Mafaa mit a meng ta lo maw!

Tun kar tawp, December ni 27, 28, 29 chho velah ka kal nâ a rawn chhuah reng avangin ka chhungte mangang chuan 'Aizawl lam i pan mai ang u' an ti a, kei chuan, 'A reh ve leh mai ang...a ngai lo. Vawiin lamah a reh loh chuan kan kal mai dawn nia' ka ti a. December ni 29 chhun atang chuan a rawn reh ve leh ta a, kan kal ta lo. Hetiang thil a lo nih takah chuan ka ngaihtuahnaa lo lut ta mai mai chu, Aizawl lo pan ni ila, Mafaa vuinaah ka kal ve thei tur tih hi.

Mafaa Hauhnar hi vawi eng emaw zat thi thanin a lo thang tawh a, chuti chung chuan thih a inhmeh thei chuang lo. Vawiin, December ni 30, 2018 zing dar 5-a a maimitchhing erawh chuan men leh zai a rêl tawh lo va, a chhîng hlen dawn ta niin a lang. Mang a ang a, a thusawi ri leh a thuziak tharlam hriat tur leh chhiar tur awm tawh lo tur ringawt pawh hi khawvel tikhawhartu a ni.

Kum 1997-a a lehkhabu tihchhuah Chawlhna Tuikam kha amah ka hriat tanna chu a ni mai a. A hnu kum 2008 Comedian Search kha kan inhriat tanna chu a ni thung. Kei contestant ka ni a, ani endiktu (judge). Chutah chuan kan inchhaih fiam a, kan inhnial fiam a; a thu leh hlate chu fiamthu bungruaah ka hmang thin. "Kum 1997-ah Chawlhna Tuikam i tichhuak a, kum 10 hnu 2008-ah Thlaler Aurawl i tichhuak leh a, i lehkhabu hming atanga han en chuan i da chak ve hle a ni," ti zawngin ka kap fiam nghe nghe. Chumi tum chuan a poetry pakhat ka duh em em mai, a thupuia Ka hlau tawh e tih a vuah chang khatna kha bah nawkin ka chham chhuak a, Pu Stephen Auhmun-in min lo chhampui nghe nghe. Chu chu hei hi a ni:

Chhan leh vang awmin mi hmangaih suh la,

Chhan leh vang neia mi hmangaih chuanin,

Mi hmangaih chhan leh vang a bo hunin, 

Sir-ah puan ang mi hnawl ngei dawn si a.

Mi hmangaih vang chauhin mi hmangaih la,

Sakhming leh hmel vanga mi pawm chuanin,

Mi awm reng peih dawn em ni chatuanin,

Hming leh hmel a vul reng dawn si lo va.

Buan ang pawmin tunah, duat te’n mi chul,

Ka tih leh nih eng pawh ni se, Thapui,

Khuareiah mi la lawm zel ang che maw?

Ka hlau tawh e, lungchhira luaithli nul,

Hlimna hnâr nge i nih chatuan mittui,

Kipte’n i dawn lungruk mi hrilh rawh aw.

(Hei hi 1996 kuma a phuah a ni)

April ni 28, 2012-a Aizawl Press Club-a ka Hmangaihna Tuboh chhut hnihna leh Nun Tihlimtu fiamthu bu tihchhuah tum khan sawi hawnna (preview) min neihsak tawh a. August ni 17, 2013-a ka tihchhuah Chhum dum kara chhemdam thli pawh hi, a tirah chuan chhum dum kara chhemdam ka han ti ren rawn a, mahse, July ni 21, 2013-a facebook lama a cover ka post chhuah khan Mafaa hian comment lamah 'a bu hming a va laklawh ve, 'thli' tel tur ni awm tak' tia a chhan leh vang te a rawn sawi hnuah Chhum dum kara chhemdam thli tiin ka thlak leh ta a ni.

Hmangaihna Tuboh seprawtuina leh Nun Tihlimtu tlangzarhnaah Mafaa Hauhnar

November ni 4, 2014 khan Pindan Khawhar chu MZP Conference Hall-ah kan tlangzarh leh a. A tirah chuan tlangzarhtu atan Mafaa Hauhnar hi ka sawm thlu a, a aw vek hnuah harsatna dang a neih avangin tlangzarh ni zingkarah Prof. R. Thangvunga sawm thluin ani'n min tlangzarhsak ta a ni. A programme a rawn tihlawhtling thei lo chu hrehawm a ti hle a, "I programme ka tihlawhtling thei lo kha tih takzetin thupha ka rawn chawi e," tiin a theih loh chhan te sawiin thu mi rawn thawn leh thlap a ni.

Kum 2015 khan Beiseina Khawvel ka tichhuak leh a. A kawm hnung lama ka dah chu,

Tuifawn a ngawi a,

Tlang a phul bulh bulh a;

Nungcha an reh a,

Lungtê a au chuah chuah a;

Chhum a zâm a,

Chhimbal a inlet but but a.

Chu hmunah chuan,

Thihna nghakin

Mi fing a ngawi a;

Nunna chaw zawngin

Mi â a au thung —

"Khawnge Beiseina Khawel"

tih a ni a. Hei hi a saptawnga dah tel kher ka duh avangin English-in Mafaa ka lehlintir a. Kar lovah hetiang hian a rawn let a:

The waves lie still and silent,

The mountains rise up and down;

The creatures hushed,

The stones cry out in unison;

The clouds form an arch,

Rainbows billow up in the sky.

There, in that very place,

Awaiting the grim reaper

The wise man holds his peace,

While, searching for subsistence,

The foolish man hollers,

"Where is the World of Hope?"

Ka lehkhabu Beiseina Khawvel nei chuan a kawm hnungah a Mizo tawng hi in hmu ang a, a kawm chhung phek hma lamah a English hi in hmu ang.

Mafaa hian min intinau em em mai a, kei pawh a lakah chuan ka pangchang viau thin. Mizo tawng leh grammar-ah ka râwn thin a, lehkhabu ka tihchhuah dawnah ka râwn bawk a, ka tihbuai tam em em mai a ni. Ka la hriat reng pakhat chu 'hrih' leh 'rih' hmanna ka va zawh kha a ni a. Ani chuan, "Hei hi Jfa pawhin a hmang kawp mai mai chu a ni a...hman a sual lo ve ve. Kei chuan 'rih' ka hmang," tiin min chhang a. Chuta tang chuan 'rih' hlir ka hmang ta a ni. Thu har leh khirhkhan, dik zawk inchuh a awmin 'Mafaa'n engtin nge a hman' tih hi ka thutlukna a ni a, ani'n a hman dan a nih phawt chuan a chhan leh vang pawh hriat tum lem lovin a ring nghal bur mai thin a. Mizo tawng leh grammar-ah hi chuan, 'Mafaa'n a ti, Mafaa'n a hmang' tih hi thu tling, tanchhan tlak a ni tlat atin ni.

Kum 2013 July thlaa BA ka pass hlim khan min lawmpui em em mai a. Tlai khawhnuah midang kâ atangin ka pass thu a lo hria a, "Ka lo hawihhai lo khawp a, zanin tlaiah in khaw Lalpasaia hnen atangin BA i pass ta tih ka hre chauh a, ka lawmpui takzet che. You've landed the moon, TS, now, go and shake the stars!" tiin July ni 18, 2013 zan dar 11:10 khan lawmpuina leh fuihna thu mi rawn thawn a, ka tan chuan theihnghilh phal chi a ni lo.

Ka zinkawng bumboh ve tak hi eng emaw chen mi hriatsak ve avangin hlawhtlinna ka chan chang hian a lo lawm ber emaw tih mai turin fakna leh fuihna thu mi rawn hlãn fo thin a, lehkhabu ka tihchhuah chang te hian a lo kal theih loh pawhin, SMS talin hriatreng tlak leh chhinchhiah reng tlak lawmpuina mi rawn hlãn thin.

Thu leh hla lamah chuan duh hun huna ka tihbuai thin, phone call, sms, whatsapp leh facebook thlenga ka tihbuai chamchi a ni a, lehkhabu tlangzarh, thlirlawk, thusawi tura chhim thlenga ko kala pawt buai thin ka ni. Chuti chung chuan keimahah engmah a phût ngai lo va, a lo kal tur ka hruai ngai lo va, ka thlah ngai hek lo; amahin a lo kal a, a haw leh mai thin. Ka tan chuan u, pu leh pa nih a fawm a! Comedian Search-a a nau sawizawite zinga thleng sang leh a chhuan berte zinga mi ka nih thu te min hrilh tawh a.

JF Laldailova, James Lianmawia, Jimmy L. Chhangte (Hming 'J' veka intan) te hnung a zui zo em em mai a, a thu leh hlaah an hming kan hmu àwl lo va; an thu leh hla tam tak hlutzia min tarlansak a, min ngaihsantir a. Thangtharte thinlungah thamral mai tur thu tam tak a tuh nghet a, heti maia a duhtawk tur erawh ngaihngam harsa ka ti. Ka rilru a na ngawih ngawih.

Vawiduailo damdawi inah a awm tawh a, vawi tam tak ka lo kan tawh. Damdawi Ina a awmpui, a khum bula mute an kal (thih) pawhin ani chuan a tuar chhuak a, a paltlang zel a. Chutiang turah chuan ka ngai a, damdawi ina a awm loh lai ber kherin a liam ta a. Krismas hma lawka Aizawl Civil Hospital Casualty-a a awm, luh an phal tawh loh avanga pawn atanga ka va hmuh vau vau chu ka hmuh tawpna ber a ni ta mai. Engtin nge maw ka han thlah dawn che ni, Pu Mafa?!

Eng pawh ni se, a nung chung ngeia hmu thei tura kan khawvel hman inrual hi vannei ka inti thlawt a ni. Vawiin hnu lama piangte laka ka intihtheihna tur a ni kumkhua tawh dawn si a.

Read More

Kumin leh kei

Kumin ka tih chu, he thu ziah hun hi December ni 25, 2018 zan a nih avangin kum 2018 tihna a ni tih a hriat mai awm e. Kumin hian thil tawn hrang hrang, chhinchhiahtlak leh theihnghilh zui tlak ka nei nual a, a zawng a zaa a kip a kawia tarlan theih ni lo mah se, keimaha lang lian deuh, theihnghilh zui har deuh thenkhat han tarlang ila.

Lehkhabu leh kei

Kumin hian lehkhabu pakhat ka sual chhuak a, chu chu Mizoram Election (Results & Statistics) tih a ni. March ni 15, ka pianchamphaa tlangzarh kan han tum zet nain a tlangzarhtu tur lamah rokhawlhna a awm avangin March ni 17, 2018-ah kan tlangzarh ta zawk a. A tira tlangzarhtu tura kan ruat chuan a tlangzarh hman leh ta chuang lem hlei law!

CYMA Conference Hall-ah khatih laia MJA President Pu Vanlalrema Vantawl-in min tlangzarhsak a ni. Inthlan kum te a ni a, copy sangkhat chauh kan siam avangin a zo thuai a; kan chhut belh leh a. Chu erawh inthlanin min han nang zui nen, a zawrh lam buaipui hman loh bawk nen, kan hralh zo hman ta lo. Kan la kawl chuang rui mai.

He lehkhabu ka buatsaih hi hautak ka ti ve hle. Hetiang lam tarlanna lehkhabu chu a lo awm ve nual tawh a, mahse, tihsual tam tak a awm thin avangin rintlak tak siam ka duh avangin a lo buatsaih hmasate zah tak chungin ka'n siam ve rawih a ni a. Data pawimawh hrang hrangte chu Election Commission of India (ECI) record angin ka dah a, history erawh Mizo political history bu hrang hrang ka ràwn thung.

He lehkhabu tih lohvah chuan rambuai behchhan thawnthu, kum thum kal ta atanga ka lo buaipui tan tawh chu buaina hrang hrangin min han nangching nen, hma ka sawn chak lo hle. Hetiang thawnthu ziak tur chuan mahni insit a na hle mai a, kum lamah kan la naupangin rambuai tawnhriat kan nei ve eih bawk si lo. Tin, a taka thil thleng tam tak kan hre ve ràn bawk si, thawnthu anga ziah tum bawk si, ziah dan tawk thiam a har ka ti hle. Chuti chung chuan rualawhna avang leh thahnemngaihna avang zawkin, thangtharte rilrua nationalism tuh duhna te, rambuai thawnthu awm belhtir duhna te avangin kum thar, 2019-ah chuan sîk thlûk ngei ka tum a ni.

Politics leh kei

Nikum lam khan party-ah ka lut tawh a (chhiar zau duh tan — Party-ah ka lut ta mai), kumin hi party luh hnua election ka hmachhawn hmasakna ber a ni. Campaign-in hmun hrang hrangah ka zin nasa hle a, Zoram khaw hrang hrang ka la hmuh ngai loh ka hmuh tam phah hle. A tawpah hlawhtlinna kan chang ta hlauh va, tha leh zung senga thi leh thau pawlha lo bei ve nih manah hlawhtlinna chan chu a lawmawm duh hle. Kan khua Vanbawng hi Chalfilh bial a ni a, MNF candidate la tlin ngai miah lohna a ni. He bialah ka theihna tam lo hle mah se, theihtawp ka han chhuah ve tauh tauh a, a vannei zawkah kan tang a, ka lawm hle a ni.

Tih tawhna vek vekah chuan ti vak mai chi ka ni reuh a. Hmun hrang hranga zinkuala campaign mai bakah party thil facebook page & instagram-a boost (man chawia advertisement tih) te, candidate-te interview-a youtube lama dah chhuah te (hei phei chu kan tih hmain party dang ti an awm ka hre lo, party leader bik interview ang chi lo chu), pic meme an tih ang chi, thlalak thusawi thei deuh deuh han siam te, pamphlet/leaflet siam chungchangah te midang rualin theihtawp ka han chhuah ve a ni. Heng ka tihna kawngah hian party sum mai bakah mahni sum sênna neuh neuh ka nei nual mai. Ka tang em a ni.

Tin, computer thil khawih nasa ka nih avang leh thuziakmi ka nih avangin candidate thenkhat banner, poster, sticker leh business card siamsak te ka nei nual a, tin, thehdarh tur an chanchin ziahsak leh an tlin hnua lawmthu sawina thlenga siamsak hi ka nei nual mai. Chungte chu ka tangkai vena nia ka hriat avanga ti mai ka ni a, phût lêt leh beisei lêt neia ti erawh ka ni hran lo; ka tang em a ni (ka'n ti leh ngat).

Zirna leh kei

Kumin chhung hian vanneihthlak takin, kum 2016 atanga ka lo beih tawh Master of Philosophy (M.Phil) chu Mizoram University atangin ka zo ve hlauh a, A+ grade-ah ka zo nghe nghe (chhiar zau duh tan — Ka mittui a parawl ve hial mai). Politics leh research chawhpawlh ka nih avangin a zawng zawng beih a harsa hle a, damlohna neuh neuhin min lo tlakbuak ve chhen bawk nen; chuti chunga hetianga ka zo phei hi, phu lo pawh ka inti letling hial. Pathianin thawkrimte mal a sawm thin tih erawh ka hre chiang hle. Kan khaw YMA-in krismas leh kumthar inkar (December ni 28 zan)-ah zirlai titha chawimawina an neihah chawimawi tur zingah min telh nghe nghe.

M.Phil dawt leh (next step) chu Doctor of Philosophy (Ph.D) hi a ni deuh sa rûn a, 'i chhunzawm dawn em' tih zawhna pawh ka dawng zing narawh e. Mahse, tun dinhmunah chuan chhunzawm ka tum lo. Harsa leh hrehawm tinreng tuara ka zir tauh tauhna hi sorkar hna thawh nana hman ka tum lo va, zirna lamah chuan ka thlen chin hi tawk ka ti ta rih. Mahni kut ngeia ding thei turin ka zir chin hi tawk ka ti ta viau a; hma lam hun erawh Pathian thu thu a ni e.

Thuziak lama kuthlei ve tak ka nih avang leh ka subject hi literature a nih avangin, 2015 kuma M.A kan chhuah tirh tê khan college thenkhata thawk tura sawmna hi ka dawng ve a. Kei akara min duhsaka min duh derte an zahawm hle nachungin a engah mah chuan ka thawk zui ta lo. Kum 2013-2015 Mizo Department of Mizoram University te hi MZU Class of the Year kan ni a, a phu pawh kan phu! Zir chhuah hnu thleng pawhin kan thiante an entawntlak hle a, hna zahawm tak tak an thawk zui a; kei tih loh chuan hnathawh an nei vek tawh hial awm e (a tam zawk chu zirtirtu hna a ni). M.Phil thlenga ka batchmate-te pawhin university-ah hna an thawk vek tawh a ni.

Sorkar hna (central & state) hi dil ka tum lo, ka ti thin a, tun thlengin vawi khat mah ka la dil ta lo rëng a. Thiante'n hna tha tak tak thawka thla tina sum an han lakluh tan tan hlawm takah chuan, rualawh a na duh hle a, mitthlaah chhungkua a lo lang uai uai ve chhen bawk nen. Mahse, ka tum ber leh ka duh ber chu sorkar rinchhan lova intodelh a ni. A la ni reng a, a ni reng bawk ang.

Natna leh kei

Pathian khawngaihna azarah, natna tesep neuh neuh nei mah ila, taksa lamah harsatna lian tham em em ka nei lo. Kum tawp lamah ka lo neih rûk ve reng thin, zunkawng tha lo chuan mi tibuai viau a, ka krismas hman thlengin a tikhaihlak a ni ber. Tun hma, kum nga vel kal tawhah khan zunkawng tha lo hian min lo tibuai tawh a; zun test-naah zunkawnga thi (blood) a lo tam lutuk a ni awm e. Tui in tam leh damdawi min chawh a, tihhlawhtlin a harsa ka ti dun hle!

