Zalenna Zawngtu Zalna Zoram Preview by H. Laldinmawia

When you go home
Tell them of us an say
For your Tomorrow
We gave our today

He thawnthu hi sipai thi ta chanchin ziakna a ni a, amah chu Mizo hnam sipai a ni. Thawnthu dang ang lo takin he thawnthu bua a changtu pa ber hi hmelma silaimu pakhat tuarin a thi. Chu sipai thi ta chu zalenna zawngtu Capt. Chhuanawma a ni a, a zalen ta. Thawnthu dang ang lo tak bawkin silai hmanga amah kaptu vai sipai ngei mai chuan ngawi renga a lukhum phawkin, engmah hre lova let reng hnam sipai ruang chu zahna chibai a buk thung.

He lehkhabu-ah hian zalenna zawngtu MNF sipaite chet lakna leh râl an beih dan hrang hrang chu, thawnthu ngaihnawm tak hmanga phochhuah a ni a. Zalenna an zawnna lamah hmelma tam tak an that a, anmahni zingah pawh nunna chân an awm nual. He thawnthua a changtupa ber pawh thah a ni. Mahse, zalenna zawngtu leh he thawnthu ziaktu ngei pawhin a thuchah laimu ni ta bera lang chu, hmelma kut tuarin thi mah se an tlawm lova, an tlawm lo mai a ni lova, an hmelma te ngei pawhin an zah a, an dah hniam lova, chibai an buk zawk a nih tih hi a ni.

Mizo history-a thil thleng pawimawh leh hriat reng ni tawh tur chu kum 1966-a MNF ten hnam zalenna puanga India an do kha a ni. Kha zalenna sual dan chanchin kil khat kha he lehkhabu-ah hian hmangaihna thawnthu hmanga puanchhuah a ni. Mizo thawnthu (fiction) tam tak chu a phenah history-a thil thleng a in zep zauh thin a, he lehkhabu-ah thung hi chuan history-a thil thleng tam tak phenah a thawnthu hi a inzep ve zawk a ni ber mai. Zalenna sual (independent movement) lai vela thil thleng tam tak kha, a ni leh thla bahlah miah lova tarlan a ni a; mihring hming leh hmun te chu phuahchawp leh chherchawp awm mang lova phochhuah a ni.

Khatih hun laia Mizo thalai tam ber ten lehkha an zirna hmun, Shillong lama lehkha zira awm tawh thin, Khatla veng tlangval pakhat Chhuanawma chanchin chu he lehkhabu in a tarlan ber chu a ni. A nu leh pa remti lo chung a hnam sipaia inpe a ni a. A bialnu ni thin Dawrpui veng nula Thansangi chu Aizawl bomb-ah khan a boral zingah a tel ve a, chu chuan a ngaihtuahna kaiharhin zalenna hi a sual ta ni. Hnam sipai a zawm hnu hian Vanapa Battalion-ah inziak lutin Maite rama an camp-ah a awm ta a. Hemi hmun atang hian zalenna an sualna kawngah vai sipai lambunna hrang hrangah a tel a, sipai huaisen leh a che tha ber zinga mi a ni chho ta a. Hemi hmuna an awm lai hian Maite nula Zodingi, amah Chhuanawma’n ‘Dingdi’ tia a koh nen chuan an inchhar ta a; nula leh tlangval inngaihzawn dan thianghlim taka inngaizawngin, an pahnih chanchin chu he lehkhabu thupui pawimawh pakhat a ni ta a ni.

Chhuanawma chu hnam sipaia a inpek tirhah, Sialsuka India sipai an beih tuma a huaisen em avangin MNF Army Headquarters lam chuan sergeant rank an pe nghal a, ‘independent an puan hnuah hetiang hi a la awm ngai lo’ an ti hial (83). A huaisen avang leh a fel em avang te, Tuivai inkahnaah silai pali ngawt a man avangtein Chhuanawma chu a hmingtha hle a. Hnam sipai ten East Pakistan an pan thlak hma 1968 khan Captain rank-ah a kai hman nghe nghe a ni (121).

East Pakistan-a an chhuk hnuah Zoram lama sorkar hnathawkte hnena tanpuina (donation) khawn turin ‘Operation Joshua’ hming chawiin an lo chhuak a (210). Chumi tum chuan a  hote nen Maite-ah an kal a, nghakhlel tak leh hmanhmawh takin a ‘Dingdi’ te inah chuan a kal a. Mahse a beisei ang a ni ta lo. A hmangaih leh duh em em, nula fel leh duhawm Dingdi chuan Chhuanawm chu a lo hre tawh lo, mi â ang maiin engtin mah a lo chhawn lo va, a lo be hek lo. A chhan chu vai sipai, Bihar regiment a mi Capt. Raj leh a hoten an pawngsual rawn vang a ni!

A hmangaih leh thlakhlelh em em Zodingi tawrhna chu Chhuanawma chuan a la na hle a, phuba lak lohva chhuah a tum lo. December ni 6, 1971 khan Capt. Raj leh a hote, mi 25 chu lo lambunin India sipai pasarih an man a, a dang zawng an kaphlum nghal. An mi man te pawh hi rei an hreng lo, an kaphlum leh nghal vek a. Capt. Raj-a, a sual em avanga ‘Sualhmingthanga’ an tih, a bialnu Zodingi pawngsualtu chu Zodingi hming leh he an inbeihnaa a thianpa boral ta Ralzuala pualin vawi hnih a kap a, a thi ta (252). A hnu zela an hriat leh dan chuan chu nula khawngaihthlak tak Zodingi chu pawngsual a nih hnuah mi ang pha zan lovin a awm a, kum 1975 khan Khamzangthal hnuaiah thiin an chhar a, a zuangthla a nih an ring (265).

Zalenna zawngtu Capt. Chhuanawma chu a hmingthat em avangin sorkar-in a lu manah Rs. 5000 a phal a, chu sum it chuan khatih laia kawktu an tih Kapzawna chuan vai sipaite hruaiin Capt. Chhuanawma te camp chu an luhchilh ta. Chutah chuan hmelmate silaimu tuarin a thi ta a ni.

Hei hi a thawnthu tlangpui chu a ni. A hma lama kan sawi tawh angin history behchhana thawnthu invet kual a nih avangin a thawnthu ruangam duan (plot construction)-ah a ziaktu hi a zalen tawk lo deuh emaw ni a tih theih a. Bung 5-na thleng hian tunge a changtupa (hero) tur ni ang  tih a la hriat theih lova, a thawnthu-ah hian harsatna leh manganna vawrh tawp (climax) a awm lo tih theih a ni. Mi huaisen leh ral dona hmuna che tha thei tak, he thawnthua a changtupa ber Capt. Chhuanawma chu, beisei loh leh rin loh tak, ho angreng takin vai sipai silaimu pakhat tuarin a thi a. beisei loh taka thil thleng ‘anti-climax’ a ni ber.

Chutih rual chuan a thawnthu bung khatnaah hian Buhban khuaa pawngsualna leh tualthahna rapthlak tak chanchin ngaihnawm ti taka kan chhiar zawh hnuah, bung hnihnaah hian thawnthu dang daih ni awma mawiin Aizawl nula leh tlangval nunah min herpui daih a. Bung thumnaah hian Maite khuaa hnam sipai chetvelna lamah min her letpui lehin, Bung linaah hian Aizawl bomb a nih dan leh ram buai danah min luhpui leh daih bawk a. Hemi thleng hi chuan ngaihnawm ti tak chung siin eng thawnthu ber nge kan chhiar dawn tih kan hre thei lo. Mahse bung ngana chho atangin kan chanchin chhiar tur a chiang tan a, a hma lama laklawh tak taka min tawpsan thawnthu ngaihnawm tak tak kha a karah a rawn suih zawm zeuh zeuh a, a tawp thlengin ngaihnawm deuhin a phiar zawm leh vek thei hi a ziaktu themthiamna sang tak a ni a. Mizo thawnthu tam tak ang lo taka a plot construction hi a danglam hle.

He thawnthua thil ngaihnawm tak mai chu a chhunga mihring (character) te min hmelhriattir thiam em em mai hi a ni. Nula pawngsuala tualthattu, Buhban tlangval Liankhuma te hi kan mi hriat chian tak ni awm tak maiin min chhawp chhuaksak thiam nia.

‘Tlangval upa lam, pianphunga rualbanlo deuh a nih loh pawhin rilru lam kim loh deuhna nei, kohhran leh khawtlang thil tihnaa inhmang tak, khawtlang mipui chhawnchhaih hlawh tak hi Mizo khuaah chuan an awm chawk a. Chutiang mi chuan kohhran leh khawtlangah ngainat an hlawh duh hle nghe nghe....... A aia upa te pawhina Pu Khuma tia an koh a ni. A ke lehlam a that tawk loh avangin a kal bai deuh aih aih thin a, thenkhat chuan ‘Khumkebaia’ ti tein an ko mai thin. Buhban hi khaw lian a nih loh avangin Pu Liankhuma na na na chuan khua a khah hneh ve viau mai...... an kohhran thalai thil tihnaah a tel tam avangin an khaw thenawmah pawh amah hria an kat nuk a; a kumin a pelh tawh hnu pawhin an kohhran thalaia inhman a thulh chuang reng reng lo...’ (23, 24)

