23 August 2017

Indian țheuh țheuh!

Assam tuilian avanga thi chu mi 151 zet an tling ta a, mihring 50,000 chuang zet chu relief camp-ah an awm mek a ni. Assam Chief Minister Sarbananda Sonowal leh a kaihhruai Minister/MLA-te chuan theihtawpin kawng hrang hrangin chhanchhuah hna leh țanpuina an thawk mek zel bawk. Chief Minister hian India ram Prime Minister Narendra Modi chu thil awmzia hrilhin, Prime Minister hian Assam tuilian an ngaih pawimawh thu leh central ațanga puihna awm thei ang anga a puih tur thu a lo hrilh tawh nghe nghe a; tuilian tuara thite hi an chhungte hnenah Rs. 5,00,000 țheuh pek an ni dawn ni awm tak a ni.


Hei mai a la ni lo, Bollywood lemchangtu lar, John Abraham pawhin thawhțanni khan Assam tuilian tuarte țanpuina atan event an buatsaih tur thu a lo sawi tawh bawk. Hei hi Assam Chief Minister Sonowal leh Finance Minister Himanta Biswa Sarma te hmalakna a ni a, John Abraham hian Assam state sawrkar nena an huaihawt tur thu a sawi nghe nghe. Hei hi Assam-a BJP an sawrkar tak vang a ni lo va, sakhaw dangtu an nih vang te a ni lem lo. Khuarel chhiatna an tawng ve a ni mai; nimahsela, anni chuan an tihtur chat chat an ti a, an koh tur chat chat an ko va, rapthlak hle mah se, chhiat tawh rau rauvah lukhawng a awm hle.

Assam state-a mihring cheng zat hi kumin hian mi 3,44,92,000 vel lai an nia chhût a ni a, district 25 zetah mihring nuai 32 chuang zet chuan tuilian hi an tuar a, tun hnai kum 30 chhunga Assam state-a tuilian an tawrh nasat ber nia ngaih a ni. Internet lamah te țanpuina (donation) an khawn nasa a, chuta țang chuan ei leh in tur bakah thawmhnaw leh medical camp te an buatsaih a ni. Bihar leh Uttar Pradesh tuilian lam chu han sawi tel rih lo mai ila.

Chutih laiin kum dang zawng aiin Mizoram pawhin tuilian kan tuar nasa a, Sairangah phei chuan, "Hetiang reng renga tuilian nasa hi kan la tuar lo," ti te pawh an awm nawk a nih kha. A dik ngei pawhin a rinawm. Mizoram chu tlangram a nih angin Assam te anga tuilian tuar nasa chi kan ni vak lo va, leimin erawh kan tuar nasa a nih hi. Chuti chung chuan kumina Mizoram hmun hrang hranga tuilian avang khan mi 12 zetin nunna an chân a, chênna in 877 zet chhiain mi 3500 vel nunphung a tibuai tihna a ni.

Mizoram chu kan vannei a, tlawmngai pawl kan nei țha em em a, tlawmngai pawl leh mi inphal te, pawl hrang hrangte kaltlangin țanpuina a lut ruih ruih reng a, Chief Minister-ah Relief Fund an chhung lut bawk a. Sawrkar pawhin a theihna kawng kawngah theihtawp tak meuh meuh a chhuah a, bialtu MLA-te pawhin an MLA fund ațangin țanpuina an theih ang tawkin an buaipui a ni. Chutih rualin sawrkar ai mahin mipui lam hi an thawk hlawk zawk ta emaw tih mai tur a ni. Kan rama kan tawn zen zen loh, tuilian avanga chhiatna rapthlak tak thleng avangin kan Chief Minister zahawm tak Pu Lal Thanhawla hian India ram Prime Minister Narendra Modi hi a be tawh em? Thil thlen dan kimchang a hrilh tawh em? Țanpuina awm thei ang ang a dil tawh em? Kei chuan a thâwm riva ka hre miah lo.


Mi țhenkhat chu an inti-Indian em em a, mahse, chhiat kan han tawh chiah hian an hnampui Indian ho hian an rawn ngaihsak tak tak em? An Indian sawrkarin a rawn buaipui em? An Indian țanpuina an dil ngam em? Mizote leh Mizote bawk hi a ni inpeizawna ințanpui tawn țhin zawk chu ni. Mizote'n chhiatna rapthlak tak tak kan tawh — kum 2013-a Laipuitlang leimin (CM berin a zinsan daih) te, bus chesual rapthlak tak tak leh quarry chim avanga thihna thleng țhin te, in kâng leh thil ei sual avanga thih leh chhiat tawh hrang hrangah te hian țanpuina kan hmuh tam zawk chu mipuite thawhkhawm a ni tih phat rual a ni lo. Hetiang nikhuaah hian Indian ho khuan min hmu unau em em chu ni sela, keini chêt aia nasa sain an rawn che tur, nge a ko eihtu tur sawrkar a chêt duh loh vang zawk ni ang?

Kei chuan, Indian hluah kher lovin Mizo em em ila a tawk ka la ti reng mai; Indian leh Mizo chu sawi hran luih ka la duh reng. Thil hrang hrang avang te, kawng hrang hrang avangtein ngaihngam leh huai taka 'kei chu Indian ka ni' han tih pàng pâng hi ka la tîmin ka la inthlahrung tlat nia! Inthlahrung zel pawhin ka inring.
Share:

0 Comment:

Post a Comment

Eng nge i ngaihdân?



Total Pageviews

Followers

Google+ Followers

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna