15 September 2017

Khawvel ngaihsan martarte

Ram tana nunna hlãna martar Capt. Thangrehlova
Mizo National Front (MNF)-in ‘Martarte Ni’ tia an lo vuah September ni 20 chu kan lo thleng leh ta reng mai. MNF chuan kum 1980 atangin kum tin an lo hmang tawh thin a, tu emaw thihchampha emaw, pianchampha emaw ni lovin, ram leh hnam tana nunna hlante hriatrengna ni a ni ber awm e. India ramah Mahatma Gandhi thih champha, January ni 20 hi ‘Martarte Ni’ atana hman thin a ni a; Orissa-ah chuan British ho lak atanga zalenna sualtu, duat leh duhsak taka ‘Punjab Kesari’ (Lion of Punjab) an tih hial Lala Lajpat Rai (1865–1928) thih champha November ni 17 hi ‘Martarte Ni’ atan an hmang thin bawk.

Mizoramah chuan a state pum angin September ni 20 hi ‘Martarte Ni’-ah hmang lo mah ila, MNF chuan ram leh hnam zalenna atana nunna hlân tate hriat reng nan, Mizote’n mitthi puala thla kan neih chhun ‘Mimkut thla’ (September) thla ni 20 chu ‘Martarte Ni’ atan a hmang a, MNF ramhnuai sawrkar (underground government) khan kum 1980 atangin a hmang tan a, MNF ni pawimawh bik paruk zinga pakhat a ni. Mizote hian hei lo hi Mizo zawng zawng huapzo ‘Martarte Ni’ dang kan nei reng reng lo. Ram leh hnam tana nunna hlantu zawng zawngte pualin Luangmual-ah ‘Martar Thlan’ siam a ni a, hei hi a ram pum ang pawha Mizo hnam martarte tana kan tih theih sáng ber a ni rih niin a lang.

Martar kan tih hi chi hnihin a then theih a, sakhuana lama martar leh ram inrelbawlna thil avanga martarte hi an ni. Rin dan leh ngaihdan, pawm dan inan loh avangin sakhuana lamah martar an awm thin a; dinhmun tha zawk emaw, dinhmun ngai luah tur emawa beihna avangin politics lamah martar an awm thin bawk. A eng martar pawh ni se, midangte tana leh ram tana nun hlântu an nih avangin an ropuina hi chuti maia sawia fiah zo chi a ni lo vang. Isua’n a thisenin sual lak ata mihringte min chhandam tawh a; Indian freedom fighter ropui Subhash Chandra Bose chuan, “Thisen min pe la, zalenna ka pe ang che,” tiin British laka zalenna sual turin Indian ho a lo sawm khawm chiam tawh bawk. Zalenna sualtute thisen man hi a va to em!

Athanasios Diakos (1788 –1821) hi Greek War of Independence-a an pasaltha hmingthang a ni. Kum 1821 kum tir atanga Grik hovin Turkey (Ottoman Empire) atanga zalenna an sual khan Diakos hi sipai rual hotu a ni. Hemi kum April thlaah khan Turkish sipaiho mi 10,000 zet chuan Greece chhim lama Grik sipai zalenna sualtute an bei a, Grik sipai mi tlemte-te chuan Alamana luikamah huaisen takin tan an lo khawh a, darkar eng emaw zat chu inbeihna rapthlak tak a thleng nghe nghe. A tawpah an sipai hotu Diakos chu hliam tuar chungin an man a, Turkish commander chuan an sipaia a tel chuan officer-a a dah tur thu te, Turkish nula hmeltha tak chu nupui atana a neihtir tur thu tein a thlem a, mahse, Diakos chuan a lo hnar fithla thak a, “Grik miin ka piang a, Grik miin ka thi leh ang,” tiin a lo chhang a ni. He a thusawi hian khawvel hriat a hlawm a, amah pawh khawvelin a ngaihsan phah hle.

Zoramin zalenna a sual laia zalenna sualtute thuvawn pawimawh tak pakhat chu, 'Felna avanga ram a that dawn chuan nang hmasa la, thihna avanga ram a that dawn chuan kei ka hmasa ang' tih a ni a, hei hi a takin an nunpui chiang hle. October ni 31, 1968 khan Mizoram khawthlang lam Lunghret-ah Mizo sipaite zan mu lai chu vai sipaihovin an bei a. Tlangval kum 20 mi Cpl. Lalnunmawia chu vai sipai hovin, “Inpe la, engtin mah kan tina lo vang che. I haw ang a, nunphung pangngai takin i nung thei ang,” tiin an thlêm a, mahse, Cpl. Lalnunmawia chuan, “Tuiah emaw, khawmualah emaw, boruakah pawh rinawm taka awm tura thutiam tawh kan ni a, nangni vaiho hmaah ka inpe lo vang,” tiin a lo chhang a, damna kawng duhthlan tur a awm reng chungin thihna kawng a zawh ta zawk a ni. Ani hi entirna pakhat mai a ni a, ani ang hi Zoram zalenna sual lai khan mi tam tak an awm.