Pu Rohnuna Fanai pawh hi khaw khat pa thil ti thei, an khuaa Mizo Union hruaitu hlun, thingtlang pa ah chuan khawsak harsa lo tak a lo ni leh zel a. Chumi a nih avang chuan kohhranah pawh a kul a taiin a lo inhmang tel kher bawk nen, kohhran upa atan thlan a ni vat a. Han thuhnuai mai theih rual khat hi nei ve reng mah se, ei lo tawk chu an hmu ve im am bawk a. Zing tin mai hian tap mei kil khat tawk chu inleng an neih ve reng avangin chhung tlem mah nise, an khua a har hran lo.

Heng bakah hain Maite khaw pa Pu Chhuahthanga, a vanglaia Feren ram kal pha ngat chanchin a titi dan te; Aizawl Dawrpui veng nula Thansangi rimtu Fakmawia, Mawithawvenga an tih chanchin te; a changtupa Chhuanawma, a hun laia Aizawla mi awm thei fapa, Shillong lama lehkha zirin ram leh hnam a vei lem loh dan chanchin a ziak te; mahni nihna ang lo taka inlantir thiam, nula lepchiah angreng tak Siamthari chungchang a tarlan dan te hi a awihawmin a pawmawm satliah mai a ni lo va, kan mi hriat chian tak chanchin a ziak ta emaw tih mai a awl a, lo mitthla zut zut a awl viau mai.

He thawnthu hi history chhehvela kual ve a nih avangin, a chang chuan history bu kan chhiar ta emaw tih mai a awl. Thil thlen dan kimchang te, a hun leh ni te, an ral rel dan leh Zoram hun tawn dan chipchiar tak tak kan hmu. Suresh Kalmadi leh Rajesh Pilot-a hming thlengin! East Pakistan an thlenthlak hnua an lunglen theihzia leh an zai nasat theihzia bakah, krismas hla chuai thei lo, khatih hun laia finance minister C. Lalkhawliana’n khatih hun lai veka a phuah ‘Kum sul liam hnu’ tih hla saa an lunglen dan thlengin a chuang. Hei hian a thawnthu ruangam hi a bawhbuai lek lek emaw a tih theih rualin a tingaihnawmtu, belhchian tidawltu a ni lawi si.

Thusawi thiam chu kan hmuh ve miah lohna tuipui chhunga sangha len vel dan min hmuhtir thiam te hi an ni, an ti thin. Chutiang bawkin literature tha chu nunkawng a kaihhruai dan leh min zirtir lam aiin, ama khawvela min luhpui thei hi a ni, an ti a. Kan mitthlaa hmuh zut zut theih tur leh an zinga tel ve ni mai awma thil awm dan min hrilfiah thiam te hi thuziak thiam an ni châwk. An thuziakah kan tel ve a, an hlimin kan lo lawm a, an tahin kan lo hnîm a, an mangangin kan lo buai a, harsatna an tawhin kan lo khawngaih a, an lungawi lohin kan lo thinrimpui thin. He thawnthuah pawh hian chutiang chu hmuh tur a awm nual. Vai sipai an lambunah min telh ve a, kan lo hlauthawng a, kan lo tang em em a. Lehkhabu chhiar chungin kan lo insang mar tún a. India sipai an kahhlum chuan kan kahhlum tlukin kan lo lawm a, hnam sipai an kahhlum chuan kan rilru a na tlat nia. Chu chu a ziaktuin ‘narration’ leh ‘presentation’ a thiam vang a ni.

