26 June 2013

Govt. Aizawl College-ah kum 4

Kum 2009 khan Govt. Aizawl College-ah college zirlai ni turin ka inziaklut ve a. Chutih lai chuan Ramhlun North thlanmual mawngah in luahin ka khawsa a. HSSLC ka pass veleh he college thlen hmaa college 5 kal kânin he college hi ka panding chat a ni. Zing tin college bus-ah ka chuang thin a, haw lamah thiante nen kein kan haw leh thin. College t-shirt hak tur an tih ni-ah chuan ka ha zat zat a, hak nuam ka ti em em a, t-shirt hak ni hi a tlem ka ti a, khawlaia a langsar thei ang bera college t-shirt hi nuam ka ti thin - 1st year atangin. Chutih lai chuan inhlawhfa chawpin in ka luah a, thenawm khawvengte'n ka dinhmun hrethiamin min khawngaih a, inhlawhna min siamsakin class kal hma zing karah te, tlai class banah te, class kal loh ni-ah te ka inhlawh thin a, kum 2005 atanga Aizawl-a in ka luah tan atangin ka chhungte hian vawi khat mah pawisa min la thawn ngai lo, tun thleng hian. College-ah cheng 5 ka pai thin a, cheng 2-in thingpui leh cheng 3-in chhang hmangin chhunah ka inhnawhpuar thin. Principal felna avang liau liauvin admission fee pawh a zatve ka bâ a, scho' lak hunah an cut mai a ni. Chutiang chu ka dinhmun a nih vang a nia college t-shirt hak ni hi tam deuh se ka tih ni!


Thu leh hla lama ka tui avangin Literature Club-ah ka inziak lut a, hruaitute mi fel leh taima tak tak vek an lo ni a, duh leh tuina thuhmun na na na chu kan inkawm ngeih chho zel a, tun hnu thlengin kan la inzui diah diah a. Nuam ka ti chho ta mah mah nge ni, college-ah te ka lehkhabu hmasa ber ka'n tlangzarh nghal pang mai a! Chutih lai chuan 1st year zirlai ve mai ka la ni a, zaktheilo tak chu ka ni! Principal Dr. LN Tluangi awm lai a ni a, 'TS Chawngkhup' ti-a ka hming lam sual nawk nawkin lehkhabu min tlangzarhsak ta a nih kha. Kha kha ka tan chuan a hluin a ropui a ni. Ka tawngtheih hmel a ni chék ang a, debate nikhuaah hian SU hruaitute hian min chelek viau mai a, GAC ka hlawhtlin leh hlawhchham a inzat thuak awm e. Ka zaktheilo ve hrim hrim a, 1st year kan luh kuma magazine chhuakah pawh ka article a tel hman hram pek a!


1st year result chhuah hma chuan college kalna hnai zawk tiin Mission Veng-ah ka insawn a. Mahse, 1st year kha nuam ka ti leh lutuk a ni ang chu, 1st year ka fail ta phawt! Subject ba a la awm loh avangin kum khat tawp ka hloh tih ka hria a, ka pawi tih a zual em em a. Ka la fail ngai loh avangin hrehawm ka ti em em a, hrehawm tak a ni tawp mai! Thiante zawng zawngin min kalsan a, tunah phei chuan MA zirlai an ni fer fur tawh a. Chuta tang chuan kum khat uiawmzia hi ka hre chiang em em a; chutih laia ka thian kawmngeih em em thenkhat, University lama min liamsan tate nena kan inbiak leh chang hian ka mittui a la hnai fo thin. 1st year ka fail avangin ka GAC kum hnihnaah chuan class ka kal ta lo va, mahse, Principal leh SU hruaitute duhsaknain college-ah free admission tiin aiawhin debate velah ka tel ta fo va. Principal phei chuan, "I duh leh class-ah i thu ang a..." min ti hial zawk nghe nghe a. Chutiang khawp chuan ka kum hnihna, ka class kal loh kumah pawh GAC hi nuam ka ti fal a, class kal lo chungin EU-ah te member ka ni vel nia maw le! Chumi kumah chuan ka tuina em em, thuziak lamah te, magazine lamah te duh thalin ka inhman theih phah ta zawk a. Tun hnu thlengin chu ka experience chu ka la chhawr a, ka fail kha thill lawmawm takah a chang thei ta a.


