05 December 2013

Siklunglen

Mizo hunpuiah chuan thlasik hun hi a nuam ber âwm e. A chhan chu hunpui zawng zawngah Mizo kristian-te rilrem ber, Mizo kristian kaihhnawih hunpui krismas hun lai a nih vang te pawh kan ti thei ang. He thlasik hian kan rilru-ah ‘thil’ rawn thlen a nei a, he ‘thil’ rawn thleng hian kan rilru ngaihtuahna a chawk nung thin.

A tlangpuiin Mizoram-ah chuan thlasik hian November thla chawhnu atanga February thla tir thleng a awh a. A ninawm hman loh va, a khamawm loh tâwk chauhvin mi a tiphâwklek a, naupang atanga tar thlengin krismas lo thleng tur nghakin thlasik kan thlîr kumtluan thin a nih hi maw...

‘Ber’ thla kan chuangkai tan dêk dêk a, thlasik rim a rawn nam nghal châk châk a, rilru chuan Bethlehem lam a thlîr nghal ngawt a. A tawrhna lam aiin a pianna lam chu rilru-ah a lian a, thlasik rim nam chuan krismas rim a rawn ken tel miau avangin engtin pawh awm ila, tumah indem tur bik kan awm lo.

A zing ni chhuak te hi a mawi bik asin. Ni chhuah hma atang tawhin tiauchhum chuan kawr ruam a bawh var vo hlawm a. Khaw vawh vanga a hma zana dai tlate chuan hnim hnah leh pangpar mawi tak takte chu bawh huhin a tilang thar sur a. Ramngaw thing leh maute chenin a tilang hring dup mai a. Zoram khawvel a mawi leh ta!

Khawthlang lamah vazar leh tlaiberh tukthuan chaw zawng turte chu a rualin an lêng kawi zar zar a. Khawvel chu ni chhuak hmuak turin a inpeih ta maw tihah khaw chhak lam tlang chhîp atangin inthlahrung âwm takin, nileng daih turin ni a rawn chhuak ta dêk dêk a. A zung thlûr zung te chuan ruam tin a chhun sút a. Ruam deuhva tiauchhum var vo te chu a hnawt tiau va, khawvel tân a ze chimawm loh a rawn chhuah leh tan ta a nih chu maw le.

Zing thlasik nilum chhim turin a lan theihna kawtchhuah remchangah patling rualkhatte chuan herhsawpa thu chungin nilum an hnungpuak a. Vaihlo zial zu hlat hlat chungin an phâk ang tâwkin Zoram kal vel an thlir a. Ni e, chu thlasik zing nilum chuan eng titi pawh a pawm thei vek a. Hei vang ringawt pawh hian thlasik thlen hma ni zathum hi a rei hma bikin a hriat a ni.

Nu leh pate’n maipawl, mai, behliang leh chingit ilo fahran turin chul an fang a. Kumtluana an lo chêttlatna lo chul rap te chuan an lunghlui a tileng a. Thlam leika-ah thuin thuro nupa indi an thlîr vang vang a, thlam bula zamzo par te chuan mit an la chang tawh lo. An thinlungah hla ruahthamloh a lo lut zut zut a, an rilru awm zawng zawngte chu mihring tawnga chham chhuak turin an thiamnain a tlin rih si lo. Chu chuan an lunglen a tizual a, thlasik lunglen chu an tuar ngawih ngawih mai a ni.

A khabe sêp thiam deuhte’n thu leh hlaah an chantir a, thu leh hla tuimite tân ruaichaw a lo tling thin. He lunglenna rah tha tak chhuah turin nipui, fur leh favang te hian thlasikin zia a chhuah ang em hi an chhuah pha meuh lo.

Krismas a hnai telh telh a, tlangsam par te chuan hmun tin mai chu an mawi chúk a. A par karah te chuan thlasik leh krismas a inthuah chiat mai niin a hriat a. Thlasik khawvela rannung hrâm ri chiah chiah te chu a mawi bik hliah hliah hian a hriat a ni. Tlai ni nêmah naupang sava veh haw rualin luia chakai-meichher-chhit tur leh chula pawltuam turte chuan an hmun lam an pan sang sang a, patling sa châng tur chenin an bang bik lo. He hun hian mitin mitang, tuina chitin reng neite tân remchanna a siamsak a ni.

Zanah chung lam atangin thla a rawn êng no nghial a, a hnuaia ramte chu lunglen tizuak tur tingin a èn no nghelh a. Han hawi hla leh deuh ila. Hmun hrang hrangah sa châng leh lui sa man te meichher a êng de zeuh zeuh reng a. A khât tâwka thli lo thaw leh zauh thin chuan lumna pai lo mah se tapchhak meilum tihlutu a lo ni leh zel si a. A mawi vek mai.

Thla êng a duai a, arsi a de sep sep a. In tin atangin lal piang lawmna hla a lo chhuak a. Nula leh tlangval inrîmte chuan an nileng hun hman dan an sawiho va, an krismas hman dan tur an seprawtui a. Nula lah chuan vâwt tia kha khâwng bap bap chungin tap mei a han tuah tha sauh sauh va. A thingtuah ling chu a khâwng têk chhek chhek bawk a. Chumi bialin a inlengte nen an thlasik khawvel chu an hmangho ta thin a. Khawvel dangin an lung a lên chang tawh lo.

Zan hun nuam tak, vâwt vîn tûk, thlâkhlelhawm em em si a han zo va. Zingkar rizaiin min delh beh tlat laiin chhûngkaw radio atangin Mizo krismas hla diktak a lo chhuak a. A aia ringin thenawm in atangin lal piang lawmna hla a lo ri dup dup a. Zing mut tinuamtu leh thawh tichâkawmtu a ni thei ve ve tlat. Hetiang thil inkawkalh inrem taka awmtir theitu chu he hun ropui hi a ni.

Hla phuah thiamte lah chuan châk lak nan he hunpui hi hman berah an neih a. Sikkhawthiang leh masi hunpui chu inhmeh takin hlaah an lo chawi kawp a. Chung hun bik nei hlate chu a hun bikah ngei mai lungawi leh lungleng takin kan han kûrpui leh ta ngawih ngawih thin a. Engkim khuanu ruat leh duan zinga a fuh ber pawl a ni âwm asin.

A hun milin khua lo vâwt viau mah se tuman kan sawisel lo. Khaw vawh vanga hmun sâng deuh laia vur lo tla var iarh te chuan phûr takin min hîp khawm zawk a ni. He thlasik zan khaw vawt hi biakbuk pan nana hun thlanawm ber ni lo mah se hunpui dang zawng aia biakbuka mite hruai khawm nasa ber a ni tlat thung si a. ‘Chiai’ zawng a nei tih a chiang reng mai.

Naupang kut chât khir bim bem te, nu leh pa hmui khi rip rep te, nula tlangval intuamlumna silhfen hrang hrangte chuan he hun chhinchhiahna an keng tel a ni. A chhimtute hi a ropuina hriatpuitu kan ni. A mak lo ve, khawvel mihring zawng zawngte hian he hun hlimawm hi eng emaw taka thlah liam kan tum theuh hial rëng a ni; a phu ém bawk tak a!

Thlasik dawna kan inbuatsaih ang émin hunpui dangah kan inbuatsaih ngai lo va, thlasik kan thlah liam ang éma nasain hunpui dangah kan rilru lunglen a awm ngai lo. Hunpui dang chu kan hmang chho mawp mawp a, kan hmang liam ve leh mai thin. Thlasik erawh chutianga hman liam ngawt a uiawm a, thil theih a ni hek lo. A ken tel thil hrang hrangte’n min chelhbetin kan rilru-ah a zûn zâm vel mai se, kan nin hmain a uiawm tâwk leh a tinghahhlelhawm tur tâwk lekin kan thlah liam leh a ngai a. Kan thlasik silhfen bîk te chu dahthain a kum leha lo thleng tur atan rilru kan siam fel ta thin zawk a ni.

Hetiang éma nuam leh thlâkhlelhawm a nih vang a ni ang e, ‘Chhandamtu meuh paw’n he hun hi pianna atana a lo thlan ni’ an lo tih fo thin ni.
Share:

15 November 2013

Ngaihthaa kan awm hi kan mâwl vang nge kan huai vang?


Tuikuk chungchang kan khel zing ta malh malh viau mai. Mahse, Mizo mipui nawlpui chuan kan la ngaihven tawk lo niin a lang. Tun atanga kum 5-ah Tuikuk MLA nei thei dinhmunah kan ding ve ta! Mizoram MLA seat 2 chu Chakma-in min chhuhsak tawh a, seat 2 hi Tuikuk-in min chhuhsak leh chuan Mizote'n seat 36 chauh kan inchuh tawh dawn tihna a ni. Hei hi hlauh nachang hria ila, vei nachang hria ila, i pen chhuak ngawt mai teh ang u.

Mizoram-a rawn let duh lo, Mizoram-a vote nei, Tuna Tripura Transit Camp-a khawsa mek hi vote nei ringawt pawh mi 11331 ngawt an ni tawh! Hei hian tuna Mizoram-a cheng mek Tuikuk te a la huam tel lo zui! An vai phei chuan Mizoram-a Tuikuk mi vote nei hrim hrim hi mi 20000 chuang fe an nih a rinawm. An inthlahpung chak si a, an han inthlahpung tak tak mah ang a, tun atanga kum 5-ah chuan rapthlak tham an ni tawh ang! Engtin nge kan tih tak ang?

Kuminah ngei pawh bial thenkhatah Tuikuk MLA candidate kan nei leh ta a. Tripura transit camp-a Tuikuk vote nei zawng zawng khuan an duhthusam ang ngeia vote an thlak thei a nih vaih chuan kan hma lam huna thil lo thleng tur leh thleng lo tur chu sawi lawk theih a ni ta lo. Kum 2008 MLA Election-ah khan Hachhek Constituency-ahPu Lalrinmawia Ralte khan vote 4933 a hmu a, a tling a. Tunah hian Tripura Transit Camp-a awm, Hachhek Constituency bika vote nei ringawt pawh mi 5114 lai an ni ta! Pu Lalrinmawia Ralte tlinna aia tam voters an awm mek a, inthlan lehah Tuikuk candidate awm se an tling han han thei tawh tihna a nih chu! Mizo aiin an la inthlahpung chak zui! Hei mai bakah Tunah he biala lo cheng sa tawh thahnem tak an awm bawk! Zan mut titui lo tham a ni tawh!

Kum 2008 MLA Election-ah vek Mamit Constituency-ah Pu John Rotluangliana chu vote 4421 hmuin a tling a. Hetah hian Tuikuk pa pakhat chu independent-a dingin vote 2211 a hmu a, MNF candidate vote hmuh zat nen a intluk thuak! Tuna Tripura Transit Camp-a awm, Mamit Constituency bika vote nei hi mi 2942 lai an ni tawh! Hengho hian he constituency-a Tuikuk lo awm sa tawhte nena tangrualin engvangin nge Tuikuk pa chu an thlan tlin theih tawh loh bik lem ang le!

Chumai a ni lo, Tripura Transit Camp-ah khuan Dampa, Tuirial, Kolasib, Serlui, Lunglei South, Thorang leh West Tuipui-a Tuikuk vote nei mutmawh hnarmawha neih tham an awm tawh! Constituency pakhata an vote neih zat ringawt pawh Mizo in 200 khua voters neih zat aia tam a ni tawh! Chakma chu heti a ni tawh a, bial hnih kan hloh tawh. Tihngaihna kan hre tawh mang lo. Tuikuk an han che tak tak ang a, sebo hnua se kawngkhar tum ang chauh kan ni tawh ang.