Thangtharte tan chuan kum 50 liam taa zalenna sual kha thawnthu ang mai a ni ta a. Khatih hun lai dinhmun leh tun hi chu chhim leh hmar ang maia inpersan a nih tawh a rinawm. Chuti chung si chuan TS Khupchong hian MNF movement te, râl an beih dan te, râl an rêl dan te, thingtlang mite nunphung leh Aizawl khawpui nundan bakah a chhunga cheng nula tlangval incheina thlengin a hre hle mai. Hemi hre tur hian a chhiarin a chhui nasa ngawtin ka ring. Tin, kha zalenna sual a rammute kha chhan inang lo tak taka chhuak an nihzia te, mipui tam takin an thil tih kha thlâwp mah se Union lam leh mi vengva pui puiten ‘independent’ theih an rin lohzia an sawi bai bai te khan a thawnthu a tingaihnawm a, a tiawihawm a, a chhiartute pawh ngaih dan phir min neihtir lek lek fo. Chumi piah lamah kha movement-a thil pawimawh em em chu zirlaite chetchhuahna (role of students) kha a ni. Shillong lama Mizo lehkha zir hmasa, lehkhathiam rualten movement kha an tuipui tlat a, chu chuan beisei phak bakin a vaw alh a ni. He thawnthua a changtupa ber Capt. Chhuanawma ngei pawh hian a zirlaipuite titi kha vawi duai lo a ngaithla a, a tir lamah movement kha tuipui pha lo mah se, Aizawl khawpuia a let hnua Jet fighter hmang meuha beih an nih tak hnuah chuan a ngaih dan a sawn sawn takzia leh, nu leh pa remti lo chung pawha zalenna zawng tura a thawh chhuah ve tak dan te kan hmu.

He thawnthuah hian Mizo fiction-a kan hmuh zen zen loh thu kharna (epilogue) kan hmu. He epilogue leh a thawnthu hi hun inkar hlat tak, kum 51 zeta inthlau a ni. Mahse a inphiar zawm tlat si. He thawnthu hi kum 2017-a Mizoram University hnuaia research scholar pakhat, James-a vahvelna atanga lo chhuak a ni daih a. Phuahchawp thawnthu mai ni lovin, thil thleng tak tak behchhana ziak a nih hmel ta riau a, chu erawh a ziaktu hian a sawi lo. Amah James-a ngei pawh hi a ziaktu pa nen hian hmehbel a rem hle, mahse a ziaktu hi chu langsar takin an inphum thiam lawi si.

A tir lama kan sawi tawh angin he thawnthu hi history kungah a par a.  Mizo thawnthu bu dang ang lo takin thuhmahruai pawh phek 19 zet zu ni pek a! Thuhmahruai dang ang lo takin a ziaktu thuphachawina leh insitna lam kan hmu lo va, Mizo history kan hmu. Mizo history-ah pawh  zalenna sual (independent movement) chanchin chipchiar tak kan hmu a, chumi rual chuan American Independent Movement te, Naga Freedom movement te a hawl tel. Zalenna sual laia hmeichhiate tawrhna, pawngsual leh rikrap an nihna chu he lehkhabu ziaktu rilrua lian tak a ni bawk.

Engpawh ni se, kum 1980 chho vela Michel Foucault leh Stephen Greenblatt ten ‘New Historicism’ an rawn buaipui chhoh kha rilru-ah a lo lang a. New Historicist ho ngaihdan chuan, literature hi mihring  rilru suangtuahna atanga lo chhuak ngawt a ni lo, khawtlang nunphung che vel (cultural movement)-in a hrin chhuah a ni, tih a ni a. History kan tih ngei pawh hi thudik leh tak (fact and figure) ni ngawt lovin, a dingchang zawkte chanchin ziakna thawnthu mai a ni, tiin literature huangchhungah an hnuk lut a. Chu tarmit chu a lo vuah tlakin, Mizo literature-ah ngei pawh a dikzia lailangtu chu he thawnthu ‘Zalenna Zawngtu Zalna Zoram’ tih hi a ni.

He lehkhabu hi thuhmahruai leh a epilogue nen chuan phek 270 laia chhah a ni a, epiloque tel lovin bung 20 a awm a, zalenna sual hun chhung kum 20 nen pawh a inmil hle. A bu hming hi ringawt pawh hian mi a lemin a hawi lam a hriat a, lung a tilengin lung a tizing nghal deuh roh a. A ziaktu in ‘alliteration’ a hman rem thiamzia pawh kan hmu.

A kawm (cover design) hi a mawiin a zahawm hle a, a hollywood poster deuh zaihin ka hria. A kawma hnam sipai ni awm tak, sam zuah chhap chunga lukhum khum, meizial petkawh va chunga thinrim hmel tak maia a chhiartute min lo melh kal mai hian he lehkhabu hawi lam zawng tur min ngaihtuahtir nghal a. Inti pa deuh tak chunga thinrim sa deuh ûla chhiar tan mai a awl. A cover art hi John Chhana ziak a ni a, a mawi takzet. A setting leh paper thlenga mit tikhamtu awm lo lehkhabu niin ka hria.

 

— H.Laldinmawia
Asst. Professor
Pachhunga University College

(He thu hi TS Khupchong ziak ‘Zalenna Zawngtu Zalna Zoram’ tih tlangzarh inkhawm ni 10.10.2020-a neiha book preview atana ziak a ni)

Share this

TS Khupchong