Ka exam tha leh a, result iaiawm loh em em mai ka nei chho va. 1st year kha lo pass tawk tawk ila chuan ka exam that leha ka result neih ang ka nei dawn lo a ni tih ka hria a, Pathian rorelna hi kan tana tha zawk turin chân loh khànah a lo chhuak zel a ni tih ka hre chiang bawk a, a kum khatnaa ka fail pawh chu ka lawm ta em em zawk a ni. Mite'n kum thum college an kal chuan an rilru-ah University a lang tawh thin a, 'I chhunzawm dawn em?' an inti an inti tawh mai a ni. Kei erawhin 2nd year ka bei ve dawn ek ek chauh va,; mahse, a hma kuma class ka kal loh avangin hmelhriat ka nei lo va, ka thiante an 3rd year tawh nen. Thian nei mang lovin ka awm ta a, class kal pawh nuam ka ti lo hial a. 1st year ka nih kuma class thulh ka nei miah lo ang kha ka ni ta lo. Class ka kal aiin ka kal loh a tam zawk a, ka inkiltawih telh telh mai. SU-ah ka thianpa nen magazine-ah kan han chuh ve a, Asst. Editor-ah ka awm a, kan han tla chiang em em mai lehnghal a! Ka kum thumna chu lap nai ve tak chu a ni. Chumi kumah pawh chuan ka phu loh result ka nei leh ta a, 1st year ka fail kha ka lawm ta telh telh mai.



Kum linaah nuam ka ti ve leh tan ta. SU election a han ni dawn a, a hma kuma kan lo tum sil ve tawhna laiah thiante'n min duhsakin, 'I chuh ve dawn em? Chuh leh rawh aw...' min han tih fiam min han tih fiam takah chuan 'kan mualphopui ta sa sa' tia mualphopui nawn leh inhuamin Magazine Editor chu ka chuh leh ta rawih a. A hma kumah class ka lo kal mumal lo chu, mi'n min han hre lo em em mai a; chuta chhapah ka khingpui chu a hma kuma SU hruaitu tha tak, hmingtha em em mai a lo ni bawk si a; a tawhkhirh kher mai! Kan han inthlang ta a, 2nd year leh 3rd year-ah vote tam takin ka hneh lo ve ve a, 1st Sem. (Semester a intan chiah)-ah ka hneh a, a pumpuiah vote tlemtein ka hneh ta hram a. Hemi vang hian a nia 1st Sem. lo lut thar zelte ka duhsak tak em em ni! Ka tuina em em ka han chang tur chu ka phur ta em em a, tun hmaa magazine atana ka duhthusam te chu ka tipuiltling thei dawn ta!



Students' Union lama ka inhman tak avangin class ka awm hman mang lo va. Kan class (Mizo hons) mi tlemte atangin SU hruaitu pathum ngawt kan awm avangin kan Mizo zirtirtute chuan duhsak takin, 'In tling kher kher hi chu a pawi ngawt mai' min ti fo thin. A chhan chu keimahni class-ah kan awm ngai si lo va, midang class kal an awm mang loh phei chuan class thulh tawp a ni mai a, zirtirtute class la turin an lo kal thlawn fo va, a zahthlak ngawt mai. A chang chuan kan class room kawtah min lo nghak a, kan inkoh khawm fe hnuah class kan la thei hram a; a chang chuan min nghak thlawn fo thin. Chumi avangin min hau ngai lo va, duhsak takin min fuih zawk thin. An lo va han dawhthei tehlul em!



Ka vanneih hun a inhawng chho zel a. Students' Union lama ka thawhpuite hi mi fel tak tak hlir an lo ni hlauh va, Vice President leh General Secretary tha leh chak tak kan nei a, Vice President hmalaknain thla tin SU sum hmanna college chanchinbu-ah kan chhuah ziah a, chuvangin sum leh paiah harsatna leh mualphona kan tawk ngai lo. Tluang leh tha takin activity tam tak kan nei a, MZU Sports-ah phei chuan kan champion hial a. Ka thawhpuite thahnemngaihna leh thawhrimna vang liau liau a ni; a hmingthatna keini'n kan lo têl ve zel si a. Kei pawh hnathawk tura ding ka nih angin theih ang tawk chuan ka thawk a, magazine department ka chan avangin kum laklawhah keimahni department pual bik programme pakhatmah kan nei lo va, taksa chau mah se rilru a hahdam a, a la zia khawp.