Kumin chhovah ka taksa a hah deuh nge ni, chu bawk chuan min tibuai ve ta fo mai a. Kum laihawlah daktawrte ka han pan leh lawp lawp a. Chutiang a nih laiin December ni 14, 2018 zingkar khan ka thil pawimawh ti tur chu chu nâ bawk chuan min tibuai ta a. A tawrha tawrh zawh rual a nih tak lohvah chuan ka awmna bula damdawi in hnai ber LRM Hospital-ah kan han lut chawt a. Nachhawknain min chiau a, zun kan test bawk a. A ngai tê bawkin zunkawnga thi (blood) awm bawk chu an lo sawi leh a. Chhun lamah Trinity Diagnostic Centre-ah ultrasound te kan han ti a, ka kal (kidney)-ah lungtê a awm a lo ni. Zun chhuah tham lek an tih avangin, zun chhuah tumin tui ka in tlauh tlauh e.

A tukah Mizoram sorkar thara council of minister-te lakluh hun a ni a, Governor chenna tuala lakluh inkhawm buatsaihah nuam zãn lo chungin ka tel a. Programme laklawh laiin ka nâ a rawn chhuak a, hun pawimawh zual a zawh hnuah a rang a rangin ka tlàn haw nghal a, a hrehawm hle. A na lutuk hi mittui a tla zawih zawih mai a ni. Kan nat dan hi a ngeiawm a; damlo han tih dawna ni chiah si lo, dam tak tak si lo kan ni. Nâ a rawn chhuah hian a na vak a, a reh laiin a tha leh viah a. Thiante min lo kan tum an awm pawhin, 'damlo tak tak ka ni lo ve, kan ka ngai lo' ka ti thin.

COM lakluh ni-ah na vel mek!

Pumpui tha lo hian min tibuai ve reng a. Zan men rei, chaw ei mumal loh hi sim a harsa bawk si a; Trinity lamah bawk chuan endoscopy kan lo ti tawh a, pumpui lâwng, nasa vak lo ka lo nei a ni awm e. Dam ka la tum nasa mai si a, inenkawl uluk ve viau chu a ngaih hmel. Kum thar lam chu taksa hriselna ngaih pawimawh kumah ngai ila, inentir deuh chhen tawh teh ang.

Krismas leh kei

Ka zunkawng tha lo a lo chhuah takah chuan, lirtheia chuanga zinkawng zawh ka zuam zãn lo va. Kan khuaa krismas hmang tura haw pawh thei lo turah ka inngai hman hial a ni. Nimahsela, nâ a rawn chhuah zui tak loh avangin December ni 1, 2018-ah ka haw ta hram a. Mahni khuaa krismas leh kumthar hman hi ka ngai pawimawh hle thin a, chhungkuaa hmanho ka duh vang a ni. Tum khat erawh krismas ka hmang thei lo tawh a, kumthar erawh ka hmang hram tho va. 

Naupan lai ang kha a ni thei tawh lo va, krismas pawh inkhawm tlut tlut mai loh chu han hman tehchiam dan a awm vak lo. Kumin pawh krismas ni, ni 25-ah ka inkhawm kim thap chu a nia! Laptop ka hàwn a, movie ka hawn tel teuh bawk a, a kar laka thil pawimawh chhut tih loh chu ina ka awm chuan movie ka en tlut tlut mai a ni. Laptop ka neih hma chuan lehkhabu chhiar tur ka hàwn thin a, ina awm chuan lehkhabu ka chhiar tlut tlut mai thin. Laptop ka neih hnu hian ka hawn ta zeuh zeuh a, ka haw hmain movie en tur hi ka download khawl teuh a, krismas leh kumthar vuakvetah ka en tlut tlut mai thin. Thil sual kan ti lo ber!

Duhtawk thut ang. A dang pawh ziah tur a la awm teuh mai a, Ngaihzawng leh kei tih pawh ziah loh zingah awm mai teh se. Thingpui ka in ang a, earphone ka vuah ang a, movie ka'n en leh mai teh ang.

Read More

Ka thianpa chu Pastor a ni ta!

Vawiin, Dt. 9th December, 2018 (Pathianni) khan Electric Veng Presbyterian Kohhrana Synod Inkhawmpui neih mekah ka thianpa V. Lalmuanpuia (Mamuana) chu pastor atan nemngheh a ni ta a, a bial vawn hmasa ber tur chu Ruprai, Tripura-ah a ni dawn a ni. Amah hi West Phaileng Pastor biala Pro-Pastor ni lai a ni a, kum 2015 Synod Inkhawmpuiah Pro-Pastor atan nemngheh a lo ni tawh a ni.

Pastor thian ka nei nual a, a then chu hmelhriat satliah te a ni a; a then pa ena ka en theih te, a then ka pu tur te an ni nawk. Ka pu (ka nu pa) hi pastor a ni a (ka pa chu a ni lo chiang!), pastor te hi chu ngaisang tak ka ni, nih erawh ka ni châk ngai hauh lo thung. Tichuan, naupan têt atanga ka thian kawm, pastor ni zui ta awm chhun chu Pastor V. Lalmuanpuia hi a ni. 'Ka thianpa' tih hi ka zak lo zel a, keimah zawk hi ka inthlahrung ta zaw mah.

Tlangval kum 30 chuang awrh chauh a la ni a, nula a lo bêm tawh, lo duh lotute chu (an awm a nih ngai chuan) an inchhir hle tawh ang. Mizoram Presbyterian Kohhran pastor ni thei naupang berte zingah a tel ka ring. Kei chang ni lo, a khaw nâwtin kan chhuang a, Pathian thu (BD) a zir tirh atang tawh khan Vanbawnga a haw apiangin pulpit an la chantir zat zat a, Vanbawng hian a chhuang reng tawh ang a, a hming hi khawii berah emaw chuan ziahin a awm reng tawh bawk ang.

Kan biak Pathian hi pa nei lote pa a nihzia tilangtu chu Mamuana hi a ni. A naupan laiin a pain a boralsan a, a nuin a fate zawng zawng a enkawl puitling vek a. Hna tha tak tak thawkin, nupui pasal tha tak tak an nei hlawm a. Unau mipa pahnih zingah amah hi a naupang zawk niin pasal a la nei lo va, unau hmeichhia pali-ah an naupang berin pasal a la nei lo bawk. Mahni tawka eizawnna nei vek, kohhrana inhmang em em chhungkua an ni a; hei vang hian pa nei lote pa chuan mal a sawm a, hna azawnga hna zahpuiawm loh ber mai chu a kutah a lo tla ta a ni ber.

An unau zinga a upa ber Miss Mali (Pi Malsawmtluangi) hi Middle School-a min zirtirtu a ni a, (kan belh hlek ang a) pawl ruk kan zir lai khan class-ah zirlaite hi dingin thawnthu phuahchawp min sawitir thin a. Nakinah mipui hmaa thusawina hun te in la nei ang a, nangmahni inzirna tur zel a ni, a ti a. Thlawhna kawng chhia, tih vel mai mai te ka sawi thin. Kan miss khan a lo thlir thui hle mai a, tun hnuah hian mipui hmaa din avanga zâm te, thusawi hreh tût ang chi te ka nei ta miah lo. A u mipa hi kan khuaa LPS en theih tura la luttu a ni a, kan khuaa cable TV sub-operator hmasa ber a ni. A u hmeichhia pakhat hi kan khaw nula zaithiam ber anga kan ngaih thin a ni. A u chiah hmeichhia Mawipuii hian hmanni maiah pasal a nei ta bawk. A nau Matei hi naupan lai (tleirawl lai a ni mah ang chu)-a kan thianho star rawn a ni, tih te han zep tel ila. Ani pawh hi zaithiam em em mai a ni a, Mizo Idol, Icon tih vel tam tak ai chuan thiam ka ti zawk daih a ni. Chhelo ropui lehnghal.

Kei aiin kum tlemtein a upa awrh chauh va, naupan laiin kan inkawm nasa hle. A nu leh ka nu hi an inkawm ngeih em em a, a nau leh ka nau hi an inkawm ngeih em em bawk a; chhungkaw inkawmngeih tak chu kan ni hrim mai. Aizawlah lehkha zir tura a awm bo hma avangin krismas leh kumthar hmang tura a lo haw hian kan inzui chawt thin. Kan han tleirawl chho va, kan tlangval chho va, ngaihzawng thlenga inhrilh thin kan ni a, tun hun hi inpuanna hun erawh a ni law! Govt. Aizawl College-ah keini hmaah daih a chhuak a, a college luhnaah kher ka lut zui a. College a chhuah veleh ATC-ah BD zirin a zir chhuah hnuah Pro-Pastor atana lak niin, tunah Pastor hial a lo ni ta.

Keimah ang thova ram leh khawtlang vei tak, khawtlang hmasawnna leh thatna duhtu a ni a, ani nena tangkawpin thian dangte kan sawm khawm a, kum 2012 November thlaah Vanbawng Students' Union kan tharthawh a, Govt. Aizawl College-a Students' Union leader ka nih lai a ni a, GAC SU Room-ah ngei mai. Chu chu tun thlengin a la kal vung reng a; mahse, hruaitu kan ni ta lo. Ani kohhran rawngbawlna lamah, kei ram rawngbawlna lamah. Mipui ngaihdanah erawh kan nihna, kan dinhmun, kan kalna hi a intlaknat hleih dawn mang e!

Pro-Pastor nia West Phailenga a awm laiin, thil tul tia Aizawl a lo zin chang chuan ka in luahah rem lo chung chung pawhin mi rawn tlawh ve ziah thin a, kei ve thung erawh chuan, West Phailenga a quarter ka la thleng lo. West Phaileng-a a awm hnuin lehlangin party thilah kan zin tawh a, ka tlawh hman ta lo va, kan inbe thei tawk chauh a ni. Nikum lama West Phaileng KTP Inkhawmpui Lian-ah te khan kal ve chu ni ila, ka'n thlen chilh ve ngei tur a ni a.

A bial hmasa ber tur Tripura state-a Rupra khua hi Agartala chhak lam km 40 vela hla, Mamit atanga km 99-a hlaa awm a ni a, Bengali hi an tawng hman ber a ni a; Bengali tawng hmannaah na na na chuan ka thianpa chu a zuk hawihil rih hlein ka ring.

Pro-Pastor atana an lak hnu khan thu tawi — Ka țhianpa duhtak Mamuana tih chu ka ziak a, chutah chuan naupan laia kan inkawp dan te, ka tana thian rintlak leh hriatreng tlak a nihzia te tlem ka ziak a, he thu chhiar hi chuan lo chhiar tel ngei ula ka ti hle.

Read More

Apa Kungtea sunna

Pu Lalrintluanga @Mapuia (Taituka/Apa Kungtea) hi, a pa hi Vanbawng khaw chhuak a ni a, a pu hi zirtirtu hmasa leh lar tak Vaikhawla a ni a; Vanbawng leh a chhehvel khuaah na na na chuan hre lo fa an awm lo vang. Zirtirtu Vaikhawla vanglaia Vanbawng awptu lal Lallula Sailo kan chawimawi tlai ber kherah Vaikhawla tupa chuan khawvel a chhuahsan ta a ni.  

A thih zana a rawngbawlpui ṭhin pakhatin a chanchin a sawi, amah ka mitthlaa ka hlimpui leh ka nuihpui tawp hleih theih loh chu - ṭum khat an rawngbawlna hmunah a (Apa Kungtea chu) lâm a, inkhawm hruaitu ṭhutna zâwn a thlen apiangin a va signal zeuh ṭhin a ni âwm e (amah ka mitthla hian inhmeh ka ti ngawih ngawih!). Inkhawm hruaitu insum hlei thei lo chu tlema tlemah a mualpho lo chauh a ni.  

A thih zanah vêk a ṭhianpa Pu Mapuia (H. Rotluanga)'n a chanchin a sawi bawk a. ICU-a a awm hmasak chanchin a sawi a, amah a harh chhuah tawh hnu, doctor-in a la chhuahtir hma siin lungphu tehna khawl (kal zet zet ṭhin kha) a en reng a, thaw lovin a han awm vang vang chhin a, khawla lungphu enna chu a kal ngil parh a; a han thaw leh hawk ṭhin a, a kal chho leh phut zel a ni âwm e.  

Chutiang chuan, thihna luikawr ruama a awm lai leh, thlarau lama a chan chhah lai ber pawhin fiamthu hian a kalsan ngai reng reng lo. Fiamthu hi a tuipui a ni mai lo va, a nunpui a tih theih hial ang! A chezia hi mi tihlimtu a tling a, a ṭawng hi mi tihlimtu a tling bawk a. Tunah zet chuan a ngawih tâk reng avangin Zoram mipui ngaih a tiṭha lo va, khati zat mai kha mipui an pungkhawm ta rêng a nih kha.  

Chuti taka inchu e kha e kan ni hran lo. TV lama a drama chan, Taituka te kha ka hmelhriat ṭanna chu a ni mai. Chutih lai chuan a taka hmuh phak, kawm phak, khawih phak turah ka ngai ngai lo va, TV aṭanga mi lar kan ralkhat ngaihsan ang kha a ni mai a ni; Zephyr Drama Club lama tela Mapuia te nen an han inkawp chho tak tak chu Zoram mipui kan nui hum hum a ni ber mai.  

Kum 2005 kha Durtlang Leitan-a ka awm lai a ni a, Leitan-a a ṭhiante pathum nen 'Gospel Echo' an din a, 'Kan hnenah i awm' music video rawn siamin a hit hle a, ka ngaithla nasa thei hle. 'Aw Pathian' tichhuak lehin Zoram a chiah hneh em em zel a. Krismas hla 'I zaipui ang' tih te rawn siam lehin a hit em em vek mai a; an band member R. Lalhmangaiha @Kaka (Mizo idol) a boral khan a pualin 'Ngaihlai Lalhma' an rawn tichhuak leh a (Johan H. Lalmalsawma pawh a tel tawh a), 'An chawl ngai lo' tih te an rawn hit-pui hle. An zai hi ka ngaithla nasa a, tunah chuan hmanlai a ni dawn ta reng mai.  

Tun hnuah LPS FTH channel lamah a rawn lang leh fo va. Ṭum khat chu an programme pakhat 'Zeldin Titi'-ah Mapuia nen min lo zeldin tawh a (a video ka kawl nghe nghe), chu chu ka ngaihlu hle. Naupan laia ngaisang taka TV kaltlanga kan lo en ṭhinte'n kan hming an han lam ve ta mai kha, ka tan chuan ngaihhlut loh rual a ni lo.  

Nikum lama damdawiina a awm lai khan Zoram pumah thi thanin a lo thang tawh a. Zoram hriat hlawh, mi lar takte hi thi thanin an lo thang duh hle a lo ni. Zaithiam Thartea te, ziakmi Mafaa te pawh thi thana lo thang tawh an ni! Hmanni maia damdawiin ICU-a a awm hnu, a hnuk la chah hma khan thi thanin a thang leh bawk. Vawi hnih ngawt thi thana thang dang awm ve tak maw. Chuti khawpa Zoram ngaihven hlawh a ni. Tun ṭum erawh a thi ve tak tak ta a ang ta ngei mai.  

Damna petute meuh pawh thihna hian a zuah lo va, an mihringpuite hnena hlimna thlentute pawh thihna a lo thlen meuh chuan lungngaihna thlentu an lo ni leh ṭhin. Zoram tinuitu khan Zoram a tirûm ta a ni e. Anni ang hi khawvel hrehawm tiziaawm theitu an ni a, nun hrehawm tikiang theitu an ni. Fiamthu hmangin nun beidawnga mahni intihhlum hreh lo eng emaw zat nun an chhanchhuak tawh a, ani erawh chuan chhanchhuaktu a nei ve ta lo a ni e.

Read More

Ka mittui a parawl ve hial mai

November ni 9, 2018 (Zirtawpni) chawhma dar 11 a pel fel awrh a; ka hla duh em em reng mai 'Par mawi thang vulna' music rem an play a; an play rualin hall chhungah mi pawimawh tak takte awmze nei takin an rawn inzui lut khup khup a. Chung mi pawimawhte chu Mizoram governor Kummanam Rajasekharan te, Mizoram University Vice Chancellor Prof. K.R.S. Sambasiva Rao te, India sorkara Secretary pawimawh tak Dr. G. Satheesh Reddy te niin MZU Registrar C. Zothankhuma'n a rawn hruai lut a. Chung mi pawimawhte chu professor rualin an rawn zui lut dam dam bawk a. Chu hun tawi têah chuan a ni, ka mittui a parawl ve hial tak ni.

Ka supervisor Prof. RL Thanmawia leh batchmate Zuia nen

Kan Head of Department Prof. Laltluangliana Khiangte nen

Certificate dawn lai -Thlalatu: RK Ruata

Thiante hnung zuiin zirna lamah hma ka sawn ve bek bek a, Pathian khawngaihna azarah M.Phil (Master of Philosophy) ka zo ve ta hial a. Midangte lo ropuizia a hriat hian, chhuang taka sawi chi pawh a ni chuang lo. Hemi ni hian a vawi khat nan convocation-ah ka tel ve a, governor kut atangin ka certificate ka dawng a. Convocation a tel vawi khatna leh hnuhnunna ber a ni mai ang em aw ka ti. Convocation kan hman dan kimchang hi ka ziah tum ber pawh a ni lo.

Kum 25 vel zet zirna huang chhunga ka tal chhung hian hun khirhkhan leh harsa ka van tawk nasa em! Ka ngaihtuah let chang hian keimah hi ka inkhawngaih thin. Ka zirna chanchin hi kimchang takin ziak dawn ila, chhungkaw chanchin duhawm lo ziah lan tel a ngai ang a, thiante chanchin duhawm lo ziah tel a ngai bawk ang a; chu chu ziah chhuah chi-ah ka ruat si lo va, ka îp zel dawn a nih hi. Nimahsela, retheihnain a sal beh, rilru ngaihtuahna thlenga a bawih beh tlat ka nih tawh avangin hlawhtlinna ka chan chhun, midang ngaihtuaha ropui tak ni si lote hian au chhuak lo thei hian min siam thin lo a nih hi.

Pawl li tha taka pass-a, middle school ka luh dawn tum khan, admission fee pûk tur hmu lo ni ila, tun dinhmun hi ka thleng hauh lo vang ('tun dinhmun' ka tih hi midang ngaihtuah chuan a sang lo ka tih kha, ka tan erawh a vawrtawp a ni). Pawl sarih ka pass hnu khan, rualawhna neiin, retheih tawp ber pawh huamin, high school kal turin Aizawlah thiante zui chawt ngam lo ni ila, tun dinhmun hi ka thleng hauh lo vang. Harsatna dang avangin kan khuaa pawl sawm ka pass hnuah, belh tur, chenna tur leh awmna tur pawh hre lawk lovin ka thiante zui thla chawt lo ila, tun dinhmun hi ka va thleng dawn lo rua em!

Pawl sawmpakhat leh sawmpahnih kha zingkar sikulah ka kal a, chhunah hna ka thawk thin a. Hetih hun lai hi ka zirna kawngah chuan a thim lai ber, ka dam chhunga ka chhuan lai ber tur ni si, sawi chhuah tlak loh sawi nuam ni si a ni. Retheihna tinreng tuarin, mal leh khawhar takin hringnun ka sual a, chumiin tawnhriat (experience) mi pek erawh a ang nei ve an tam lo thung. Khatih hun laia ka thiante, ka thenawmte leh ka khawsak dan min hriatpuitute khan 'engtikah emaw a la zir chhuak ngei ang' an tih loh pawhin, 'heti ringawt chuan a zir chhuak zo lo vang' an tih ngei ka ring. Kei ngei pawh beiseina nena hma lam pan tang tang ni mah ila, 'tun dinhmun' em thlen erawh ka thinlung tak chuan a ring pha ngai lo.

College ka kal laiin Students' Union-ah te inhmangin zirlai pawl hrang hrangah te ka intat lut chho va, chu chuan ka tun hun kawng a lo sial reng mai. College ka chhuah hnuah University-ah Master of Arts (MA) zir chhunzawmin Mizo Students Union (MSU)-ah ka inhmang zui zel a; MA ka zir chhuah hnuah zirlai pawl chhuahsanin political party-ah 2017 April ni 3 khan lutin Mizo National Front (MNF) ka zawm a. Mi tam takin zirlai pawl hi political institution, politics khelhna, politics kailawn tiin an dem thin a; kei chuan, NGO atang te, kohhran atang te, sorkar hna atang tea mi'n politics a luhchilh chuan zirlai pawl atanga politics luh hi eng nge a pawina, ka ti ve tlat a ni. Chutianga ka awm lai pawhin zirna chu ka chhunzawm reng a.

MA ka chhuah atanga kum khat hnuah M.Phil ka chhunzawm a, October ni 25, 2018 khan kan M.Phil result chu a rawn chhuak a, Pathian khawngaihna avang liau liauvin Grade 'A+' hmuin ka CGPA chu 7.333 a ni. Kan ute, batch hmasa lama Grade 'O'-a zo theite an lo awm tawh a, mahse, ka research tih dan leuh leuh ka ngaihtuah hian ka tan chuan lawmawm tak a ni. M.Phil kan zir tan kum, 2016 kha course work kala nitin class kan kal lai a ni a; chumi kum chu MSU inthlana General Secretary post chuha ka campaign vanglai a ni. Class kal leh zin a inchhawk reng mai a, class lamah attendance a pawimawh si a, campaign-a zin a tul bawk si a; class kal loh ni leh a chhan te ka chhinchhiah a, class awm zat te chhinchhiahin attendance-a tla lo tur tawkin ka insiamrem (adjust) a, chutiang chuan 2016 chu ka hmang tlingtla hram a, attendance-ah chuan ka tla ta bik em lo va, course work exam pawh ka pass ve thei ta a. MSU inthlanah a tla pawlah kan tang chu 2017 April thlaah thianhovin MNF kan zawm a. Inthlan a hnaih tawh avangin campaign-a zinin ka hun tam tak ka hmang a, zirna lamah research beih tul vanglai tak a ni bawk si, hun insiam rem a har hle. Chungte zawng zawng ka ngaihtuahin, ka result chu phu lo ka inti hial zawk a ni.

Ka supervisor hi Prof. R.L. Thanmawia a ni a, politics-a ka inhman avangin ka zirlai lam kalsan a tul chang a lo awm lo thei si lo; min fuih, min zilh, min hau- thawkkhat lai phei chu bansan hial duhna khawp thinlung ka pu hial a ni. Nimahsela, thahnem min ngaihpuiin min lo duhsak hle a lo ni. July ni 26, 2018-a kan dissertation (research paper) thehluh chu thla thum hnu lekah result a chhuak nghal mai a, kan Supervisor chuan, "M.Phil zir tawhah chuan result in nei hma ber," min ti hial a ni. A reng reng thuin, keini M.Phil batch (zirlai pali) hi hau tuar nasa ber batch kan ni maithei.

Ka zirna kawngah hian, result chhuanawm vak ka nei ngai lo; mahse, ka result neih danah lawmna deuh ka nei. Naupang thiam thei tak, lehkha zir thatchhe tak ka ni thin a, pawl hniam lamah distinction thak thak thin ka ni. Nimahsela, zirna kawnga harsatna hrang hrang ka tawh avangin, ka zirna aiin ka harsatna tawhte chu keimahah a lian zawk lo thei lo va, high school ka zir meuh chuan ka pass tawk tawk chauh zel a. HSLC leh HSSLC chu 3rd division-ah ka pass pha tawk tawk a, BA-ah hma sawnin 2nd division-ah ka pass a, 59% hmuin one percent-in first division a pha lo. MA-ah hma sawn chho lehin 1st division-ah ka pass a, CGPA 6.92 niin kan class-ah pathumna ka hauh pha ve a. M.Phil-ah hma sawn chho lehin ka CGPA chu 7.333 a ni. A thiam ber leh tha ber ni lo mah ila, result-a hma ka sawn chhoh zelna hi min tihlimtu a ni.

University, zirnaa hmawr ka bawkna hmuna ka zir lai hi pawl dang danga ka inhman nasat lai ber a ni. Thil danga ka inhman nasat avangin ka thiante tluk tur chuan an zir aia nasaa zir te, an beih aia nasaa beih te ka ngai tih ka inhre chiang hle a; thiante tluk pha ve turin theihtawp ka chhuah thin a, chuvangin, pawla ka inhman hian ka zirna a tibuai lo va, ka inhman nasat vanglai tak hi academic result ka neih that lai ber a ni ta zawk a ni. Tum tlat chuan a lo theih ve zel e.

MZU Multipurpose Hall chhunga mi pawimawh rualte an lo luh dam dam lai chuan heng thilte hi ka ngaihtuah a; MA ka pass hlima kan khuaa zirtirtu pakhatin lawmpuina hlana min rawn biak tuma 'i chanchin hi kan zirlaite fuih nan ka sawi thin' a tih te ka hre chhuak uai uai a, mi aiin ropui lo teh mah ila, ka mittui a parawl lo thei lo a ni.

Ka zirna leh a kaihhnawih chanchin hi a hnuaia link ka dahah te hian tlem azawng chu chhiar tur a awm:

1. Incheina leh kei

2. Hun thim

3. Ziak leh chhiar leh kei

4. Govt. Aizawl College-ah kum 4

5. GK bu ka lakai thin

BONUS: Mite'n tu nge a ni min tih?

Read More

Aizawl traffic jam mawlh mai hi

Mizoram Statistical Handbook 2014-in a tarlan danin, kum 2013-2014-a Mizorama lirthei awm zat hi 1,37,225 a ni a; March ni 30, 2016-a assembly session-a Pu PC Lalthanliana'n kum 2014-2015-a Mizorama lirthei awm zat a sawi chu 1,51,486 a ni. Kum khat chhung lekin lirthei 14,261 a awm thar a, nitin lirthei 39 zet a awm thar tihna a ni. Tin, May ni 2, 2018-a sorkar thuchhuaha a lan danin hetih laia Mizorama lirthei awm zat chu 2,09,338 zet mai a ni a, kum 3 chhungin lirthei 57,852 zet a awm thar hman a ni. Kum 5 chhung lekin lirthei nuai khat dawnin a pung hman tihna a ni a, hmasawnna rapthlak a tling!

Kum 2008-a Aizawl khawpui lirthei chet vel dan leh, kum 2018-a lirthei chet vel dan han khaikhin chuan, lirthei avanga Aizawl khawpui chep sawtzia chu a hriat theih mai a, heti renga lirthei a pung a nih chuan kum 10 hnu, 2028-ah chuan kan khawpuiah lirthei a che hleithei tawh dawn lo a ni tih a chiang reng mai. Sorkar pawhin Aizawl khawpui traffic harsatna sutkian nan theihtawp a chhuah a, sikul tan leh ban hun a tidanglam a, lirthei intlanchhawk a kalpui a; lirthei a pun chak avangin awmzia a awm rei thei lo. Chu vangin, hun lo kal zel tur ngaihtuaha hmalakna thar a neih a ngai hle. Chumi atan tha tur nia ka hriat, ka rilrua riak reng thin hlawm thum chauh han tarlang ila.

1. New Capital Complex/New Secretariat:

MNF sorkar lai khan Khatla Assam Rifle hmunah New Capital Complex din a ni a, khawpui chhunga sorkar office pawimawh tam tak awm kha khawpui pawna a awm tak avangin, chhuna Aizawla lirthei awm leh, lirthei veivak eng emaw zat chu khawpui pawnah a insawn ta a. Nimahsela, hun kal zelah lirthei a pun chak em avangin awmzia a nei thui ta lo. He hmun hi hmun hnih — Chawnpui/Dinthar atang leh Khatla atanga luh theih a ni a; a tam zawk chu Khatla lam atanga lut an ni. Chuvangin, sorkar pisa kal hun leh ban hunah chuan Aizawl chhim lam traffic a jam nasa thin viau reng a.

He sorkar pisapui awmna hi, Zokhawsang lamah emaw, Chite ruam lamah emaw sawn ni ta sela, a hmun panna tur tam tak a awm dawn. Falkland atang te, Ramhlun PWD Peng atang te, Bazar Bungkawn atang te, Venghlui atang te, Sikulpuikawn leh Silaimual atang tein a hmun pan theih a ni dawn a, sorkar pisal kai tur, Aizawl khawpui lûn laia kawngpui (main road) zawh dul dulte khan hmun hrang hrang atangin Aizawl diversion road (world bank road) an pan thla ang a, pisa kai kal hun leh haw huna traffic jam nasa tih a awm lo vang.

2. Lirthei tlanna tur hmun dang siam:

MNF president Pu Zoramthanga khan Aizawl khawpui tana hmathlir (vision) a neihte a sawinaah, leiverh leh kawng chhawng siam a sawi fo thin a, tihhlawhtlin theih ni sela chuan Aizawl traffic jam hi a kiang nghal ang. Kan duh emaw, duh lo emaw, khawpui kan sawn thei a nih si loh chuan engtikah emaw chuan Aizawl khawpuiah kawng chhawng (elevated road) emaw, lei verha lei hnuai kawng kan siam a la ngai tho tho dawn tih chu a chiang reng mai. Kawng chhawng hi eng sorkar pawhin a siam thei a nih ngat chuan lirthei tlan dan mumal tak nen, Aizawl main road-a lirthei tlan zawng zawng zatve hlawk chu kawng chhawngah an tlan thei ang a, double lane-a siam theih a nih phei chuan kum 50 chuang zet chu traffic jam harsatna awm a su kiang thei dawn a ni.

Aizawl leihnuai verh hi ZPM chief ministerial candidate ni ta Pu Lalduhoma khan, 'Bazar kal tur Kulikawn pa khan Bawngkawnah eng nge a va tih ang?' ti zawngin a sawi a; mipui lawm pawh a hlawh hle. Kulikawn pa, bazar kal tur na na na chu leiverh kawnga a tlan kher ngai lovin kawngpui pangngaiah a tlan mai ang a, Aizawl chhim lam atanga hmar lam pan tur te, hmar lam atanga chhim lam pan tur lirtheite kha leihnuai kawngah an tlan mai dawn a ni. Aizawl leihnuai verh te, kawng chhawng siam te hi nuihza siam nana hmangin, tih theih lohvah ngai rih mah ila, engtikah emaw chuan kan la ti tho tho dawn a ni.

3. Lirthei hûnna (garage & parking):

Kan kawngpui hi a zauh belh thei tawh lo va, a zim belh zel thung. Hmun rem deuh laiah kawng sirah parking area siam a ni a. Lirthei neitute tana remchang a nih bakah sorkar sum hmuhna tha tak pakhat a ni. Hnawk deuh mah se, kawng sira lirthei dah hi kawng dung leh a chhehvela dawr leh eizawnna neitute tan tih loh theih a ni lo. Nimahsela, kawngpui tizimtu leh ticheptu a nih avangin, tihdan phung (system) thar tha zawk neih a ngai ta niin a lang a, kawngsira lirthei dah khap hmak thei tur leh, parking area tihbo a nih theih nan parking area-a lirthei dahte leh kawng sira lirthei hûngte tan hmun dang siamsak a ngai tihna a ni.

Aizawl kawngpui sira sorkar office zawng zawng hi, a chunga kan tarlan tak angin khawpui pawnah sawn chhuah vek ni se, chung a hmun ruak chu lirthei dahna atan sorkarin chhawng tam tak neiin thawm tha sela. Tin, hemi bakah mimal ram a ni maw, mimal in a ni emaw, sorkarin a lei theih ang angte leiin, lei phal lote hmun pawh hman hawh (hire) system tha tak nen kalpui sela, mimal luahtir aia man to zawka sorkar luahtir duh hi mi tam tak an awm a rinawm. Hei hian kawng sira motor inhûng leh parking area awmte hi a tihbo theih chuan, kawngpui zau tha zawk kan nei ang a, traffic jam chhan tam tak a kiang ngei ang.0

Tlangkawmna:
A dang pawh tarlan mai theih tur a la tam na a, heng hlawm thumte chauh tarlang ta mai ila. Aizawl traffic jam nasa ta lutuk hi khawpuia lirthei a tam vang a ni a, khawpuia lirthei tam tak awmte hi engtiangin nge hmun dangah kan sawn chhuah theih ang, tih hi ngaihtuah ngai tak a ni. Chumi tur chuan khawpui leh khaw lian zawkte tihhmasawn te, Aizawla thil pawimawh zawng zawng awm hi hmun dangah pawh a awm a ngai a; Aizawla thawh theih tam tak hi hmun dangah thawh theiha a awm a ngai bawk. Aizawla awlsam taka kan hmuh thin kha hmun dangah pawh awlsam taka kan hmuh theih a ngai bawk a. Aizawl khawpuia awm kher ngai lo tur te, Aizawl awt lo tur tea khaw dang kan tihhmasawn a ngai a ni.

Tun atanga hun rei lo te hnuah kan khawpui berah lirthei a che hleithei tawh dawn lo. Hei hian mipuiah harsatna tam tak a siam dawn. Emergency light-in awmzia a nei lo vang a, damlo leh kangmei a chhuahin a buaithlak lehzual dawn. Chu hun a thlen hmain sorkarin hma a lak a tul a. Tuna sorkarin ruahmanna a siamte bakah hun rei lo te chhung traffic jam tiziaawm thei tura hmalakna tur dang pawh a la awm thei ang. Mahse, lirthei pung chak avangin awmzia a nei rei thei chuang si lo. Chu vangin sorkar hian hmathlir (vision) thui tak neia hma a lak a ngai tak meuh meuh a ni.

Read More

Kawng chhia avanga thil thleng dangdai zual te

Kum 2008 atanga Congress term hnih an sawrkar chhung hian kawng chhia avanga khawtlang tangrual te, tlawmngai pawl hrang hrang te, kohhran bil bakah sikul naupang thlengin hnatlanga kawngpui siam a awm; chutiang chu a thleng zing em em. Chung hnatlang hrang hrangte chu sawi zui lovin, kawng chhia avanga kum 2013-2018 inkara harsatna thleng danglam bik deuhte han sawi zui ila.

Kawng siam phutin kawng dang

August ni 19, 2013 khan Vaivakawn leh Mizoram University inkar kawng chhe lutuk siam phûtin MZU panna kawnga veng pasarih - Tanhril, Sakawrtuichhun, Tuivamit, Chawlhhmun, Zonuam, Luangmual leh Zotlang veng mipuite leh MZU-a non-teaching staff-te Vaivakawnah kawngpui an dangchat. MZU lam kawng chauh an dan hnuin, Temple Square leh Hunthar Veng lam panna kawngpui dan leh an tum chu chhun dar 12:30 velah police-te nen an innawr a, police-te chuan tear gas an hmang a ni.

Kawngchhia avangin naupang inkhawmpui hun sawn a ni

September ni 13, 2015 zan atanga hman tan tura ruahman East Lungdar Pastor Bial Sande Sikul naupangte’n inkhawmpui an hmanna hmun tur Sailulak khaw panna kawng chu kal ngaihna awm lo khawpa a chhiat avangin a hun an sawn a, October ni 25, 2015-a neih turin an sawn a ni.

Kawngchhiat vangin JCB-in damlo phur

July 28, 2016 khan Leng khua atangin East Lungdar panin damlo pakhat chu JCB hmanga phurh a ni. East Lungdar leh Leng khaw inkar kawng hi a chhiat em avangin, motor pangngaia phurh theih chi-ah ngai lovin JCB hmanga phurh a ni.

Kawngchhia vangin CrPC Section 144 puang

October 5, 2016 khan thla hnih chhung awh tur CrPC Section 144 hmangin Champhai panna kawng a chhiat em avangin Champhai District pumah lirthei keruk aia tam hmang chin tlan khapna thupek siam a ni.

Kawngchhia avangin maxicab service chawl

*** October ni 19, 2016 atang khan Mizoram khawthlang lam Tlabung leh a chhehvel khaw hrang hranga tlan maxicab-te chu Lunglei atanga an khaw panna kawng chhia vangin an tlân lo va, kar khat chuang an ding. Tlabung leh Chawngte inkara maxicab service te pawh kawng chhiat vang thovin hun rei tak chhung an lo ding tawh bawk.

*** September ni 4, 2017 atang Hachhek tlang dunga khaw hrang hranga tlan thin, khualzin phur, Maxicab-te chu kawng chhiat avangin an service chawl. Dapchhuah, Mamit, Tuidam, Kawrthah, Rengdil, Zamuang, Zawlnuam leh Kanhmun inkar kawngte, Kolasib lam atanga Mamit District panna – Rengtekawn, Meidum, Pangbalkawn, Bairabi, Saikhawthlir, Chuhvel leh Zamuang kawngah te Maxicab leh truck an tlan thei lo a ni.

*** September ni 5, 2017 atang khan Sateek leh Darlung inkar kawng chhiat lutuk avangin Darlung Centre Maxi Cab Driver’s Association chuan Maxi Cab Service an chawlhsan bawk.

*** September ni 25, 2017 atang khan Lunglei leh Tlabung inkar kawng, National Highway no. 302 chu a chhiat em avangin a zawh thintu maxicab neitu leh enkawltute chuan lirthei tlanna chia ngai lovin an tlan duh lo. Heng maxicab service chawlte mi 30 chuang an ni.

Kawngchhia sticker bel vangin sumo service khap a ni

July 15, 2017 atang khan Mamit to Aizawl Sumo service Vanchhawng Sumo chu a motor hnunga “Mamit kawng chhe lutuk hi ka chau” tih a bel avangin a service phalsak a ni lo va, a motor document laksak a ni bawk. Motor neitu hi Pu Liana, driver fel leh tlawmngai chawimawina lo dawng tawh a ni.

Kawngchhia vangin damlo zawn

July ni 19, 2018 khan Thorang Constituency-a Bunghmun khuaa police Ramthanpuia pum na chu Lunglei Civil Hospital panin mi tlawmngaite'n an zawn. Bunghmun khaw kawng hi a chhiat em avangin lirtheiin damdawiin an pan thei lo a ni.

Sikul kharin kawngchhe siamin hnatlang

May ni 16, 2018 khan Thingsai khuaa Middle School leh a chunglam zirlaite leh zirtirtute chuan sikul chawlin an khaw panna kawng siamthat hnatlang an thawk. Mi tlawmngaite sum thawhkhawm hmanga boulder phah tur leiin May ni 14, 2018 khan khawtlang huapin hnatlang an nei tan a, a tuk atangin zirna in pathum – Govt. Saikuti Memorial Middle School, Govt High School leh Adhoc Aided Higher Secondary School-a zirtirtute leh zirlaite chuan hnatlang neiin mi 200 vel an thawk chhuak a, a tuk lamah an chhunzawm zel a ni.

Kawngchhia avangin mithar lawmluhna hmun thleng thei lo

July ni 25, 2018 khan Thorang bial chhunga Thenhlum leh Bunghmun-a Congress party atanga MNF zawm thar mi 69 lawm luhna hun hmanpui tura sawm Er. Rohmingliana, General Secretary, MNF Gen. Hqrs chuan heng khaw hnihte hi a thleng thei lo nia hriat a ni.

Read More

Assam NRC chungchang leh a behbawm

Assam state sawrkarin 1951 hnu lama a vawi khatna atan National Register of Citizens (NRC) list an tharthawh leh ta a. July ni 30, 2018 khan draft final list tar chhuah a ni a, hetah hian mi nuai 40 chuang zet an tel ta lo va, a thenawm state hrang hrangah leh India ram laili lamah pawh nghawng a nei thui hle a, parliament thlengin chai a hlawh hle a ni. India hmarchhak state paruk dangte hi Assam nena inri an ni a, hetia Assam rama illegal immigrant anga mi nuai 40 chuang zet an lo awm takah chuan, state thenkhat chuan an state chhunga chung mite an lo luh huk an hlau va, an inralring nasa hle.

NRC hi Assam mi leh sa diktakte chhinchhiahna leh dan lova lo awm/pem lutte danna tur a ni mai a. March ni 24, 1971 hma lama Assam ram chhunga lo awm tawhte leh an thlahte chu a ram leilung fa angin an chhiar a; March ni 24, 1971-a electoral roll-a chuang tawh (leh an thlahte) emaw, chung hunah chuan an lo awm tawh ngei a ni tih lanna document dang emaw an neih a ngai a, a finfiahna an neih loh chuan dan lova awm (illegal immigrant) anga ngaih an ni.

Assam citizen list hi kum 64 hnuah, 2015 khan update tan a ni a, kumin January ni 1 khan draft hmasa ber tihchhuah a ni. He list apply zat mi vaibelchhe 3.29-ah vaibelchhe 1.9 te hming register a ni. Tuna final list an tihchhuah hnu thla khat chhung chu complaint-na hun an hawng leh bawk. Hetih lai hian Supreme Court-in thupek a chhuah angin, Assam NRC programme coordinator Prateek Hajela chuan, “List-a tel lote chungah sawrkarin engmah action a la dawn lo. Tumah taninah tantir an ni dawn lo va, hnawhchhuah an ni hek lo vang,” a ti. NRC kalpui dana lungawi lo emaw, list-a tel lo emaw chuan an duh phawt chuan Foreigners Tribunal-ah an appeal thei a ni,” a ti bawk. Hajela hian NRC hi mi vaibelchhe 3-in an apply thu leh document vaibelchhe 6 chuang zet chu thuneitu 75,000-te’n an buaipui thu sawiin, NRC process hi duh angin a kal chak thei lo tih a sawi a ni.

North East state-a zirlai pawl inhlawm khawm lian ber North East Students Organisation (NESO) chuan hmarchhak state zawng zawngah NRC neih an duh thu an sawi. An chairperson Samuel Jyrwa chuan, “Assam-in harsatna a tawh hi kan hmu a, hetiang hi hmarchhak state danga a thlen ve loh nan NRC hi hmarchhak state zawng zawngah neih theih ni se kan duh,” tiin a sawi a ni.

West Bengal chief minister Mamata Bannerjee hian Assamin-in NRC a kalpui dan chu nasa takin a sawisel a, Bengali leh Bihari-te um chhuah tumnaah puhin, Assam NRC list-a tel lo West Bengal-a tlu lutte chu an tuamhlawm tur thu a sawi. Trinamool Congress (TMC) hotunu hian, Assam NRC kalpui hi kum 2019 Lok Sabha inthlan tur denchhena kalpuiah puhin, ruling party hamthatna atana kalpuiah sawrkar a puh a ni. July ni 30 khan Rajya Sabha-ah Trinamool Congress, Congress leh Samajwadi Party MP-te chuan he thil duh lohna an lantir a, a tuk lamah pawh TMC MP-te hi house chhunga au rualin, inkhawm pawh tum hnih ngawt tihtawp a nih phah nghe nghe. Hei vang hian Lok Sabha-ah home minister Rajnath Singh chuan, hetiang sensitive issue hi eptu pawlte hian politicize lo se a duh thu a sawi. BJP president Amit Shah chuan, “Kum 1985 khan Rajiv Gandhi chuan Assam Accord, he NRC ang hi a sign a, inremna an bawhzui lo va, keinin kan bawhzui mai a ni,”  a ti.

BJP general secretary (i/c West Bengal) Kailash Vijayvargiya chuan Mamata chu chhang nghalin West Bengal-ah pawh Bangladesh atanga dan lova lut te zawng chhuak turin a phut. “West Bengal-ah mi vaibelchhe tel teh meuh mai an lut tawh a. Bengal thalaite hian thalai hna hmu lo tam tak an awm phah avang leh dan kenkawhna lamah harsatna tam tak a awm phah avangin Bangladesh atanga dan lova lut te zawn chhuah hi an duh a ni,” a ti bawk.

All Assam Students’ Union (AASU) adviser Samujjal Bhattacharya chuan, “India mi diktak tan NRC a hlauhawm loh thu a sawi a, “A ram leilung fa diktak, NRC draft list-a tel lo an awm chuan AASU leh NESO hriattir sela, NRC final-ah an hming a chuang ngei ang,” a ti. Bhattacharya hian political party-te chu Assam NRC chungchang politicize lo tur leh communal feeling tichhuak thei zawnga hma la lo turin a ngen a. Mamata Bannerjee pawh khakin, “Trinamool Congress hian India hmarchhaka harsatna thleng hi inzirna atana hmangin, Bangladesh atanga West Bengal-a dan lova lut tur dang ve rawh se,” a ti. “Bangladeshi tam tak West Bengal-ah an lut a, in ramri venhimna kawngah i rilru pe rawh,” tiin thu a chah. Political party hruaitu thenkhatin NRC chungchangah thu dik lo vawrh darhin NRC chu anti-Bengali leh anti-Muslim anga an sawi thu sawiin, “Heng party hruaitute ka chah duh chu, India hi Indian tan a ni a, Assam leh hmarchhak state pawh Indian tan a ni, Bangladeshi atanga pem lutte tan ni lovin,” a ti bawk.

Assam NRC final draft-a tarlante hi, kum 1951-a hming chuangte leh an thlah te, March ni 24, 1971 hma lama electoral roll-a hming chuangte leh an thlah te leh hemi ni hma lama tihchhuah document neite leh an thlahte an ni. He ni bithliah hi kum 1985-a Assam Accord-a tarlan dan a ni a; Assam Accord hi, Bangladesh atanga lo pem lutte duh lohna lantirna (movement) kum 6 zet mai an neih hnua All Assam Students’ Union (AASU), Assam sawrkar leh Central sawrkarin inremna an siam a ni. The Register General of India chuan NRC final list tihchhuah hun atan December ni 31, 2018 a ruat tawh a ni.

Eng pawh ni se, India hmarchhak state, Assam nena inri zinga state sawrkar thawm nei lo, hmalakna pakhat tê pawh la nei lo awm chhun Mizoram thenawm state-te hmalak dan han thlir zuai zuai ila a tha awm e.

Arunachal Pradesh

Arunachal Pradesh leh Assam hian ramri intawm hi km 804 ngawt mai an nei a, an lo inbuatsaih nasa hle bawk. Deputy inspector general of police (DIG) Tusar Taba chuan, “Check gate zawng zawngah fimkhur lehzual tura inhriattir a ni a, state luhka vil reng turin venhimna lam buaipuitute pawh hriattir an ni,” a ti. Hei bakah hian Assam dep district tina SP-te chu boruak thlithlai reng tura hriattir an nih thu a sawi bawk.

Arunachal Pradesh-a zirlai pawl lian ber All Arunachal Pradesh Students Union (AAPSU) chuan, August ni 2, 2018 khan thuchhuah siamin, an state Scheduled Tribe nihna document nei lote chu August ni 16-ah an state chhuahsan tura hriattirin ni 15 chhung hun an pe. Arunachal Pradesh-ah hian India an state tlawha turte tan inner line permit (ILP) neih a ngai a, foreigner tan restricted area permit (RAP) neih a ngai bawk.

July ni 30, 2018-a Assam-a National Register of Citizens (NRC) draft list tihchhuah a nih hnu khan, Arunachal Pradesh-ah dan lova awmte laka mipui thikthu a chhe zual a, AAPSU hian August ni 17 atangin an state chhunga dan lova Indian leh ramdangmi (foreigner) awmte lakah ‘Operative Clean Drive’ neih tan an tum nghe nghe a ni. AAPSU convenor Tatung Taga chuan, “Dan lova awmte hi hun tiam chhunga ILP nei tur emaw, Arunachal Pradesh chhuahsan turin emaw kan ngen a ni,” a ti.

An state chief minister Pema Khandu chuan, “State pawn lam atanga luhna te chu ngun taka vil leh ven a ni a, engmah hlauhthawn tur a awm lo. Kan state-ah chuan hmun hrang hranga chengte hi an inhre tawn deuh thum a, hmelhriat loh lo awm tharte chu police hnenah report-in rang taka action lak zel a ni ang,” a ti bawk.

Manipur

Assama NRC final draft an tihchhuah hnu khan, Manipur-a BJP kaihhruai chuan August ni 2 khan committee pahnih – state level leh district level-ah an din nghal a, he committee hian state chhunga dan lova awm emaw, dan lova lo lut emaw a thlithlai dawn a ni.

State chief minister N. Biren Singh chuan, “State sawrkar chuan July ni 30, 2018 atang khan dan lova lo lut tur ven nan Imphal Airport-ah police check post a hawng nghal a. Chutiang bawk chuan Jiribam, Mao leh Tamenglong relkawng luhkaah hawn nghal a ni bawk,” a ti a. Assam atangin Barak lui kaltlangin Manipur chu lawng hmanga awlsam taka luh theih a ni a, “Jiribam district-a luang lut Barak luiah police-te ngun takin an duty a, mihring lo lutte chu uluk taka cross checking neih nghal zel a ni,” an chief minister chuan a ti bawk.

State director general of police (DGP) LM Khaute chuan, Assam-a NRC an update tirh atang khan an department (home department) chuan boruak an thlithlai reng tawh tih a sawi a, “Tunah chuan ramri chhehvel, Jiribam district tiamin venhimna kan tihchhah belh tawh,” a ti.

Nagaland

Nagaland leh Assam hian ramri hi km 434 lai an in\awm a, district paruk – Kohima, Dimapur, Mokokchung, Wokha, Mon leh Longleng te chu Assam nena inri an ni. State chief secretary Themjen Toy tarlan danin, ramri chhehvelah forces lam mi dah belh an ni a, chung zingah Indian Reserve Battalion unit an tel thu a sawi. “Ngun takin ram chhunga lo lut huk awm thei a nih avangin kan thlithlai reng a ni,” a ti. NRC draft tihchhuah a nih hnuah, Nagaland home department chuan municipal, town leh village committee-te chu an state luhkate uluk taka vil turin a hriattir nghal a, illegal immigrant-te chu tumah an huam chhunga lo luhtir leh chentir lo turin an hriattir nghal bawk a ni.

Naga Students’ Federation (NSF) pawhin Assam ram atanga raltlan an lo luh huk an hlauhthawn thu an sawi a, an president Kesosul Christopher Ltu chuan, sawrkarin dan lova pem lut (illegal migration) chungchangah policy mumal tak a neih thuai a beisei thu a sawi bawk.

Meghalaya

Meghalaya hi Assam nen km 900 zet ramri an intawm a. Draft list final tihchhuah a nih hnuah Khasi Students Union (KSU) chuan state deputy chief minister Prestone Tynsong hmu nghalin, a ram leilung fate venhimna kawnga hma la turin an ngen. NRC draft tlangzarh tuk, August ni 2 khan KSU chuan Assam nena an inrinaah dan lova lo lutte dan nan check gate hmun thumah an siam nghal a. “Mi a nuai tel teh meuh maiin Assam sawrkar atanga hamthatna an dawn theih tawh dawn loh chuan, hmarchhak state danga insawn hi an tum ngei dawn a ni,” tiin, “KSU chuan institution hrang hrangah te, khawtlang hruaitu leh keimahni branch tinah Assam list-a tel lote an lo luh theih lohna tura hma la turin hriattirna kan pe,” tiin an general secretary Donald V. Thabah chuan a sawi.

KSU president L Marngar chuan, “Nagaland leh Arunachal Pradesh angin lo lut huk tur ven nan ILP kan nei lo va, hei vang hian Assam citizen atanga paihte hian Meghalaya hi tlanchhiatna atana an hman ber tur niin a lang,” a ti.

Final draft list tihchhuah a nih hian Meghalaya state sawrkar chuan high level meeting nei nghalin, Assam nena an inrina dinhmun an thlir zui a. Assam dep district-ah te chuan sawrkarin dan bawhchhiatna thleng thei lak ata venhimna khauh takin an kalpui nghal a ni. Chief Secretary Y Tsering kaihhruai he meeting-ah hian home commissioner S Kharlyngdoh leh director general of police (DGP) Swaraj Bir Singh pawh an tel. State additional chief secretary (home) Peter Ingty chuan deputy commissioner (DC) leh superintendent of police (SP) te chu Assam nena inkalpawhna te en thlithlai reng tura tih an nih thu a sawi bawk.

State chief minister Conrad K. Sangma chuan state sawrkarin illegal immigrant a lak thutak thu sawiin, “Home department chu he thil hi en zui turin ka hrilh tawh a, an en zui nghal ang,” tiin a sawi a, “Kan thenawm state-a thil thlengin a tha lo zawnga min nghawng loh nan kan theihtawp kan chhuah mek a ni,” a ti bawk. Home minister James Sangma pawhin thil thlen dan ngun taka an en reng thu a sawi a ni.

Tripura

Tripura hian Assam-a Karimganj district nen ramri intawm km 100 vel an nei a. Dharmanagar, North Tripura District-a sub-divisional police officer (SDPO) Dhiman Das Chowdhury chuan, “Assam leh Tripura inrinaah venhimna tha takin kan kalpui a, ngun takin ramri kan vil reng a ni,” a ti.

Tripura-a political party pakhat Indigenous Peoples Front of Tripura (IPFT) chuan an state-ah pawh NRC neih ve an duh thu an sawi a. “Tun hmain kan state-ah NRC hman ve phutin kawngzawh te kan lo huaihawt thin a. August ni 23-ah Kumulwung (Tripura Tribal Area Autonomous District Council hmunpui)-ah kawngzawh pui huaihawt leh kan tum a ni,” tiin August ni 1 khan IPFT vice president Ananta Debbarma chuan a sawi.

Tin, Indigenous Nationalist Party of Twipra (INPT) president Bijoy Kumar Hrangkhawl chuan, “Bangladeshi migrant-te chhui chhuaha hnawh chhuah te, tribal autonomous council huam chhunga inner line permit (ILP) hman te hi kan party agenda pawimawh tak mai a ni,” a ti a. “Kan state-a NRC kalpui a nih theihna turin kan party chuan agitation neih vat kan tum,” a ti bawk.

Mizoram

Mizo Zirlai Pawl (MZP) chuan August ni 4, 2018 khan press conference neiin, Assam nena inrina hmuna venhimna tichak lehzual tur leh, chak taka hma la turin Mizoram sawrkar an phut a, sawrkar a chet loh chuan check point siama a tul anga hma an lak tur thu an sawi. August ni 7 khan Mizo National Front (MNF) party vice president Pu R. Tlanghmingthanga chuan, NRC chungchanga sawrkar a ngawi reng a dem thu leh hma la tura a phut thu a sawi a; Zoram Peoples Movement (ZPM) chief ministerial candidate Pu Lalduhoma pawhin, sawrkar chu hma la vat turin a phut bawk. Hetih lai hian he thu buatsaih lai (August ni 7, 2018) thleng hian Mizoram sawrkarin hmalakna a la neih awm hriat a ni lo va, police hotu pakhat chuan phai lam chanchinbu zawhna chhangin, Assam NRC avangin Mizoramah eng issue mah a awm loh thu leh, hmalakna thar a awm hran loh thu a sawi a ni.

Read More