05 May 2013

Aw Zoram, harh rawh; harh lul rawh!


T. Zorampela hla phuah, Duhaisam Group sak 'Zoram ngaih hla' hi chuan ka nâk a zen thlawt a ni!

Chhaktiang kawlrawnah hian leng mah ila,
I sakhming sawi reng kan bang thei si lo,
Ka pian ka seilenna ram tiin,
Dawn lungrukah nghilhni i awm thei lo.

Hmun danga awm, a bikin Burma rama kan unau, Mizo em emte’na Mizoram an ngaihzia hi aw… An awmna atangin anmahni chawr chhuahna tiin chhuang em emin an sawi thin a, a chanchin an ngaihven a, an sawi thin. Programme leh thil dang dang an buatsaih pawhin Kawl zaithiam leh Kawl fiamthu thiam an sawm ngai lo, Mizo zaithiam te, Mizo fiamthu thiamte an rawn sawm vang vang thin. Mizoram-a kalna remchang an zawng reng thin a, zaithiam leh midang dang pawhin hun remchang an hmuh chuan an hna dang kalsanin Mizoram an rawn pan thin; mahse, kan lo hmusit si.

Aw, Zoram ka ngai em a che.
Nang lo chuan lawm a kim thei lo,
Dar ang tawn leh ni her chhuak thuai se,
Thinlai damten len ve maw ka nuam e.

Zoram hi an ngai ngawih ngawih a ni. He a thunawn hian Pu Rosangliana ‘Zoram Ngaih Hla’ min hriatchhuahtir ziah lehnghal. Keini a ram chhunga awm zawkte hian Zoram nawmzia leh thlakhlelhawmzia hi kan hrethiam si lo va, hmun dang daiha kan unau awmte’n Zoram hlutzia hriain an rawn au vawn vawn zawk zawk thin a; mahse, kan lo hmusit si.

Kan ram kan hnam lo san zelna turin,
Kan nun kan neih kan chakna zawng hlanin,
Lungngaih mangan buaina let zel te,
I tan hlimten ka lo dodai zel thin.

Mizoram-ah an khawsa lo, mahse, Mizo an ni. He an nihnaah hian an chiang em em a, Mizo an nih avangin Mizote chenna Mizoram hi an ramah an pawm hmiah mai a ni. Kan thiam an theih an finna zawng zawngin Mizoram an chawimawi a, Mizoram nawmzia te hla-ah an chawi a, an phuah a, khawvel hriatah an puang chhuak thin. Mzo an nihna kawnga harsatna an tawh pawhin ram leh hnam tan tiin chhel takin an tuar a, an dodai thin. Kan ram leh hnam hmasawn nan theihtawp an chhuah a, hmun hrang hranga an inzarpharhna hmunah pawh ‘MIZO’ chu an tilang thin a, thu leh hlaah an chawi kur ngiai nguai thin; mahse, kan lo hmusit si.

Mahse, vangkhua leta fan leh ni chuan,
I chhunga lungduh unaufa leng zawngten,
Khawchhak mi tia hming min selin,
Sirah damten puan ang min lo hnawl e.

He hla chang hian min tihrehawm ngawih ngawih a; he hlaa ‘chang sakei’ ka ti hial, mahse dawt a ni hauh si lo. ‘Kan ram’ tia an lo chhuan ve ngawih ngawih thin tlawha an lo ‘zin’ chang hian a chhunga chengte hian hmuhsitna kawng hrang hrangin kan lo lantir a. Mizo kan ti duh lo, BURMA MI kan ti thin. He kan ram hi an intineitu em em a, an lo kal chang pawhin ‘zin’ an ti lo va, ‘let’ an inti hial a ni. Mahse, keini chuan, kan unaute hi khawchhak thil hrim hrim huat phah nan kan hmang ta zawk hlauh si. Aw Zoram, harh lul rawh! Kan ram kan hnam chawisangtute hian min zahpui lo. Mahse, keini zawk erawh chu Burma thil fak leh chawimawi te, Burma thil neih te, Burma hming sawi hrim hrim pawhin ‘I va Burma ve!’ kan inti mai thin. Zoram ngaia rumte hian Zoram hi an thlahlel ngawih ngawih a, kan lo hmusit chung chung pawhin hun remchang an neih chuan an rawn tlawh hram hram thin; mahse, kan lo hmusit si.

Aw, a na tuar thiam zawng a har,
Hrilh ka hai, lunglam ka lo vai,
I tan ka tuarna leh hlim ni te,
Zantiang tawnmang mawl mai an chang zo ta.

Kan hmuhsitna thil tih leh tawngkam zozaite hi an hre ve tho, an hai bik lo. Hrehawm ti takin an tuar tlawk tlawk thin. Zoram leh hnam tana an tawrhna leh thawhna zawng zawngte hi kan hmuh hmaih lui a, kan hre duh si lo. An tan chuan a na thlawt a ni. An ram ngeia an lo let leh chang hian hrilhhai leh zak, lungngaiin kan lo siam thin a nih si hi. Ngaihtuah teh, a nâ asin. Zalen leh ngaihngam taka len ve an châk a, Mizoram-a an awm loh lai, Burma-a an khawsak lai takngial pawhin tawngkam na tak takin kan umzui tawk tawk thin. Anni erawh chuan Zoram ngaih an bang chuang lo va, an thinlung hi MIZORAM a la ni tho tho thin; mahse, kan lo hmusit si.

Ramtin kiltina Zofate zawng hian,
Suihlung ruala thinlung hmunkhat puin,
Hmangaihnaa insuihkhawm zel hi,
Kei ka lungkham leh DUHAISAM a ni.

Hnama chiang chu kan hmuhsit Burma-a Mizo awmte hi an ni. Mizoram-a Mizo awmte zingah hnama chiang hi an va tam lo em! Tunge mahni unaute hmusit ngai? Kan unaute chu an chan a chhiat em em lai te, mangang leh hrehawma an rum laite hian kan tanpui zawk tur a ni lo’m ni? Khawvel danah foreigner an ni a ni mai thei, kan thinlungah erawh unau kan ni a, foreigner a awm lo. Mahse, keini zawng khawvel mi kan ni si a, inpumkhatna tichhetu zawkah kan la tang zawk zel a. Chuti chung chuan, thu leh hla hmangin inpumkhatna thu an la rawn au chhuahpui tawk tawk a, Zoram tana an duhthusamte chu an rawn puang chhuak thin a; mahse, kan lo hmusit si.

Aw Zoram, harh rawh; harh lul rawh!
Share:

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Powered by Blogger.

Ka luh ṭhinna

Followers