Kum a han thar leh a, a kum ang zawng chuan ka kum 5-na tur a ni hial mai! Mahse, GAC hi a nuam em a, ka la kham thlawt lo. Ka senior telh telh a, nuam ka ti telh telh! High School te chu kum 5 bei nawn ila, ka zak ngawt ang. College erawh a kum ang zawng chhut chuan kum 5 ka kal tling a, mahse, ka zak miah lo. Ka zahtheihloh hrim hrim piah lamah, a nuam em a, ka zak phal lo a ni ber. Zah ahnekin thiante bulah intihtheihpui nan ka la hmang zawk zaw mah maw le! BA final kan han exam ta a, ka subject tuina ber (Mizo) la ka ni bawk a, nuam ka ti a, ka exam pawh ti tha pangngai khawpin ka inhre nghe nghe a. Nuam ka ti tluan dawn em tih erawh chung lam thu thu a ni. Exam kan zo ta chiah a, ka hna magazine buatsaih chu a lo ngai tak tak ta.



Inah computer ka neih loh avangin SU Office-ah ka khawih mai thin a, ka riahchilh thin. Ka riahchilh ka tih hian ka tlaivarpui ka tihna tluk a ni. Ka induhthawh tak tak chang phei chuan ka tlaivar bakah nilenga chaw takngial pawh ka ei loh chang a tam mai. Mizoram-a college tha ber Annual Magazine tur a nih avangin a hautak a, fimkhur a ngai a, mawhphurhna a sang em em a ni. Mawhphurhna sàn ang chuan theihtawp ka chhuah a, ka hahpui thlawt a. A neuh neuh a tam a, a tlangzarh ni hma thlengin ka buaipui a ni. Tlangzarh ni thlengin zawh tih tak tak ni a awm thei lo a ni ber. Tichuan, June ni 24, 2013 tlai lamah Guwahati-a kan chhutna atangin Aizawl a rawn thleng chiah a, a tuk June ni 25-ah Vanapa Hall-ah ka thianpa, kan college magazine editor hlui, Mapuia Renthlei chuan zana a tlaivarpui hnuah, thiam taka thlirlawkna hun neiin Principal Dr. Sangkima chuan a tlangzarh ta a ni.



Thla eng emaw zat hah taka ka lo sual ve fat fat hlawhtlinna hmel ka hmu ta chu ka hlim em em mai a. Ka kuah reng a, ka kalna apiangah ka ak a, zanah ka mutpui thin a. Ka buatsaih lai chuan SU Office-a khawih theih loh chin te a lo awm a, mi ina khawih chi a awm chang chuan zanah kan khawih a, zan lai dar 2 vela Aizawl khawlaia mahnia kea haw hnak hnak chang ka nei fo va. A hlawhtlinna ka hmu pawh hi lawm lo rual ka ni lo. 'Ka tlaivarpui zat chu ka mutpui tur a ni' ka ti hial reng a ni. Ka thian ka thawhpuite'n min lawmpui thiam em em a, kan zirtirtute hlei hleiin min lawmpui thiam a, an theihna zawn zawnah min pui nasa bawk a, ka lawm a, ka thla a muang a, ka hlim a ni. Ka hlim takzet. Ka suangtuahna a taka a chang ta atin ni.



Ka duhthusam ang ngei chuan magazine-ah thil thar tam tak kan dah ta a, thu leh hla lamah pawh college zirlai ni kher tan lo pawha rotling thuziak a tam em em a, tu tan pawha dahthat tlak ni hialin ka hria a. Ka roh em em a, ka zirlaipuite hnenah pawh, 'In chhiar peih lo a nih pawhin in thingrem mawngah tal chuan min lo dahthatsak dawn nia' tiin ka chah lawm lawm hial a ni. Mahse, a tu pawh mai hi an lawm thiam em em a, anmahni avanga chanchinbu chhuak thei zawk si-a kha min fak letling zawk a; hei tak hi GAC nawmna a lo ni. 1st year-ah khan fail lo ila college-ah SU hruaitu ka ni awm si lo va, magazine editor ka ni hman awm si lo va tih te ka ngaihtuah a, fail avanga lawmna ka chang chho ta zel mai.