Tuikuk leh Chakma te hi a hnam angin kan hua a ni lo; Mizo an ni lo va, an ram ni lo Mizoram-ah dinhmun sang tak rawn neih an tum hi kan duh lo a ni mai. Facebook hmanga ram vei te, pen hmanga ram vei te, tawngkam hmanga ram vei te inthurual taka kan chet a hun ta e. Chu chu India tan a ni lo, Mizoram tan, kan ram leh hnam tan a ni. Zoram nuam tak hi keimahni'n chên hman lo mah ila, kan tu leh fate tan tal aw... Kan pute pawhin kan awmna turin ram heti tiat hi min lo hauhsak ve alawm le...
Share:

03 November 2013

Vote i thlâk ang u

Kan hma lawkah inthlanpui a lo inchhawp leh ta rup mai le. He inthlan, ni khat chhung lek hian kum nga sawrkar tur a hril mai bakah, kan ram leh hnam hma lam hun tur zawng zawng a hril avangin kumina ni pawimawh ber chu inthlan ni, November ni 25 hi a nih hmel a, vote thlak zawng zawngte hian kan ram awmdanah leh a kal danah mawhphurhna kan nei vek a. Rokhawlhna lian tham tak avanga vote thlak lote tih loh chu, vote thlak ngai lote hian kan ram kal dan turah engmah sawi theih an nei lo va, inrawlhna tur pawh an nei hek lo. Chuvangin kan ram hruaitu, kan thlan tlin leh thlan tlin zawh lote kal dana  kan lungawi loh pawha inthlahrung lo taka ngaihdan kan sawi ve ngam nan hrim hrim pawh vote kan thlak a tul a ni. Vote thlak hi khua leh tuite’n kan tihtur a ni. Vote thlak hi kan rights a ni ringawt lo va, kan duties a ni. Chumi awmzia chu, vote thlak hi kan tih tur a ni mai lo va, kan tih ngei ngei tur a ni tihna a ni mai.

Tute nge kan vote ang tih hi mi tam tak buaina a ni fo. Tuna kan dinhmunah chuan, party tinte’n candidate an puan hma, kan biala ding tur pawh kan hriat hmain kan vote turah kan chiang vek tawh thin niin a lang. A awmzia chu, tu pawh candidate-ah rawn dah se, kan party mi a nih phawt chuan vote tur chiang sa-ah kan ngai tihna a ni ber. Hei hi khua leh tui tha nihna niin a lang lo. Party mi kan nihna hian keimahniah awmzia nei tlem telh telh sela, kan party system chhe lutuk pawh hian awmzia a nei zawk âwm asin. Kan biala rawn ding chu, eng party mi leh sa pawh ni se, a tha kan tih phawt chuan kan vote mai tur a ni ang. Kohhran leh pawl dang dangte’n inthlan thuchah an chhuah thin a. Mipuite hnena vote tura an ngen chu, Pathian tih mi, mi dik leh rinawm adt. a ni thin. Chutiang teh duah a ngai lo va, ‘Pathian tih mi’ tih hian a tâwk em em a ni; ‘Pathian tih mi’ tihah hian thil tha zawng zawng a awm vek avangin. Chuvangin kan vote tur chu Pathian tih mi a ni tawp mai tur a ni. Kristian rama awm kan ni a, Pathian tih mi vote chu a pawi lo ngawt ang chu.

Khawpuiah lamah chuan kan changkang ta a, party-a tel lo pawhin mitin kan awm ngam tawh zawk a. Thingtlang lamah erawh chuan khaw tin maiah party a lian em em a, khaw chhung inrelbawlnaah hnawksak thamin a awm a ni. Hei hi kan retheih vang a ni. Sawrkar atangin hamthatna eng eng emaw dawn tur lo awm se, ruling party-te’n duhsak bik an hlawh fo avangin ruling party-a tel lo bik nih chu retheih hliah hliahna a ni. Party engah mah awm lo phei chuan mi â nih an hlawh fo mai. Mitinin mahni nawmsakna tur kan zawng theuh va, indem tur chuang kan awm lo ve. Kan party system a that hunah a reh ve mai ang. Kan party system kan siamthat nan chuan englekhawle, vote kan thlak phawt a tul a ni.

Tun inthlanah chuan None of the Above (NOTA) an rawn telh thar dawn ta a, hei hi candidate zinga kan duhzawng an awm lohva hmeh tur a ni âwm a. Party tinte hian bial tinah tling tura an rin ni satliah lo, tha tura an rin hi rawn dah chu ni sela he thil hi kan hmang rim lutuk lovang. Mipuite pawhin kan duhtui tawlh tawlh a, mi tha thlan kan chîng tan ta a, chuvangin candidate-te pawh mi tha tak tak an ni fer fur ta mai. Tun tum inthlanah pawh mi tha tak tak an rawn ding chhuak leh dawn a, chutih laia NOTA kan hman uar lutuk chuan mi tha kan thlang chhuak thei lo zawk mai ang tih te pawh thil hlauhawm tak a ni thei. Vote thlak thei chin chu mi puitling anga ngaih an ni tawh a, vote tur hre lo rual pawh kan awm tawh lo. Kan chhia leh tha hriatna hmangin candidate zinga mi tha leh tha lo chu kan thlirin kan zir chiang ve tur a ni. Tha famkim a awm theih loh ang bawkin sual famkim a awm theih loh va, chuvangin kan chhia leh tha hriatna hmanga candidate ngei kan vote hian kan inchhir ngawih ngawih hauh lovang. Chutiang ni lova None of the Above hi sawrkarna kan siamtir mai chuan kan party hruaitute kan tizak lutuk palh ang e!

Vote thlâk duh lote hian hun hlutna an ngaihtuah chian ngai loh vang a ni maithei. Dân pangngai chuan kum nga chhungin MLA inthlanah tum khat chiah vote kan thlak thei, chu pawh mi pakhatin vawi khat! Kum nga chhunga kan vote thlak theih zat hi a tlem lutuk a, vawi khat bawhpelh hi a uiawm a nil; a bak chu dam rei nghah thil a nih tawh avangin. Vawi tam tak vote lo thlak tawhte hi mi awhawm an ni a, inchhuanna atan pawh hman tur chi zawk tak a ni. Pathian-in hriselna tha tak min pe a, chumi avang ringawt pawhin lawmthu sawi nan tal vote kan thlak ngei ngei tur a ni. Kum upa lam kum 100 chuang tawh te pawhin vote thlak an ngai pawimawh a, kal pawh kal hleithei lovin vote thlakna hmun an pan thin. Khawpuia awm thingtlangmi tam tak chu sum tam tak sêngin vote thlak turin an khuaah an haw thin. Chutiang bawkin ram danga awm zirlai leh hnathawka awmte pawh an ni tho âwm e. Chutiang a nih laia mahni awmhmuna vote thlâk pawh peih lo khawpa thatchhe fal bik nih hi kan pi leh pute pawh khan an phal hauh lovang.

Chhungte nena tum khat lek krismas hmanho loh pawh kan hlau va, kan hmanho theih loh pawhin pawi kan ti thin. Mahse, a kum lehah a lo thleng leh mai zel a. Inthlan erawh a ni ve hauh lo. Tum khat vote i thlak loh khan kum 10 lai vote i thlak lo tihna a ni. Kum 10 chu tam tak a ni, kumtin kum 10 pawh dam thleng lovin naupang engzat nge thi thin ang le? MLA mai ni lo, pawl hrang hrangah pawh kan tihsual deuh tum chuan inthlana vote thlâk leh vat vat kan châk zawk thin a, hruaitu thlâk kan duh thin a nih kha. Hruaitu thlâk thei leh hruaitu ni sa dinhmun sawhnghet theia kan awm lai a nih vang a ni. MLA inthlan pawh chutiang chu a ni mai tur a ni; kan ram hruaitute kan ning a nih chuan kan thlâk ang a, kan duh a nih chuan an dinhmun kan sawhnghet mai ang. Vote thlâk duh lo tân erawh chu tak chu thil tih theih a ni ngai lo vang.

Kan ram hi kan vei tur a ni. Politics erawh kan ruihchilh tur a ni lo. Tu pawh mai hian kan ram hi kan vei tur a ni. Zirlai pawhin ram a vei tur a ni a, hnathawktu pawhin a vei tur a ni; ram vei hi politician-te tan chauh dah tur a ni lo. Kan ram hian siamthat a ngai a, siamthatu a mamawh ngawih ngawih a. Zofate hi hmun hrang hrangah kan chêng darh a, rilru hrang hrang kan pu a, kan ngaihtuahna siamthaa inpumkhat kan mamawh ngawih ngawih bawk. Chu chu kan châk a ni. Chung kan thil duh te, kan thil vei te, kan thil awhte hi a takram a thlen theihna tur chuan kan ngaihtuahna tlêm tal kan lo sên ve hi khua leh tui kan nihna anga kan tihmakmawh a ni. Kristian kan ni a, khawiah pawh awm ila, kan tawngtai thin. Lal Isua’n tawngtai min zirtir anga tawngtai rual phei chu kan ti zing malh malh hle. Chung hunah te chuan ‘I ram lo thleng rawh se’ tiin kan chham rual dual dual thin. A ram hi amahin a rawn thleng dawn lo va, keimahni kaltlanga lo thleng tur zawk a ni. Chu kan duhthusam ram lo thleng tura kan tihtur hmasa ber leh pawimawh ber chu vote thlâk hi a ni.

Ram kalphung hre lo lutuk nih te, ram chhung politics thli tleh dan te, kan ram dinhmun leh kan ram hruaitute hre lo lutuk nih hi a zahthlak a ni. Mahni awmhmun atangin kan phâk ang tâwk tâwkin kan ngaihven ve tur a ni. Tu pawhin engtik lai pawhin ngaihdan mûm kan nei reng tur a ni a, a hre ber ang ziazanga engtik lai pawha pâwt zat zat thei em kan ni lo a nih pawhin hre lo fal bik nih pumpelh nan hrim hrim tal pawh tui lo chung chung pawhin hriat kan tum mai tur a ni ang. Tun hnaiah talkshow eng eng emaw en theihin a lo awm ta a, hengah te hian phuartu dang nei ni si lo, mahni pawha ngaihdan nei lem lo an lo awm leh mai thin. Mi zawng zawng hian kan ram hi an vei ta emaw kan tih lai pawha chutiang ngaihtuah hauh lova keimahni leh kan hnathawhna kawnga hamthatna bak ngaihtuah ngai lo an lo awm leh mai thin. Kan indem em em lo ve, vote thlâk pawimawhzia kan ngaihtuah chian ngai loh vang a ni zawk. Ram vei chuan a vote tur diktak a hai ngai lo; a vote tur hrilh pawh a ngai lo va, a bula campaign vak vakin awmzia a nei hek lo.

Vote thlak ni-a kan mitthlaa lang chu a inang lo viauvin a rinawm. Thenkhat mitthlaah kutphah a lo lang ang a, thenkhat chuan chhunah arsi an hmu ang a, thenkhat chuan an kalna apiangah electric bulb an chhi ang a, thenkhat thung chuan a hma zan atang tawhin ni an chhuahtir thung ang. Chu chu vote kan thlak dawna keimahnia thil awm thin, tuna kan dinhmun a ni. Chutiang ni suh se, kan ti a ni! Candidate tha i thlang mai ang u. Tam tak chuan kan party candidate an tlin theih nan vote an thlâk thin; kan ram a lo that theih nan vote i thlâk tawh zawk ang u. Vote kan thlak dawn hian, candidate chu party-a mi challang tak a nihna te, kohhran rawngbawltu a nihna te, tlawmngai pawl leh zirlai pawla hruaitu a lo nih tawhna te, hmeichhia a nihna te mai chuan kan kut chêttir lo se, kan ngaihtuahna thinlung chhungrila thil tak tak awm khan kan kut hmawr thleng pha rawh se; hmasawnna hian mi rethei berte hnen pawh thleng rawh se, kan tih fo ang khan.

Eng pawh ni se, vote thlâk theia kan awm hi lawmna chang i hre zawk hlauh teh ang u. Vote thlâk ila, harsatna dang nei pawh ni lem lova vote thlâk duh lo hrim hrimte i intihtheih khum leh phawt mai ang u hmiang.

31.10.2013 (23:00-00:40)
Share:

13 September 2013

Insuihkhawm leh zai i rêl ang u

‘Insuihkhawm leh zai i rêl ang u’ tih hla ṭha zet mai phuahtu Capt. LZ Sailo hi hnam inpumkhatna vei em em mai, a taka nasa taka thawk a ni a. UNO Peace Keeping Force-ah te telin khawvel ram hrang hrang a fang kual a; sipai aṭanga a lo chhuah hnuah Zofate insuihkhawmna lam a vei em em mai a. Thu leh hla pawhin a phuah chhuak nasa hle a. Zofate insuihkhawmna atana a thawh nasat avangin tàninah pawh a lo tâng tawh nghe nghe a nih kha.
Zofate hi hmun hrang hrangah kan awm darh a. A ṭhen chu Tripura-ah te, Bangladesh-ah te, Manipur leh Burma-ah te pawh an awm bawk a. Hmun hrang hranga Mizo awmte hi hmun khatah awmkhawm duh mah ila tun dinhmunah chuan thil theih ni pawhin a lang lo. Kan ṭawng a inang lo va, kan culture leh tradition a inang lo va, kan society thlengin a danglam nasa tawh em em a. Tin, kan awmna hmun ṭheuhvah awmhmun nghet kan nei tawh a, chu kan awmhmun nghet chu awlsam taka chhuahsan mai chu thil harsa tak tur te pawh a ni a. Chuti a nih si chuan engtin nge kan inpumkhat theih ang? E le, ka thlarau zawkin le...
British hovin India ram an rawn awp ṭan tirh khan ‘Divide & Rule’ policy, ‘ṭhendarh la, awpbet rawh’ tih chu an rawn hmang a, India ram chu bung hrang hrangin an ṭhendarh a, an awp a, kar lovah India ram chak tak ṭhin chu an tichau zo ta a nih kha. Chutiang chiahin Mizoram-a sapho an rawn luh tirh khan he policy ‘ṭhendarh la, awpbet rawh’ tih bawk hi an rawn hmang a. Mizoram chu hmar bial leh chhim bialah an ṭhendarh a; hmar bial chu Assam lamin changin chhim bial chu Bangladesh lamin an vil a nih kha. British, hnam fing hmasaho hian unau pawh hmun hranga an awm hian an in-unauna a dal telh telh thei a ni tih an hre chiang em em a lo ni.
Mizote ṭiau lui kan kân hnuah hmun hrang hrangah kan awm darh ṭan a. Chuta ṭang chuan kan ṭawng te, kan hnam chîn dan te, kan ei leh bar dap dan kawng te a lo dang hret hret a. Kan zavaiin unau vek kan ni tho. Hmun hranga kan awm avangin zawi zawiin kan khawsak dan a lo dang chho zel mai a lo ni a. Tunah chuan kan unau ngei ngeite pawh kan hmu foreigner zo ta a, kan deu a, kan ram aṭangin kan hnawtchhuak bawk a; an hnawhchhuah ṭhenkhat chu an sual vang ai mahin an nihna vang a ni zawkin a lang. Hei hi hmun hranga kan awm vang a ni a, kan thinlung lam inpumkhat loh vang a ni. Ṭiau lui an lo kân hnuah khan hmun khatah la awmho zel sela chu hetiang teh nuaih kan ni kher lovang.
Pathian hian mihringte hi hnam anga awm turin min siam a. Min siam ang ngeiin Mizote pawh hnam anga kan awm a ṭul a, chuvangin kan inpumkhatna tichhe zawnga hmalakte hi Pathian duhzawng a nih a rinawm hauh loh. Kan hnam nihna leh kan nunphungte hi zahpui lova khawvel kan hriattir a ngai a, chumi tur chuan inpumkhatna bawk hi a pawimawh ta a ni. Zofate kan inpumkhat theih nan kan zirlai pawl te pawh hna nasa takinan thawk a, Mizo Zirlai Pawl phei chuan Zohnahthlak hnam hrang hrang intawhkhawmna hunpui ‘Zofest’ hi a buatsaih ṭhin a. Chutiang hunah chuan Zohnahthlak hnam hrang hrangte inpumkhat duh ngawih ngawiha zaia an lamho han hmuh chuan kan duhthusam inpumkhatna (rilru inpumkhatna) kan hnaih tawh hle niin a lang ṭhin. Zo-Reunification Organisation (ZORO) pawh hian Zofate inpumkhat leh, keimahni ram ngeia zalên taka kan awmho theih nan nasa takin hma an la mek reng a ni. Chuvangin, mimal leh pawl anga hnam bil thila hma kan lak dawn hian zirlaite huikhawm sa tidarhtu kan nih loh nan chuan kan fimkhur te pawh a ngai hle ang.
Mizote hi kan la naupang hle a, kan thlahtute chanchin kan chhui theih hla ber pawh Chhinlung a ni tlawng mai a, chu pawh thawnthu ang deuhva sawi a ni mai a. A kum ang zawng phei chuan kum zabi 10-na vela Mizo te khawsak dan pawh kan chhui thleng hleithei lo a ni. Chutiang khawpa hnam naupang kan nih avangin ṭhendarh kan awl a, chîmral te pawh kan awl hlein a rinawm. Juda te khu han thlir ila, Bible-ah ringawt pawh hnam upa an nihzia chu a lang reng mai a. Babulon salah kum tam tak an tàn pawh khan an ral rêng rêng lo. German dictation Adolf Hitler pawh khan Judaho chu suat rêm tumin a that chiam a, Juda mi maktaduai tam tak a that a, mahse, an rêm chuang reng reng lo. Tuna an ram chhehvelah Arab-hovin an hual a, ram te tak tê-ah an awm khawm a, mahse, khawvelah an tê ngai reng reng lo a ni. Babulon sala an tàn lai te khan Juda hnam hi bo âwm tak an ni, mahse, a teuh lo. Sam number 137-naah khan ‘Babulon lui kamah te, chutah kan ṭhu a, a ni, kan ṭap ṭhin, Zion kan ngaihtuahin’ tih kan hmu a. ‘Aw Jerusalem, ka theihnghilh che chuan ka kut ding lam hian a thil thiam hi theihnghilh ve rawh se. Ka hriat reng loh che chuan ka lei hi ka dangah bet tlat rawh se’ an ti hial a. Judaho kha an lo nationalist ṭiah ṭiah asin! An thlahtute hetiang khawpa an thinlung a lo inpumkhat avangin tunah chuan khawvel hmun hrang hranga Judaho chu an ramah an kalkhawm mek a, rilru inpumkhatna aṭangin tisa tak pawhin an inpumkhat chho mek a ni.
Tehkhin nan Judaho ka rawn hmang mai a ni. Judaho angin, khawi lai hmunah pawh awm ila, eng anga darh pawhin awm mah ila, kan thinlung a inpumkhat si chuan engtikah mah kan ral ngai lovang. Tisaa pumkhat ni tur chuan thinlung inpumkhat phawt a ngai a ni. Nupa pawh an thinlung a inpumkhat loh chinah an inṭhen mai a, an lo inngai a, an rilru lama an lo inhmuhthiam hnuah an inhruai leh mai a, rilru lam a inhmuh thiam loh chuan an inṭhen hlen mai a ni. Chutiang chiah chuan Zofate pawh thinlung lama kan inpumkhat loh chinah kan inṭhen a, hmun hrang hrangah kan awm ta a ni. Kan rilru lam a inpumkhat chuan kum eng emaw zat hnuah Judaho ang hian kan la kalkhawm leh ang. Rilru lama kan inpumkhat thei lo a nih erawh chuan khawvel awm chhungin kan darh reng tawh mai dawn a ni.
Tun hnai, September ni 13, 2013 pawh khan Mizo Students’ Union chuan Aizawl-ah ‘Inpumkhatna Kawngzawh’ an nei a, zirlai sang têl chu Zohnahthlak inpumkhatna duhin an au chhuak a nih kha. Kan hnam inpumkhatna duha zirlaite an au chhuak ta mai hian ngaihtuah a tithui a, nu leh pate tân chona lian tak a ni. Kan political party te pawh hian hnam inpumkhat chu an duh ṭheuh niin a lang a, a taka thawk thei dinhmuna an han din hian remchang kan pe duh tlat ṭhin lo zawk a ni. Kan hnam inpumkhat nan zirlai pawlte hian hna ropui tak an thawk mek a, an thawk zel dawn bawk niin a lang a. Zofate inṭhendarh huikhawm tura hma latu chu tun dinhmunah chuan ZORO, MSU leh MZP hi a langsar deuh an ni tawh mai awm e. Kan tlawmngai pawl lian ber YMA te hian an kumpuan ‘Ram leh hnam humhalh’ chu tlem siam danglam hretin, kan hnam kan inpumkhat chuan ram leh hnam kan humhalh nghal a ni tih hriain ‘Hnam inpumkhat’ te han ti sela, tuna an ṭhahnemngaih anga ṭhahnemngaiin han bei sauh sauh sela chuan kan duhthusam ram chu kan hnaih chak hle âwm asin.
Tunah zawng, ṭhangṭhar mithiam an lo chhuak zel a, zirlaite mit a rawn keu ṭan ta a. Lehkha thiamte pawhin kan ram leh hnam dinchhuah nana hnam inpumkhatna pawimawhzia an rawn hmu chiang zel a. Heng Zoram fatlumte hian Zofate inpumkhat hma chu Zoram khawvar nghaktute tân rimawi bengchheng an khâwng reng tawh dawn a ni.
Rinawmna chibai inbûk ang le.
13.9.2013
Share:

03 September 2013

Thianpa bialnu nen kan inthen!

Bus chhung ka thutna hma chiahah hian nula pakhat hi a thu a. Kawng a chhiat avangin motor a insawh leh dawt dawt thin a; chu chu remchangah lain a lam hnaihah ka va bu phei zauh thin a, a hmel tak hmu thei lo mah ila a hnawih rimtui chu mi tivir tâwk lekin ka chhim pha hman hram a.

Chutianga motor a insawh a insawh takah chuan a taksa lang thei chin tlemte atangin a no hle tih ka va hmu thei a. A mal chungah a bag pahnih a pawm a, a bag pakhat zawk chhunga teddy bear senno chu ka va hmu thei ta hram bawk a.

Kan tlan zelna turah kawng an lo siam avangin motor chu a tlan zel thei ta lo va. Loh theih lohvin ke-a kan kal a ngai ta a. Ka hmaa thu nula-i chu ka hmu chiang ta a. A hmel a tha zawng ka ti hauh lo va, mahse, hmelthaa sawi tur ni lo duhawm deuh hi a lo ni reuh va.

Kan kal ta deuh va, remchang zawn vang pawh ni lovin a teddy bear ahna bag zawk chu khaisak ka tum a, a tang hle nachungin ka khaisak thei ta hram a; a tang tluan thei ta ngang lo te pawh a tih theih tho ang chu. Kal pahin kan titi zel a.

A âw te lah chu beng tivir tâwk lekin a'n no nalh em em mai a, Mizo tawnga ka thumal nalh tih berte zinga mi 'fîm' leh 'tliang' chu a aw sawifiah nan a tâwk zo hle âwm e. A taksa a no tawh si a, amah a lo no lehzel bawk si a, a thil pawimawh ka pawmsak bawk si a; chuta ka awmdan tur chu a duh apiang tana inrinsiak mai mai turah dah ta ila.

A hmel ka en leh thin a. A tawng hi a tawng a ni ringawt lo, a tawng siam siam mai a ni. Ni a tlangsang a, khua a lo lum ta deuh va, a lo kal hah deuh bawk nen, a biang chu a rawn sen tai ta tãk mai a! A chal sam tona vel chu thlanin a tihuh hlap a. "I hah tawh em?" ka ti a, a hah loh thu leh kea thui tak tak a kal thin thu min hrilh mai a.

Kawngah diak a lo awm a, rah ngei ngei a ngai a. Kei ka kal hmasa a, a nâl avangin 'min vuan rawh' ka tih miah lohvin, loh theih loh vang zawkin ka kut a rawn vuan a, ka têk deuh chhak a. Mel chanve vel tal diak awm sela ka ti ngei mai. Diak a rah hnuah mi thlah leh mai a, ka kut a ruak huai a.

Amah lah chu a inchei nalh em em mai lehnghal a. Class kal tur ka nih avangin ani pawh a nih ka'n ring thla nghal ngawt a. Ka zawt a, a lo ni ngei reng a. A teddy bear ken chhan te ka zawt leh a, hostel-a a luh dawn thu leh a thawmhnaw thenkhat a lak thuin min chhang a; class kal nghal a tum bawk tak e.

Kan class kalna tur hmun kan thleng dawn ta a. Kan class neihna hmun a inan loh avangin kan inthen a lo ngai dawn ta a. Kei chuan score tha inti takin a bag ka ken chu ka pe a, ka pek pah chuan a teddy bear ah chu ka'n hmu kher a. Ka hmu mai ni lovin teddy bear-a thuziak awm ka va hmu tel ta kher a!

'With Love...' tih chu! Ka hrethiam nghal a, ka tla ta rawih rawih mai a!

Tichuan, innei miah lovin kan inthen ta a ni.

3.9.2013
Share:

30 August 2013

ZOTALK thlirletna

1. Pu Duhoma interview-ah khan a zawttute leh a zawha te an inhnehtawk ka ti a, Pu Zorama interview-ah khan Pu Zorama kha a chak lovin a tua te mai pawh hian an ngam em em a, Pu Hawla interview-ah a zawttute leh chhimtute-ah Pu Hawla'n ngam loh a nei lo; a CM huhang hi a na hle pawh a ni maithei.

2. Pu Duhoma leh Pu Hawla hian pawi insawisak tawn an hlau hle. Pu Duhoma interview-ah MPCC atanga kal an awm lo va, Pu Hawla interview-a ZNP aiawha kalte kha an zâm chhe der mai! An zawhna ang kha pawl 10 zirlai pawhin an zawt ve thei ang.

3. Pu Duhoma chu ka hre lo; Pu Zorama leh Pu Hawla thluak hi tunlai khawvela CM turin a fit tawh lo. Congress emaw, MNF emaw pawh lo sawrkar se, CM turin midang hmang sela ka ti ngawt mai.

4. Pu Hawla hi a tar tial tial a, a tawng a thlahdah telh telh. A interview en phei chuan, a zawttute'n an zawh laia a lo tawng zawt zawt te kha a huatthlala ka ti a; Pu Zorama kha tham loh hmel takin zawhna an zawt niin a lang a, Pu Hawla erawh chuan tham loh hmel takin a chhang let niin ka hria.

5. An sawrkar tirh atanga an sawrkar tawp thleng pawhin CM hian 'Corruption hi a zung chawpa phawiin kan phoro ang' a la ti fan! Mahse, 'kan tihtur a ni lo' a ti lawi a. A Thil ti dik lo buaipuitu turin PRISM leh SOSA an awm alawm a ti leh et a, PRISM leh SOSA hi awm lo ta se tiin ka lo ngaihtuah. Tin, kan CM zahawm tak hian eiru-a an sawi, finfiah miah loh hi mipui hmaah huai takin a lo sawi chhuak thin a lo ni!

6. Pu Zorama leh Pu Hawla hi 'Corruption-ah i fihlim em' tih zawhna an chhan dan atangin mipuite chuan an fihlim leh fihlim lohvah ngaihdan kan siam thei tawh. Tuna Mizoram sawrkar sum dinhmun tha lovah hian eng party president mah hian a sutkian dan tur an hre lo niin ka hria.

7. Eng party pawh lo sawrkar se, eng party president pawh lo CM sela, CYMA hmalakna (fuh lo lai) dodal zawnga huai taka hmala ngam tur an awm lo. Saikhumphai chungchangah sawrkar hian hmalakna 'pangngai' engmah a nei lo tih a chiang bawk.

8. Mipui hi kan taimak a hun. Party tinte hian eng manifesto nge an neih, an sawrkar hnuah an bawhzui tha em, an ngaihsak em tih te hi kan ngaihven a ngai. Mipui kan taimak a hun takzet. Host-tuin a interview-a te talbuai theihna turah a zawhnaah: Pu Zorama chu a insawi chhuakin a insawi thiam thei zel mai a, Pu Hawla erawh a tâng chat chat a, a insawi chhuak thiam thlawt lo! 'Thudik hi sawi tawp mai zel a tha a' tihah a tlâk tawp zel.

9. Pu Duhoma, Pu Zorama leh Pu Hawla te pathumah CM tawh pahnihah chuan CM turin Pu Hawla ka duh zawk a, an pathum zingah Pu Duhoma ka duh ber; a ngaihna a hre ber tih hi an pathum interview ngun taka ka en atanga ka ngaihdan a ni.

10. Pu Duhoma kawm atanga Pu Hawla kawm thlenga party aiawhte zingah Pu MC Lalrinthanga ka duh ber! A huaisen ber a, a zawhnain awmzia a nei ber a, ngaihtuah zui tlak thu a pai hnem ber a, a technical ber a, a chhangtu tur tan a chhan tham ber bawk.
Share:

17 August 2013

'CHHUM DUM KARA CHHÊMDAM THLI' tlangzarh a ni ta

Ka lehkhabu pathumna 'CHHUM DUM KARA CHHÊMDAM THLI' tih chu vawiin, August ni 17, 2013 chawhma dar 11 khan Aizawl Press Club-ah VLC Vanlalhriatrenga chuan a tlangzarh ta.

Programme hi dar 11-a tan tur tih a ni naa, power supply awm loh avangin minute 15 kan nghak a, a awm loh tak zel avangin a hângin programme tan a ni ta a. Tlangzarh inkhawm hi Lalmuansanga Hlondo-in kaihruaiin V. Lalmuanpuia'n Pathian hnena hlanna hun a nei a. Chawnglianmawia Chawngthu-in lehkhabu thlirlawkna hun a neih hnuin VLC Vanlalhriatrenga'n a tlangzarh ta a ni.

VLC Vanlalhriatrenga'n a tlangzarh
Tlangzarh hnuah thiam tak maiin Kanan Ramchullovi'n zaiin min awi a; thusawi bengvarthlak tak tak leh ngaihnawm tak takte ngaihthlak chhunzawm a ni bawk a. Dar 1 rik dawnah kan tîn thei hram a ni.

Kanan Ramchullovi
Hei hi ka lehkhabu pathumna a ni a, ka thuziak hrang hrang dahkhawmna a ni. Then 4-ah then niin Then Khatnaah hian ka thawnthu tawi phuahchawp 10 a awm a; Then Hnihnaah midang leh thil thleng tak tak chanchin ka ziah 8 dah a ni a; Then Thumnaah thuziak hlimawm lam 11 a awm a; Then Linaah ka hun lo hman tawh dan leh keimah kaihhnawih thuziak 8 a awm bawk. He lehkhabu hi ka thuziak hrang hrang 100 chuang zinga ka duh zual 37 ka dahkhawmna a ni ber mai.

Rosy K. Remsangpuii fuihna thusawi
Tun laiah chuan hun hi a uiawm tawh a, mi tu pawh mai hian hna kan ngah em em tawh a; keimahni avanga mi hun hlu tak han tihbuai hi a inthlahrunawm ngawih ngawih tawh a. Chuti chung pawha ka lehkhabu tlangzarhna hun ngai pawimawhin mi 70 chuang lai mai an lo kal khawm a, ka lawm kher mai. He huna lo kalte hi hlãwm eng emaw zatin a then theih a! Govt. Aizawl College atanga lo kal ka lehkha zirpui leh SU lama ka thawhpui te, Mizoram University-a ka lehkhazirpui te, zirlai pawl hrang hrang - MSU, MZP, Chalfilh Constituency Students' Union, Vanbawng Students' Union, SSPP leh ZORO atanga lo kal te, Internet lama ka thian duhawm tak tak te, thu leh hla lama ka kut hleipui te leh Mi Anglo Thianho te an ni hlawm a ni.

Tlangzarha kalte
Lehkhabu chhungah hian ka hun lo hman tawh dan ziakna a awm nual mai a, mahni chanchin ziah vak vak chu tih pawh thil awm thei a ni a. Ka chanchin ka ziah hi, ka ziak chhuak a ni satliah lo va, keimah ang bawka harsatna lo tawk thinte'n tumruhna tha zawk an neih theih nan te, beidawng lova bei hram hram duhna thinlung an lo neih theih nan te-a an lo hlawkpui theih mialin ti-a dah hram ka ni a. Mahni insawi khawngaihthlak tumna ngawr ngawr te pawh a ang viau mai!

He lehkhabu hi phek 233-a chhah niin cheng 100 man a ni a. Synod Bookroom-ah te; CVL Bass, Zarkawt-ah te; Sailo Book Store leh  RL Nutei Book Store, Bara Bazar-ah te; VLM Book Store, Bawngkawn & Ramhlun Industry Peng-ah te lei theih a ni a. Thingtlang lama awmte tan Synod Bookroom branch awmnaah tawh phawt chuan lei theih a ni bawk.


Share:

06 August 2013

Rzi tan


Thiam zir rûn bêlin tuktin ka chhiar a,
Rûn mawitu an tam ngei lêng zawng zingah;
A sakhming leh hmel a mawi chunglur e,
Hnehbàn loh sakhming pawi lo Rzi!

Chhuihthangval uaitu a chhîngmit meng please,
Thinlai dêktu khuavang chhinchhiah zawng nen;
A hlu chuang ngei a seih mawi riang val tan,
A sakhming ka chawi khuavang note hluan!

Vul la vul la vul reng la khuavela'n,
Êng la êng zual zel rawh zir rûn mawia'n;
Chutin ka fak nang e Siamthemthiama,
A themthiam em a ni i siamtu hi!

4.7.2013
Share:

Thumal khat

I kimtlang pheichheh zeizia chevel khan,
Min lêm zo ngei mitthlaa'n i châm reng mai;
Mipaa hneh theih zawng zawng hnehtu chu,
Nang ngei hi i lo ni e Thafamkim!

Ka dâwn ngam lo tiang reng reng mai chuan e,
Ka hmakhaw hriltu i zawlaidi nêm;
Min hlãn mai ta che i ankanêm nen,
Ka ring si lo chu êm a sáng lua e!

Ka chhai ngam dan tâwk che chu duhaisam,
Ka hmuh ngam dan tâwk che chu chhîngmitthla;
Ka tawn ngam dan tâwk che pawh tawnmangmâwl,
Pawi ta ber chu thumal khat 'married' kha!


3.7.2013
Share:

18 July 2013

Kan duh loh kan tih a ngai leh thin

Tun hnaiah sawrkar hna lak hrang hrangah felhlel a tam ta hle niin a lang a. Hei hi kan ram kalphung ve rëng anga ngaihna pawh a awm ta hial mai. Tun hnaiah MPSC hna lak theih chin chungchangah kan zirlai pawlte atangin dodalna a awm ta hial a. Departmental exam-a hna lak a nih hian duhsak zawngte thunluhna remchang tak a awm thin niin a lang a, hei hi zirlai pawlte duh loh chhan tak pawh niin a lang a. Mizo Students’ Union phei chuan July ni 30-ah Aizawl khawpuiah total bandh huaihawt a tum hial a, heta a hlawhtling lo a nih chuan district headquarters tinah bandh hi neih chhunzawm an tum thu an sawi nghe nghe.

A thawnthu
Kum 1989-a Mizoram Public Service Commission (MPSC) din a nih atang leh, kum 1991-a hna a thawh tan tak tak atanga chhûtin MPSC hna lak theih chin (Limitations of Functions) hi vawi 6 lai siamthata tihdanglam a ni tawh a. Hei hi eng vang nge tih hi zawhna pawimawh tak a ni thei ang. Sawrkar hian an duhsak zawngte sawrkar hnaa thunna remchang an zawng em ni tih mai pawh awl tak tur a ni. Kum 2008 MPSC (limitations of functions) Regulation-ah chuan, sawrkar hna lak reng reng, Group ‘B’ Gazetted leh Non-Gazetted Post chin zawng MPSC kuta dah a ni a, hei hi Mizo thalai, a thiam leh tlingte ngeite sawrkar hnaa an luh ve theih nana a that viau laiin he dân hi kum 2011, May Ni 30-ah sawrkarin a siam danglam leh a. Kum 2011 MPSC (Limitations of Functions) Regulation sawrkar-in a siamthat (ammend)-ah chuan, sawrkar hna lak turah Grade Pay Rs. 4400/- chin MPSC-in hna lakna an kalpui thin chu Gazetted leh Non-Gazetted Post thliar lovin MPSC kut atangin sawrkarin a chhuhsak leh vek a, hei tak hi Mizo thalai hna zawngte tan beidawnna tham a tling. Grade Pay Rs. 4400/- chinah hian hna pawimawh tak tak a tam avangin hei hi ngaihthah mai mai chi a ni lo.

MPSC a tha bik em ni?
Mizo zirlaite zingah graduate leh post graduate hi kum tin sâng têl kan chhuak ve zel a, sawrkar hna inchuhna a lian chho tulh tulh a, hna lak dik lo leh felhlel a huatthlala telh telh bawk a. Chutih laiin deparment-in hna lak a kalpui danah eng party pawh sawrkar se, duhthusam lohna tam tak a awm chhoh tak zel avangin hna lakna tam zawk Mizoram Public Service Commission (MPSC) kuta dah hi Mizo thalai hna zawng mek, hmelhriat tha leh tihpuitu tha nei ve lote tan a him ber niin a lang a. MPSC hna lak zawng zawng hi felfai famkim sawisel bo tihna erawh a ni chuang lo va, zawhna siam chungchangah te pawh eng eng emaw tihsual palh sawi tur chu a awm ve tho mai. Amaherawhchu, MPSC hna lak tawh reng rengah induhsak bik avanga hna lakna kalpui hi sawi tur a vâng khawp mai a, chuvangin duhthusam ni famkim lo mah se department-in hna lakna a kalpui aiin an hna lak chu a felfai zawk tura ngaih a ni hrim hrim a. Chuvangin, hna lak dan dik lo a tlem zawk nan MPSC-in sawrkar hna lakna a tam thei ang ber an kalpui hi a fuh zawk a, zirlaite leh thalai hna zawng mekte duhdan zawk ni pawhin a lang.

Kan tanrual a tul
Sawrkar hna lak reng rengah eng party pawh sawrkar se mimal leh party induhsakna hleihluak tak avanga Mizo thalai, a thiam leh tlingte, hmelhriat tha neih ve loh avanga hnawl an ni fo hi a pawi lungrun a, a thiam leh tlingte hnawl an nih zel chuan, Mizoram hian a la tuar ngei ang tih a lang reng mai. Mizoram sawrkar-in Grade Pay Rs. 4600/- hnuai lam Departmental Exam-a hna lakna a kalpui mekah hian, a thiam leh tling zawkte duhsaktu tha neih loh avanga lak tâk loh an awm thin avangin sawiselna thawm a ri ring hle thin a. Eng sawrkarah pawh, hna laknaah Minister, Department Officers-te leh Party Office zuan khum a harsat thin em avangin sawrkar hna pawimawh Group B, Grade Pay 4400/- chin post pawimawh takte phei hi chu MPSC kuta dah a dik leh felfai taka hna lakna buatsaih hi Mizo thalai hna zawng mekte tan leh Mizoram tan a him ber a ni. Chuvang chuan Group ‘B’ Grade Pay Rs. 4400/- china hna lak awm reng reng, Gazetted leh Non-Gazetted Post huam vekin MPSC kuta dah let leh tura Mizo Students’ Union-in hun rei tak kal ta atanga hma a lo la tawh hi a lawmawm a, a hlawhtlin ngei theih nan Mizo mipuite’n kan thlâwp a tul takzet a ni.

Thalai lehkhathiam lo kan pung a, hna zawng kan tam telh telh a. Hna lak dik lo a huatthlala telh telh a. Mizo thalaite pawh he lamah kan thangharh tan niin a lang a, a lawmawm hle. Dik lo taka hna lak hi a huatthlala em em a, mi’n rim tak leh hah taka kum tam tak an lo sual chhuah tawh thiamna mimal induhsakna avanga inhnâwlsak phei chu a na takmeuh a ni. Tunah phei chuan hna lak chungchanga duhsak zawngte thun thin hi fiamthu-ah tak kan hmang ta hial mai! Hna lak tur thâwm awm ‘Tihpuitu tan lo chuan chance a awm lo’ tih hian a zawm zat thin. A sawi uar deuhte phei chuan ‘Interview & Written Test hmain an la fel vek tawh’ an ti fo!
Hetianga hna lak dik lo hian thil pawi tak a thlen thei a, kan moral pawh a hruai dik lo zo ta a nih ber hi maw! Hna lakah lo pawh, exam leh test a awm reng rengin hmelhriat nei chuan an zar zo kan tum ran a, sawipuitu tur kan dap ruai thin. Hei hi kan moral chhiat tawhzia a lanchhuahna a ni. Hei hi kan tihbo a tul! A tul takzet! Chumi tur chuan, MPSC kuta sawrkar hna a tam thei ang ber dah hi a kawng awlsam a ni. Chumi tur chuan sawrkar a chêt a ngai a, nawrkal ngai sawrkar a nih avangin a nawrkal turin Mizo mipuite inthurual taka kan thawhchhuah a tul hle a ni.

Grade Pay Rs. 4400 chin hna hrang hrang te
 Hna hming - Department 
1. Asst/Steno-II - Common Service 
2. Computer Operator - Common Service 
3. JE - Common Service 
4. Staff Nurse - Common Service
5. Asst. Treasury Accountant - Account & Treasury 
6. Asst. Divisional Accountant - Account & Treasury 
7. Asst. Auditor - Account & Treasury 
8. Jr. Extension Officer - AH & Vety
9. Jr. Farm Manager - AH & Vety
10. Research Investigator - Art & Culture 
11. Inspector of Statistics - Economics & Statistics 
12. Forest Ranger - Environment & Forest 
13. Sub. Inspector - Excise
14. Asst. Supdt. of Accounts - Food, Civil Supply & Consumer Affairs  
15. Inspector of Supplies - Food, Civil Supply & Consumer Affairs
16. Inpector of Legal Metrology - Food, Civil Supply & Consumer Affairs 
17. Technical Asst. - Fisheries 18. Technical Asst. - Health & Family Welfare 
19. Physio Therapies - Health & Family Welfare 
20. Sr. X-Ray Technician - Health & Family Welfare 
21. Sr. Laboratory Technician - Health & Family Welfare 
22. Radio Therapy Technologies - Health & Family Welfare
23. Deputy Librarian - Higher & Technical Education 
24. Sr. Horti Demonstrator - Horticulture 
25. Foreman - Industries 
26. Handloom Officers - Induatries
27. Forensic Science - Police 
28. Sub Inspector - Police 
29. Asst. Jailor - Prison 
30. Depo Manager - Printing & Stationaries
31. Asst. Technical Officer - Printing & Stationaries 
32. Draftmans - Power & Electricity 
33. Revenue Inspector - Revenue 
34. Cartographer/Surveyor-I - Revenue 
35. Train Graduate Teacher - School Education 
36. Seri Extension Officer - Sericulture 
37. Soil Ranger - Soil & Water Conservation
38. Inspector of Taxes - Taxation 
39. Asst. Tourist Officer - Tourism 
40. MVI - Transport
41. Asst. Station Superintendent - Transport
Share:

03 July 2013

India Union hnuaia Mizoram kan luh dan

-Prof.J.V. Hluna
(MSU 28-06-2013; 11 AM Aizawl Club)

(He thu hi Mizo Students' Union-in June ni 26, 2013-a Aizawl Club-a 'India Union hnuaia Mizoram kan luh dan' tih thupuia hmanga symposium a buatsaiha Prof. JV Hluna paper present a ni).

British lawng sipaite’n Spanish indo lawngrual, Invincible Armada an hneh khan an phur thar a. London sumdawng hausa ho chuan India rama bu rawn khuar hi hlawk riau dawnin an ring ta a. East India Company an din a, Queen Elizabeth-i hnen atangin 1600 December 31-ah phalna (charter) an la a. Sumdawng tura lo kal khan ram an la zel a, Lord Dalhousie, Governor General a nih chhung 1848 – 1858 khan India ram pumpui awptu (Paramount Power) an ni ta der mai a.

Kan ram thenawm, Cachar leh Chittagong te, Burma te pawh hemi chhung hian an awp ta vek mai a. Kan pute Sai ram chhuahna ngawpui tha tha chu thingpui huan atan an rawn vat eng ta hum hum mai a. Chu chu ngai thei lovin kan Lalte’n an pasaltha te hruaiin vawi tam tak an run a. Mangang taka an siam avangin inremna siam an duh a, nasataka an dawr hnuah Sapho Aizawlah lo zinin kan pu Suakpuilala nen January ni 16, 1871 khan tuna Millennium Building awmna chhak lam tlang zawlah Saui (Sunnud) an tan ta a, tumah intibuai tawh lo va, a tul anga insumdawn tawn tur leh intanpui zawk turin remna an siam a ni. Hemi kum vek hian Chhim lam Lal Rothangpuia leh Chittagong-a British bawrhsap T.H. Lewin (Thangliana) chuan Tlabungah inthianna thu an thlung bawk a. Heng hi British India nena mumal deuh va thuthlung kan neih hmasak ber a ni a. An awpna hnuaiah kan intulut a ni lo va, intihbuai loh kan intiam tawn mai zawk a ni.[1]

Hemi hnu hian thingpui huan chu kan ram lamah an la rawn zauh lui ta fo mai a. Lal Bengkhuaia pasaltha te chuan an zuk bei let a. January 23, 1871-ah Alexandrapur Thingpui huan Sap, Mr Winchester-a leh a labour engemaw zat an that a, a fanu naupang kum 6 mi lek, Mary Winchester leh midang 37 lai salah an man bawk.[2]

Mizo te awpbeh tula an hriat avangin Vai Lian vawi hnihna chu an rawn thawk leh a, May 1890-ah Capt. Browne leh Suakpuilala thlahte chuan remna an siam a. Fort Aizawl leh Fort Lungleh leh Vanlaiphai-ah Fort Tregear te dinin an awm nghet ta a.[3] Kan Lal tam takte’n ramdang mi hetianga an mahni thu a kan ram an luah ta mai hi an ngaithei lo va, an la indo deuh fo a, mahse a dotu apiang an tlawm zel a. British India Governor General Foreign Department thuchhuah chuan Sept 6, 1895 atangin Mizoram chu British India a nih a puang ta a ni.[4]  Assam Chief Commissioner hnuaiah Superintendent-in a awp ta a.

Mizote’n kan tihbuai tawh loh nana senso tlem thei ang ber a mi awp hi British ho tum dan a ni a, tlangram danga an lo hman tawh, Schedule District Act of 1874 (Act 14 of 1874) chu kum 1898 atangin Mizoramah an hmang nghal a. Vai dangin an duh duh a min tlawhpawh theih loh nan Regulation pahnih – Chin Hills Regulation 1896 (Regulation V of 1896) chu October 11, 1911 atangin, a dawtah Bengal Eastern Frontier Regulation 1873 (Regulation V of 1873) chu an hmang a.[5]

Government of India Act 1919 kum 1921 atanga hman a nih khan Assam chuan Provincial Legislature an nei a, Mizoram leh tlangram dangte chu Backward tract-ah puangin Assam Legislature-ah kan tel ve lo va. Kan hmasawnna a nih beisei a Assam Legislature-a tel ve dil Kulikawn pa ho 1924-a Shillong kal haw pawh Aizawl an lo thlenin an man ta mai a nih kha. Kum 1935-a Government of India Act-in India mite thuneihna sang zawk a pek pawh khan keini chu mahni hmasawnna ngaihtuah thei lo, Excluded Area-ah mi an dah leh ta a. Chu chu Governor General-in-Council  in Assam Governor kaltlangin mi a awp a ni. By Order of the King’s most Excellent Majesty in Council Lushai Hills was declared to be an Excluded Area under the Government of India Act by order 348 Fr. Dated April 15, 1936.[6]

India National Congress-in Independence an sual na telh telh a, British sorkar pawh chuan chu lam hawiin rorelna a kalpui hret hret a. Hemi hre reng hian Assam Governor Sir Robert Reid chu ama bial mi te rilru hre turin a zin kual vel a. Confidential note: “A note on the future of the present excluded and partially excluded and tribal area of Assam”, 7-11-1941 khan a siam a. Chutah chuan a hnuaia bawrhsap pahnih- Dr John H Hutton, C.I.E., rei tak Naga Hills Deputy Commissioner lo ni tawh leh  N.E.Parry ICS, Garo Hills Deputy Commissioner a nih hnua Lushai Hills Superintendent ni mekte’n tribal an hmuh dan chu Reid a ngaihdan nen a thuhmun a ni tih a hriat a. A sawi dan chuan heng tribal te hi ‘Racially, Historically, Culturally and Languistically” in Assam phai mite  nen an danglam a, an inawpna pawh a danglam hlauh bawk a. Chutiang anih a vangin Northeastern Frontier Province hran siam nise, chutah chuan Assam leh Burma-a Backward tracts te hi dahkhawm a, zawi zawia self government or semi-independent emaw a dah a, an external relation chauh Governor kutah dah chi a ni.[7] A footnote-ah chuan a pawimawhna a hrilhfiah a-China leh Japan indo leh II World War 1939 avang hian Northeast Frontier-a chengte hi Tibet, China, Burma leh Japan te nen an inhnaih sawt dawn si a, a ti nghe nghe a ni. Governor ngaihdanah chuan he rawtna hian Lushai Hills te, Chittagong Hills Tract te, tuna Arunachal Pradesh te, Nagaland te, Chin Hills te, Shan State te, Khasi Lalram 25 leh Manipur leh ram la awp loh (unadministered) area ami a huap vek a. Burma ram tel lo pawhin hemi area-ah hian mihring maktaduai 2 leh a chanve vel an awm a ni. Robert Reid-a ngaihdan chuan heng tlangram te hi mahni intodelh vek an ni a, hnatlangin kawnglaih leh leihlawn dawh pawh an ti thei a. Sum an nei lo va, chu chu Imperial Source atangin pek ni se. Burma Frontier service mite administration lam enkawl tir nise, sum leh administration hi India atanga ti lovin British sorkar WhiteHall atang veka enkawl ni se.[8] A ngaihdanah chuan heng lai ram hi Assam Ministry atanga awp chi a ni lo a ni.

Prof. David R. Syiemleih-a sawidanin Sir Robert Reid-a confidential note hian Viceroy, Lord Linlithgow leh L.S.Amery, Secretary of State for India te a thleng thuai a. Amery hian tha a ti hle a, Prof. Reginald Coupland, Law member of British Council hnenah a hlan chhawng a. Chuvangin Crown Colony hi Coupland-a emaw McDonald emaw rawtna a ni lem lo. He rawtna hi JH Mitchell, Chairman Commission on Scheduled Area of Burma chuan a duh ve lo va. L.S.Amery te Lord Wavell leh Sir Reginald Dorman- Smith te’n London-ah an sawiho va, he thu Burma Frontier leh India hmarchhak tribal area suihfin hi 1943-46 thleng khan ngaihtuah a ni a. Ngaihdan tlangpuiah chuan hnam chi khat chu thendarh lo va, awp khata an awm theih dan tur a ramri siam tha an ti a, mah se JP Mills, Adviser to the Governor of Assam chuan Governor-in tribal area leh excluded area te chu ram hranga dah lo va, Assama bei tir chu a ngaihdan a ni tih ziakin a thlen ve leh ta tlat a ni.[9]

Hetiang Crown Colony Plan hian mumal taka sawiho emaw mipui support emaw a hmu lem lo va, Khasa Politician lar ber Rev. J.J.M.Nichols Roy chuan British Cabinet Mission-ah Memorandum theh lutin, Tribal Area leh Excluded Area te hi Protectorate-a dah a nih chuan sum leh paiah an harsa dawn a, India Independent hun chuan Assam hnuaia an awm a rem ber ang a ti a. Jaintia aiawh Rev.L.Gatpoh chuan Jaintia chu protectorate-a a awm tha a a rinthu a sawi a. Garo hruaitu pathum te chuan British Parliamentary delegation hnenah protectorate-a awm ai chuan Assam zawm an duh zawk thu an lo thlen ve bawk a. Naga hruaitute 1945- kum bul lamah Kohima-a kalkhawm chuan British Crown hnuaia awm a, anmahni a Legislative Council neih an duh thu an puang thung a. Mizo hotute (Mizo Union) chuan  Crown Colony emaw Protectorate emaw ai chuan Assam hnuaia Autonomous status –a awm an thlang bawk a.[10]

Indopui II  Nghawng
Indopui pahnihna khan Mizote rilruah hnam rilru putna a chawk tho hle a, Japan-in Burma an la tawh a, Imphal luh an tum a, Mizoram an rawn thleng lek lek tawh bawk a. Superintendent A.G.Macall chuan ‘Total Defence Scheme’ a duang chhuak a. Kum 1942 April thla chuan Mizo Lal zawng zawng Lammualah ko khawmin British tanpui turin a ngen a. A ngenna chu an vaia rem an tih hnu chuan British puanzar (Union Jack) an dinhual a ‘Japan kan do ve’ tiin indo an puang ve ta hial a. Pasaltha pawl A leh B an siam a, Assam Regiment-ah te Burma Army-ah te, India Medical Corp-ah te, Lushai Scout-ah te, Airforce leh Navy-ah te, Auxiliary Nursing Service-ah te an lut bawk a. Mizo 3551 laiin War Service kha an zawm a ni. Mizo tlangval 60 lai Singapore-ah Japan salah an tang ve nghe nghe bawk. Dr. Suhash Chatterjee sawi dan chuan President Roosevelt an February 22, 1942-ah Right to Self Determination a puang a. Hemi hnu lawkah Atlantic Charter-ah he thu bawk hi puan nawn leh a ni a. Mizo lehkhathiam te’n Atlantic Charter te an hre hle a, an sawi an sawi a, a hran ngata Lal hovin Indo an puan avangin hnam hrang – ‘Seperate National Identity’ neia an inhriatna a san phah hle niin a sawi.[11]

Lord Mountbatten leh Cabinet Mission
Indo a lo reh a, India Independent tura inbuatsaihna pawh a kal mup mup bawk a. Hemi chingfel tur hian Prime Minister thar Clement Atlee-a chuan Lalchhungkaw mi Lord Louise Mountbatten chu thuneihna sang tak neiin Governor General atan a rawn tir a. March 22, 1947-ah Delhi-ah a hna a zawm a, Cabinet Mission Plan May 16, 1946-in Mountbatten thurawn an tihchhuah chu India leh Pakistana then bakah India Raja 550 lai Princely State te chu duhthlanna chi thum a pe a, chungte chu:- (i) India Union zawm, (ii) Pakistan Zawm, (iii) Independent-a awm.

Cabinet Mission chuan British India hnena Independent pek a nih chuan Raja (State) te leh British Crown inzawmna chu a awm zui thei dawn lo va, Sorkar thar lo piang tur lo tawiawm mai chu an tih tur nia an beisei thu an sawi a. Cabinet Mission-in ‘Memorandum on States’ an ziak May 22, 1946-ah chuan ‘His Majesty Government a tawp dawn a, heng Raja te hian awm dan tur chu an thlang thei a, mah se British sorkar chuan tumah an zawm tur hmin tumin a sawipui dawn lo. Heng Lalte hi mahni a din an tan a harsat dawn avangin India emaw Pakistan zawm mai hi  an tan a that ber a rinthu Secretary of State-in a sawi.[12]  Cabinet Mission rawtna chu British sorkar hnenah an thawn thla a, India Independent Bill chu an buatsaih a. ‘British sorkar chuan India chu August 15, 1947-ah a chhuahsan ang’ tih a tel a. Chu Bill chu British Parliament-in July 18 1947-ah an pass ta a ni.

Independent Bill thuchhuak angin Northwestern Province leh Syhlet-ah vantlang duhthlanna ‘Referendum’ chu neih a ni a. Pakistan zawm duh an tam zawk avangin, Pakistan-ah an tel ta a. Punjab leh Bengal then chungchangah Boundary Commission din a ni a, Beldevere, Calcutta-ah an thu a. Assam Congress hotute chuan Mizo Union General Secretary Pu H.Vanthuama hnenah thirhrui thawnin ‘Mizo Union-in Pakistan hnuaia awm in duh loh chuan in duh loh thu, Boundary Commission Beldevere-a thukhawm hnenah thirhruiin in hrilh thei ang’ an rawn ti a. Muslim hruaitu Moinul Hug Chowdhury-an Pakistan zawm tura a thlem hle chungin a hmin thei lo va “Mizoram chuan Pakistan hnuaia awm a duh lo” tiin thirhrui an zuk thawn a.[13]

September 2, 1946-ah Governor General chuan India Interim Government chu a la lut a, tah chuan Pu Nehru-a chu Interim Government Vice President-ah dah a ni a. President erawh chu Governor General a la ni. He Interim Government-ah hian Muslim League an tel duh lo va. Heng thu hi Mizo Union pawhin lo hria in hetiang hian hla an phuah a, an sa dul dul thin-.

                Vice President Nehru-a chuan,
                India ram leh Assam hi,
                Zalenna kawng a hawng an ti,
                Vantlang kan hlimtlang ngei e.

August 14, 1947 zan dar 12 chuan Pakistan khawpuiah chuan Pu Jinnah chuan Pakistan Dominion Governor a chelh tan a, Pakistan chu a lo piang ta a.

August 14, 1947 zan vek hian India Constituent Assembly member te chu Delhi-ah an inkhawm a, India Union Dominion Governor General atan Lord Louise Mount Batten chu an ruat a, Sovereignty chu a la nghal a. A tuk zingah Governor General chuan  Pandit Jawarhar Lal Nehru chu India Union Dominion Prime Minister hmasa ber atan a ruat fel leh ta a.

Aizawl khawpui-ah chuan thuneihna te engmah a danglam chuan loh avangin engmah tih vak a awm lo. Superintendent Office-ah pawh India Flag tar a awm chuang lo va. Bawrhsap chuan India Flag a tar lohna chhan chu India Flag a lo neih loh vang niin a sawi. Mizo then khat chuan Kawngzawh turin rawtna an siam a. Mahse Aizawl mi then khat te’n an ngaihthiam loh em avangin kawngzawh chu tih a ni ta lo. Mizo Union Office bul velah mi tlem te chu an thukhawm awm e.

Bordoloi Sub Committee
Constituent Assembly of India chuan January 25, 1947 –ah Advisory Committee on Minorities and Tribal Areas, etc. an siam a. Chairman-ah Sardar Valladhai Patel an ruat a, chu Committee chuan Sub Committee an ruat leh chhawng a, Chairman ah Gopinath Bordoloi an ruat a. Northeastern Tribal Area leh Excluded & Partially Exluded Area chungchang ngaihtuah tura din a ni. He Sub Committee hian Vote nei lo, Co-Opted member atan Pu Ch.Saprawnga leh Pu Khawtinkhuma, Mizo Union ve ve chu an ruat a.

Mizo Union a lo din khan an duh dan a khal nghal hle a. An General Assembly neih hmasak ber Boys ME School-ah September 24-26 1946 khan ‘Mizo Lal te thuneihna hlihsak’ tih leh ‘India Independent hunah Mizoram chu Assam-a beh nise, Legislative Assembly-ah Member pathum neih ni bawk se’ tih resolution an siam nghal hmiah a. Hemi hma May 25, 1946-ah an conference (Assembly ni lo) hmasa ber an neihah ‘Mizo Union chauh hi Mizo mipui aiawhtu an nih avangin an remtihna la hmasa lovin tuman engmah tih a rem lo’ tih resolution an siam tawh bawk a.

November 7, 1946-a District Conference chuan Mizo Union Resolution hi an helh hle an Bawrhsap pawhin a helh a, Mizoram aiawh diktak nei turin Bawrhsap McDonald-a chuan District Conference a bialtin aiawh tur thlan that a rawt a. Mizo Union chuan he inthlan hi a boycot a, Lal leh hnam chawm member inzat neih an duh lo va, hnamchawm aiawh member an tam zawk tur a ni an ti a ni. Union-in an boycot chung hian April ni 9-ah Aizawlah, April 14-ah Lunglei-ah inthlan a awm ta tho va. Mizoram-a aiawh roreltu thlanna hmasa ber a ni ta a ni.

District Conference April 16, 1947 a thukhawm chuan Bordoloi Sub Committee hmu turin mi 5 an ruat a, chungte chu:- Rev. Liangkhaia, Rev. Zairema, Lalkailuia Sailo, R.Vanlawma leh Pi Lalziki Sailo te an ni. Sub Committee hi April ni 17 1947-ah Aizawl an lo thleng a. Sub Committee rual hian Sir B.N.Rao,ICS, Constitutional Adviser, Constituent Assembly of India pawh Mizoram hmu duhin an lokal ve a. District Conference aiawh hi Mipui aiawh an ni lo tiin an hmu duh lo va. Superintendent in nasa taka a sawisel a vangin an hmu duh ta hram a. April 19 chuan Sub Committee leh Co-Opted Member te District Conference aiawh te chu Circuit House Drawing Roomah dawhkan lianpui kilin an thu kual thap mai a. District Conference thu thlen te chu:- (1) Legislature hrang hranga Mizoram aiawh thlan dan tur engtin nge. (2) District Conference hian  Assam Legislature zawm turin thu tlukna a la siam lo. (3) Provincial Service hna lak dawn reng rengin Fair and Open Competition-a lak ni thin rawh se. (4) Ram neitu nihna te, Agriculture leh Social Custom lam reng reng chu Mizoram tualchhung sorkar thu ni rawh se. (5) Ram pawn lam atanga Mizoram pem lutte chung thu chu Local Body thu a ni tur a ni. (6) Misual hremna, Civil and Criminal, chu thihna thu thlengin Zoram pawn atanga rel theih a ni lovang. (7) Advisory Sub Committee-a Co-Opted Member Khawtinkhuma leh Saprawnga dah hi tumah rawn lova tih a nih avangin paih leh ni rawh se, tih te an ni.[14]

Member dang A.V.Thakar chuan Mizoram  nen tun hmain inhriat pawh turin remchang kan la nei lo va, kan inkarah chhum pui zing angin daidanna a awm thin avangin kan inhre riai ruai a, nakin lawkah innel takin kan la thawkho ang chu, tiin a sawi ve a.

Rev. Zairema chuan ‘In thu rawnken hi a lian hle si a, hetiang hun chepah chuan ngaihdan pawh kan sawi thei lo, chumi ngaihtuah turin hun rei deuh kan la duh ang. A reng rengah India Union zawm ve nghal mai turah min ngai mai niin alang a, chumi awmzia chu duhthlan theihna kan nei lo em ni?’ a ti a. Pi Lalziki pawh chuan ‘India Union kan zawm duh leh duh loh in hre duh a ni maw?’ a lo ti bawk a. Sir B.N.Rao chuan ‘British India zawng zawng chu India Union a lut vek tura tih a ni a, kawng dang thu ken kan nei lo. India ramchhunga in dinhmun tur sawipui tur che u in kan lokal mai a ni. In ram tan India zawm hi a that ber ka ring’, a ti a.[15]

Lalho aiawh Pu Kailuia chuan ‘Hmanlai kumpinu lo luh hma daih atanga tun thlengin Lal kan ni a, hun inher thar zelah pawh kan Lal zawm zel tur niin kan ngai a. Chu chu ka sawi duh ber a ni’, a ti a.

Mizo Union hotute an lo lut ve leh a, chungte chu:- Pu H.Vanthuama, Pu Lalbuaia, Pu R Dengthuama te an ni. An memorandum ziaksa an President Pu Khawtinkhuma leh an General Secretary Pu H.Vanthuama te hming ziakna chu an thehluhin an sawiho nghal a. An thu thehluh tlangpui chu:

1) Mipui thlan District Council awm se la.
2) Mizorama Vai lo lut danna dan te, ram leilung enkawl leh cheibawlnaa thuneihna te, thu chhe rem thu te Council kutah awm se la.
3) ‘Lushai’ tih leh ‘Lushai Hills’ tih chu ‘Mizo’ tih leh ‘Mizoram’ tia thlak vek ni se.
4) Assam Province chhungah Mizoram-in full determination neih ni se.
5) Central Sorkar-in kumtin tangka tanpuina a bikin pe thin se la.
6) Vantlang rorelna dik tak awm rawh se.
7) Assam Legislative Assembly-ah Mizoram-in aiawh neih ve ni rawh se, tihte an ni.

A hnuhnung ber atan April 19, 1947 tlai lamah Bawrhsap Mc Donald-a chu Sub Committee hmaah a lang ve thung a. Chairman Bordoloi chuan ‘Kan thu zawh che kha i ngaihtuah tawh em? Mizo te hi India ramah tel lo ta se, i ngaihdanin Hnam fingte angin an inenkawl theiin i ring em?’ a han ti a. McDonalda chuan ‘an theih loh leh Burma an zawm mai ang chu’ a ti awl then a. A sawi chhunzawm a, ‘Mizo te hian an tualchhung in enkawlna zawng zawng, tualthah thuchhia thlengin thu neihna nei sela, an inenkawl nan Central Sorkar-in cheng 4,00,000/- vel kum tin pe thin se la, a tha maithei’ a ti zui. Khawtinkhuma leh Saprawnga awm ve reng chu ngaimawhin  ‘Heng naupang pahnih, pawl pakhat chauh aiawh engtizia nge an thut ve reng? Mizoram aiawh dik tak chu District Conference te hi an ni si a’, a ti a. Chairman chuan Mizo Union chauh hi Political Party kan rawn hriat chhun an ni, chhim bial leh hmar bial aiawh kan ruat mai a ni. Eng pawh ni se mi hrang hrang thusawi kan ngaithla tho alawm. Chuvangin hemi thuah hian inhnial buai a ngai lo,’ a ti a. Mimalin Pu R.Thanhlira te, Pu HK Bawihchhuaka te, Pu Lalbiakthanga te pawh an hmu a, an thusawi chu India Union zawma Assam Legislative Assembly-a aiawh neih leh Autonomy zau thei ang ber neih a ni vek a.[16]

August 14, 1947 chuan Superintendent L.L.Peters-a chairman-na hnuaiah Mizo Leaders mi 50 meeting a awm a. Meeting chuan Mizo te hian India zawm emaw Burma zawm emaw Pakistan zawm emaw hi duh kan thlang thei reng em tih sorkar-ah zawh ni se. India-ah kan lut dawn a nih chuan heng a hnuaia mi ang hi kan awm duh dan a ni.

1) Mizo Customary Law hman lai leh ramchhunga Mizo te thuneihna hi chhunzawm ni se.
2) Tuna Lushai Hills-a hman mek Regulations te hi hman zui zel ni rawh se.
3) Kum 10 hnuah India atanga chhuah an duh chuan phalsak ni rawh se.[17]

Heng bakah hian Foreign Affairs, Currency leh Communication tih loh thil dang chu Local Council kutah awm vek tih te an sawi bawk a. Saprawnga sawi dan chuan Mizoram Independent emaw Crown Colony emaw a awm dawn chuan an do ber Lal neih chhunzawm zel kha a kawk a, chung ai chuan India Union zawm a, Lal ban kha kan duh zawk a ni, a ti.[18]

Bordoloi Sub Committee chu April 20, 1947-ah an hawng a. Mizo Union chuan an lo rel tawh dung zuiin  draft Constitution an siam a. Chu leh an Memorandum chu Bordoloi Sub Committee-ah an thawn a, annin Constituent Assembly-a lo thawn turin an ngen nghal bawk a. Chungte chu

1) India Independent hunah Mizoram chu Assam-ah a bei ang.
2) Mizoramin Legislative Council member 27 awmna a nei ang.
3) Mizo ni lo Candidate an ni thei lovang.
4) National Court –‘ Mizoram High Court’ tia vuah chu Mizoramah a awm ang.
5) Provincial Legislation rorel chu Mizo National Council-in a pawm chauhin Mizoramah hman theih a ni ang.
6) Heng a chunga sawi zawng zawng hi kum 10 hnuah en thata tihdanglam leh theih vek an ni ang.

Governor Chhanna
Bawrhsap L.L.Peters-a ho Mizo Leader 50 leh Mizo Union Memorandum Governor of Assam-in a rawn chhang a. Letter No.7629 – 30 G of 02-09-1947-ah chuan hetiang a ziak a:-

1) Lushai ho hi Assam hnuaia Excluded Area a nih tawh avangin India Union atangin a chhuak thei lo vang.
2) Lushai te chu India Union-a awm an nih avangin Pakistan emaw Burma emaw a zawm thei lovang.
3) Constitutional Provision kan sawi tak pahnih en hian kum 10 hnua India Union atanga chhuah leh pawh a theih loh.[19]

Pu Vanthuama chuan Kum 1946 tawp lam khan British Parliament-ah hetiang zawhna hi a lo awm a, ‘British Sorkar-in India a chhuahsan dawn chuan khing hnam hnufual tribal Christian te khi humhalhna siamsak lohvin in kalsan mai dawn em ni?’ tih a ni a. British Sorkar chuan ‘Chung ang chu venhimna bik pek dan ngaihtuah a ni ang’, tiin chhan a ni.[20] Mahse hetiang engmah a awm ta chuang lem lo a ni.

Prof. David Syiemlieh-a‘n Pethick Lawrence-a thuziak a lakchhawn-ah chuan, Prime Minister Clement Atlee, Labour Sorkar thar programe-ah India Independent pek bak a lan loh avangin India ramchhung la hek a, hmarchhak tribal tana Crown Colony siam hi a lang pha lo va, a hun enin a tlai lutuk tawh bawk a, India hruaitute’n an duh loh zawng tak a lo ni bawk si. Hmarchhak tlangmite tana Crown Colony siam tumna lam hawi chi reng reng chu Assamese Politiciante’n an ngawihpui hmiah a, khawih chet loh turin  an dahtha hmiah mai a ni. Tlang mite rilru-ah erawh chuan 1947 – 1950 thleng khan beiseina a la awm reng a ni.[21]

Burma Zawm Duh
Mizo Union-in India hnuaia luh an tum ruh em em laiin Crown Colony-a awm duh an tangrual a, Mizo Union nen an inkalh ta hle mai a. Lalho leh Crown Colony-a awm duh ho chuan Political Party thar United Mizo Freedom Party an tih chu July 5, 1947-ah an din ta a.[22]  Lalbiakthanga M.A. chu an President hmasa ber a ni a, rei lo teah Sorkar hna ah luhsan a. Lalmawia,Burma Army Officer Pension chu President-ah an thlang ta a. Lalmawia chuan Falam Lal Zahreliena leh Burma Cabinet Minister U Nu te thurual puiin Mizoram chu Burma zawm turin a Campaign ta a. India zawm ai chuan kan unau Chin Hills ami te nena Burma zawm chu a nuam zawk ang a, Burma Constitution draft-ah chuan kum 10 hnuah hei pawh hi enthat leh theih a ni ang, a ti a ni. Hnamah Burma chu kan laichin hnai zawk a, chanvo pawh kan nei sangt thei zawk ang, a ti a. Zahreliena nen Burma Prime Minister U Nu pawh an sawipui bawk a.[23] Pu Vanlawma sawi danin UMFO leh Mizo Union Right Wing (Lalhema Pawl) tangkawp leh Mizo Union inkar chu a chhe ta hle a. India Independence Day niin Mizo Union-in kawngzawh an tum a, UMFO-in dan an tum a. Second World War zawh hlim a nih avangin Silai leh Grenade te atam a, hman an hnial lo tih a hriatin Mizo Union President chuan thisen a luang vak mai ang tih a hlau a, a pawl te chu kawngzawh thulh turin a ngen a, an zawh luih chuan President anihna atangin a ban phah hial dawn a ni tiin a vau a, kawngzawh chu an thulh thei ta hram a ni.[24]

District Advisory Council
Constituent Assembly Advisory Sub Committee thutkhawm hnuhnung ber chu July 4, 1947-ah a awm a. Mizoram tan Vantlang rorelna sang tak, Autonomous District Council chu Recommend mahse India Constitution pumpui siam zawha nemngheh hnua la hman chauh tur a ni si a. Chumi hmaa ro lo rel tur District Advisory Council neih chu Mizo Union-in an rawt a. Assam Premier, G.M.Bordoloi hnena bawhzui turin R.Thanhlira, R.Dengthuama, Vanchuanga leh HK Bawihchhuaka te Shillong-ah an tir a. Governor chuan Superintendent L.L.Peters te, Lal aiawh te, Zalen Pawl aiawh te, Sipai bang aiawh te, Shillong-ah a ko thla bawk a. Heng hotute hi November 10, 1947-ah Governor inah Mizo Union hotute nen inbiakna an neia . Governor leh Premier Bordoloi leh PWD Minister J.J.M.Nichols Roy te an tel bawk a. Mizo Union aiawh chu kan sawi tawh te hi an ni a. Lal aiawh te chu Lalsailova Sailo, Awksarala Sailo leh Ngura Sailo te an ni. Sipai Bang aiawh  chu Jem.R.Zuala a ni. L.L.Peters, Mizoram Bawrhsap leh Governor Advisor for Tribal and Excluded Area, C.E.D.Walker te pawh an tel.

An inremna tlangpui te chu:- Aiawh roreltu 37 thlan a ni ang a, Mipui thlan mi 20, Lal aiawh 10, Aizawl khawpui aiawh 3, Lunglei khawpui aiawh 2, Aizawl khawpui hmeichhe aiawh 1, Lunglei khawpui hmeichhe aiawh 1 te an ni ang.

Heng thlan tlin mi 37 inkhawmna hmasa ber hi August 16, 1948-ah bawrhsap Office-ah an nei a. Bawrhsap-in chair a la mai tur chu Saprawnga’n a sawisel a, ‘Kalkhawmte’n Chairman kan thlang tur a ni’ a ti a. H.Vanthuama’n a rawn pui bawk si a, an pamtul thak a. Governor an rawn a. Superintendent L.L.Peters-a chu Chairman tur a ni a tih avangin 7/8/1948-ah an thu leh a. Union ho chuan thu tlukna siam turin vote lak thin ni se an tih chu an inhnial fe hnuah an pawm a. An sawi ho tur Governor atanga Draft Regulation phek 17 lai English Copy chu an han sem a. Union ho chuan ‘Saptawng thiam lo kan tam si a, a zir pawh kan la zirchiang hman lo va, zotawnga lehlin phawt a, ngaihtuah that leh ni rawh se, ‘ tih an rawt a. Bawrsap chuan ni 7 chhung lehlin nan hun a pe a. Ni 7 a ral hnu chuan August 24th 1947-ah a hmun ngaiah bawk an thu leh a. Union ho chuan ‘Zirchian phawt a, kan mite pawh rawn kan duh a, thla hnih khat hun min pek belh rawh,’ an ti leh a. Chairman-in rem a tih loh avangin Union ho chu an chhuak tau a, an inkhawm leh thei ta lo va. Hemi kar hian Bawrhsap chuan lo neih tur ram thet chu tihdan pangaiin Lal leh upa ‘ram hual’  neiin a theh ta a.

Governor Adviser N.K.Rustumji, ICS a rawn zin a, a ho chuan August 31, 1948-ah an thukhawm ta a. Mizo Union rawtna chu a tlangpui thu-a pawm a ni a. Governor Adviser Rustumji-a chu la chama amah ngeiin heng advisory Committee pumpui thut theih loh laia lo kengkawhtu tur Sub Committee Secret Ballot-a thlan an dil a. September 3, 1948 chuan Sub Committee an thlang ta a. Chungte chu

1. R.Thanhlira    
2. Ch.Saprawnga              
3. H.Vanthuama               
4. Lalsawia          
5. Ngura te an ni.

R.Thanhlira chu Secretary atan ruat a ni a. Chairman neih rih loh ni se an ti a.

Mizo Union chuan Bawrhsap L.L.Peters chu Lal lam tan ema an hriat avangin amah do nan nawrh an huaihawt a. Peters chu December 28, 1948 hmain a hawng ngei tur a ni, an ti a. Kawng te an zawh a. An hotu eng emaw zat chu an man a, Tezpur Jail-ah pathum an tang a, Aizawl Jail-ah eng emaw zat an tang bawk a. Heng te hi Assam Maintenance of Public Order Act 1947 Section 2-na hmanga man an ni. Governor Adviser, Rustumji bawk a rawn zin chho leh a. Nawrh ti tawp turin a ngen a. Tihtawp an intiam avangin Jail tang zawng zawng pawh a chhuah nghal a ni.[25]

An lo rel lawk tawh avangin District Advisory Committee chu Mizo Union aiawh te, Lal aiawh te, UMFO aiawh te, Hmeichhe aiawh te, thlana buatsaih fel a nih chuan Assam Chief Minister Gopinath Bordoloi chuan July 24, 1950-ah a rawn hawng ta a. Sixth Schedule tha tak hnuaiah rorelna siam sak an nih tur thu te a sawi a. Pu Ch.Saprawnga chu Member of Parliament-a ruat a ni thu te a han sawi chuan mipui chu an lawm em em a. Kut an beng dur dur mai a ni.

Pu H Vanthuama sawi danin Assam Gazette Extra-ordinary Dated January 25, 1950-ah Excluded Area kan nihna paih a ni.[26] July 24, 1950 District Advisory Committtee hawn ni hi nge Excluded Area kan nihna paih ni January 25, 1950 hi Mizo te’n India Union kan zawm niah a ngaih theih ang chu.

India Constitution a pumpui a pawm (adopt) ni chu October 26, 1949 a ni a, District Council ruangam tur an tih fel ni pawh ni ngeia ngaih a ni. District Advisory Committee chu November 5, 1951-ah thiah a ni thung a. Sixth Schedule hnuaia District Council inthlan chu April 4, 1952-ah kan nei a. Assam Assembly-a kan aiawh, MLA 3 thlan chu January 5, 1952-ah kan nei bawk a. Kan District Council chu Assam Chief Minister,Bishnu Ram Medhi-a’n April 25, 1952-ah a rawn hawng a. Sum nei lo va bul tan kan ni a. Prime Minister Jawahar Lal Nehru, April 1953-ah a rawn zin a,Reid House ah thu a sawi a, Council bul tanna turin 1952-53 Budget atan Rs 17,175 a pe a.

Mizo Union thupui ber kha Lal ban a nih avangin District Council-ah sorkarna an chang ta bawk a, an hna hmasa berah Lal ban Assam sorkar-ah an nawr a, Lushai Hills (Acquisition of Chief’s rights) Act 1954 Assam Sorkar-in a passed a. August 16, 1954-ah Mizo District Council huam chhunga Lal 259 ban an ni a. April 15, 1956-ah P.L.Region huam chhunga Lal 50 ban an ni ta bawk a. Village Council thlan hmasak ber July 24, 1954-ah neih a ni a. Mizo Union-in Village Council leh District Council rorelna an la fai vek a. Lal banin India hnuaia rorelna  nghet takin kan tel ta a ni.

Lehkhabu rawnte

English

1.       Making of India Union: Merger of Princely States and Excluded Areas. Edited by Sajal Nag, Tejimala Gurung, Abnijit Choudhury. Published by Aansha Publishing House, New Delhi 110002, 12 June 2007.
2.       History & Ethnic Identity Formation in Northeast India (ed) J.V.Hluna. Published by Concept Publishing Company (P) Ltd. New Delhi 110059, 2013.
3.       Church & Political Upheaval in Mizoram: John Van Lal Hluna, published by Mizo History Association, 1985.
4.       Problem of Peace Making in Mizoram, Lal Hmingthanga (ed) J.V.Hluna, published by Concept Publishing Company (P) Ltd., New Delhi 110059, 2013.
5.       Hill Politics in Northeast India, S.K.Chaube, published by Orient Black Swan, Third Edition, 2012.
6.       Autonomy Movement in Mizoram (ed) R.N.Prasad, published by Vikas Publishing House Pvt. Ltd., New Delhi -110014, 1994.
7.       Mizoram, Animesh Ray, published by National Book Trust, New Delhi, 1993.
8.       Golden History of Lushai Hills, Keihawla Sailo, 2010.
9.       N.Mansergh (ed) The Transfer of Power, 1942 – 1947, VOL II, No. 303, New Delhi, 1978

Mizo
1.       Mizoram Politics Chanchin, H.Vanthuama, published by Ms Vanlalmawii, 2001.
2.       Political History of Mizoram, Chaltuahkhuma, 1981.
3.       Political History of Mizoram, V.H. Khuma, published by 3J Publication, 1999.
4.       Mizo Chanchin, Zatluanga, published by Art & Culture Deptt., GOM, 1996.
5.       Ka Ram leh Kei, R.Vanlawma, published by MC Lalrinthanga, 1989.
6.       Mizo Chanchin, Rev. Liangkhaia, published by LTL Publications, 2002.
7.       Zoram Politics Thli Tleh Dan VOL I, C.Hermana, 1999.

Record
1.       India Office Library and Records, London.
[1] Prof J.V.Hluna (ed) Problem of Peace Making in Mizoram, pp. 134-136.
[2] Zatluanga: Mizo Chanchin p.176
[3] Liangkhaia: Mizo Chanchin P.149
[4] Animesh Ray: Mizoram p.147
[5] Sangkima: The Process of Merger of Mizo Hills with India in the Book “Making of India Union: Merger of Princely & Excluded Areas, Edited by Sajal Nag and others. P.214.
[6] H.Vanthuama: Mizoram Politics Chanchin, p.2
[7] Indian Office Literacy & Records, London L/P&S 12-3115A, The Notes Dt. 7.Nov.1941.
[8] Ibid pp.3-4.
[9] Syiemlieh: op. cit. pp 244-245
[10] Syemlieh: ibid.
[11] Dr. Suhash Chatterjee: Minority Nationalities of NE India: The Mizos in the Book ‘History & Ethnic Identity Formation in Northeast India Edited by Prof. J.V.Hluna p 106.
[12] N.Mansergh (ed): The Transfer of Power, (1942-1947, Vol 11. No. 303, New Delhi 1978, p. 262 pp. 586, 522-524 quoted by Syemlieh p. 182.
[13] H.Vanthuama, April. pp. 8-11.
[14] Sangkima: pp. 219-220.
[15] Vanthuama: op cit pp. 63-69
[16] H.Vanthuama: op. cit.
[17] Ibid.
[18] Saprawnga Ch.: Factors contributing to the Mizo Problems; Tribal Mirror; Karimganj, 1967, VOL III qouted by Zochungnunga in the book ‘Making of the Indian Union’ (ed) Sajal Nag and others p. 207.
[19] Sangkima: op.cit. p.224.
[20] H.Vanthuama: op.cit p.36.
[21] Syemlieh: op cit. p.247.
[22] Animesh Ray: Mizoram, pp. 152-153.
[23] Sangkima: op cit. pp.223.
[24] R.Vanlawma: Ka ram leh kei pp. 162-163.
[25] H.Vanthuama: op cit. pp. 143-155.
[26] H.Vanthuama: op cit. pp. 166-169.
Share:

Total Pageviews

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna

Followers