek Ka Pa


A chang chuan min tilungngaitu a ni a,
A chang chuan min tilungawitu a ni.
A chang chuan min tithinrimtu a ni a,
A chang chuan min tihlim ṭhintu a ni.
Min tilungngaiin lungchhiain ṭap mah ila,
Min tihlungawi tumna aw nêm ka dawng fo.
Min tithinrimin lunghnurin tau mah ila,
Min tihhlim a tumna thil tih ka tawng fo.
Ka ṭahin ka mita mittui hru lo mah se,
Ka mitin a inchhir hmel ka hmu ṭhin.
Ka lungngaihin duatin min pawm lo mah se,
Ka mit hian a tlâwm lai hmel a hmu ṭhin.
Mite chuan anchhia an lawh a — an pa te,
Kei chuan hmangaih thu ka hrilh fo — ka pa chu.

09 June 2012

Ṭhiante thu min hnutchhiah chu

Mihring hian hma lam hun kan va hre lo tehlul em! Kan ṭhian, kan chhûng, kan ṭhenawm khawveng leh kan hmelhriatte chuan mak deuh deuhvin, rin loh deuh deuhvin min boralsan leh ṭhin a. Chu'ng hunah chuan, 'A van mak em!' tih bak tih theih kan nei si lo. Chu'ng thihna lo thleng thut thuta chu kan chungah a lo thleng ve thut thei a lo ni reng si a. Khawvelah hian nuamchen hman kan ni lo ve.

Manuna hi naupan lai, kohhran lama tuihnâng tak tak laia ka kawm ṭhin a ni. Chutih lai chuan kan ṭhianho hi sawm dawn kan ni a, krismas-ah te in khatah kan riak tlâng ṭhin. Chu'ng kan ṭhiante chu, a ṭhen chuan nupui an nei tawh a, a ṭhen chu zirna lamah sang tak an ni tawh a, a ṭhen chuan Pathian thu an zir a, a ṭhen chu a chanchin pawh ka hre chhunzawm tawh lo. Manuna nen hian kan inrual deuh reng a, pumruaah chuan kei aiin a lian zawk awm e. Kan inkawm ngeih viau ṭhin a, mahse, awmna hmun a inan loh na na na chuan a inkawm reng theih tawh lo va. Hman angin kan inkawm ngai tawh lo.


Mahse, chu ka ṭhianpa chuan nikum, March ni 27 2011 khan min boralsan ta. Vanduaithlak takin swimming pool-ah a tlahlum a ni. An kal lam motor chhûnga a thlalak te ka hmu a, chutah chuan a hma lawka thil thleng tur hre miah lovin hlim takin an awm a. Mahse, a hnu lawkah khatiang thil kha a lo thleng ta a ni. Kan hma lam hun hi kan hre lo, tih chu kan sawi thei a, engtik ni-ah emaw chuan a taka tawngtu kan la ni ngei dawn a ni.

Ka ṭhianpa Rosangliana hi naupan laia ka kawm ṭhin tho a ni. Kan khuaah chuan cycle nei hmasa pawl a ni a, a cycle kan khalhsak luai luai ṭhin. Ṭum khat pawh a cycle ka khalh a, kawng thlangah ka tlàn liam tawh nghe nghe. Ramah te kan kalho ṭhin. Vanneih asiamin kan khuaah electric department lamah hna a thawk a. Kan khawtlang mipui tan chuan mi ṭangkai, êng kan hmuhna hnar a ni. Ani nen pawh kum inrual kan ni; mahse, a vanduai a, a kal hma ta a nih kha.

Electric man avangin nikum hmasa, 2010 June ni 28 khan a boral ta a. Electric hrui vel buaipuia a bana a lâwn chu, information lo dawn fuh tawk loh avangin current an lo on thut a, ka pawh chhawn lovin a boral a ni. Chutih lai chuan a phone no. te pawh ka kawl ve reng a, a mak khawp mai; kan inbe tam lutuk lo naa kan inbe ve zeuh zeuh a. Aizawl-a a rawn chhuk chang hian ka in luahah te mi rawn tlawh a, a rawn riak fo tawh a ni. A hma lawka hlim taka kan biak, nasa taka kan fiamte kha lungngaihna min thlentu an lo ni ta si a.

Jeru-a hi kan khuaah pawh kan veng a inhnaih a, kan inkawm nasa mai. Carrom board an nei a, ṭhianhovin kan pen nasa ṭhin khawp mai. Keini chu thingtlang naupang tih takah a ruala inkawm ṭhin kan ni a, mi sawm vel hi kan inzui dàl dâl reng ṭhin. Chu'ng zingah chuan kan ṭhianpa Jeru-a hi a tel ve a ni. Lehkha a thiam thei em em a, a chhungte, a ṭhiante mai bakah khawtlang chhuanvawr a ni. Kan khaw High School aṭanga pawl sawm first division-a pass hmasa ber dawt a ni. Aizawl-ah mi inah awmin science subject a la nghe nghe.

Mahse, chu ka ṭhianpa chuan 2007 November ni 11 khan min boralsan ve ta. Insawiselna em em pawh a nei chuang lo, a hma tlaiah khan insawiselna a neih ve deuh avangin damdawiinah an kalpui a, zanah a zual thut a. Rei pawh rial lovin a boral zui ta a ni. Aizawl-ah a nih avangin kan hriat veleh a awmnaah kan kal a, Aizawl-a awm ve tho ṭhiante pahnih dang nen kan zuihaw a. Kan khaw lamah YMA member-te'n an lo hmuah rualin ṭhian dangte an lo awm bawk a. Kan ṭap nasa mai. Mitthi inah engtik lai mahin ka ṭap ngai lo, ka u leh naute thih pawhin ka ṭap miah lo; mahse, ṭhian chu ṭhian nge nge a lo ni.

Tichuan, kan ṭhianho chuan kan nghilh lohzia entir nan inkhel ngai hlei lo khan a hriatrengna Jeru-a Memorial Club (JMC) kan indin a, tournament-ah te kan tel ṭhin. A thih cham a lo thlen hian a thei thei chu a chhûngte inah kan kal a, kan ral a, inkhawmna te kan nei ṭhin a ni. Jeru-a hi a pa thihsan tawh a ni a, a pa hi Jeru-a naupan laiin HPC (D) te'n an kaphlum a ni.

Tun thla tir të-ah khan Aizawl-a ka awm tirha ka awmna pa chu a boral bawk. Hetiang hi mihring nunna chu a ni. Ka ṭhian ka tarlante bakah min duhsak ngawih ngawihtu te, ka mi hriatchian em em te chu an liam zel a, chutih laia kei tehlul nunna zuah a la ni ve zel hi a mak a ni. Chu makah chuan Pathian hian thil phûmrûk a nei. Chuvangin engtik lai pawha inring renga kan awm te, khawvel thila inhambuai lova a lam kan hnaih a hun tawhzia te hriattir ka ni — mak phênah chuan!

Chhungte ṭhiante sûn ṭheuh tawh kan ni ang, chutih lai kara he thu ziak theia ka awm te, he thu chhiar theia i awm te hi mak ti liam mai mai lo la, ngaihtuah chiang rawh. Pathian hian i nunna zuah chhan a nei a ni. Chu chu i hriat chhuah a ngai. Khawvel thila i tlàn mai mai chuan mak taka tihboral thutin i awm ang a, i chatuan hun a inṭan ang. Kei, ka ṭhian sawi tâkte zingah pawh a fel lo ber mai hi zuahin ka la awm a, chhan a va nei dawn rua em! Ka ṭhian kal tate khan he thu min lo hnutchhiah a lo ni reng mai.

Tun hi Pathian chance mi pêk a ni e.