College-a luh chuan thalai kalkhawm kan ni bawk a, nula leh tlangval chhe lo tak tak leh duhawm tak tak an tam em em a, an phe suau suau a, an insulpel zut zut a ni ber! 1st year nih laiin thiante nen st*r kan inneihhmuh a; 1st year-a ka st*r chu Siampuii a nia! Zaithiam Josephine-i ang ka ti thei em em a, kan class a inang a, a thu mai mai te hi ka en ngawih ngawih thin. Aw, a va mawi em! A engkim hi a inhmeh vek a; Pathian-in mihring mit a siam zawng zawngah Siampuii mit hi siam fuh a intih ber ka ring thin a, a hmaia thil awm zawng zawng hian a mal tê têin min lêm neuh neuh ni berin ka hria. A taksa pum chu zawlaidi a ni mai a, chu chuan mi zem chiai chiai a, class kal a nuam em em thin. Mahse, ngaihzawng ni lovin st*r a ni a, thiante nen infiam nan kan hmang chho ta mai mai a. Kei phei chuan '1st year-ah ka st*r phawt ang a, 2nd year-ah ka kawm ngeih ang a, 3rd yr-ah ka bêm ang' ka ti fiam thin a. 1st year-ah kan fail ve ve ta mai pawh a. Chuta tang chuan college a kal chhunzawm tawh lo va, khawlaiah kan inhmu zeuh zeuh va, mobile number te inbiain kan inbe zeuh zeuh a. Tunah erawh zawng, kan inbe pawp ta lo. Thiante nena inhmuh changin kan sawi chhuak thin a, chu chu a zunzam a ni ta ber mai. Haulawng khaw nula duhawm, Mizoram-a nula duhawm ber mai Siampuii kha engtin awm ta zel maw?!



St*r ka nei chho zel a! 2nd year & 3rd year ka nih thlengin st*r hrang hrang ka nei zut zut a, st*r sên an ni lo hial mai. College-a ka st*r hmasa ber ka ziak tawh a, a bak hi chu chhunzawm thui ta lo mai ila. Chutia st*r lama ka rilru ka lo pek bing em avang chuan ngaihzawng lampang ka lo ngaihthah hleuh mai a, ngaihthah han tihah thukhuhna mai a ni a, mi chuti zozai zingah midang aia ka duhawmn bikna hmu thiam an awm lo tihna a ni mahna le. Ka han kal zel a. SU hruaitu ka han ni chho ta a, chu nihna chuan nulate mithmuhah min tiduhawm ta sawt sawt a! A hma zawnga college-a ngaihzawng nei ngai miah lo khan a theih lai lai tiin ka'n nei chho zur zut a. Keimah kha keimah ang lo tak ka ni! Chumi avanga min hawtu leh min haw phal lotu an inzat thuakin ka ring. Tunah chuan college ka chhuak tawh dawn a, SU hruaitu ka ni tawh lo va, an bo leh tan ta! Mahse, GAC nawmna ka pawh tawh a, ka khua a har lo.



GAC hi a nuam kan ti kan ti a, a nawmna tak kan sawi hmaih fo thin. Senior leh junior inthliarna hi a awm lo, pakhat tê mah a awm lo. Hei hi a nawmna pui ber chu a ni. Zirtirtute hian an tinuam em em bawk. Zirlaite leh zirtirtute hi kan inkawm ngeih em em a, an fate rual thiana min kawm bawrh bawrh chuan college kala inhmuh vat vat hi a châkawm tawh thin. Tin, incheina a sáng lo va, thingtlangmi tam tak an awm a, an tan college kal hrehawm a ni lo. Tun hma phei chuan 'thingtlang college' tih a ni hial thin. Tun thleng pawhin zirlai tam zawk chu thingtlang atanga kal kan nih ka ring. Tin, academic & sports-ah kan tha a, activity dang dangah pawh kan tha a, cell hrang hrangah activity kan nei tha em em bawk. Semester system-a a kal hnu phei chuan Principal hi a khawng tha a, discipline a kengkawh tha bawk a, semester result chhuak tawhah chuan result nei tha ber kan la ni zat zat a, MZU Sports-ah a zawnin champion kan ni mek a, MSU Cup-ah champion lai kan ni bawk.



Kum tin vawi hnih tal chu midangte tan a huhovin college-ah thisen kan pe thin a, nikum 2012 phei kha chuan zirna in anga thisen pe tam ber kan ni nghe nghe. Tin, cell hrang hrang - YAC, NCC, EU, SSU, Literature Club leh a dangte a active em em a, kum tin member pawh thahnem tak an nei ziah a ni. College huang chhunga talent nei tha tak takte tan inphochhuahna hun remchang a tam a, chawimawi tlak chawimawi kan chîng bawk. Students' Union-in function kan buatsaih reng rengin college pawn lam mi kan sawm ngai lo va, zaithiam kan sawmte pawh college chhuak hlir sawm an ni thin. College zirlai a tam thei ang berte tan zaina siamsak thin a ni a, zai lo pawh lam leh item dang dangah talent phochhuahsak thin a ni.



Mizoram-a college awm hmasa pawl a nih avangin khawi hmunah pawh kal ila, GAC chhuak an lo awm thei deuh zel a, kan mamawhna zawnah tak an lo lang nawlh nawlh mai thin. GAC to GAC a nih chuan buaina a awm lo va, engkim hi a dik vel vek a ni ber mai. Hei hian GAC mi nih a tinuam a, zin veivah thlengin zuk tinuam thei hiala maw le! Aw, theihna han ngah deuh ila, talent tam tak chhuan tham nei bawk ila, GAC tana pen chhuaka GAC han tihhmingthat tak tak hi ka va châk tehlul em! Mahse, kan mihuai kal ta te, kal hmasate kalna college-a kal ka nih avang ringawt pawhin ka inchhuah a ni.



SU hruaitute thawhhona a tha em em kum tin a, hei hian college hmel a timawi hle. Sports nikhuaa intihbuainaah GAC hi a tel ngai lo. Hei hi SU hruaitute leh zirtirtute min kaihhruai hneh em vang a ni. GAC hian ama pual liau liauvin slogan tam tak a nei a, chu'ng slogan te chu sports nikhuaah kan chham rual dual dual thin. Hei hi sports-a kan thahrui pakhat a ni. Kan SU hruaitute leh kan zirtirtute'n slogan ang lova au an phal lo hrim hrim a, 'pawnah pawnah' tih ringawt te pawh phal a ni lo hrim hrim. Chuvang chu a ni ang, Best Discipline-ah pawh thlan kan ni fo tawh a ni. Khawi hmunah pawh programme nei ila, infiamna hmunah pawh kal ila, GAC chuan kan awmna hnu tihfai lohvin kan kalsan ngai lo. GAC hnu chu a dak thlarh zel mai a ni. Ziah tawh angin, senior leh junior inthliarna awm lo hian zirlai zawng zawng min tipumkhat a, chu chuan Govt. Aizawl College chu Mizoram-a college nuam ber leh tha berah a siam ta a ni.



College hi nuam ka ti em em a, mahse, nuam ka ti satliah mai mai a lo ni. June ni 25, 2013-a Freshers' Social cum Magazine Release & Farewell kan han hmang zet chu, GAC-ah ka in-baptist ta chiah a ni. Govt. Aizawl College hi a nuam telh telh a, keini erawh kan chhuak ta. Govt. Aizawl College hian kei lo pawh tihmingthatu tur a ngah em a, kei mi tlaktlai lo hi awm lo mah ila, he college hi Mizoram-a college tha ber a ni reng tawh ang.

Hei hi ka ram ngaih chu a ni

Share:
Location: Aizawl, Mizoram, India Aizawl, Mizoram, India

0 Comment:

Post a Comment

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Powered by Blogger.

Ka luh ṭhinna

Followers