03 March 2013

Hneh theih loh nun neitu Zodinpuii a fam ta!

Govt. Hrangbana College-a 2nd Semester zirlai, Zodinpuii chuan a natna khirh tak mai, cancer chu hun rei taka a beih lêt hnuin March ni 1, 2013 khan a kalpui ta. A thih hian kum 18 mi chauh a ni. Zodinpuii chanchin hi ka han hre chiang a, a nundan, a huaisenna leh a tumruhnain mi hneh em em a, ka nêpzia leh engmah ka nih lohzia a lang chiang kher mai.

Amah hi Durtlang mel 5-a awm a ni a, a pa'n a boralsan tawh a. Kum 2009 khan HSLC chu 1st Division-ah a pass a, Govt. Mizo Higher Secondary School-ah class 11 leh 12 chu chhunzawmin Science a la a. HSSLC a exam hma lawk atangin he a natna hian a tibuai tan tawh a. Chu a natna avang chuan an sikul lamah pawh an zirtirtute'n an hrethiam a, sikul kal mang lovin in lamah inenkawl chungin theihtawp chhuahin a bei tang tang a.

Chemotherapy khai chungin a exam lui hram hram a, chuti chung chuan class pawh kal ve mang lovin HSSLC (Science) chu 2nd Division-ah a pass thei hial a. Natna khirh tak tawk chunga HSSLC 2nd Division-a a pass thei chu, a chanchin hria apiang mak tih a hlawh a, tualchhung lam TV Channel pawhin lo hriain chutiang mi huaisen leh mi tumruh chanchin chu Zoram pum hriata tarchhuah an duh a. Interview an tum pawhin, "Ka ti tha lo em mai, a zahthlak," tia mahni inngaitlawm takin a lo hnial ta zawk a ni.

HSSLC a exam lai hian a natna nen nasa takin an inbei a. Exam leh chemo khai hun a inrual chang chuan a exam hmasa phawt a, chumi hnuah chemo chu a khai mai thin. Chuti khawp chuan a bei nasa a. Chemo pawh cycle 16 zet a khai a, vawi 30 teh meuh mai a inhem hman bawk. Chuti chung chuan 2nd Division-ah Science subject a la pass thei a ni! Mi pangngai tan chuan mak tih loh rual a ni lo.

Tichuan, nikum kum 2012 khan BA (Arts) chhunzawm turin Govt. Hrangbana College-ah a inziak lut ta a. Science atanga Arts-a a inlehna chhan hi cancer natna tuar chunga science practical neih a harsat vang a ni. Chutianga bei tang tangin 1st Semester chu a exam thei hram a. Paper hnih exam tur a la nei tihah a natna a zual tak zel avangin a chhunzawm thei ta lo va, Cancer Hospital, Zemabawk-ah October ni 30, 2012 khan a lut a. February ni 22, 2013 atangin a natna chuan zual lam panin March ni 1-ah chatuan ram min lo pansan ta a ni.

Amah hi mi hlim thei tak a ni a. A damloh lai pawhin a nu hnenah, "Ka nu, min ngaihtuah suh u. Ka kalna turah in lo kal ve lo vang tih ka hlau zawk a ni..." tiin a nu a thlamuan thin. Thisen var a mamawh an ngaihtuahsak lai pawhin, "Kal mai ka duh tawh, ka thla a muang a ni," a ti hial a. Nun awhawm tak, mi tam takin an neih phak loh a nei a, a thla a muang em em a ni.

Hetianga cancer nena inbuan reng chunga HSSLC Science 2nd Division-a pass thei khawpa mi tumruh leh tuarchhel, zirna ngai pawimawh em em mai, a zir chhunzawm duh avanga a natna vanga a duh pawh zir chhunzawm thei lova Science atanga Arts-a a inlet hial mai te hi a chhuanawmin a ropui a, a entawntlak ngawih ngawih a ni. Natna khirhkhan tak nen a zirna tawp lam chu a hmangral a, huaisen tak a beih hnuah natna reng reng awm tawh lohna hmunah min lo kalsan ta a ni.
Share:
Location: Aizawl, Mizoram, India Aizawl, Mizoram, India

15 comments:

  1. A va khawngaihthlak reuh mai mai ve aw...RIP

    ReplyDelete
  2. Pathian rorelnaah kan tel ve silo a.Thlamuang taka akal thei chu a ropui hle mai.Khawngaihthlak hle bawk

    ReplyDelete
    Replies
    1. Dik chiah. Thlamuang taka a kal hi a lawmpuiawm em em zawk a ni.

      Delete
  3. A ropui reuh hle mai. Zirna lama a tumruhna leh huaisenna mai bakah thlarau nun lamah pawh a hausakna khian min hneh khawp mai. RIP

    ReplyDelete
    Replies
    1. A chanchin hian min hneh khawp mai, kei pawh.

      Delete
  4. This comment has been removed by the author.

    ReplyDelete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers