15 November 2013

Ngaihthaa kan awm hi kan mâwl vang nge kan huai vang?


Tuikuk chungchang kan khel zing ta malh malh viau mai. Mahse, Mizo mipui nawlpui chuan kan la ngaihven tawk lo niin a lang. Tun atanga kum 5-ah Tuikuk MLA nei thei dinhmunah kan ding ve ta! Mizoram MLA seat 2 chu Chakma-in min chhuhsak tawh a, seat 2 hi Tuikuk-in min chhuhsak leh chuan Mizote'n seat 36 chauh kan inchuh tawh dawn tihna a ni. Hei hi hlauh nachang hria ila, vei nachang hria ila, i pen chhuak ngawt mai teh ang u.

Mizoram-a rawn let duh lo, Mizoram-a vote nei, Tuna Tripura Transit Camp-a khawsa mek hi vote nei ringawt pawh mi 11331 ngawt an ni tawh! Hei hian tuna Mizoram-a cheng mek Tuikuk te a la huam tel lo zui! An vai phei chuan Mizoram-a Tuikuk mi vote nei hrim hrim hi mi 20000 chuang fe an nih a rinawm. An inthlahpung chak si a, an han inthlahpung tak tak mah ang a, tun atanga kum 5-ah chuan rapthlak tham an ni tawh ang! Engtin nge kan tih tak ang?

Kuminah ngei pawh bial thenkhatah Tuikuk MLA candidate kan nei leh ta a. Tripura transit camp-a Tuikuk vote nei zawng zawng khuan an duhthusam ang ngeia vote an thlak thei a nih vaih chuan kan hma lam huna thil lo thleng tur leh thleng lo tur chu sawi lawk theih a ni ta lo. Kum 2008 MLA Election-ah khan Hachhek Constituency-ahPu Lalrinmawia Ralte khan vote 4933 a hmu a, a tling a. Tunah hian Tripura Transit Camp-a awm, Hachhek Constituency bika vote nei ringawt pawh mi 5114 lai an ni ta! Pu Lalrinmawia Ralte tlinna aia tam voters an awm mek a, inthlan lehah Tuikuk candidate awm se an tling han han thei tawh tihna a nih chu! Mizo aiin an la inthlahpung chak zui! Hei mai bakah Tunah he biala lo cheng sa tawh thahnem tak an awm bawk! Zan mut titui lo tham a ni tawh!

Kum 2008 MLA Election-ah vek Mamit Constituency-ah Pu John Rotluangliana chu vote 4421 hmuin a tling a. Hetah hian Tuikuk pa pakhat chu independent-a dingin vote 2211 a hmu a, MNF candidate vote hmuh zat nen a intluk thuak! Tuna Tripura Transit Camp-a awm, Mamit Constituency bika vote nei hi mi 2942 lai an ni tawh! Hengho hian he constituency-a Tuikuk lo awm sa tawhte nena tangrualin engvangin nge Tuikuk pa chu an thlan tlin theih tawh loh bik lem ang le!

Chumai a ni lo, Tripura Transit Camp-ah khuan Dampa, Tuirial, Kolasib, Serlui, Lunglei South, Thorang leh West Tuipui-a Tuikuk vote nei mutmawh hnarmawha neih tham an awm tawh! Constituency pakhata an vote neih zat ringawt pawh Mizo in 200 khua voters neih zat aia tam a ni tawh! Chakma chu heti a ni tawh a, bial hnih kan hloh tawh. Tihngaihna kan hre tawh mang lo. Tuikuk an han che tak tak ang a, sebo hnua se kawngkhar tum ang chauh kan ni tawh ang.

Tuikuk leh Chakma te hi a hnam angin kan hua a ni lo; Mizo an ni lo va, an ram ni lo Mizoram-ah dinhmun sang tak rawn neih an tum hi kan duh lo a ni mai. Facebook hmanga ram vei te, pen hmanga ram vei te, tawngkam hmanga ram vei te inthurual taka kan chet a hun ta e. Chu chu India tan a ni lo, Mizoram tan, kan ram leh hnam tan a ni. Zoram nuam tak hi keimahni'n chên hman lo mah ila, kan tu leh fate tan tal aw... Kan pute pawhin kan awmna turin ram heti tiat hi min lo hauhsak ve alawm le...
Share:

4 comments:

  1. Tuikuk ho hi mizo te aiin an fing hmasa zawkin ka hria. Hmanlaia "Reng ram" akn tih te pawh kha tuikuk ho hi an ni lo maw? MIzoram chhungah mitlemte an inbengbel a, an khawsak a harsa a, kan hmu hniam mai mai a, an fing tlat. Population a san chuan politician in an ngaihthah ngai lo tih an hria, an inthlah pung thur thur mai dawn a ni.

    ReplyDelete
    Replies
    1. A dik khawp mai. Mahse, tuikukho hi kan haw tlur tur ni pawhin a lang lo. Bangladesh atangin Tripura-ah an lut a, Tripura atangin Bengali hovin Mizote min nêk turin an rawn nêk chhuak a, Bengali ho hi kan huat tura te an ni a, a huat tur leh kah tur dik zawk chu tuikukho hi kan hriattir a ngai. Tunah chuan an awmna tur, an ram diktak Tripura-a lungmuang taka an awm theih nan Mizote hian hma laksak ta zawk ila, awmzia a nei chak viau maithei.

      Delete
  2. "Reng" ho hi tuikuk kan tihte hi a ni e... Mizo pawh nilo hian mizoramah thuneih an tum hi kei chuan ka hua a ni. Mizo chi-peng chu ni se pawi pawh ka ti lo. Kawng leh lamag chuan India khualehtui an nih chuan khawi hmunah pawh MLA candidate chu a nei thei a, mahse a ram mipuiten kan duh loh chuan an nei thei bik lovang.

    ReplyDelete
    Replies
    1. A ni ngawt mai. Mizote hi min haw tur an ni miah lo va, huat tur diktak zawk kan hriattir a ngai a ni ber mai.

      Delete

Eng nge i ngaihdân?

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers