Thlirna Tlang Thara kan thlir chhan pawh a lehkhabu tlangzarh ni khan PUC lam kan zirtirtu thiam tak Sir Dma Hlondo khan ngaihnawm takin he lehkhabu hi a lo thlirlawk tawh a. Sawi belh leh chuan tur vak awm tawh loh khawpin a rawn sawi hawng țhain ka hria a. Chuvangin, tun țumah chuan sir Dma sawi kan lai deuh kha hrut ve mai ila a țha awm e kan tih vang a ni.
A ZIAKTU Tsa hi 'Pindan Khawhar' lumtu; 'Hmangaihna Tuboh' hliam lo tuar ve tawh (mi hriatpui lem lohvin, a ruk tein ni ber ang chu); chung thil a tuar chung pawha 'Beiseina Khawvel' dina 'Chhemdamthli' dawnga chakna thar nei thei zel mi a ni a. Pa pui tak a ni. MA lamah kan zirpui a ni a; a zirpuite khan inchhuang takin 'English-hovin TS Eliot an nei a; Mizo dept chuan TS Khupchong kan nei thung..' tia kan țawng chhan kha a ni ve țhin a.
Mahse, MA zawh hnuah Research te a tih chhunzawm lai mekin Politik lamah a lut ta daih mai a. Keini lamin a Politik luhchilh kan ui chhan ber chu Mizo Thu leh Hla hmakhua kan ngaih vang zawk a ni a. Mahse, Ziakmi nihna tak tak amaha awm reng tawh hi chu Politik boruakin a ti tawmim deuh emaw a ti khaihlak deuh a nih pawhin, a hmehmit mai mai lovang tih hi kan beisei leh inhnemna awm chhun chu a la ni! Tunah chu chu a takin a lo lang taah kan ngai a; he a ZALENNA ZAWNGTU ZALNA ZORAM hi a chhung thu leh ih engmah hriat hma hauh pawha min ti lawmtu pakhat chu a ni.
RAMBUAI THAWNTHU
Zoram buai behchhan leh rambuaia innghat thawnthu hi chhiar tur a awm ve ta nual mai a. Chung zinga tharlam ber chu TSa ZZZZ hi a ni. He lehkhabua thawnthu hi buai hma kum 1964 ațanga ințanin buai thim chhah zualpui a ven deuh hnu, kum 1971 December thla thleng a awh. Kum 7 lai a thawnthu khawvel hian a awh tihna a nih ber chu.
A thawnthu ruangam kal chhoh dan chu hetiang deuh hi a ni- thawnthu bul pho chhuahna (exposition) kan tih hian Bung 1-na ațanga bung 4-na thleng a awh a. Bung khatnaah hian Buhban lama kum 1964 Masi dawna thil thleng rapthlak leh thin tițhawng tak kan hmu a. A thawnthu khawvela mi pawimawh, langsar si lo, a changa mi sual (villain character) tih mai tur Siamthari te, Liankhuma leh Rohnuna te kan hmu a; a changtupa (protagonist) tana khawlhkham lian tak siamtu ni bawk (antagonist) Kapzawna hming pawh amah kan hriat hmain kan hria!
Bung 2-naah kum buai hma hret, '60 chho vela nula tlangval nun leh Aizawl nun chiang takin a pho chhuak a. He bung thawnthu hun țhut 1965 June thlaa thil thleng (incident) pakhat- hmeichhe pakhat vanga Mizo leh Assam Rifles inkara buaina chhuakah hian Kapzawna mizia te, Mizo Union ruhkawl Pu Ramchhuana te, Thansangi te kan hmu leh.
Bung 3-naah kum 1965 kum tir lamah min letpui leh daih a. Țawi tlang pangpera khaw pakhat Maite khaw lamah. Hetah hian a thawnthu kal zela mi pawimawh tak (changtunu deuh ber la ni tur) Zodingi hmuh țanna a ni bawk a. Thil thleng lian tak chu MNV Instructor Lalthlanga tualthih/sarthihna hi a ni bawk. Zodingi pu Pu Chhuahthanga titi/thusawi ațangin KAPZAWNA leh SIAMTHARI te ȚOBUL kan hre thei bawk. Eng ang chhungkua nge an nih a, eng vanga Maite ațanga Buhban lama pem chhuak leh ta nge an nih tih thlengin...
Bung 4-naah Bingi inleng zingah REMSANGA leh Kapzawna kan hmu leh a (Kapzawna hi mak tak maiin he thawnthu tluan hian a khat tawkin bung hmasa ber ațanga a tawp kharna Epilogue thlengin a hming hi zu lang a maw le! A chhan ni awm in hriat ve duh erawh chuan a tawp thleng chhiar chhiar ve mai ruuu).
He bung hian he thawnthu pumpui chawchah ber Zoram buai chungchanga BUAINA INȚAN dan, Bomb puak, Aizawl bomb etc vel chipchiar angreng takin a rawn thai lang bawk.
Tichuan, Bung 5 ațangin Buaina Inmung chho (Rising Action)-in a thawnthu khawvelah min hruai lut chho țan a. Thawnthua Changtupa ber Lalchhuanawma'n (chhuanawm taka a chet avanga Capt Chhuanawma ni chho ta) Shillong lama a zirna kal lai rawn chawlhsan meuhva a hmangaih Thansangi (Bingi) thihna phuba lak tuma a nu leh pa, chhungte phal lo chung MNF zawm tura a arkawh chhuah tawp thu leh, Sialsuk bangla kahnaah silai pawh keng lova a tel ve thu leh huaisen taka a chet nghal dan kan hmu a.
He bung dawt ațang hian Rambuai avangin Ramhnuai lama a thawnthu tam zawk kan hmu ta a. Hnam sipai leh Vai Sipai inkahna, inlambunna hrang hrangte kan hmu chho ta zut a ni.
Chhuanawma chu Vanapa Bn lamah, Maite HQ lamah awmin, ţhian thar Remsanga te, Ralzuala leh Ngurkunga te a chhar a. Anni nen hian rawlrala chein an chetlakna hmasa ber chu Suangpuilawn leh Zawngin inkara vai sipai an lambun kha a ni. Chumi hnuah Capt. Thankima hote nen hlawhtling takin vai sipai an lambun leh a. KAWKTU vangin mi 3 lai an chân ve bawk. Rawlrala an chet chhuah karlakah khaw chhung (Buhban) lamahte an han awm leh ren rawn bawk a. 1966 Masi te pawh 'Krismas Nang Nen' tiin Maite nula Zodingi 'Dingdi' nen hlim takin an hmang dun a ni.
Heng Chhuanawma leh a chekawite chanchin leh chet velna kar lakah hian kawktu vanga Thanpara thihna te; bung hmasa bera Sitei 'pawngsualtu' Liamkhuma thihna te hmuh tur a awm a. Kum 1968 kum tawp lam ațanga Hnam sipaiten East Pakistan an pan tak thu te leh Aizawl lama boruak te; Union ruhkawl Pu Ramchhuana bo thu te; kum 3 zet East Pakistan lama an tawm bo hnua 1971 kuma Capt. Chhuanawma leh a hoten Maite an tlawh leh dan leh, a chhan leh a vang tak hriat si lohva a bialnu Zodingi Sipaiin an pawngsual rawna a ât tak thu te; chumi phuba la tura Capt. Chhuanawmate chet lakna leh ambush hlawhtling tak an neih thu te hi Bung 19 thlengin kan hmu a.
Bung 19-na hi he thawnthuin a vawrtawp a thlen (climax) lai tak chu a ni mai awm e. Bung 20-naah hian Falling Action pawh awm hran chuang (bung 19-na hi Climax anga ngaih dawn chuan) a tawp kharna Catastrophe min thlenpui nghal pawp a. Lu man Rs 5000 zet nei Capt. Chhuanawma, chhuanawm taka Vai sipai lambunna hrang hranga lo che chhuaka Capt. Raj leh a hote mi 22 zet pawh kaphlum vektu kha, Sairang ramah kahhlum a ni a. Zalenna Zawngtu Capt. Chhuanawma chuan Zoram tan a nunna a hlan ve ta a ni!
THLIRNA TLANG DANG
He thawnthu hi ruangam hi complex plot hmanga duan a ni a. A tir lam leh a thubul pho chhuahna lam hi a țhata plot chingchivet tak anga lang hi a suihzawm țhat teh reng nen, a tawp lam hi duh aiin a zuih ta mah mah em aww a tih theih.
Zalenna Zawnga chhuak Capt. Chhuanawma hian 'zalenna' atan nge a beiha 'phuba lak nan' tih hi ngaihtuah tham tak a ni bawk. Union ruhkawl Thiamsanga fapa, MNF thlipui tleh hum hum lai pawha a thenga thawnga thawk hran lo kha, Thansangi boralna avangin nawr chhuahin a awm a. Rei loteah a kal chhuah chhan ber, amah tur chhuaktu Thansangi theihnghilhin Zodingi zunah a uai lehnghal mai a. Sipai pawngsual rawn a tawh avanga mi ang lo Zodingi phuba lak nan ropui takin a che chhuak leh bawk. PHUBA chu a la ta ngei a; a thi zui ve leh nghal mai bawk a. Chuvangin, phuba lak nan Zalenna sualin Chhuanawma hi a rammu a ni mai lawm maw ni tih mai a awl viau!
A chunga mi zulzui chiah hian, Zoram Zalenna aiin Hmeichhiate dikna leh chanvo humhima an chunga hleilentute laka humhima an phuba laksak pawh hi Zalenns sual aiin a thupui langsar a ni mai em aw tih palh a awl bawk!
Pu Ramchhuana bo chanchin leh Zodingi pawngsual a tawh dan (engtianga pawngsual tawk mai nge a nih dan, Aizawla himna zawng si Maite lamah engtia kir leh nge ni etc) hi, chhiartute ngaihtuah zawm atan Open Ending hmangin a dah ni maiin a lang bawk. Kum 5 chhung vel Ramhnuai lama che tla Hnam sipaite hi lui dung chakai leh chengkawl bakah Tumbu deuh ngawt a a fur a ţhalin a rintir a (aidu te thlasikah a khawrhtir deuh mai a hehe). Tunlaia kan sawi uar deuh Mau nena inkaihhnawih 'rawtuai' te hi rintir ve zeuh zeuh awm hi nia...
A tawp berah chuan, a ziaktu hian Rambuai Chanchina thil thleng tak tak (historical facts) tar lana pho lan a duha a tum lutuk mah mah hi a thawnthu ngaihnawmna kal lai laka chhiartute hruai pengtu pakhat a tling ve thei a.
Historical fact aiin Literary Facts, Literary Truth zawk hi Historical Fiction hmanga kan tar lan ber tur a ni zawk dawn lawm ni? Chumi avanga history a thu dik awm sa mausam tur tihna ni chuang lovin. Chuvangin, a tawpa lukhum phawk meuhva Vai sipaiin zahna an lantir tur khawpa Hnam Pasalțha chhuanawm ni turin a Fictional character Capt. Chhuanawma hi tun ai hian a la chhuah chhuanawm theih zawk lo maw, ka ti a ni kei chuan.
NB: Thlirletna (review) ziaktu hi F. Lalzuithanga a ni a, tunah hian MZU Mizo Department-ah Ph.D a ti mek a ni.
0 Comment to "Zalenna Zawngtu Zalna Zoram Review by F. Lalzuithanga [Thlirna Tlang Thara Thlirna]"
Post a Comment
Eng nge i ngaihdân?