Martarte hi an chên loh leh dai loh tur khawvel dintute an ni a; mahni nawmsakna zawnga theihna kan hman mek laiin kan khawvel hman a nawm lehzual zawk nan an nunna an hlãn a, an khawvel kalsanin midangte khawvel din tumin an hmanhlel a; khawvelah chuan a bak awm tawh lo, thil zawng zawng tawpna ‘thihna’ chu an hmuh loh tur an tu leh fate tân liau liau an thlang zawk thin. Khawvela an chanvo neih theih ve chhun chu ‘thihna’ a ni. Martarte hi thih ngawt lo deuh duhthlan tur tha zawk leh duhawm zawk pek an ni cháwk a, mahse, chung duhthlan tur duhawm leh tawktarh tuihnai paltlangin an khawvel an hlãn ta thin a ni. Hei vang ni maw, khawvel hian martarte hi a ngaisang a, a chawimawi thin. British Press mite’na ‘khawvela misual ber’ ti hiala an lo sawi thin, misual leh tawrawt hmingthang Aleister Crowley meuh pawh khan, “Martarte hi history siamtu diktak an ni,” a lo ti hial a; misual berte thleng pawhina an ngaihsan chu martarte hi an ni tlat a ni. Hei vang hian, khawvel awm chhûng chuan ram leh hnam tâna nunna hlãntute hming hi hmuhsitin a awm ngai lo vang.

Khawvel hian martarte a zah a, a ngaisang thin. Khawvela poet ropui ber ber — Lord Byron, John Dryden, Alexander Pope, Thomas Moore, Oscar Wilde, RW Emerson, WB Yeats, John Milton, George Herbert, Emily Dickinson, Victor Hugo leh mi langsar tak takte hi martarte chungchang phuah uar hlei hlei an ni a, thawnthu-ah pawh martarte chanchin tarlanna hi thawnthu ngaihnawm a ni thin. Khawvela lehkhabu chhut hnem ber Holy Bible-ah meuh pawh martarte chanchin a chuang a nih kha. Lemchan lamah lah ni se, martarte chanchin behchhana siam te chu khawvelin hmuhnawm a tih ber ber te a ni bawk. Kum 1857-a First War of Indian Independence-a phusa tak, hemi kum April ni 8-a kum 29 mi lek nia an khaihlum tak Mangal Pandey chanchin behchhana kum 2005-a an film siam, ‘Mangal Pandey: The Rising’ kha khami kuma India rama film sum hlawh chhuak tam ber palina a ni pha hial.

MNF-in kum 2016-a ‘Zoram Chhantu Martarte’ lehkhabu a tihchhuahah khan kum 1966-1986 chhunga Zoram chhan nana nun hlãntu mi 1700 vel hming tar chhuah a ni a; hriat chhuah theih tâk loh pawh mi thahnem tak an awmin a rinawm bawk. He Mizo Independence War a chhuah hma kum 100 hma lam, kum zabi 19-naa Mizoram-a sapho an lo luh dawna lo bei lêta nunna chânte pawh hnam martar an ni vek bawk. Chung martar zawng zawngte nunna hmangin kan vawiin khawvel hi lei a ni a; thisen tam taka lei kan ram neih chhun vawnhim leh venhim, chhanhim leh chhanchhuah hi thangtharte tih tur a ni lo thei ta lo.

Vawiina mite hian kan hnam martarte kha, ram tana an hlan a ropui ang hûin chawimawi thiam lo mah ila, thangtharte khawvela finna leh thiamna a sáng zel ang a, chhuan lo awm leh zel turte’n an khawvel dintute nasa taka chawimawi an duh hun a la thleng ngei dawn a; chu hun thleng pawhin, chu hun a ral hun thleng pawhin hnam martarte kha an thi ngai dawn reng reng lo a ni. Hnam martar pakhat Capt. Chhawnthuama hla ‘I hming a dai lo vang’ tih thunawn hmangin a tawp i khar dawn teh ang. Ni e, Mizo hnam martarte kan zah che u a, kan chhuang che u a, Mizo a awm chhung chuan in hming hi a dai ngai dawn reng reng lo a ni.

Aw i hming a dai lo vang,
Thang leh thar chuan tam ral mah se,
Zoram chhana i tuarna hian a man tawk e
Chham ang i zalna piallei hmun leh,
Zan mu chhîng lo doral karah
Kan tuanna mual tuai ang tharin
Nghilh ni i awm dawn lo.
Share:

0 Comment:

Post a Comment

Eng nge i ngaihdân?



Total Pageviews

Followers

Google+ Followers

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna