Aw ka thlarau tho la, hlim takin!

Tunlai chu mihring nun derthawnzia leh mihring taksa hi eng mah lo mai a nihzia keimahah a chiang hle mai a, ka ngaihtuahna a luah ngut ngut fo mai nia. Khawvelah hian mihring/minung tia kan sawi hi a tak takah chuan 'thlarau' mai niin a lang. Kan taksa hi thil pakhat ve mai chauh a ni a, mihring siam chawp hmanrua/bungrua tam tak aiin a daih rei lo zawk.

 

Kan taksa hi chen chilhtu, thlarau avanga nunga che ve chauh a ni a, chu thlarau chu kan thunun theih miah loh, a duh hun hunah a chen chilh taksa chhuahsan thei a ni leh ta nghal a. Chu mai a ni lo, eng tikah nge a chhuahsan dawn a, khawi hmunah nge tih thlengin kan hre thei lo.

 

Khawlai i kal lai te, lirtheia i chuan lai te, zan i muthilh hlan te, thiante nena in infiam lai te, thil sual i tih lai leh i inkhawm lai thlengin chu thlarau chuan taksa a chhuahsan thei. Mihring ngaihtuahnaina hun a tih leh tih loh pawh chu thlarau chuan a ngaihtuah ve lo a nih hmel. 

 

Tu ma hmuh loh leh hriat lohvah i taksa chen chilhtu thlarau chuan, i taksa kalsan ta sela, ni hnih/thum hnuah i taksa a uih chho tan ang a; kar khat velah chuan a tawih hum hum ang. Thla tam pawh a vei hmain taksa zawng zawng tawih ralin, i ruhro ringawt kha a awm reng tawh dawn a ni. Thlarauvin a chhuahsan dinhmun chu chutiang a ni. 

 

Chuvangin kan khawvel hringnun hi a ho mang e. Silh leh fen man to tak tak inbel te, chumi awt ngawih ngawiha hun hman te; incheina tlereuh chi hrang hrang uma tlân te hi a ho a nia! Taksa khuh mawina leh chei mawina atana sum tam tak sen hi, a lem vek a ni! Khawvela chhia leh tha hriaa kan la awm chhunga min khuh mawi thei tur a awm phawt chuan a tawk mai lo'm ni? 

 

Tihian i han ngaihtuah chhunzawm leh ang hmiang. Football in khel a, inkhelh laklawh laiin i hah lutuk chu lungphu chawlin i thi thut a. I thlarauvin i taksa a chhuahsan hnuah, (i thlarau hmangin) i taksa, leia thlarau chhuahsan hnu kha zuk en chhin ta la, i ngaihtuahnaah eng nge lo luta i rin? Chutah zet chuan, mihring taksa hi eng mah lo mai a nihzia nangmahah a chiang em emin a rinawm. Leiah eng mah hre lovin a tlu reng ang a, ama thuin inchi khat pawh a che thei tawh lo vang.

Chuvangin chuan, leia kan dam lai hian keimahnia awm rau rauvah, kan taksa aiin kan thlarau kan ngaihsak (care) tur a ni. Kan taksa mawi nan, lan nalh nan theih tawp chhuah mah ila, eng tik emaw hnua tawih ral mai mai tur, eng mah hre lova awm tur a nih avangin, taksa awm tawh loh hnu thleng pawha la awm zel tur thlarau zawk kha ngaihtuah a ngai a ni.

Kristian te chu kan thih hnuah kan thlarau chu vanah hremhmun/vanramah kal turin kan inzirtir a. Khawvela kan khawsak dan (performance) azira khawi emaw zawk zawka kan thlarau kal turin kan inzirtir thin. Kan taksa a awm tawh loh hnua kan thlarau a la awm reng dawn si chuan, taksa piah lam rama thlarau awmna tur kha kan taksa la awm lai ngeiin kawng kan sah kuak a ngai dawn tihna a ni.

Thlarauvin mihring taksa a chhuahsan hun tur hre lo mah ila, taksa khawvela kan awm chhung chuan hriselna tha nei a, kan dam khawchhuah nan hna kan thawh erawh a tul tho si. Chuvangin thlarau châwm miah lo tur thil sual tihna hun kan neih lohna turin rim takin hna i thawk zel phawt mai ang aw.

Mi tam tak chu tisa thilah tih-âtin kan awm a, kan buai thin. Engtin nge ka hausak theih ang, engtin nge ka nawm ang, engtin nge ka mawi ang, engtin nge ka ngah ang, engtin nge ka hlêp hnem theih ang, eng hna nge hlawh tha etc tih ringawt ngaihtuahin kan hmanhlel thin. 'Ni tin kan ei khawpin chaw min pe ang che' tia kan chham chhan a dik tak chuan kan kalsan chiang hle a ni.

 

Mihring khawvelah hian kan ei khawp bak hi kan taksa hian a mamawh loh avangin, a bak chu tul lovah intihhahna mai a ni. Kan mamawh tawk kan hmuh theih nan thawk ila, thlarauvin taksa a kalsan huna 'Aw ka thlarau tho la, hlim takin' kan tih theih nan thlarau mamawh zawk zawng ang u hmiang! Chu chu leia kan tih makmawh a nih hmel tho si a.

 

Share this

TS Khupchong